Eski ou enn “administrateur faveur Bondié, faveur ki personne pa merité”?
“Dan l’amour fraternel, ena enn grand l’affection sakenn pou so camarade. Zot bizin toujours premier pou honore sakenn so camarade.”—ROM. 12:10.
1. Ki l’assurance nou trouvé dan Parole Bondié?
PLUSIEURS fois Parole Bondié donne nou l’assurance ki Jéhovah pou aide nou kan nou decouragé ou-soit kan nou ena enn grand chagrin dan nou leker. Remark sa bann parole bien encourageant-la: “Jéhovah soutenir tou bann ki pé tombé, ek Li redresse tou bann ki courbé.” “Li gueri bann dimoune ki ena enn grand chagrin dan zot leker, ek Li mette enn bandage kot zot ena douleur.” (Ps. 145:14; 147:3) En plus, nou Papa ki dan le ciel Li-mem Li dire: “Moi, Jéhovah to Bondié, mo pé attrape to la main droite bien fort, Celui ki dire toi: ‘Pa peur. Moi, mo pou aide toi.’ ”—Is. 41:13.
2. Couma Jéhovah soutenir so bann serviteur?
2 Mais couma Jéhovah, ki reste dan le ciel invisible—‘attrape nou la main’? Couma Li ‘redresse nou kan nou courbé’ a cause enn grand chagrin? Jéhovah soutenir nou dan plusieurs fason. Par exemple, Li servi so l’esprit saint pou donne so bann serviteur sa “puissance ki plus ki seki normal-la.” (2 Cor. 4:7; Jean 14:16, 17) La Bible, Parole ki Bondié inn inspiré, ena enn grand pouvoir ek bann serviteur Bondié senti ki sa pouvoir-la releve zot. (Héb. 4:12) Eski ena encore enn lot fason ki Jéhovah servi pou fortifié nou? Nou trouve enn reponse dan premier lettre ki Pierre ti ecrire.
‘Faveur Bondié ki personne pa merité ek ki manifesté dan different fason’
3. (a) Ki l’apotre Pierre dire concernant bann l’epreuve? (b) Lor ki kitsoz dernier partie premier lettre ki Pierre ti ecrire, kozé?
3 Dan so lettre, l’apotre Pierre ecrire bann chretien oint ek dire zot ki zot kapav content parski ena enn grand recompense ki pé attann zot. Apré sa li ajouté: “Mem si pou enn tigit le temps asterla, si bizin, zot dan la peine a cause different qualité l’epreuve.” (1 Pierre 1:1-6) Remark mot ki Pierre servi: “different.” Sa montré nou ki ena different qualité l’epreuve. Pourtant, Pierre pa arrete la, li pa laisse so bann frere demann zot-mem si zot pou kapav endure sa bann different qualité l’epreuve-la. Au contraire, li montré ki bann chretien kapav sur ki Jéhovah pou aide zot pou endure chaque l’epreuve ki zot gagné, n’importe ki qualité sa l’epreuve-la été. Nou trouve sa l’assurance-la dan dernier partie lettre ki li ti ecrire, kan li koz lor bann sujet ki concerne “la fin tou kitsoz.”—1 Pierre 4:7.
4. Kifer bann parole 1 Pierre 4:10 encourage nou?
4 Pierre dire: “Pareil couma sakenn inn gagne enn don, servi sa pou aide sakenn so camarade couma bann bon administrateur faveur Bondié, faveur ki personne pa merité ek ki manifesté dan different fason.” (1 Pierre 4:10) Pierre servi encore enn fois mot “different.” En realité, li pé rod dire ki ‘bann l’epreuve vinn dan different fason, mais ki Bondié manifesté so faveur ki personne pa merité, dan beaucoup different fason aussi.’ Kifer sa bann parole-la zot encourage nou? Sa montré ki n’importe ki qualité l’epreuve nou kapav gagné, pou ena toujours enn fason ki faveur Bondié pou manifesté ki pou corresponn ar sa l’epreuve-la. Mais eski ou’nn remarké dan bann parole Pierre couma faveur Bondié ki personne pa merité li manifesté envers nou? Par moyen nou bann frere ek soeur.
“Aide sakenn so camarade”
5. (a) Ki chaque chretien bizin faire? (b) Ki bann question nou kapav posé?
