“Reste lor zot garde”
“La fin tou kitsoz finn kosté. . . . Reste lor zot garde pou zot kapav prié.”—1 PIERRE 4:7.
1. Ki ti theme l’enseignement Jésus?
KAN Jésus Christ ti lor la terre, theme so l’enseignement ti Royaume Bondié. Par moyen sa Royaume-la, Jéhovah pou justifié so souveraineté universel ek pou sanctifié so nom. A cause sa, Jésus ti enseigne so bann disciple pou demann Bondié dan la priere: “Ki to royaume vini. Ki to volonté faire lor la terre pareil couma dan le ciel.” (Mat. 4:17; 6:9, 10) Sa Royaume, ou-soit sa gouvernement-la bientot pou detruire le monde Satan ek pou veillé ki volonté Bondié faire partout lor la terre. Pareil couma Daniel ti annoncé, Royaume Bondié “pou crase tou bann lezot royaume [ki existé asterla] ek li pou fini zot, ek li-mem li pou regné pou touletan.”—Dan. 2:44.
2. (a) Couma bann disciple Jésus ti pou koné ki li ti’nn commence regné dan so Royaume? (b) Ki sa signe-la ti pou montré encore?
2 Parski l’arrivée sa Royaume-la ti ena enn grand l’importance pou bann disciple Jésus, zot ti demann li: “Ki signe pou montré to presence ek conclusion sa systeme-la?” (Mat. 24:3) Presence Christ dan so Royaume ti pou invisible pou bann dimoune lor la terre, a cause sa, Jésus ti donne enn signe ki ti pou visible. Dan sa signe-la ti pou ena plusieurs l’evenement ki la Bible ti annoncé. Coumsa, bann disciple Jésus ki ti pou vivant dan sa lepok-la ti pou kapav comprend ki li’nn commence regné dan le ciel. Sa ti pou aussi enn signe ki montré commencement periode ki la Bible appel “dernier jour” sa mauvais le monde ki ena zordi-la.—2 Tim. 3:1-5, 13; Mat. 24:7-14.
Reste lor zot garde dan dernier jour
3. Kifer bann chretien bizin reste lor zot garde?
3 L’apotre Pierre ti ecrire: “La fin tou kitsoz finn kosté. Alors, garde zot bon sens ek reste lor zot garde pou zot kapav prié.” (1 Pierre 4:7) Bann disciple Jésus ti pou bizin reste lor zot garde ek veille bien bann l’evenement ki ti pou ena dan le monde, ki ti pou montré ki li’nn commence regné. Li ti pou pli important encore ki zot reste lor zot garde a mesure ki la fin sa systeme-la ti pou kosté. Jésus ti dire so bann disciple: “Contigne veillé, parski zot pa koné kan maitre lakaz-la pé vini [pou juge le monde Satan].”—Marc 13:35, 36.
4. Montré difference ki ena entre l’attitude bann dimoune ki forme partie dan le monde Satan ek l’attitude bann Témoins de Jéhovah. (Guette l’encadré aussi.)
4 Bann dimoune en general zot enba domination Satan, ek zot pa’nn prend compte signification bann l’evenement ki’nn arrivé dan le monde. Zot pa comprend ki Christ inn prend pouvoir dan so Royaume. Mais bann vrai disciple Christ zot, zot inn reste lor zot garde ek zot inn comprend vrai signification bann l’evenement ki’nn arrivé pendant dernier siecle. Depuis 1925, bann Témoins de Jéhovah inn reconette ki Premier Guerre mondial ek bann l’evenement ki’nn suive apré, zot bann preuve solide ki montré ki Christ inn prend pouvoir dan so Royaume en 1914. A cause sa nou kapav dire ki bann dernier jour sa mauvais le monde ki dominé par Satan-la, inn commencé. Beaucoup dimoune ki observe bann l’evenement dan le monde, mem si zot pa konn signification sa bann l’evenement-la, reconette ki ena enn grand difference entre lepok avant Premier Guerre mondial ek lepok ki’nn suive apré.—Guette l’encadré “Enn lepok kot ena bann trouble, inn commencé.”
5. Kifer li bien important ki nou contigne reste lor nou garde?
5 Sa faire preské enn siecle ki ena bann l’evenement horrible ki pé arrivé partout lor la terre ki montré ki nou pé vive lepok dernier jour. Reste bien tigit le temps avant ki Jéhovah donne Christ l’ordre pou dirige bann l’armée ange bien puissant kont le monde Satan. (Rév. 19:11-21) Bann vrai chretien inn gagne l’ordre pou contigne veillé. Alors, li bien important ki nou contigne faire sa pendant ki nou pé attann la fin sa le monde-la. (Mat. 24:42) Nou bizin contigne veillé ek enba direction Christ, nou bizin faire enn travail precis partout dan le monde entier.
