Anou trouve la joie kan nou pé faire bann disciple
“Alors, allé ek faire bann disciple.”—MAT. 28:19.
1-3. (a) Ki sentiment beaucoup ena pou conduire enn l’etude la Bible? (b) Ki bann question nou pou examiné?
“MO FINN etudié la Bible pendant 11 semaine avek enn famille ki sorti Pakistan. Li pa etonnant ki nou’nn vinn camarade. Kan mo pensé ki bientot sa famille-la pé retourne Pakistan, mo envie ploré. Larme vinn dan mo lizié pa zis parski mo chagrin ki zot pé quitte nou, mais aussi parski mo’nn ena la joie pou faire zot konn Jéhovah,” c’est seki enn soeur ki servi dan enn groupe ki koz hindi en Amérique, ti ecrire.
2 Pareil couma sa soeur-la, eski ou aussi ou finn konn la joie pou etudié la Bible avek enn kikenn? Jésus ek so bann premier disciple ti trouve enn grand la joie dan l’activité pou faire bann disciple. Kan bann 70 disciple ki Jésus ti formé ti retourné ek ti raconte Jésus bann bon resultat ki zot ti gagné dan zot predication, Jésus li-mem ti “rempli ar la joie dan l’esprit saint.” (Luc 10:17-21) Zordi aussi pareil, beaucoup trouve enn grand la joie pou faire bann disciple. Par exemple, en 2007, bann proclamateur joyeux ki’nn travail dur ti conduire en moyenne, 6,500,000 l’etude la Bible chaque mois!
3 Mais, certain proclamateur pankor ena sa la joie pou conduire enn l’etude la Bible-la. Pou lezot, sa faire deux-trois l’année ki zot pa finn conduire enn l’etude. Ki bann difficulté nou kapav gagné kan nou pé faire zeffort pou rod enn l’etude la Bible? Couma nou kapav surmonte sa bann difficulté-la? Ek ki bann bienfait nou gagné kan nou faire tou seki nou kapav pou obeir commandement Jésus: “Alors, allé ek faire bann disciple”?—Mat. 28:19.
Bann difficulté ki kapav empeche nou trouve la joie
4, 5. (a) Couma beaucoup dimoune reagir dan certain partie le monde? (b) Ki difficulté bann proclamateur gagné dan lezot l’endroit?
4 Dan certain partie dan le monde, bann dimoune bien content pou accepté nou publication ek zot bien disposé pou etudié la Bible avek nou. Enn couple ki sorti l’Australie ek ki ti pé servi pendant enn temps dan Zambie ti ecrire: “Li vrai seki dimoune raconté. Zambie c’est enn paradis pou predication. Predication dan la rue li extraordinaire! Bann dimoune approche nou, ena mem ki vinn demann nou certain numero precis nou bann periodik.” Pa trop longtemps, bann frere ek soeur dan Zambie ti conduire plus ki 200,000 l’etude la Bible—sa faire en moyenne, plus ki enn l’etude par proclamateur.
5 Mais dan lezot l’endroit, kitfois bann proclamateur trouve sa difficile pou place bann publication ek pou conduire bann l’etude la Bible regulierement. Kifer? Souvent bann dimoune pa kot zot kan enn proclamateur tappe zot la porte, alors ki bann ki la-mem, zot, zot pa interessé ar la religion. Li possible ki zot inn grandi dan enn famille ki pa ti dan okenn religion, ou-soit zot detesté l’hypocrisie ki zot trouve ena dan fausse religion. Beaucoup dimoune finn blessé lor plan spirituel, coumadir zot inn gagne maltraité ek zot senti-zot perdi ek abandonné par bann fausse berger. (Mat. 9:36) Nou comprend kifer sa bann dimoune-la kitfois hesité pou gagne bann conversation lor la Bible.
6. Ar ki bann difficulté certain proclamateur kitfois bizin faire face?
6 Certain proclamateur fidele faire face ar enn lot qualité difficulté ki kapav empeche zot trouve la joie. Mem si pendant enn temps zot ti bien actif dan l’activité pou faire bann disciple, asterla zot limité a cause enn mauvais la santé ou-soit a cause la vieillesse. Ena aussi bann barriere ki nou-mem nou’nn mette devant nou. Par exemple, eski ou senti-ou pa assez qualifié pou conduire enn l’etude la Bible? Li possible ki ou ena mem sentiment ki Moïse kan Jéhovah ti dire li al koz avek Pharaon. Moïse ti dire: “Pardon, Jéhovah, mais mo pa enn kikenn ki ena la parole facile, ni depuis hier, ni avant sa.” (Ex. 4:10) Kan nou ena sentiment ki nou pa assez qualifié, souvent nou peur pangar nou pa pou reussi conduire enn l’etude. Nou kapav peur pangar enn dimoune pa vinn enn disciple parski nou pa enn enseignant parfait. Alors, pou evité ki nou faire sa l’experience-la, kitfois nou decidé pou pa conduire enn l’etude. Couma nou kapav faire face ar sa bann difficulté ki nou finn mentionné-la?
