Role ki Marie ena dan projet Bondié
PENDANT ministere Jésus, enn madame dan la foule kot ti ena beaucoup tapaz, ti leve so la voix ek ti criyé: “Heureux sa ventre ki finn sarié toi-la ek bann sein ki’nn donne toi boire!” Si Jésus ti envie ki bann dimoune adore so mama, li ti kapav dan sa moment-la saisi l’occasion pou encourage sa qualité l’adoration-la. Au lieu sa, li ti reponn: “Non, mais plutot: Heureux bann dimoune ki tann parole Bondié, ek ki obeir li!”—Luc 11:27, 28.
Jésus pa ti donne so mama enn l’honneur special; ek jamais li pa’nn demann so bann disciple faire sa. Couma sa li en accord avek l’adoration ki beaucoup croyant ki sincere donne Marie? Anou guetté ki la Bible dire lor deux-trois l’enseignement ki bann dimoune bien koné concernant mama Jésus.
“Rempli avek grace,” “beni parmi tou bann madame”
Ange Gabriel ti annonce Marie role ki li ti pou ena dan projet Bondié. Sa jour-la, li ti salué li, ek li ti dire: “Bonjour, toi ki ena enn grand faveur, Jéhovah avek toi.” (Luc 1:28) Enn lot traduction pou sa mem salutation-la dire: “Mo salué toi ki rempli avek grace, le Seigneur avek toi.” Enn tipé le temps apré, Élisabeth ti salué Marie avek sa bann parole-la: “To beni parmi tou bann madame, ek fruit to ventre li beni!” (Luc 1:42) Eski sa bann parole-la pa montré ki Marie merite gagne enn l’adoration?
En realité, non. Mem si nou trouve sa bann parole-la dan enn la priere ki bann catholique adresse ar Marie, la Bible li, li pa donne okenn raison pou prié li. Gabriel ek Élisabeth ti reconette grand privilege ki Marie ti ena couma sa kikenn ki ti pou donne naissance le Messie, mais bann l’Ecriture pa donne l’idée ki bizin prié li. Au contraire, kan bann disciple Jésus ti demann-li pou aprann zot couma prié, li ti dire ki bizin prié so Papa. Avredir, la priere modele Jésus commence par sa bann parole-la: “Nou Papa ki dan le ciel.”—Matthieu 6:9.
Parmi bann ki regné
Enn lot l’enseignement ki bien populaire lor Marie seki asterla li la “Reine le ciel.” Jamais la Bible inn donne li enn titre coumsa. Mais, la Bible montré ki li ena enn role special dan gouvernement Bondié dan le ciel. Ki sa role-la sa?
Jésus ti dire ki certain so bann fidele disciple pou regne avek li dan so Royaume. (Luc 22:28-30) Jésus pou donne sa bann ki finn choisir-la droit pou servi couma “bann pretre pou nou Bondié, ek zot pou regne couma bann le roi ki dirige la terre.” (Révélation 5:10) La Bible dan enn fason clair faire nou comprend ki Marie li parmi sa bann ki finn gagne sa grand privilege-la. Kifer nou kapav dire sa?
Kitfois ou rappel ki apré la mort Jésus, Marie ti pé “perseveré dan la priere” avek bann disciple ek bann frere Jésus. Apepré 120 disciple ti reuni ek parmi ti ena aussi “deux-trois madame.” (Actes 1:12-15) La Bible dire ki alors ki “fête la Pentecôte ti pé deroulé, zot tou ti ensam dan mem place” kan l’esprit Bondié ti desann lor zot, ek ti donne zot capacité pou koz dan bann lezot langue.—Actes 2:1-4.
Marie aussi ti parmi sa bann disciple ki ti gagne l’esprit saint-la. Alors sa montré ki Marie ek sa bann lezot madame ki ti gagne sa benediction-la ti parmi bann ki forme parti dan Royaume Jésus ki trouve dan le ciel. Alors, nou ena tou raison pou croire ki asterla Marie pé assize avek Jésus dan le ciel. (Romains 8:14-17) Anou guette deux-trois privilege ki Marie ek lezot ki pou al regne avek Christ pou ena dan realisation bann projet Bondié.
Zot pou donne bann benediction extraordinaire
Livre la Bible, Révélation, dire ki 144,000 dimoune pou ressuscité ek pou regne avek Jésus dan le ciel couma bann pretre, bann juge, ek bann le roi. (Révélation 14:1, 4; 20:4, 6) En tant ki bann pretre, zot pou applik bann bienfait sacrifice Jésus lor tou bann dimoune obeissant, ek faire ki zot vinn parfait lor plan spirituel, moral ek physik. (Révélation 21:1-4) Vrai-mem, sa pou enn grand privilege pou tou bann fidele serviteur Jéhovah ki pou vive sa lepok extraordinaire-la!a
Marie ti joué ek li encore pé joué enn role important dan realisation bann projet Jéhovah. Li merite ki nou imite li pou so l’humilité, so la foi, so l’obeissance, so devouement en tant ki enn mama, ek aussi nou pa blié so l’endurance face ar bann difficulté. Pou role ki li finn ena pou donne naissance le Messie ek pou faire bann dimoune profite bann benediction eternel grace a sacrifice Jésus, Marie merite enn grand respé.
Mais, leson plus important ki nou aprann ar Marie, c’est ki li, ensam avek tou lezot serviteur Bondié, adore selman Jéhovah mais pa lezot bondié. Marie, ensam avek bann lezot le roi ki pou regné avek Jésus dan le ciel, dire bien fort: “Donne sa Kikenn ki pé assizé lor trone [Bondié Jéhovah] ek l’Agneau [Jésus Christ], benediction ek l’honneur ek la gloire ek puissance pou touletan.”—Révélation 5:13; 19:10.
[Note]
a Pou plus renseignement lor sa bann benediction-la, guette chapitre 8 dan livre Ki la Bible enseigné vrai-mem? ki publié par bann Témoins de Jéhovah.
[L’encadré lor page 4]
Marie merite ki nou imite li pou so l’humilité, so la foi, ek so l’obeissance