‘Regard Jéhovah couma bann rayon la lumiere,’ pé examine nou tou
“Regard [Jéhovah] couma bann rayon la lumiere, pé examine bann dimoune.”—PS. 11:4.
1. Ar ki qualité dimoune nou attiré?
KI OU ressenti kan bann dimoune interessé vrai-mem avek ou? Kan ou demann zot zot l’opinion, zot honnete ek zot dire ou seki zot pensé. Kan ou bizin zot l’aide, zot disposé pou aide ou. Kan ou bizin conseil, zot conseil ou avek amour. (Ps. 141:5; Gal. 6:1) Eski ou pa attiré ar sa qualité dimoune-la? Eh bien, Jéhovah ek so Garson zot coumsa. En realité, zot plus interessé ar ou ki n’importe ki dimoune, ek zot mobile pa egoïste ditou; zot envie aide ou pou “bien saisi vrai la vie.”—1 Tim. 6:19; Rév. 3:19.
2. Ki quantité Jéhovah Li interessé ar so bann serviteur?
2 David, ki’nn ecrire bann psaume, ti montré ki quantité Jéhovah Li interessé avek nou kan li ti dire: “Lizié [Jéhovah] pé guetté, so regard couma bann rayon la lumiere, pé examine bann dimoune.” (Ps. 11:4) Oui, Jéhovah pa zis guette nou; Li examine nou. David ti ecrire aussi: “To’nn examine mo leker, to’nn faire enn inspection a-soir, . . . to pou trouvé ki mo pa’nn faire plan pou faire le mal.” (Ps. 17:3) Li clair ki David ti koné ki quantité Jéhovah ti interessé ar li. Li ti koné ki si li ti developpe bann mauvais pensée ou-soit bann mauvais projet dan so leker li ti pou faire Jéhovah chagrin ek li pa ti pou gagne so faveur. Eski Jéhovah Li réel pou ou couma Li ti été pou David?
Jéhovah trouve seki ena dan leker
3. Couma Jéhovah montré ki Li ena enn l’attitude equilibré kan Li trouve nou bann imperfection?
3 Jéhovah interessé surtout ar seki nou été endan, setadir seki nou été vrai-mem dan nou leker. (Ps. 19:14; 26:2) Avek amour, Li pa guette nou bann ti defaut. Anou prend l’exemple Sara, femme Abraham. Enn fois, kan enn ange ti visite zot ek ti faire enn remark, Sara pa ti reponn li franc. Ange-la ti comprend ki Sara ti peur ek embarrassé, alors li pa ti reprend li dan enn fason severe. (Gen. 18:12-15) Kan Job ti “dire so nâme juste au lieu ki Bondié,” Jéhovah ti beni li kan-mem. (Job 32:2; 42:12) Li ti koné ki Job ti bien souffert dan la main Satan. Li pareil aussi kan veuve la ville Tsarphath ti koz franc ar prophete Éliya, Jéhovah pa ti en colere. Bondié ti comprend ki li ti bien bouleversé a cause la mort so sel zenfant.—1 Rois 17:8-24.
4, 5. Couma Jéhovah ti montré consideration dan fason ki Li ti traite Abimélek?
4 Parski Jéhovah examine leker bann dimoune, Li finn montré consideration mem envers bann dimoune ki pa ti adore Li. Prend par exemple fason ki Li ti traite Abimélek, le roi Guérar, la ville bann Philistin. Abimélek pa ti koné ki Abraham ek Sara ti marié. Li ti faire al prend Sara pou ki li vinn so femme. Mais, avant ki li ti gagne bann relation avek Sara, Jéhovah ti dire li dan enn rêve: “Mo’si mo koné ki c’est avek enn leker droite ki to’nn faire sa, ek c’est moi aussi ki ti pé empeche toi faire peché kont moi. C’est a cause sa ki mo pa’nn laisse toi touche li. Mais asterla retourne femme sa missié-la, parski li enn prophete, ek li pou suppliye pou toi. Lerla, contigne vive.”—Gen. 20:1-7.
