Laisse bann parole Jésus influence ou conduite
“Sa kikenn ki Bondié inn envoyé-la dire bann parole Bondié.”—JEAN 3:34.
1, 2. Ar ki kitsoz nou kapav compare bann parole ki Jésus ti prononcé dan so Sermon lor montagne, ek kifer nou kapav dire ki li ti basé lor “bann parole Bondié”?
ENN parmi bann pli gros diamant ki nou koné zordi ki bann zom inn taillé, c’est l’Étoile d’Afrique. Li pese 530 carat. C’est vrai-mem enn pierre ki ena enn grand valeur! Mais bann tresor spirituel ki trouve dan Sermon lor montagne ki Jésus ti faire ena beaucoup plus valeur ki sa diamant-la. Sa pa etonne nou parski Jéhovah Li-mem la source sa bann parole ki Christ ti prononcé-la. La Bible dire lor Jésus: “Sa kikenn ki Bondié inn envoyé-la dire bann parole Bondié.”—Jean 3:34-36.
2 Mem si Jésus ti prend moins ki 30 minute pou prononce so Sermon lor montagne, dan sa discours-la ena 21 citation ki sorti dan huit livre bann l’Écritures hébraïques. Alors c’est enn discours ki ena enn base solide lor “bann parole Bondié.” Asterla, anou guetté couma nou kapav applik certain parmi sa bann parole ki ena valeur-la ek ki trouve dan discours extraordinaire ki Garson Bondié inn prononcé.
“D’abord al faire la paix avek to frere”
3. Apré ki li ti averti so bann disciple kont bann mauvais consequence ki la colere kapav amené, ki conseil Jésus ti donné?
3 En tant ki chretien, nou heureux ek nou bann dimoune pacifik parski nou ena l’esprit saint Bondié, ek parmi bann qualité ki sa l’esprit-la produire ena la joie ek la paix. (Gal. 5:22, 23) Jésus pa ti envie ki so bann disciple perdi zot la paix ek zot la joie, alors li ti averti zot ki si zot contigne reste en colere, sa kapav faire zot gagne bann mauvais consequence ki amenn vers la mort. (Lire Matthieu 5:21, 22.) Apré sa, li ti dire: “Alors, si kan to pé amenn to don devant l’autel ek ki la to rappel ki to frere ena kitsoz kont toi, laisse to don la, devant l’autel, ek allé; d’abord al faire la paix avek to frere, ek apré, kan to’nn retourné, offert to don.”—Mat. 5:23, 24.
4, 5. (a) Ki sa “don” ki Jésus ti mentionné dan Matthieu 5:23, 24, representé? (b) Eski li vrai-mem important ki nou faire la paix avek enn frere ki nou finn offensé?
4 Sa “don” ki Jésus ti mentionné-la ti n’importe ki sacrifice ki bann Juif ti offert dan temple Jérusalem. Par exemple, ti ena bann sacrifice zanimo ki ti important parski dan sa lepok-la, zot ti forme partie dan l’adoration ki le peuple ti pé offert Jéhovah. Pourtant, Jésus ti mette l’accent lor enn kitsoz ki pli important—faire la paix avek enn frere ki’nn offensé avant offert Bondié enn don.
5 “Faire la paix” vedir ‘reconcilié.’ Alors, ki leson nou kapav tiré ar sa bann parole Jésus-la? Li clair ki fason ki nou traite lezot ena enn l’effet direct lor nou relation avek Jéhovah. (1 Jean 4:20) Oui, bann sacrifice ki ti pé faire longtemps pa ti ena okenn valeur si sa kikenn ki ti pé faire sa-la pa ti traite so prochain couma bizin.—Lire Mika 6:6-8.
L’humilité bien important
6, 7. Kifer nou bizin ena l’humilité kan nou faire zeffort pou retabli la paix avek enn frere ki nou finn offensé?
6 Faire la paix avek enn frere ki nou finn offensé c’est enn kitsoz ki kapav testé nou l’humilité. Bann dimoune humble pa persisté ou-soit pa la guerre avek zot bann frere ek soeur pou insisté lor bann droit ki soi-disant zot ena. Sa pou crée enn mauvais l’atmosphere—pareil couma seki ti existé parmi bann chretien dan ancien la ville Corinthe. Concernant sa situation-la, l’apotre Paul ti dire enn kitsoz ki faire reflechi: “C’est enn defaite total pou zot ki zot poursuive zot camarade devant la cour. Kifer zot pa plutot accepté ki faire zot di-tort? Kifer zot pa plutot accepté pou perdi zot di-bien?”—1 Cor. 6:7.
