Parole Jéhovah vivant

KI PÉ attann bann ki adore Jéhovah ek bann ki pa adore Li? Ki pou arrive Satan ek so bann demon dan l’avenir? Ki benediction bann dimoune obeissant pou gagné pendant Regne mille an Christ? Nou kapav trouve reponse sa bann question-la ek lezot question bien important encore dan Révélation 13:1–22:21.a Dan sa bann chapitre-la ena 9 dernier vision parmi sa 16 vision ki l’apotre Jean ti gagné vers la fin premier siecle nou lepok.

Jean ecrire: “Heureux sa dimoune ki lire fort ek bann ki tann bann parole sa prophetie-la, ek ki suive bann kitsoz ki finn ecrire ladan.” (Rév. 1:3; 22:7) Kan nou lire ek nou applik seki nou aprann dan livre Révélation, sa kapav ena enn l’influence lor nou leker. Sa faire nou la foi en Bondié ek en so Garson, Jésus Christ, vinn pli solide, ek donne nou enn l’avenir extraordinaire.b—Héb. 4:12.

PÉ VERSE SEPT BOL COLERE BONDIÉ

(Rév. 13:1–16:21)

Révélation 11:18 dire: “Bann nation inn commence en colere, ek [colere Bondié] inn vini, ek le temps ki’nn fixé . . . pou detruire bann ki pé detruire la terre.” Pou montré kifer colere Bondié inn vini, huitieme vision decrire seki ‘enn zanimo sauvage ki ena dix corne ek sept la tête,’ pé faire.—Rév. 13:1.

Dan neuvieme vision, Jean trouve “l’Agneau ki ti pé deboute lor montagne Sion” ek avek li ena “cent quarante-quatre mille.” “Finn acheté zot parmi bann dimoune.” (Rév. 14:1, 4) Apré sa, bann ange annonce enn message. Dan prochain vision, Jean trouve “sept ange avek sept plaie.” Pena doute ki c’est Jéhovah Li-mem ki donne sa bann ange-la l’ordre pou verse “sa sept bol colere Bondié-la” lor different partie le monde Satan. Dan sa bann bol-la ena bann message ek bann l’avertissement concernant bann jugement ki Bondié pou appliké. (Rév. 15:1; 16:1) Sa deux vision-la donne bann detail lor bann lezot jugement ki Royaume Bondié pou amené ki ena en rapport avek troisieme malheur ek sonnerie septieme trompette.—Rév. 11:14, 15.

Reponse pou bann question biblik:

13:8—Ki été “rouleau la vie ki pou l’Agneau”? Sa rouleau-la c’est enn rouleau symbolik kot ena zis nom bann ki pou regne avek Jésus Christ dan so Royaume ki trouve dan le ciel. Parmi bann nom ki ena dan sa rouleau-la, ena nom bann chretien oint ki encore lor la terre, ki ena l’esperance pou vive dan le ciel.

13:11-13—Couma eski sa zanimo sauvage avek deux corne-la agir couma enn dragon ek li faire difé sorti dan le ciel? La Bible dire ki sa zanimo sauvage ki ena deux corne-la, setadir Puissance mondial anglo-américain, koz couma enn dragon. Sa montré ki li servi bann menace, bann pression ek la violence pou force bann dimoune accepté fason ki li dominé. Li faire difé desann depuis dan le ciel dan sens ki li pé soi-disant montré ki li enn vrai prophete kan li pretann ki l’inn gagne victoire kont bann la force le mal dan toulé-deux la guerre mondial ki finn ena dan 20^eme siecle, ek ki l’inn gagne victoire lor communisme.

16:17—Ki été “l’air” lor ki enn ange verse septieme bol? “L’air” represente bann pensée ki sorti ar Satan, “l’esprit [disposition mental] ki pé agir asterla dan bann garson desobeissance.” Tou bann ki forme parti dan mauvais le monde Satan, respire sa l’air empoisonné-la.—Éph. 2:2.

Bann leson pou nou:

13:1-4, 18. “Enn zanimo sauvage” ki represente bann gouvernement humain sorti “dan la mer” setadir, dan l’humanité ki pa stable. (Is. 17:12, 13; Dan. 7:2-8, 17) Sa zanimo sauvage ki’nn crée ek ki’nn gagne pouvoir grace a Satan, porte numero 666, seki mette l’accent lor ki quantité imparfait li imparfait. Si nou comprend bien kisannla sa zanimo sauvage-la representé, sa pou aide nou pou pa suive li avek admiration ni adore li pareil couma bann dimoune en general pé faire.—Jean 12:31; 15:19.