5 Pena doute ki Jéhovah ti kapav agir dan enn fason bien severe avek Abimélek ki ti enn adorateur bann fausse bondié. Mais Bondié ti remarké ki sa missié-la ti agir dan enn fason honnete dan sa situation-la. Avek bonté, Jéhovah ti prend sa en consideration ek Li ti dire le roi-la ki li bizin faire pou gagne pardon Bondié ek pou “contigne vive.” Eski c’est pa sa qualité Bondié-la ki ou envie adoré?
6. Cite bann fason couma Jésus imite so Papa.
6 Jésus ti imite so Papa dan enn fason parfait; li ti fixé so l’esprit lor bon coté so bann disciple ek li ti disposé pou pardonne zot erreur. (Marc 10:35-45; 14:66-72; Luc 22:31, 32; Jean 15:15) L’attitude Jésus ti en accord avek so bann parole ki nou trouve dan Jean 3:17: “Bondié inn envoye so Garson dan le monde, pa pou ki li juge le monde, mais pou ki le monde sauvé par so moyen.” Oui, l’amour ki Jéhovah ek Jésus ena pou nou, li profond ek li pa changé. Nou trouve zot l’amour dan desir ki zot ena pou nou gagne la vie. (Job 14:15) Kan nou trouve sa qualité l’amour-la, sa faire nou comprend kifer Jéhovah examine nou, couma Li trouve nou, ek couma Li agir lor seki Li trouvé.—Lire 1 Jean 4:8, 19.
Li examine nou avek amour
7. Avek ki mobile Jéhovah examine nou?
7 Alors, li pou vrai-mem mauvais si nou mazinn Jéhovah couma enn la police dan le ciel ki pé veille nou pou Li maye nou couma nou faire peché! C’est Satan ki agir coumsa; li accuse nou ek pretann ki nou egoïste. (Rév. 12:10) Li mem dire ki nou ena bann mauvais mobile kan sa pa vrai! (Job 1:9-11; 2:4, 5) Concernant Bondié, enn psalmiste ti ecrire: “Si to ti veille tou nou bann peché, o Yah, o Jéhovah, kisannla ti pou kapav tini devant toi?” (Ps. 130:3) Reponse pou sa question-la c’est, personne! (Eccl. 7:20) Au contraire, Jéhovah veille lor nou avek misericorde, Li guette nou avek amour, pareil couma enn parent ki prend soin so zenfant ek ki envie protege li pou ki nanyin pa faire li di-tort. Souvent, Li averti nou concernant nou bann defaut ek nou bann faiblesse pou ki nou kapav evité faire nou-mem di-tort.—Ps. 103:10-14; Mat. 26:41.
8. Couma Jéhovah enseigne ek discipline so bann serviteur?
8 Bondié faire nou trouve so l’amour a travers l’instruction ek discipline ki Li donne nou dan la Bible ek dan bann publication ki nou gagné ar “l’esclave fidele et avisé.” (Mat. 24:45; Héb. 12:5, 6) Jéhovah aide nou aussi a travers la congregation ek a travers bann ‘zom ki Li’nn donne nou couma bann don’ dan congregation. (Éph. 4:8) En plus, Jéhovah guetté couma nou reagir ar formation ki Li donne nou couma enn Papa, ek Li faire tou pou aide nou encore plus. Psaume 32:8 dire: “Mo pou donne toi capacité pou comprend ek mo pou montré toi dan ki chemin to bizin marché. Mo pou donne toi conseil pendant ki mo garde enn lizié lor toi.” Alors, li vrai-mem bien important ki nou ecoute Jéhovah touletan! Nou bizin reste humble devant Li, reconette ki Li enn kikenn ki enseigne nou ek nou Papa ki content nou.—Lire Matthieu 18:4.