5 Kan Pierre ti koz ar tou bann membre congregation chretien, li ti dire: “Avant tou, zot bizin ena enn l’amour profond sakenn pou zot camarade.” Apré li ajouté: “Pareil couma sakenn inn gagne enn don, servi sa pou aide sakenn so camarade.” (1 Pierre 4:8, 10) Sa vedir ki sakenn dan congregation bizin faire so part pou fortifié so bann frere ek soeur. Jéhovah finn confié nou enn kitsoz ki ena valeur ek ki pou Li; alors nou ena responsabilité pou partage sa avek lezot. Ki sa kitsoz-la sa? Pierre dire ki c’est “enn don.” Ki sa don-la? Couma nou pé servi sa ‘pou aide sakenn nou camarade’?
6. Cite certain don ki bann chretien inn gagné.
6 Parole Bondié dire: “Tou joli don ek tou cadeau parfait sorti la-haut.” (Jacq. 1:17) Oui, tou bann don ki Jéhovah donne so bann serviteur c’est bann fason ki Li manifesté so faveur ki personne pa merité. Enn don extraordinaire ki Jéhovah donne nou c’est l’esprit saint. Sa don-la permette nou developpe bann qualité spirituel couma l’amour, la bonté, ek la douceur. Lerla, sa bann qualité-la pousse nou pou manifesté enn l’affection sincere envers nou bann frere ek soeur ek pou disposé pou aide zot. Parmi bann bon don ki nou gagné grace a l’aide l’esprit saint ena aussi vrai sagesse ek connaissance. (1 Cor. 2:10-16; Gal. 5:22, 23) En realité, nou kapav considere tou nou la force, nou bann capacité ek nou bann talent couma bann don ki nou kapav servi pou loué ek pou donne l’honneur nou Papa ki dan le ciel. Responsabilité ki Bondié inn donne nou c’est pou servi nou bann capacité ek nou bann qualité pou permette faveur Bondié manifesté envers nou bann frere ek soeur.
‘Servi sa don-la pou aidé’—Couma?
7. (a) Ki nou comprend par l’expression “pareil couma”? (b) Ki bann question nou bizin pose nou-mem, ek kifer?
7 Concernant bann don ki nou’nn gagné, Pierre dire aussi: “Pareil couma sakenn inn gagne enn don, servi sa.” L’expression, “pareil couma,” montré ki chaque chretien inn gagne enn “don,” setadir bann qualité ek bann capacité. Sa bann don-la kapav different, setadir ki nou tou nou pena mem don ek nou pena li dan mem quantité. N’importe ki don ki nou’nn gagné, Pierre encourage sakenn parmi pou “servi sa pou aide sakenn [nou] camarade.” En plus, l’expression “servi sa . . . couma bann bon administrateur,” c’est enn l’ordre. Alors, nou bizin demann nou-mem: ‘Eski vrai-mem mo pé servi sa bann don ki’nn confié moi-la pou fortifié mo bann frere ek soeur?’ (Compare avek 1 Timothée 5:9, 10.) ‘Ou-soit eski mo servi bann capacité ki Jéhovah inn donne moi zis pou mo prop l’interet—kitfois pou gagne bann richesse ou-soit pou arrive enn certain niveau social?’ (1 Cor. 4:7) Si nou servi nou bann don “pou aide sakenn [nou] camarade,” nou pou faire Jéhovah plaisir.—Prov. 19:17; lire Hébreux 13:16.
8, 9. (a) Mentionne certain fason ki montré couma bann chretien dan le monde entier servi zot bann frere ek soeur. (b) Couma bann frere ek soeur dan ou congregation aide sakenn so camarade?
8 Parole Bondié mentionne plusieurs fason couma bann chretien premier siecle ti aide sakenn so camarade. (Lire Romains 15:25, 26; 2 Timothée 1:16-18.) Zordi aussi pareil, bann vrai chretien obeir avek tou zot leker sa l’ordre pou servi zot don en faveur zot bann frere ek soeur. Anou examine certain fason couma bann chretien faire sa.
9 Beaucoup frere passe plusieurs l’heure toulé-mois pou prepare zot participation pou bann reunion. Dan reunion, kan zot partage certain pensée spirituel bien interessant ki zot inn trouvé dan zot l’etude la Bible, zot bann parole ki rempli ar discernement encourage zot tou dan congregation pou enduré. (1 Tim. 5:17) Beaucoup frere ek soeur ena enn bon reputation parski zot ena l’affection ek compassion pou zot bann compagnon chretien. (Rom. 12:15) Certain visite regulierement bann ki gagne depression ek prié avek zot. (1 Thess. 5:14) Ena lezot ki prend le temps pou ecrire deux-trois mot encourageant zot bann compagnon chretien ki pé passe par enn l’epreuve. Ena lezot encore ki avek bonté aide bann chretien ki limité lor plan physik, pou zot kapav assisté reunion. Ena plusieurs millier Témoins de Jéhovah ki participe dan bann secours pou aide zot bann frere pou reconstruire zot lakaz apré bann catastrophe. Sa bann frere ek soeur-la vrai-mem interessé ar zot bann compagnon chretien. Kan zot montré sa grand l’affection-la ek zot apporte enn l’aide pratik, c’est bann demonstration “faveur Bondié, faveur ki personne pa merité ek ki manifesté dan different fason.”—Lire 1 Pierre 4:11.