13:16, 17. Mem si nou gagne bann difficulté kan nou faire nou bann l’activité toulé-jour, couma par exemple kan nou “acheté ou-soit vendé,” fodé pa nou laisse sa zanimo sauvage-la influence nou ek dirige nou la vie. Si nou accepté sa ‘mark zanimo sauvage-la lor nou la main ou-soit lor nou front’ sa vedir ki nou laisse li controle nou bann action ek influence nou pensée.

14:6, 7. Message ki sa ange-la pé annoncé montré nou ki nou bizin annonce la bonne nouvelle concernant Royaume Bondié ki’nn etabli, sans tardé. Nou bizin aide nou bann l’etude pou developpe enn la crainte pou Bondié ek pou donne Jéhovah la gloire.

14:14-20. Kan “recolte lor la terre” pou fini, setadir kan rassemblement tou bann ki pou sapé pou terminé, pou arrive l’heure pou ange-la jette tou seki li finn recolté ar “pié raisin ki lor la terre” “dan grand pressoir di-vin colere Bondié.” Sa pié raisin-la c’est bann gouvernement visible ki pourri, ki Satan servi pou dirige bann dimoune, ek bann “grappe” c’est bann mauvais fruit ki zot produire. Bientot tousala pou detruire pou touletan. Nou bizin determiné pou pa laisse-nou influencé par sa pié raisin-la.

16:13-16. “Bann parole inspiré ki impur” represente bann fausse l’idée ki sorti ar bann demon. L’intention ki ena derriere sa bann fausse l’idée-la c’est pou empeche bann le roi lor la terre laisse-zot influencé kan bann ange verse sept bol colere Bondié lor la terre, mais aussi pou manipule zot pou ki zot oppose-zot ar Jéhovah.—Mat. 24:42, 44.

16:21. Zis avant la fin sa le monde-la, bann jugement ki Jéhovah pou annoncé kont mauvais le monde Satan kapav surement implik bann jugement direct bien-bien severe, pareil coumadir la grêle pé tombe lor zot. Mais malgré sa, bann dimoune pou contigne blaspheme Bondié.

LE ROI KI’NN REMPORTE LA VICTOIRE, REGNÉ

(Rév. 17:1–22:21)

“Babylone la grande,” l’empire mondial tou bann fausse religion, li enn parti bien degoutant dan mauvais le monde Satan. Onzieme vision decrire li couma enn “grand prostitué”—enn femme ki amenn enn mauvais la vie—ki “pé assizé lor enn zanimo sauvage couleur rouge vif.” “Dix corne” sa zanimo sauvage ki pé sarié li-la, pou detruire li net. (Rév. 17:1, 3, 5, 16) Prochain vision compare sa prostitué-la ar enn “grand la ville.” Sa vision-la annonce so destruction ek li faire enn l’appel ar le peuple Bondié, pou ki zot pa tardé pou “sorti ladan.” Beaucoup dimoune dan deuil a cause destruction sa grand la ville-la. Mais ena enn grand la joie dan le ciel, a cause “mariage l’Agneau.” (Rév. 18:4, 9, 10, 15-19; 19:7) Dan 13^eme vision, enn cavalier lor “enn cheval blanc” al laguerre kont bann nation ek li detruire mauvais le monde Satan.—Rév. 19:11-16.

Ki pou arrive ‘serpent originel, li-mem ki Diable ek Satan’? Kan pou ‘jette li dan lac difé’? Sa c’est enn sujet ki 14^eme vision kozé. (Rév. 20:2, 10) Deux dernier vision donne nou enn l’idée couma la vie pou été pendant Regne mille an. A mesure ki “revelation” ki Jean inn gagné pé al fini, li trouve enn ‘la riviere de l’eau la vie ki pé coulé au milieu grand la rue,’ ek ‘tou bann ki soif ’ pé gagne enn l’invitation extraordinaire.—Rév. 1:1; 22:1, 2, 17.