9. Ki qualité defaut nou bizin rejeté, ek kifer?
9 Parkont, fodé jamais nou vinn dur a cause l’orgueil, a cause nou pena assez la foi ou-soit a cause “pouvoir ki peché ena pou embete dimoune.” (Héb. 3:13; Jacq. 4:6) Souvent sa bann defaut-la commencé kan enn dimoune developpe bann mauvais pensée ek bann mauvais desir. Li kapav mem arrive enn point kot li rejette bann conseil bien approprié ki sorti dan la Bible. Seki pli pire encore, li kapav ena tellement enn mauvais l’attitude ou-soit enn mauvais fason agir ki li faire li-mem vinn enn l’ennemi Bondié—enn situation ki faire bien peur! (Prov. 1:22-31) Anou prend l’exemple Caïn, premier zenfant Adam ek Ève.
Jéhovah trouve tou ek Li agir dapré seki Li trouvé
10. Kifer Jéhovah pa ti accepté sacrifice Caïn, ek couma Caïn ti reagir?
10 Kan Caïn ek Abel ti faire enn sacrifice pou Jéhovah, Li pa ti zis interessé ar zot don mais Li ti interessé aussi ar zot mobile. Parski Bondié ti koné ki ti ena dan zot leker, Li ti montré ki Li ti accepté sacrifice ki Abel ti faire avek la foi, mais ki Li ti rejette sacrifice Caïn. Li ti faire sa parski dan enn certaine fason, sacrifice Caïn ti montré ki li pa ti ena assez la foi. (Gen. 4:4, 5; Héb. 11:4) Au lieu ki li ti tire leson ar seki ti arrivé ek change so l’attitude, Caïn ti bouilli ar colere kont so frere.—Gen. 4:6.
11. Couma Caïn ti montré ki li ti ena enn leker traitre, ek ki leson nou kapav tiré?
11 Jéhovah ti trouvé ki Caïn ti pé developpe enn l’attitude dangereux. Avek bonté, Li ti koz avek Caïn ek Li ti dire li ki si li faire seki bien, Li pou eleve li. Malheureusement, Caïn pa ti prend compte conseil ki so Createur ti donne li ek li ti touye so frere. Kan Bondié ti demann li: “Kot Abel, to frere?” Caïn ti reponn Li: “Mo pa koné moi. Eski mo gardien mo frere, moi?” (Gen. 4:7-9) Sa fason ki li ti reponn-la ti montré ki li pa ti ena okenn respé pou Bondié, ek sa ti confirmé ki so leker ti mauvais. Nou leker kapav vrai-mem traitre, li kapav al mem ziska pa prend compte enn conseil ki Bondié Li-mem inn donné! (Jér. 17:9) Alors, anou tire leson ar bann recit coumsa ek pa tardé pou rejette bann mauvais pensée ek bann mauvais desir ki nou kapav ena. (Lire Jacques 1:14, 15.) Si nou gagne enn conseil ki sorti dan la Bible, anou accepté li avek reconnaissance ek considere sa couma enn preuve ki Jéhovah content nou.
Pa kapav garde enn peché secret
12. Couma Jéhovah reagir devant peché?
12 Certain kapav pensé ki si personne pa trouve zot faire peché, alors zot pa pou gagne okenn punition. (Ps. 19:12) En realité, pena okenn peché ki secret. “Tou kitsoz au clair ek bien exposé devant lizié sa Kikenn ar ki nou bizin rann compte-la.” (Héb. 4:13) Jéhovah Li enn Juge ki examine bann mobile pli profond ki nou ena, ek fason ki Li reagir devant peché montré enn justice parfait. Li “enn Bondié ki ena misericorde ek compassion, ki pa en colere vite ek ki ena l’amour fidele ek la verité en abondance.” Pourtant, envers bann dimoune ki pa repenti, “jamais Li pa pou retire so punition” kan zot “pratik peché par expré” ou-soit kan zot manifesté enn l’attitude hypocrite letan zot faire bann plan pou faire le mal. (Ex. 34:6, 7; Héb. 10:26) Nou trouve sa dan fason ki Jéhovah ti agir avek Akân ek avek Ananias ek Sapphira.