Enn travail mondial
6, 7. Couma l’activité predication lor Royaume Bondié inn konn enn grand l’accroissement pendant lepok dernier jour?
6 Parmi bann l’evenement ki ti annoncé pou forme partie dan signe ki montré ki nou pé vive bann dernier jour sa mauvais le monde-la, ena enn travail ki bann serviteur Jéhovah bizin faire. Jésus ti decrire sa travail mondial-la kan li ti cite plusieurs kitsoz ki ti pou arrivé dan lepok la fin. Dan so prophetie ti ena sa phrase bien important-la: “Sa bon nouvelle lor royaume-la pou preché partout kot dimoune resté lor la terre couma enn temoignage pou tou bann nation; ek lerla la fin pou vini.”—Mat. 24:14.
7 Reflechi lor certain kitsoz ki ena enn rapport avek sa l’evenement ki forme partie dan prophetie Jésus-la. Kan bann dernier jour ti commencé en 1914, ti ena bien tigit dimoune ki ti pé preche la bonne nouvelle. Mais zordi, ena beaucoup plus dimoune ki pé participe dan sa l’activité-la ek zot pé contigne augmenté. Ena plus ki 7,000,000 Témoins de Jéhovah dan plus ki 100,000 congregation, ki pé preché partout lor la terre. En 2008, pou Mémorial la mort Christ ti ena 10,000,000 dimoune en plus ki ti rassemblé avek bann Témoins. Sa ti represente enn grand l’augmentation par rapport ar l’année avant.
8. Kifer l’opposition pa’nn kapav empeche nou predication reussi?
8 C’est vrai-mem enn grand temoignage lor Royaume Bondié ki bann dimoune dan tou nation pé gagné avant la fin vini! Ek sa pé arrivé malgré ki Satan li “bondié sa systeme-la.” (2 Cor. 4:4) Systeme politik, religieux ek commercial sa le monde-la ek tou bann moyen ki le monde servi pou fann bann l’information, zot influencé par Satan. Alors, pou ki raison sa travail predication-la pé reussi coumsa? C’est parski li ena soutien Jéhovah. A cause sa, predication Royaume Bondié pé contigné dan enn fason extraordinaire malgré tou bann zeffort ki Satan pé faire pou arrete li.
9. Kifer nou kapav dire ki nou prosperité lor plan spirituel, li enn mirak?
9 Nou kapav dire ki c’est enn mirak kan nou trouve succès ki nou l’activité predication inn gagné ek l’accroissement ek prosperité spirituel peuple Bondié. Sans l’aide Bondié, setadir direction ek protection ki li donne so peuple, li ti pou impossible pou preché. (Lire Matthieu 19:26.) L’esprit saint Bondié ena enn l’effet lor leker bann dimoune ki reste lor zot garde ek ki disposé pou servi. Nou kapav sur ki grace a sa, l’activité predication pou contigné ziska li terminé avek enn grand succès, “ek lerla la fin pou vini.” Sa ler-la pé kosté vite-vite.
“La grande tribulation”
10. Couma Jésus ti decrire la grande tribulation ki pé vini?
10 La fin sa mauvais le monde-la pou commencé kan pou ena seki la Bible appel “la grande tribulation.” (Rév. 7:14) La Bible pa dire nou comié le temps sa pou duré, mais Jésus ti dire: “Lerla pou ena enn grand tribulation couma jamais pa finn ena depuis commencement le monde ziska zordi, non, ek ki pa pou ena encore.” (Mat. 24:21) Kan nou mazinn tribulation ki sa le monde-la inn deja koné, couma par exemple seki ti arrivé pendant Deuxieme Guerre mondial, kot apepré 50 a 60 million dimoune ti’nn mort, sa tribulation ki pou vini-la pou bien-bien terrible! Li pou terminé avek la guerre Har-Maguédôn. C’est lerla ki Jéhovah pou largue so bann l’armée pou tire tou ti trace le monde Satan.—Rév. 16:14, 16.
11, 12. Ki l’evenement pou faire nou koné ki la grande tribulation pou commencé?