7 Jésus pa ti dire ki nou bizin al guette nou frere zis pou convaink li ki nou ena raison ek ki li, li ena tort. Au contraire, nou l’objectif c’est pou retabli la paix entre nou. Pou faire la paix, nou bizin honnete ek dire franc seki nou ressenti. Nou bizin reconette aussi ki sentiment sa lot dimoune-la inn blessé. Ek si nou finn faire enn erreur, pena doute ki nou pou envie demann li excuse avek humilité.
“Si to lizié droite faire toi tombé”
8. Faire enn ti resumé seki Jésus ti dire dan Matthieu 5:29, 30.
8 Dan so Sermon lor montagne, Jésus ti donne bann bon conseil lor moralité. Li ti koné ki bann membre nou lekor ki imparfait kapav ena enn l’influence dangereux lor nou. Alors, Jésus ti dire: “Si to lizié droite faire toi tombé, rass li ek jette li loin ar toi. Parski li pli bon pou toi ki to perdi enn sel membre to lekor ki jette tou to lekor dan la géhenne. En plus, si to la main droite faire toi tombé, coupe li ek jette li loin ar toi. Parski li pli bon pou toi ki to perdi enn sel membre to lekor ki tou to lekor al fini dan la géhenne.”—Mat. 5:29, 30.
9. Couma nou “lizié” ou-soit nou “la main” kapav faire nou “tombé”?
9 “Lizié” ki Jésus ti pé kozé represente pouvoir ou-soit capacité ki nou ena pou fixé nou l’attention lor enn kitsoz, ek “la main” represente seki nou faire avek nou la main. Si nou pa faire attention, sa bann membre nou lekor-la kapav faire nou “tombé” ek faire nou arrete ‘marche avek Bondié.’ (Gen. 5:22; 6:9) Alors, kan nou tenté pou desobeir Jéhovah, nou bizin prend bann action bien severe, coumadir rass enn lizié ou-soit coupe enn la main.
10, 11. Ki kapav aide nou pou rejette l’immoralité sexuel?
10 Couma nou kapav empeche nou lizié arrete lor bann kitsoz immoral? Job, enn serviteur Bondié ki ti ena la crainte pou Li, ti dire: “Mo’nn faire enn l’alliance avek mo lizié. Alors couma mo kapav guette enn vierge?” (Job 31:1) Job ti marié ek li ti bien decidé pou pa desobeir bann la loi moral ki Bondié ti etabli. Nou aussi nou bizin ena mem l’attitude, ki nou marié ou-soit nou celibataire. Pou rejette l’immoralité sexuel, nou bizin laisse l’esprit saint Bondié dirige nou, parski sa l’esprit-la agir lor bann ki content Bondié pou ki zot developpe maitrise de soi.—Gal. 5:22-25.
11 Pou rejette l’immoralité sexuel, kitfois li pou bon ki nou demann nou-mem: ‘Eski mo laisse mo lizié faire moi developpe enn desir pou bann kitsoz immoral ki facile pou trouvé dan bann livre, dan television, ou-soit lor Internet?’ Anou rappel aussi sa bann parole ki disciple Jacques ti dire-la: “Sakenn passe par enn tentation kan li laisse so prop desir entraine li ek attire li. Apré, kan sa desir-la inn developpé, sa faire li faire peché; lerla kan li’nn faire peché, sa amenn la mort.” (Jacq. 1:14, 15) En realité, si n’importe ki serviteur Bondié ki finn voué so la vie ar Li “contigne guette” enn kikenn lot sexe avek bann l’intention immoral, li pou bizin prend bann disposition bien severe pou changé, coumadir li pou rass enn lizié ek jette li loin.—Lire Matthieu 5:27, 28.
12. Ki conseil Paul inn donné ki kapav aide nou pou lutte kont bann desir immoral?
12 Si nou mal servi nou la main sa kapav faire nou desobeir bann principe moral Jéhovah. A cause sa, nou bizin bien decidé pou reste pur lor plan moral. Alors, nou bizin suive sa conseil Paul-la: “Detruire net bann membre zot lekor ki lor la terre en seki concerne la fornication, l’impureté, bann desir sexuel, bann desir ki faire di-tort, ek bann l’envie exageré, ki enn idolatrie.” (Col. 3:5) Mot “detruire” montré l’importance pou prend bann action bien severe pou lutte kont bann desir immoral.
13, 14. Kifer li bien important ki nou rejette bann pensée ek bann action immoral?
13 Pou enn dimoune protege so la vie, kitfois li pou accepté ki coupe enn membre so lekor. Dan enn sens symbolik, li bien important ki nou ‘jette loin ar nou’ enn lizié ou-soit enn la main, parski sa pou permette nou rejette bann pensée ek bann action immoral, bann kitsoz ki kapav faire nou perdi faveur Jéhovah. Sel fason pou nou pa al dan la géhenne, ki represente destruction eternel, c’est reste pur lor plan mental, moral ek spirituel.