Reponse pou bann question biblik:

17:16; 18:9, 10—Kifer “bann le roi lor la terre” pé chagrin a cause sa puissance ki zot-mem zot inn detruire-la? Zot chagrin pou bann raison egoïste. Apré destruction Babylone la Grande, bann le roi lor la terre surement realisé ki quantité zot ti bizin li. Zot ti cachiette derriere Babylone la Grande pou domine bann dimoune, ek li ti faire zot bann action passe pou bann action ki bon lor plan religieux. Babylone la Grande inn aussi aide zot pou engage bann jeune pou al laguerre. En plus, li ti joué enn role bien important: li ti permette ki bann dimoune soumette ar zot.

19:12—Couma eski pena personne a part Jésus li-mem, ki konn nom ki li ena? Li parette ki sa nom-la represente position ek bann responsabilité ki Jésus ena pendant jour nou Seigneur, pareil couma Isaïe 9:6 cité. A part li, personne pa konn sa nom-la, parski zis li tousel ki ena sa bann responsabilité-la ek zis li tousel ki kapav comprend ki sa vedir ena enn grand position coumsa. Mais Jésus partage certain sa bann responsabilité-la avek bann ki forme partie groupe la marié, en realité ‘li ecrire so nouveau nom lor zot.’—Rév. 3:12.

19:14—Kisannla ki pou lor bann cheval ensam avek Jésus pendant la guerre Har-Maguédôn? La Bible dire ki pou ena “bann l’armée ki dan le ciel” ki pou ensam avek Jésus dan la guerre Bondié. Dan sa l’armée-la pou ena bann ange ek aussi bann chretien oint ki’nn gagne la victoire ek ki’nn fini gagne zot recompense pou vive dan le ciel.—Mat. 25:31, 32; Rév. 2:26, 27.

20:11-15—Ki nom k’inn ecrire dan “ rouleau [ou-soit “livre”] la vie”? Dan sa rouleau-la ena nom tou bann ki pou gagne la vie eternel—bann chretien oint, bann membre la grande foule, ek bann serviteur Bondié ki fidele ki pou konn “resurrection bann dimoune ki juste.” (Actes 24:15; Rév. 2:10; 7:9) Pou ecrire nom bann dimoune ki pou regagne la vie pendant ‘resurrection bann ki pa juste’ dan “rouleau la vie,” a condition ki zot agir en accord avek ‘bann kitsoz ki ecrire dan bann rouleau,’ setadir bann instruction ki nou pou gagné pendant Regne mille an. Mais Bondié pa ecrire sa bann nom-la avek l’encre ki pa kapav effacé. Si bann chretien oint montré-zot fidele ziska la mort, jamais zot nom pa pou effacé dan sa rouleau-la. (Rév. 3:5) Kan zot inn fini passe l’epreuve final, a la fin mille an, nom bann ki gagne la vie lor la terre jamais pa pou effacé.—Rév. 20:7, 8.

Bann leson pou nou:

17:3, 5, 7, 16. Grace a “sagesse ki sorti la-haut” nou arrivé comprend “mystere sa femme ek sa zanimo sauvage [couleur rouge vif] ki pé sarié li-la.” (Jacq. 3:17) Sa zanimo sauvage symbolik-la ti commencé en tant ki Societé des Nations ek plitar li’nn regagne la vie en tant ki l’Organisation Nations unies. Nou finn arrivé comprend sa mystere-la. Eski sa pa bizin pousse nou pou preche la bonne nouvelle lor Royaume Bondié ek annonce jour jugement Jéhovah avek zele?

21:1-6. Nou kapav cent pour cent sur ki bann benediction ki pou ena kan Royaume Bondié pou regné, ki’nn annoncé, pou realisé. Kifer? Parski concernant sa bann benediction-la, la Bible dire: “Zot finn accompli!”

22:1, 17. “La riviere de l’eau la vie” represente bann disposition ki Jéhovah inn prend pou delivré bann dimoune obeissant ar peché ek la mort. Enn tipé sa de l’eau-la li disponible zordi. Fodé pa nou contente-nou zis accepté avek reconnaissance sa l’invitation pou vini ek “prend de l’eau la vie sans payé” mais nou bizin aussi offert sa l’invitation-la lezot dimoune avek enn grand zele!

[Note]

[Zimage lor page 25]

Oui, bann dimoune obeissant pou konn bann benediction extraordinaire kan Royaume Bondié pou regné!