11 Bann prophetie la Bible pa dire nou ki date premier partie la grande tribulation pou commencé. Selman, li dire nou ki l’evenement extraordinaire pou faire nou koné ki li’nn commencé. Sa l’evenement-la c’est destruction tou bann fausse religion par bann systeme politik. Dan bann prophetie la Bible ki trouve dan Révélation chapitre 17 ek 18, fausse religion comparé ar enn prostitué ki’nn gagne bann relation immoral avek bann systeme politik lor la terre. Révélation 17:16 montré ki bientot sa bann systeme politik-la “pou detesté sa prostitué-la, ek zot pou prend tou seki li ena ek zot pou mette li touni; zot pou mange so la chair ek zot pou brule li dan difé ziska ki li fini net.”
12 Kan l’heure pou vini pou sa arrivé, Bondié pou “mette dan zot leker [bann chef politik] pou realise so pensée” setadir pou detruire tou bann fausse religion. (Rév. 17:17) Alors, nou kapav dire ki dan enn sens c’est Bondié ki pou faire sa destruction-la. Sa pou so jugement kont bann religion hypocrite ki finn enseigne depuis tou sa le temps-la bann doctrine ki contraire ar volonté Bondié ek ki finn persecute so bann serviteur. Le monde en general pa pé attann ki la fausse religion detruire. Mais bann serviteur fidele Jéhovah zot, zot pé attann sa. Ek pendant toute longue dernier jour, zot finn annonce sa bann dimoune.
13. Ki montré ki la fin fausse religion pou arrive vite?
13 Bann dimoune pou gagne enn grand sok kan zot pou trouve fausse religion detruire. Enn prophetie la Bible montré ki mem certain “le roi lor la terre” pou dire concernant sa destruction-la: “Bien triste, bien triste, . . . parski dan enn heure temps to jugement inn arrivé!” (Rév. 18:9, 10, 16, 19) L’expression “enn heure temps” ki la Bible servi, montré ki sa l’evenement-la pou arrivé assez vite.
14. Kan finalement bann l’ennemi Jéhovah pou attak so bann serviteur, couma Bondié pou reagir?
14 Nou comprend ki enn tipé le temps apré destruction fausse religion, pou ena enn l’attak lor bann serviteur Jéhovah ki finn preche so bann message jugement. (Ézék. 38:14-16) Kan sa pou commencé, bann ki pou faire sa l’attak-la pou bizin affronte Jéhovah, ki promette pou protege so bann serviteur fidele. Jéhovah dire: “Dan mo zele ek dan mo colere ki’nn prend couma enn difé, mo pou bizin kozé. . . . Ek zot pou bizin koné ki mo-mem Jéhovah.” (Lire Ézékiel 38:18-23.) Dan so Parole, Bondié dire: “Seki pé touche zot [so bann serviteur fidele], pé touche mo la grain lizié.” (Zek. 2:8) Alors, kan so bann l’ennemi pou commence attak so bann serviteur partout lor la terre, Jéhovah pou faire kitsoz. Li pou agir ek c’est sa ki pou amenn dernier partie la grande tribulation—Har-Maguédôn. Christ pou dirige bann l’armée ange puissant ek zot pou applik bann jugement Jéhovah kont le monde Satan.
Ki l’effet sa bizin ena lor nou
15. Nou koné ki la fin sa le monde-la li pré, alors ki l’effet sa bizin ena lor nou?
15 Nou koné ki la fin sa mauvais le monde-la pé kosté vite-vite, alors ki l’effet sa bizin ena lor nou? L’apotre Pierre ti ecrire: “Parski tou sa bann kitsoz-la bizin disparette, ki qualité dimoune zot bizin été par bann action ki montré ki zot conduite saint ek ki zot ena l’attachement pou Bondié!” (2 Pierre 3:11) Sa bann parole-la montré nou l’importance pou veille bien lor nou-mem pou guetté si nou conduite li en accord avek bann principe Bondié. Nou pou aussi veillé ki dan nou la vie nou pé faire bann action ki montré nou l’attachement pou Bondié, bann action ki montré ki nou ena l’amour pou Jéhovah. Parmi nou bann action, nou pou faire tou seki nou kapav pou preche la bonne nouvelle lor Royaume Bondié avant la fin vini. Pierre ti ecrire aussi: “La fin tou kitsoz finn kosté. . . . Reste lor zot garde pou zot kapav prié.” (1 Pierre 4:7) Nou vinn pli proche ar Jéhovah ek montré nou l’amour pou Li kan nou prié Li souvent pou demann Li dirige nou par moyen so l’esprit saint ek par so l’organisation mondial.