14 A cause peché ki nou finn herité ar Adam ek a cause l’imperfection, nou bizin faire zeffort pou nou kapav reste pur lor plan moral. Paul ti dire: “Mo donne mo lekor bann coup, ek mo amenn li couma enn esclave, pangar apré ki mo’nn preche avek lezot, mo-mem mo vinn enn dimoune ki’nn disqualifié dan kit fason.” (1 Cor. 9:27) Alors, anou bien decidé pou applik conseil ki Jésus ti donné lor moralité, ek fodé jamais ki nou agir dan enn fason ki montré ki nou pena okenn reconnaissance pou sacrifice ki li’nn faire.—Mat. 20:28; Héb. 6:4-6.
“Prend l’habitude donné”
15, 16. (a) Ki l’exemple Jésus inn laissé concernant l’habitude pou donné? (b) Ki bann parole ki Jésus ti dire dan Luc 6:38 vedir?
15 Bann parole Jésus ek l’exemple extraordinaire ki li’nn donné encourage nou pou prend l’habitude donné. Li ti montré enn grand generosité kan li ti vinn lor la terre pou ki bann dimoune imparfait kapav gagne bann bienfait. (Lire 2 Corinthiens 8:9.) Jésus ti laisse volontairement la gloire ki li ti ena dan le ciel, pou vinn enn zom ek pou donne so la vie pou bann dimoune imparfait. Parmi sa bann dimoune-la, ena certain ki ti pou gagne bann richesse dan le ciel en tant ki bann coheritier dan so Royaume. (Rom. 8:16, 17) Ek pena doute ki Jésus ti pé encourage bann dimoune pou montré-zot genereux kan li ti dire:
16 “Prend l’habitude donné, ek dimoune pou donne zot. Bann dimoune pou vide enn grand mesure dan zot poche devant, zot pou tasse mesure-la bien, zot pou sakouye li, ek li pou debordé. Parski c’est avek sa mesure ki zot mesuré-la, ki lezot pou mesure pou zot.” (Luc 6:38) Kan Jésus ti dire ki dimoune pou ‘vide dan zot poche,’ li ti pé koz lor enn coutume ki certain vendeur ti ena dan le passé. Zot ti rempli sa pli ki ti ena devant dan linge bann dimoune ki ti vinn acheté bann kitsoz. Sa pli-la ti tini par enn ceinture ek li ti couma enn poche ki ti permette sarié bann kitsoz. Si nou pa hesité pou montré-nou genereux, sa pou kapav faire nou aussi gagne enn grand mesure en retour, kitfois kan nou pou dan difficulté.—Eccl. 11:2.
17. Couma Jéhovah inn laisse pli grand l’exemple concernant l’habitude pou donné, ek dan ki fason nou bizin donné pou nou gagne la joie?
17 Jéhovah content bann dimoune ki donne avek la joie ek Li recompense zot. Li-mem ti donne pli grand l’exemple ki ena kan Li ti donne so Garson ki Li ti crée direct, “pou ki tou seki ena la foi en li pa detruire, mais gagne la vie pou touletan.” (Jean 3:16) Paul ti ecrire: “Enn kikenn ki seme en abondance pou recolté aussi en abondance. Laisse sakenn faire couma li finn decidé dan so leker, sans okenn regret, ni par obligation, parski Bondié content enn dimoune ki donne avek la joie.” (2 Cor. 9:6, 7) Kan nou donne nou le temps, nou la force ek nou bann kitsoz materiel pou favorise vrai l’adoration, pena doute ki nou pou gagne la joie ek bann grand recompense.—Lire Proverbes 19:17; Luc 16:9.
“Pa sonne trompette devant toi”
18. Dan ki sens nou pa pou “gagne okenn recompense” ar nou Papa ki dan le ciel?
18 “Faire bien attention pou pa pratik zot justice devant bann zom, pou ki bannla remark zot, sinon, zot pa pou gagne okenn recompense avek zot Papa ki dan le ciel.” (Mat. 6:1) Kan Jésus ti pé dire “pratik zot justice,” li ti pé rod dire ki nou bizin ena enn conduite ki en accord avek volonté Bondié. Li pa ti rod dire ki fodé jamais nou faire bann bon action en publik, parski li ti dire so bann disciple ki zot bizin “faire ki zot la lumiere brillé devant bann dimoune.” (Mat. 5:14-16) Mais nou pa pou “gagne okenn recompense” avek nou Papa ki dan le ciel si nou faire kitsoz zis ‘pou ki bann dimoune remark nou’ ek admire nou, pareil couma bann acteur lor enn la scene theatre. Si nou ena bann mobile coumsa, nou pa pou ena enn bon relation avek Bondié ek nou pa pou gagne bann benediction eternel ki so Royaume pou amené.
