Couma faire face ar chagrin?

“Tou so bann zenfant ti rod console [Jacob], mais li pa ti oulé consolé ek li ti dire: ‘Mo pou encore en deuil kan mo pou rejoinde mo garson dan place kot bann mort allé.’ Ek li ti contigne plore so garson.”—GENÈSE 37:35, Bible en français courant.

PATRIARCHE Jacob ti bien chagrin kan li ti perdi so garson. Pou li, li ti pou ploré ziska jour so la mort. Pareil couma Jacob, ou kapav senti ki la peine ki ou ena a cause ou’nn perdi enn kikenn ki ou content, li tellement grand ki jamais sa pa pou allé. Eski si ou ressenti enn grand chagrin coumsa, sa vedir ki ou mank la foi dan Bondié? Pa ditou!

La Bible presente Jacob couma enn dimoune ki ti ena la foi. Ensam avek so grand-pere Abraham ek so papa, Isaac, Jacob gagne bann louange pou so la foi extraordinaire. (Hébreux 11:8, 9, 13) Enn fois, li ti mem lutte toute la nuit avek enn ange pou gagne enn benediction ar Bondié! (Genèse 32:24-30) Li clair ki Jacob ti bien attaché ar bann kitsoz spirituel. Alors, kan nou lire lor chagrin ki Jacob ti ressenti, ki nou aprann? Nou aprann ki mem si nou kapav ena enn la foi solide dan Bondié, mais sa pa empeche nou ressenti enn grand chagrin ek la peine kan enn dimoune ki nou content mort. Chagrin, c’est enn reaction normal ek naturel.

Ki été chagrin?

Chagrin kapav affecté nou dan different fason. Mais seki beaucoup dimoune plus ressenti, c’est sa grand douleur lor plan moral-la. Prend l’exemple Leonardo, ki ti ena 14 an kan so papa ti mort enn coup avek bann probleme respiratoire ek probleme leker. Jamais Leonardo pa pou blié sa jour kot so ma-tante ti annonce li sa nouvelle-la. Au commencement, li pa ti’lé croire ki sa ti arrivé vrai-mem. Li ti trouve lekor so papa pou l’enterrement, mais tousala ti parette couma enn kitsoz ki pa réel. Pendant apepré six mois Leonardo pa ti kapav ploré. Souvent, li ti trouve-li pé attann ki so papa sorti travail, retourne lakaz. Sa ti prend li preské enn an pou comprend vrai-mem ki so papa inn mort. Kan sa ti arrivé, li ti senti-li bien tousel. Bann kitsoz simple, couma par exemple retourne dan enn lakaz kot pena personne, ti rappel li ki so papa nepli la. Lerla, souvent li pa ti kapav tini ek li ti ploré. Li ti bien mank so papa!

Pareil couma l’exemple Leonardo montré, chagrin ki enn dimoune ressenti apré la mort enn kikenn kapav bien grand. Mais ou kapav ena sa l’assurance-la: li possible pou sorti dan sa grand chagrin-la. Mais sa kapav prend inpé le temps. Pareil couma enn blessure grave prend le temps pou gueri, chagrin ki nou ressenti kan nou perdi enn kikenn ki nou content, prend le temps pou allé. Sa kapav prend bann mois, plusieurs l’année, mem pli longtemps encore. Mais sa grand la peine ki ou ressenti au commencement-la pou diminué avek le temps. Doucement-doucement la vie pou parette moins sombre ek li pou recommence ena enn sens.

Mais dapré seki certain dire, chagrin li enn l’etape necessaire pou kapav gueri ek adapté ar sa nouveau situation-la. Ena enn place vide kot avant ti ena enn dimoune vivant. Nou bizin aprann vive sans sa dimoune-la. Chagrin kapav aide ou pou exprime seki ou ressenti. Bien sur, tou dimoune pa ressenti chagrin dan mem fason. Pourtant, ena enn kitsoz ki parette vrai: si enn dimoune garde tou so chagrin endan, sa kapav faire li di-tort lor plan mental, affectif ek physik. Alors, couma ou kapav exprime ou chagrin dan bann fason ki pou faire ou di-bien? La Bible donne certain conseil pratik.a

Couma faire face ar chagrin?