13. Couma bann mauvais pensée ti pousse Akân pou ena enn mauvais conduite?
13 Akân ti desobeir enn l’ordre bien clair ki Bondié ti donné. Li ti prend enn partie di-bien ki zot pa ti detruire dan la ville Jéricho ek li ti cachiette sa dan so la tente. Surement so bann famille aussi ti complice. Kan ti decouvert so peché, Akân ti montré ki li ti reconette ki li ti’nn faire enn kitsoz bien grave, parski li ti dire ki li ti “faire peché kont Jéhovah.” (Jos. 7:20) Pareil couma Caïn, Akân ti’nn developpe enn mauvais leker ek li ti ena enn desir pou gagne toujours plus. C’est sa ki ti pousse li pou agir dan enn fason malhonnete. Apré destruction la ville Jéricho, tou bann di-bien ki pa ti’nn detruire, ti pou Jéhovah. Alors, en realité sa vedir ki Akân ti’nn kokin Jéhovah ek sa ti coute li ek so famille zot la vie.—Jos. 7:25.
14, 15. Kifer Ananias ek Sapphira ti merite perdi faveur Bondié, ek ki leson nou kapav tiré?
14 Ananias ek so femme, Sapphira, ti faire partie dan congregation chretien ki ti fek formé dan Jérusalem. Apré la Pentecôte l’an 33 nou lepok, ti crée enn fond pou prend soin besoin materiel bann nouveau croyant ki ti sorti loin ek ki ti encore dan Jérusalem. Bann chretien ti faire bann contribution volontaire pou sa fond-la. Ananias ti vann enn terrain ek li ti donne zis enn partie l’argent pou sa fond-la. Pourtant, li ti pretann ki li ti donne tou seki li ti gagné ek so madame ti konn sa. Pena doute ki sa couple-la ti envie gagne enn l’honneur special dan la congregation. Mais zot ti agir dan enn fason malhonnete. Par enn mirak, Jéhovah ti faire l’apotre Pierre konn sa fraude ki zot ti faire-la ek Pierre ti demann Ananias kifer li’nn faire sa. Desuite apré sa, Ananias ti tombe enba ek ti mort. Enn tipé apré, Sapphira aussi ti mort.—Actes 5:1-11.
15 Ananias ek Sapphira pa ti tombe dan sa piege-la a cause enn faiblesse ki zot ti ena dan sa moment-la. Zot ti fini faire zot plan ek zot ti koz menti pou embete bann zapotre. Seki ti pli pire encore, c’est ki zot ti ‘koz menti pou embete l’esprit saint ek Bondié.’ Maniere ki Jéhovah ti reagir ti montré dan enn fason bien clair ki Li bien decidé pou protege congregation kont bann hypocrite. Oui, “c’est enn kitsoz terrible pou tombe dan la main Bondié vivant”!—Héb. 10:31.
Garde nou l’integrité touletan
16. (a) Couma Satan pé essaye gate spiritualité bann serviteur Bondié? (b) Ki bann methode Satan pé servi pou gate bann dimoune dan ou l’endroit?
16 Satan pé faire tou seki li kapav pou gate nou spiritualité ek faire nou perdi faveur Jéhovah. (Rév. 12:12, 17) Nou trouve bien bann mauvais mobile Satan dan le monde, ki obsedé par l’immoralité sexuel ek violence. Li facile pou guette pornographie lor computer ou-soit lor lezot gadget electronik. Fodé jamais nou tombe dan bann piege Satan. Au contraire, anou ena mem sentiment ki psalmiste David ki ti ecrire: “Mo envie veille bien lor seki mo faire dan enn fason kot personne pa kapav faire moi okenn reproche. . . . C’est avek enn leker rempli ar fidelité ki mo pou marche dan mo lakaz.”—Ps. 101:2.