19, 20. (a) Ki Jésus ti pé rod dire kan li ti koz kont bann ki ti “sonne trompette” kan zot ti faire “bann don misericorde”? (b) Couma nou kapav faire ki nou la main gauche pa koné seki nou la main droite pé faire?
19 Si nou ena enn bon l’attitude, nou pou suive conseil Jésus: “Alors, kan to faire bann don misericorde, pa sonne trompette devant toi, pareil couma bann hypocrite faire dan bann synagogue ek dan la rue, pou ki dimoune donne zot la gloire. Vrai-mem mo dire zot, zot pé gagne deja tou zot recompense.” (Mat. 6:2) Bann “don misericorde” ti bann don ki ti pé faire pou aide bann dimoune ki ti dan difficulté. (Lire Isaïe 58:6, 7.) Jésus ek so bann zapotre ti ena enn la caisse pou aide bann dimoune misere. (Jean 12:5-8; 13:29) Bann dimoune pa ti vrai-mem sonne bann trompette kan zot ti faire sa bann don-la. Alors, li clair ki Jésus ti pé servi enn hyperbole, setadir enn l’exemple exageré kan li ti dire ki fodé pa nou “sonne trompette” devant nou kan nou faire bann “don misericorde.” Kan nou faire sa qualité don-la, fodé pa nou faire tou dimoune koné, pareil couma bann Pharisien ti pé faire. Jésus ti appel bannla bann hypocrite parski zot ti pé faire vantard avek zot bann don “dan bann synagogue ek dan la rue.” Sa bann hypocrite-la ti pé “gagne deja tou zot recompense.” Bann zom ti pou loué zot ek kitfois zot ti pou gagne enn place devant dan synagogue pré kot bann rabbin ki ti ena enn grand reputation, sa c’est sel recompense ki zot ti pou gagné, parski Jéhovah Li, Li pa ti pou donne zot nanyin. (Mat. 23:6) Couma alors bann disciple Christ ti bizin agir? Jésus ti faire zot koné—ek nou aussi, kan li ti dire:
20 “Mais toi, kan to faire bann don misericorde, pa laisse to la main gauche koné ki to la main droite pé faire, pou ki kan to faire bann don misericorde, to faire zot en secret; lerla, to Papa ki pé guetté en secret pou rann toi sa.” (Mat. 6:3, 4) En general, nou deux la main travail ensam. Alors, kan nou faire enn maniere ki nou la main gauche pa koné seki nou la main droite pé faire, sa vedir ki nou pa faire tou dimoune koné ki nou pé faire bann don misericorde, pa mem bann dimoune ki bien proche ar nou pareil couma la main gauche été avek la main droite.
21. Couma Jéhovah “ki pé guetté en secret” pou rann nou seki nou faire?
21 Si nou pa faire vantard kan nou aide lezot, nou “bann don misericorde” pou faire en secret. Lerla, nou Papa “ki pé guetté en secret” pou rann nou sa. Parski nou Papa reste dan le ciel ek Li invisible pou bann dimoune, alors comparé avek bann dimoune, Li reste “en secret.” (Jean 1:18) Jéhovah, “ki pé guetté en secret” rann nou seki nou faire kan Li permette nou pou ena bann bon relation avek Li, kan Li pardonne nou bann peché ek kan Li pou donne nou la vie eternel. (Prov. 3:32; Jean 17:3; Éph. 1:7) Oui, sa vaut beaucoup plus ki gagne bann louange ar bann zom!
Bann parole ki ena valeur ki nou bizin apprecié
22, 23. Kifer nou bizin apprecié bann parole ki Jésus inn dire?
22 Ena vrai-mem bann tresor spirituel dan sa Sermon ki Jésus ti faire lor montagne-la. Dan sa Sermon-la nou trouve bann parole ki ena valeur ki kapav donne nou la joie mem dan sa le monde ki rempli ar probleme-la. Oui, nou pou heureux si nou apprecié bann parole Jésus ek si nou laisse zot influence nou l’attitude ek nou conduite.
23 Tou dimoune ki “tann” bann parole ki Jésus inn enseigné ek “mette zot en pratik” pou gagne bann benediction. (Lire Matthieu 7:24, 25.) Alors, anou bien decidé pou suive bann conseil ki Jésus inn donné. Dan dernier lartik sa serie-la, nou pou examine lezot kitsoz ki Jésus ti dire dan so Sermon lor montagne.
Couma ou pou reponn?
• Kifer li important ki nou faire la paix avek enn frere ki nou finn offensé?
• Couma nou kapav evité ki nou “lizié droite” faire nou tombé?
• Ki l’attitude nou bizin ena en rapport avek donné?
[Zimage lor page 9]
Li vrai-mem bon ki nou “faire la paix” avek enn chretien ki nou finn offensé!
[Zimage lor page 10, 11]
Jéhovah beni bann ki donne avek la joie