Beaucoup dimoune ki en deuil inn trouvé ki sa soulage zot kan zot kozé. Prend par exemple, bann parole Job, enn personnage biblik ki ti perdi tou so dix zenfant ek ti passe par beaucoup malheur. Li ti dire: “Oui mo nâme ena degout pou mo la vie. Mo envie exprime tracas ki mo ena lor mo-mem. Mo nâme inn vinn amer ek mo pou kozé!” (Job 1:2, 18, 19; 10:1) Remarké ki Job ti bizin “exprime” so bann tracas. Couma li ti pou faire sa? Li expliké: “Mo pou kozé.”

Paulo, ki ti perdi so mama, dire: “Koz lor mo mama, c’est enn parmi bann kitsoz ki’nn aide moi.” Alors kan ou koz lor seki ou ressenti avek enn camarade ar ki ou ena confiance, sa kapav donne nou enn certain soulagement. (Proverbes 17:17) Apré ki li ti’nn perdi so mama, Yone ti demann so bann frere ek soeur chretien pou visite li pli souvent. Li rappel: “Kan mo ti kozé, sa ti aide moi pou diminué mo la peine.” Ou aussi ou kapav trouvé ki kan ou exprime seki ou ressenti par bann parole ek ki ou partage sa avek enn dimoune ki pou ecoute ou ek prend part dan ou la peine, sa pou pli facile pou ou faire face avek sa bann sentiment-la.

Si ou ecrire, sa aussi pou soulage ou. Certain trouve sa difficile pou koz lor seki zot ressenti. Mais kitfois zot kapav trouve sa pli facile pou exprime-zot kan zot ecrire. Apré la mort Saül ek Yonathân, David ki ti ena la foi, ti ecrire enn chanté bien triste kot li ti exprime tou so chagrin. Finalement seki li ti ecrire ti forme partie dan la Bible, dan deuxieme livre Samuel.—2 Samuel 1:17-27.

Si ou ploré, sa aussi kapav soulage ou lor plan affectif. La Bible dire: “Pou tou kitsoz ena enn le temps fixé, oui . . . enn le temps pou ploré.” (Ecclésiaste 3:1, 4) Li sur ki, kan enn dimoune ki nou content mort, sa li “enn le temps pou ploré.” Nou pa bizin honté pou verse bann larme a cause nou chagrin. Dan la Bible ena beaucoup l’exemple bann zom ek bann femme ki ti ena la foi ek ki ti ploré pou exprime zot chagrin. (Genèse 23:2; 2 Samuel 1:11, 12) Jésus Christ “pa ti kapav tini, so larme ti coulé” kan li ti vinn pré ar tombe so bon camarade Lazare ki ti fek mort.—Jean 11:33, 35.

Ou bizin patience pou surmonte ou chagrin parski enn moment ou kapav senti-ou bien, mais enn sel coup apré ou senti ou chagrin revini. Rappel ki fodé pa ou honté pou ploré. Beaucoup dimoune ki ena la foi inn trouvé ki ploré kan zot chagrin, li enn l’etape normal ek necessaire ki amenn vers guerison.

Vinn proche ar Bondié

La Bible dire: “Vinn proche ar Bondié, ek Li pou vinn proche ar zot.” (Jacques 4:8) La priere, c’est enn parmi bann fason principal pou nou vinn proche ar Bondié. Pa sous-estime valeur la priere! La Bible faire sa promesse reconfortant-la: “Jéhovah pré ar bann dimoune ki ena enn grand chagrin dan zot leker; ek Li sauve bann ki demoralisé.” (Psaume 34:18) La Bible donne nou aussi sa l’assurance-la: “Jette to fardeau lor Jéhovah Li-mem, ek Li-mem Li pou soutenir toi.” (Psaume 55:22) Mazinn sa. Couma nou’nn aprann enn tipé avant, beaucoup dimoune finn trouvé ki sa finn aide zot kan zot finn koz lor seki zot ressenti avek enn camarade ar ki zot ena confiance. Eski sa pa pou aide ou encore plus si ou devide ou leker ar Bondié ki promette ki Li pou console nou?—2 Thessaloniciens 2:16, 17.

Paulo, ki nou ti mentionné avant, ti dire: “Kan mo ti nepli kapav tini sa la peine-la ek ki mo ti senti ki mo pa ti kapav faire face, mo ti tombe a genou ek mo ti prié Bondié. Mo ti suppliye Li pou aide moi.” Paulo sur ki so bann la priere inn aide li. Ou aussi ou kapav trouvé ki kan ou perseveré dan la priere, “Bondié ki donne tou consolation” pou donne ou courage ek la force pou faire face ar ou chagrin.—2 Corinthiens 1:3, 4; Romains 12:12.