Prepare zot leker
7. Ki ti motive Jésus dan so ministere?
7 Enn premier l’etape c’est prepare nou prop leker. Jésus ti dire: “Seki enn dimoune ena en abondance dan so leker, c’est sa-mem ki li dire.” (Luc 6:45) Jésus ti ena enn l’interet sincere pou bien-etre bann dimoune ek c’est sa ki ti pousse-li pou accompli so ministere. Par exemple, kan li ti trouvé ki condition spirituel bann Juif pa ti bon, “li ti ena pitié pou zot.” Li ti dire so bann disciple: “Recolte-la grand . . . Suppliyé Maitre recolte pou Li envoye bann travailleur dan so recolte.”—Mat. 9:36-38.
8. (a) Lor ki kitsoz nou bizin reflechi? (b) Ki nou aprann lor commentaire enn etudiant la Bible?
8 A mesure ki nou pé participe dan sa l’activité pou faire bann disciple-la, li bon nou reflechi ki quantité bienfait nou-mem nou finn gagné parski enn proclamateur inn prend le temps pou etudié la Bible avek nou. Mazinn aussi bann dimoune ki nou pou joinde dan nou ministere ek bann bienfait ki zot pou gagné kan zot pou tann message ki nou preché. Enn madame ti ecrire Béthel dan pays kot li ti resté: “Mo ti pou content dire zot ki quantité mo reconnaissant envers bann madame ki vinn enseigne moi kot moi. Mo sur ki parfois zot agacé parski mo pose tellement beaucoup question ek mo toujours pé faire zot reste pli longtemps. Mais zot ena patience avek moi ek zot toujours pré pou partage seki zot finn aprann. Mo remercié Jéhovah ek Jésus ki mo’nn joinde sa bann dimoune-la dan mo la vie.”
9. Lor ki Jésus ti fixé so l’attention, ek couma nou kapav imite li?
9 Bien sur, pa tou dimoune ki ti accepté l’enseignement Jésus ek ti vinn so bann disciple. (Mat. 23:37) Certain ti suive li pendant enn temps mais apré zot ti rejette so bann l’enseignement ek zot “ti nepli oulé marche avek li.” (Jean 6:66) Mais, c’est pa a cause sa ki Jésus ti pensé ki so message pa ti ena okenn valeur. Mem si la plupart la grain ki li ti semé pa ti rapporte okenn fruit, Jésus ti fixé so l’attention lor bann bon kitsoz ki li ti pé faire. Li ti trouvé ki karo ti blanc pou recolte ek li ti trouve beaucoup la joie pou participe dan sa recolte-la. (Lire Jean 4:35, 36.) Dan territoire ki nou finn gagné, ena enn recolte pou faire. Au lieu ki nou guette zis sa partie la terre ki pa rapporte nanyin ki trouve entre chaque plante-la, kifer nou pa faire couma Jésus ek concentré nou l’attention lor seki nou kapav recolté? Anou guetté couma nou kapav garde enn l’attitude positif coumsa.
Semé avek l’objectif pou recolté
10, 11. Ki ou kapav faire pou garde ou la joie?
10 Enn planteur seme bann la grain avek l’objectif pou recolté apré. Li pareil pou nou, nou bizin preché avek l’objectif pou commence bann l’etude la Bible. Mais ki ou pou faire si ou habitué preché regulierement mais ou pa trouve beaucoup dimoune kot zot ou-soit ou pa reussi joinde ou bann visite? Sa kapav bien decourage ou. Eski sa vedir ki ou pou arrete preché de porte-en-porte? Non, pa ditou! Nou encore pé contacté beaucoup dimoune grace a sa methode predication-la ek sa inn produire bann bon resultat pendant longtemps.
11 Mais pou garde ou la joie, eski ou kapav varié ou bann methode predication ek kitfois essaye lezot fason pou contacté bann dimoune? Par exemple, eski ou’nn essaye rann temoignage dan la rue ou-soit kot bann dimoune travail? Eski ou kapav preche par telephone ou-soit gagne numero telephone bann dimoune avek ki ou finn deja gagne enn conversation pou ki ou kapav garde contact avek zot? Kan ou montré ki ou perseveré ek ou souple dan ou ministere, ou pou gagne la joie pou joinde bann dimoune ki pou ecoute message lor Royaume Bondié.