17. (a) Kifer finalement Jéhovah revele bann peché ki dimoune cachiette? (b) Ki nou bizin bien decidé pou faire?
17 Zordi, Jéhovah pa faire mirak pou revele bann peché grave ek bann mauvais conduite couma Li ti faire dan le passé. Mais kan-mem, Li trouve tou, ek dan ler ki Li’nn fixé ek dan so fason, Li pou faire konn bann peché ki dimoune pé cachiette. Paul ti dire: “Peché certain dimoune li au clair devant zot tou, ek sa amenn zot direct ar enn jugement, mais ena lezot dimoune ki c’est plitar ki decouvert zot peché.” (1 Tim. 5:24) Seki pousse Jéhovah surtout pou revele bann mauvais kitsoz c’est l’amour. Li content la congregation ek Li envie protege so pureté. En plus, Li montré so misericorde pou bann ki’nn faire peché mais ki repenti avek tou zot leker. (Prov. 28:13) Alors, anou faire zeffort pou garde enn leker complet envers Bondié ek pou rejette tou l’influence ki kapav gate nou spiritualité.
Garde enn leker complet
18. Ki le roi David ti envie so garson ressenti envers Bondié?
18 Le roi David ti dire Salomon, so garson: “Konn Bondié to papa ek servi Li avek enn leker complet ek enn nâme ki rempli ar la joie; parski Jéhovah examine tou bann leker ek Li discerne tou tendance bann pensée.” (1 Chron. 28:9) David ti envie ki so garson faire plus ki zis croire dan Bondié. Li ti envie ki Salomon comprend ki quantité Jéhovah interessé ar So bann serviteur. Eski ou aussi ou trouve Jéhovah couma enn Bondié ki ena enn grand l’interet pou so bann serviteur?
19, 20. Dapré Psaume 19:7-11, ki ti aide David pou vinn proche ar Bondié, ek couma nou kapav imite li?
19 Jéhovah koné ki bann dimoune ki ena enn bon l’attitude, pou attiré vers Li ek kan sa bann dimoune-la pou konn so bann bon qualité, sa pou faire zot vinn proche ar Li. Alors, Jéhovah envie ki nou aprann konn Li ek ki nou decouvert so personnalité extraordinaire. Couma nou kapav faire sa? Kan nou etudié so Parole ek kan nou trouve so bann benediction dan nou la vie.—Prov. 10:22; Jean 14:9.
20 Eski ou lire la Bible toulé-jour avek enn grand l’interet, ek eski ou prié pou gagne l’aide pou mette en pratik seki ou lire? Eski ou trouve l’importance pou vive en accord avek bann principe la Bible? (Lire Psaume 19:7-11.) Si oui, ou la foi en Jéhovah ek ou l’amour pou Li pou contigne grandi. Ek lerla, Li pou vinn pli proche ar ou, coumadir Li pé marche la main dan la main avek ou. (Is. 42:6; Jacq. 4:8) Oui, Jéhovah pou montré so l’amour pou ou kan Li pou beni ou ek protege ou lor plan spirituel a mesure ki ou marche lor sa chemin serré ki amenn vers la vie-la.—Ps. 91:1, 2; Mat. 7:13, 14.
Couma ou pou reponn?
• Kifer Jéhovah examine nou?
• Couma certain dimoune vinn bann l’ennemi Bondié?
• Couma nou kapav montré ki Jéhovah Li réel pou nou?
• Couma nou kapav garde enn leker complet envers Bondié?
[Zimage page 9]
Couma Jéhovah veille lor nou couma enn parent ki prend soin so zenfant?
[Zimage page 10]
Ki leson nou tiré dan l’exemple Ananias?
[Zimage page 11]
Ki pou aide nou pou contigne servi Jéhovah avek enn leker complet?