L’esperance resurrection

Jésus ti dire: “Mo-mem resurrection ek la vie. Sa kikenn ki ena la foi en moi-la, pou regagne la vie mem si li mort.” (Jean 11:25) La Bible enseigné ki bann dimoune mort pou revive.b Kan Jésus ti lor la terre, li ti montré ki li kapav ressuscite bann dimoune mort. Enn fois, li ti ressuscite enn tifi 12 an. Couma bann parent sa tifi-la ti reagir? “Zot ti gagne sok ek zot ti dan enn la joie extraordinaire.” (Marc 5:42) Kan Royaume Bondié pou dirigé, le Roi Jésus Christ ki dan le ciel pou ressuscite enn quantité dimoune ici lor la terre—mais lor enn la terre kot pou ena la paix ek la justice. (Actes 24:15; 2 Pierre 3:13) Mazinn sa la joie extraordinaire ki pou ena-la kan bann dimoune mort pou ressuscité ek pou retrouve bann ki zot content!

Claudete ki ti perdi so garson Renato dan enn accident avion, mette enn photo so garson lor frigidaire. Souvent li guette sa photo-la ek li dire li-mem: ‘Nou pou rejoinde, kan pou ena resurrection.’ Leonardo mazinn so papa pé ressuscité dan le monde nouveau ki Bondié inn promette. Oui grace a l’esperance resurrection, Claudete ek Leonardo ek enn quantité lezot dimoune ki finn perdi enn kikenn ki zot content, gagne enn grand reconfort. Pou ou aussi sa kapav pareil!

[Note]

[L’encadré lor page 7]

Zot console lezot

“[Bondié] console nou dan tou nou bann probleme, pou ki nou kapav console bann ki dan tou sorte qualité probleme, grace a consolation ki nou-mem nou gagné ar Bondié.”—2 Corinthiens 1:4.

Beaucoup vrai chretien inn koné ki sa bann parole-la vedir par seki zot-mem zot inn vive. Parski zot inn gagne consolation pou faire face ar la mort enn kikenn ki zot content, zot trouvé ki zot kapav encourage ek console lezot.

Prend l’exemple Claudete ki visite lezot regulierement pou partage avek zot so bann croyance ki basé lor la Bible. Avant ki li ti perdi so garson, li ti pé visite enn madame ki ti’nn perdi so garson ki ti’nn mort ar leucémie. Sa madame-la ti bien apprecié bann visite Claudete, mais li ti pensé ki Claudete jamais pa ti pou vrai-mem comprend so la peine. Mais, enn tipé apré ki garson Claudete ti mort, sa madame-la ti visite Claudete ek ti dire li ki li ti’nn vinn guetté si li ti encore ena la foi dan Bondié aster ki so garson ti’nn mort. Sa madame-la ti impressionné par la foi Claudete ki ti solide. Asterla li pé etudié la Bible regulierement avek Claudete ek li pé trouve beaucoup consolation dan Parole Bondié.

Apré ki Leonardo ti’nn perdi so papa, li ti decide pou aprann langue des signes pou ki li kapav partage message consolation ki ena dan la Bible avek bann dimoune ki sourde. Li’nn trouvé ki so bann zeffort pou aide bann dimoune ki sourde ti faire li gagne beaucoup bienfait. Li dire: “Enn parmi bann kitsoz ki’nn aide moi pou faire face ar mo chagrin, c’est desir ki mo ti ena pou aide bann dimoune sourde pou aprann konn Bondié. Mo finn donne beaucoup le temps ek l’energie pou aide zot. Sa chagrin ki mo ti ena dan moi-la ti transformé, ti vinn la joie kan mo ti trouve mo premier etudiant prend bapteme! En realité, c’est premier fois depuis la mort mo papa ki mo ti ressenti enn grand bonheur.”—Actes 20:35.

[Zimage lor page 4]

Kan ou koz lor seki ou ressenti, sa kapav donne ou enn certain soulagement

[Zimage lor page 5]

Kan ou ecrire, sa kapav aide ou pou exprime ou chagrin

[Zimage lor page 5]

Kan ou lire lor l’esperance resurrection, sa li enn vrai source reconfort

[Zimage lor page 6]

Jésus ti promette pou ressuscite bann ki ena la foi en li