Faire face ar l’indifference
12. Ki nou kapav faire si beaucoup dan nou territoire parette indifferent ar nou message?
12 Ki ou pou faire si beaucoup dimoune dan ou territoire zot indifferent ar la religion? Eski ou kapav commence ou conversation par enn kitsoz ki pou interesse zot? L’apotre Paul ti ecrire so bann compagnon dan Corinthe: “Pou bann Juif, mo ti vinn couma enn Juif . . . Pou bann ki pena la loi, mo ti vinn couma enn kikenn ki pena la loi pou gagne zot, mem si mo pa sans la loi devant Bondié.” Ki l’objectif Paul ti ena? Li ti dire: “Mo’nn vinn tou kitsoz pou tou sorte qualité dimoune, pou ki par tou moyen possible mo kapav sauve certain parmi zot.” (1 Cor. 9:20-22) Eski nou aussi nou kapav rod bann sujet ki pou interesse bann dimoune dan nou territoire? Beaucoup dimoune ki pa suive okenn religion envie ameliore bann relation ki zot ena dan zot famille. Kitfois zot pé rod aussi enn but dan zot la vie. Eski nou kapav presente message lor Royaume Bondié dan enn fason ki pou touche zot leker?
13, 14. Couma nou kapav augmente nou la joie dan l’activité pou faire bann disciple?
13 Beaucoup proclamateur finn augmente la joie ki zot gagné pou faire bann disciple, mem dan bann l’endroit kot la plupart dimoune parette indifferent. Couma? Kan zot inn aprann enn lot langue? Enn couple ki ena plus ki soixante an ti rann-zot compte ki plusieurs millier etudiant chinois ek zot famille ti pé reste dan territoire zot congregation. Mari-la raconté: “Sa inn encourage nou pou aprann chinois. Mem si nou ti bizin passe le temps toulé-jour pou aprann sa langue-la, sa ti permette nou gagne beaucoup l’etude la Bible avek bann Chinois dan nou l’endroit.”
14 Mem si ou pa kapav aprann enn lot langue, ou kapav servi bien brochure Une bonne nouvelle pour des gens de toutes nations, kan ou joinde bann dimoune ki koz enn lot langue. En general, ou kapav aussi gagne bann publication dan langue sa bann dimoune ki ou joinde-la. Li vrai ki sa demann plus le temps ek zeffort pou gagne enn conversation avek bann dimoune ki koz enn lot langue ek ki ena enn lot culture. Mais pa blié sa principe ki trouve dan Parole Bondié-la: “Enn kikenn ki seme en abondance pou recolté aussi en abondance.”—2 Cor. 9:6.
Tou dimoune dan congregation impliké
15, 16. (a) Kifer zot tou dan congregation impliké dan l’activité pou faire bann disciple? (b) Ki role bann chretien agé ena dan sa l’activité-la?
15 Mais, pou faire bann disciple sa pa depann lor zeffort zis enn sel dimoune, mais lor zeffort tou dimoune dan congregation. Kifer? Jésus ti dire: “Par sa tou dimoune pou koné ki zot mo bann disciple, si zot ena l’amour entre zot.” (Jean 13:35) Oui, kan bann etudiant la Bible assisté reunion, souvent zot impressionné par bon l’atmosphere ki ena dan nou bann reunion. Enn madame ki etudié la Bible ti ecrire: “Mo bien content assisté reunion. Bann dimoune bien accueillant!” Jésus ti dire ki bann ki pou vinn so bann disciple pou kapav gagne l’opposition avek zot prop famille. (Lire Matthieu 10:35-37.) Selman, li ti promette ki zot pou gagne enn quantité “frere ek soeur ek mama ek zenfant” spirituel dan congregation.—Marc 10:30.
16 Surtout nou bann frere ek soeur ki agé zot ena enn role important pou aide bann etudiant la Bible pou progressé. Dan ki fason? Mem si certain parmi zot pa toujours kapav conduire enn l’etude la Bible, zot bann commentaire bien encourageant pendant reunion fortifié la foi tou seki ecoute zot. Tou seki zot inn faire pou marche “dan chemin la justice” faire congregation vinn pli joli ek attire bann dimoune sincere vers l’organisation Bondié.—Prov. 16:31.