Ki kitsoz ki pli important?
10. (a) Ki deux l’aspect ki ti forme partie dan so service pou Bondié Paul ti prend compte? (b) Couma nou imite Paul zordi?
10 Bann serviteur Bondié pa’nn gagne zis enn don ki zot bizin servi pou aide zot bann frere ek soeur mais zot inn gagne aussi enn message ki zot bizin partage avek zot prochain. L’apotre Paul ti reconette ki sa deux l’aspect-la ti forme partie dan so service pou Jéhovah. Li ti ecrire congregation Éphèse concernant ‘sa l’administration concernant faveur Bondié, faveur ki personne pa merité,’ ki li ti gagné pou zot prop bienfait. (Éph. 3:2) Pourtant, li ti dire aussi: “Bondié ti faire nou passe par l’epreuve ek Li ti juge nou digne pou confié nou la bonne nouvelle.” (1 Thess. 2:4) Pareil couma Paul, nou aussi nou reconette ki Bondié inn confié nou enn mission pou servi couma bann proclamateur ki preche so Royaume. Kan nou preche avek zele, nou faire zeffort pou imite l’exemple ki Paul inn laissé, l’exemple enn proclamateur ki jamais pa ti fatigué pou preche la bonne nouvelle. (Actes 20:20, 21; 1 Cor. 11:1) Nou koné ki preche message lor Royaume Bondié kapav sauve la vie. Mais en mem temps, nou faire aussi tou seki nou kapav pou imite Paul kan nou rod bann l’occasion pou “transmette [nou bann frere ek soeur] enn certain don spirituel.”—Lire Romains 1:11, 12; 10:13-15.
11. Couma nou bizin considere nou responsabilité pou preché ek pou fortifié nou bann frere?
11 Lekel parmi sa deux l’activité-la pli important? Kan nou pose enn question coumsa, c’est coumadir nou pé demandé: ‘Lekel parmi deux lezel enn zoiseau pli important?’ Reponse-la li clair. Enn zoiseau bizin so toulé-deux lezel pou li kapav envole bien. Li pareil aussi pou nou, nou bizin participe dan toulé-deux l’aspect ki forme partie dan nou service pou Bondié pou nou kapav vinn bann chretien complet. Alors, au lieu ki nou pensé ki nou mission pou preche la bonne nouvelle pena okenn rapport avek nou responsabilité pou fortifié nou bann frere ek soeur, nou ena mem l’attitude ki Pierre ek Paul—nou considere ki sa deux responsabilité-la marche ensam. Dan ki fason?
12. Dan ki fason nou couma bann l’instrument dan la main Jéhovah?
12 En tant ki bann proclamateur la bonne nouvelle, nou servi n’importe ki capacité ki nou kapav ena pou enseigné, pou touche leker bann dimoune avek message lor Royaume Bondié, enn message ki encourageant. Dan sa fason-la, nou souhaité ki sa pou aide zot pou vinn bann disciple Christ. Selman, nou servi aussi bann capacité ek bann lezot don ki nou kapav ena pou essaye encourage nou bann frere avek bann parole ki pou fortifié zot ek bann action ki pou aide zot—bann fason ki faveur Bondié ki personne pa merité, li manifesté. (Prov. 3:27; 12:25) Dan sa fason-la, nou esperé ki sa pou aide zot pou reste bann disciple Christ. Dan toulé-deux l’activité—preche en publik ek “aide sakenn [nou] camarade”—nou ena enn privilege extraordinaire: nou couma bann l’instrument dan la main Jéhovah.—Gal. 6:10.
“Ena enn grand l’affection sakenn pou so camarade”
13. Ki pou arrivé si nou pa “aide sakenn [nou] camarade”?
13 Paul ti donne sa conseil-la bann chretien: “Dan l’amour fraternel, ena enn grand l’affection sakenn pou so camarade. Zot bizin toujours premier pou honore sakenn so camarade.” (Rom. 12:10) Oui, l’affection pou nou bann frere pousse nou pou servi zot avek tou nou leker couma bann administrateur faveur Bondié, faveur ki personne pa merité. Nou realisé ki si Satan reussi empeche nou “aide sakenn [nou] camarade,” li pou affaibli nou l’unité. (Col. 3:14) Lerla, si pena l’unité entre nou, nou pa pou zelé dan predication. Satan bien koné ki dan enn certain fason, li nek zis ena pou blesse enn sel lezel pou jette nou enba.
14. Kan nou “aide sakenn [nou] camarade,” kisannla ki profite sa? Donne enn l’exemple.
14 Kan bann chretien “aide sakenn so camarade” c’est pa zis bann ki gagne faveur Bondié ki tire profit, mais aussi bann ki transmette sa faveur-la. (Prov. 11:25) Prend par exemple cas Ryan ek Roni, enn couple ki reste dan l’Illinois, en Amérique. Zot ti aprann ki cyclone Katrina ti detruire lakaz plusieurs centaine Témoins de Jéhovah. Lerla, zot l’amour ti pousse zot pou quitte zot travail ek zot l’appartement, zot ti acheté enn caravane seconde-main ki zot ti arrange bien pou zot kapav reste ladan, ek zot ti voyage enn distance 1,400 kilometre ziska Louisiane. Zot ti vive la-bas pendant plus ki enn an ek pendant sa le temps-la, zot ti donne zot le temps, zot la force ek seki zot ti ena lor plan materiel, pou aide zot bann frere. Ryan ki ena 29 an dire: “Kan mo’nn participe dan sa travail pou aide bann dimoune-la, sa inn faire moi vinn pli proche ar Bondié. Mo’nn trouvé couma Jéhovah prend soin so bann serviteur.” Li ajouté: “Mo’nn travail avek bann frere pli agé ek sa inn montré moi bien couma pou prend soin mo bann frere ek soeur. Mo’nn aprann aussi ki nou, bann jeune, nou ena beaucoup pou faire dan l’organisation Jéhovah.” Roni ki ena 25 an dire: “Mo bien content ki mo’nn kapav aide lezot. Jamais mo’nn senti moi heureuse coumsa dan mo la vie. Mo koné ki mem apré dan bann l’année ki pou vini, mo pou contigne gagne bann bienfait ar sa l’experience extraordinaire-la.”
15. Ki bann bon raison nou ena pou contigne servi couma bann administrateur faveur Bondié, faveur ki personne pa merité?
15 Oui, obeir commandement ki Bondié inn donne nou pou preche la bonne nouvelle ek pou fortifié nou bann frere, sa faire nou tou gagne bann benediction. Bann dimoune ki nou aidé, vinn fort spirituellement, ek nou-mem, nou gagne enn grand la joie, la joie ki gagné selman kan donné. (Actes 20:35) Kan chaque membre enn congregation interesse-li avek amour ar so camarade, c’est congregation-la net ki tire profit parski ena enn pli bon l’ambiance parmi so bann membre. En plus, sa l’amour ek sa l’affection ki nou manifesté envers lezot-la montré bien ki nou bann vrai chretien. Jésus ti dire: “Par sa tou dimoune pou koné ki zot mo bann disciple, si zot ena l’amour entre zot.” (Jean 13:35) Surtout, nou bon Papa, Jéhovah, gagne l’honneur parski so bann serviteur ki lor la terre pé manifesté mem desir ki Li pou fortifié bann dimoune ki affecté par bann probleme. Alors, nou ena bann bon raison pou servi nou don “pou aide sakenn [nou] camarade couma bann bon administrateur faveur Bondié, faveur ki personne pa merité”! Eski ou pou contigne faire sa?—Lire Hébreux 6:10.
Eski ou rappel?
• Cite certain fason couma Jéhovah fortifié so bann serviteur.
• Ki kitsoz Bondié finn confié nou?
• Cite bann fason couma nou kapav servi nou bann frere ek soeur.
• Ki pou pousse nou pou contigne servi nou don “pou aide sakenn [nou] camarade”?
[Zimage lor page 17]
Eski ou servi ou “don” pou aide lezot ou-soit pou faire ou-mem plaisir?
[Zimage lor page 19]
Nou preche la bonne nouvelle ar lezot ek nou soutenir nou bann frere ek soeur
[Zimage lor page 20]
Bann ki participe dan bann secours merite felicitation pou zot l’esprit sacrifice