Vaink nou la peur
17. Si nou ena sentiment ki nou pa assez qualifié pou conduire enn l’etude la Bible, ki nou kapav faire?
17 Ki ou pou faire si ou ena sentiment ki ou pa assez qualifié pou conduire enn l’etude la Bible? Rappel ki Jéhovah ti aide Moïse kan Li ti donne li l’esprit saint ek Li ti donne li aussi enn compagnon, so frere Aaron, pou aide li. (Ex. 4:10-17) Jésus ti promette ki l’esprit Bondié pou soutenir nou travail predication. (Actes 1:8) En plus, Jésus ti envoye so bann disciple pou preche deux par deux. (Luc 10:1) Alors, si ou trouve sa difficile pou conduire enn l’etude la Bible, prié Bondié pou donne ou so l’esprit saint pou ou kapav gagne la sagesse. Apré, rod enn kikenn pou preche avek ou, ki pou faire ou ena confiance dan ou-mem ek ki pou aide ou grace a so l’experience. Sa fortifié nou la foi kan nou rappel ki Jéhovah inn choisir pou servi bann dimoune ordinaire—“bann kitsoz bete dan sa le monde-la”—pou accompli sa travail extraordinaire-la.—1 Cor. 1:26-29.
18. Si nou peur pangar nou pa reussi aide enn etudiant la Bible, couma nou kapav vaink sa sentiment-la?
18 Si nou peur pangar nou pa pou kapav aide enn etudiant la Bible, couma nou kapav vaink sa sentiment-la? Li pou bon ki nou rappel ki faire enn disciple li pa pareil couma prepare enn repas. Pou ki enn repas reussi sa depann zis lor enn sel dimoune—cuisinier-la. Mais faire enn disciple depann au moins lor trois element. Jéhovah faire seki pli important: Li attire sa dimoune-la vers Li. (Jean 6:44) Nou, avek lezot dan congregation, nou faire tou seki nou kapav pou servi l’art pou enseigné pou aide etudiant-la progressé. (Lire 2 Timothée 2:15.) Ek etudiant-la li, li bizin mette en pratik seki li aprann. (Mat. 7:24-27) Si enn dimoune arrete so l’etude la Bible, sa kapav faire nou bien decouragé. Nou toujours esperé ki bann etudiant la Bible faire enn bon choix, mais chaque dimoune bizin “rann compte pou li-mem devant Bondié.”—Rom. 14:12.
Ki bann bienfait nou gagné?
19-21. (a) Ki bienfait nou gagné kan nou conduire bann l’etude la Bible? (b) Couma Jéhovah considere tou bann ki participe dan l’activité predication?
19 Conduire enn l’etude la Bible aide nou pou contigne rod Royaume Bondié avant tou kitsoz. En plus, sa aide nou aussi pou grave bann verité ki ena dan Parole Bondié dan pli profond nou l’esprit ek nou leker. Kifer nou dire sa? Enn pionnier ki appel Barak expliké: “Conduire bann l’etude la Bible oblige ou pou vinn enn pli bon etudiant Parole Bondié. Mo’nn trouvé ki mo bizin faire mo bann conviction personnel concernant mo bann croyance vinn pli solide avant ki mo kapav al enseigne sa bien ar enn lot dimoune.”
20 Si ou pa pé conduire enn l’etude la Bible, eski sa vedir ki ou service pena okenn valeur devant Bondié? Non, nou pa kapav dire sa! Jéhovah bien apprecié bann zeffort ki nou faire pou loué Li. Tou bann ki preché zot bann “ki travail ensam avek Bondié.” Selman, kan nou conduire enn l’etude la Bible sa faire nou gagne encore plus la joie parski nou trouvé couma Bondié faire sa la grain ki nou’nn planté-la, poussé. (1 Cor. 3:6, 9) Amy, enn pionnier, dire: “A mesure ki ou trouve enn etudiant la Bible progressé, ou ena enn grand reconnaissance pou Jéhovah parski Li pé servi ou pou donne sa dimoune-la enn grand cadeau—possibilité pou konn Li ek pou gagne la vie eternel.”
21 Kan nou faire tou seki nou kapav pou commence ek pou conduire bann l’etude la Bible, sa pou aide nou garde nou l’esprit fixé lor service ki nou offert Bondié zordi ek pou fortifié nou l’esperance pou rente dan le monde nouveau. Avek soutien Jéhovah, nou kapav aussi sauve bann dimoune ki ecoute nou. (Lire 1 Timothée 4:16.) Si sa arrivé, sa pou faire nou gagne vrai-mem enn grand la joie!
Eski ou rappel?
• Ki difficulté kapav empeche certain pou conduire bann l’etude la Bible?
• Ki nou kapav faire si la plupart dimoune dan nou territoire parette indifferent?
• Ki bann bienfait nou gagné kan nou conduire enn l’etude la Bible?