16. Kifer nou bizin suive bien conseil ki Bondié donne nou?
16 Nou pé vive enn lepok bien dangereux, a cause sa nou bizin suive bien sa conseil ki Parole Bondié donne nou-la: “Faire bien attention ki zot maniere marché pa pareil couma bann dimoune ki pena okenn sagesse, mais plutot couma bann dimoune ki ena la sagesse, ek reacheté le temps ki bizin pou zot-mem, parski nou pé vive dan enn mauvais lepok.” (Éph. 5:15, 16) Zordi, ena plus mechanceté lor la terre ki jamais pa finn ena avant dan l’Histoire. Satan inn manigance beaucoup kitsoz pou empeche bann dimoune faire volonté Bondié ou-soit zis pou detourne zot l’attention. En tant ki bann serviteur Bondié, nou konn sa bien ek nou pa envie laisse nanyin affaibli nou fidelité envers Bondié. Nou koné aussi seki pou arrivé bientot, ek nou mette nou confiance en Jéhovah ek dan so projet.—Lire 1 Jean 2:15-17.
17. Raconté couma bann ki pou survive Har-Maguédôn pou reagir kan pou ena resurrection.
17 Bondié inn faire promesse pou redonne bann dimoune mort, la vie, ek sa promesse-la pou realisé, parski “pou ena enn resurrection bann dimoune ki juste ek bann dimoune ki pa juste, toulé-deux.” (Actes 24:15) Remarké couma sa promesse-la mette l’accent lor la: “Pou ena enn resurrection”! Pena okenn doute lor la, parski Jéhovah inn donne so parole! Isaïe 26:19 faire sa promesse-la: “To bann mort pou vive. . . . Levé ek criyé dan la joie, zot bann ki reste dan la poussiere! . . . La terre li-mem pou laisse tombé, setadir donne naissance mem bann ki sans okenn la force dan la mort.” Sa bann parole-la ti ena enn premier realisation kan dan le passé peuple Bondié ti retourne dan zot pays. Sa faire nou ena confiance ki bientot sa promesse-la pou realisé vrai-mem dan le monde nouveau. Pou ena enn la joie extraordinaire kan bann ki pou ressuscité pou retrouve bann dimoune ki zot content! Oui, la fin le monde Satan bien pré, ek le monde nouveau ki Bondié inn promette pé kosté. Alors, li bien important ki nou reste lor nou garde!
Eski ou rappel?
• Ki ti theme l’enseignement Jésus?
• Ki quantité predication lor Royaume Bondié inn progressé?
• Kifer li bien important ki nou reste lor nou garde?
• Ki ou trouve encourageant concernant promesse ki trouve en Actes 24:15?
[L’encadré lor page 16, 17]
ENN LEPOK KOT ENA BANN TROUBLE, INN COMMENCÉ
Pendant preské 20 an, Alan Greenspan ti president Reserve federal américain, enn association ki veille lor tou bann systeme la banque en Amérique. En 2007, li ti ecrire enn livre ki appel: Le temps des turbulences. Ladan, li ti mette l’accent lor grand difference ki ena entre situation dan le monde avant 1914 ek situation ki’nn existé apré:
“Tou bann rapport ki’nn faire dan sa lepok-la montré ki avant 1914, li ti parette ki le monde ti pé progressé ek ki bann dimoune ek bann nation en general ti pé traite zot prochain avek plus respé; ti ena aussi bann progré dan fason ki bann dimoune ti pé vive entre zot dan la societé ek dan domaine technik; coumadir societé humain ti pou kapav vinn parfait. Dan dix-neuvieme siecle, nou’nn trouve la fin trafik bann esclave, enn trafik bien detestable. Li ti parette ki la violence ki ti pé tire tou dignité bann dimoune, ti pé diminué. . . . Pendant dix-neuvieme siecle,vitesse ki ti pé faire bann invention ti pé acceleré, ti’nn invente bann rail pou train, telephone, electricité, cinema, l’auto, ek enn quantité kitsoz electromenagé ki trop beaucoup pou mentionné. Science medical, qualité mangé ti’nn amelioré, ek bann dimoune dan beaucoup l’endroit ti kapav gagne de l’eau prop, tousala ti augmente l’esperance la vie bann dimoune . . . Le monde entier ti pensé ki sa progré-la pou contigné.”
Mais . . . ”Premier Guerre mondial ti detruire la societé ek civilisation beaucoup plus ki Deuxieme Guerre mondial ti faire, mem si Deuxieme Guerre mondial ti touye pli beaucoup dimoune—Premier Guerre mondial ti detruire enn l’idée. Mo pa kapav efface souvenir sa bann l’année avant Premier Guerre mondial-la dan mo memoire. Sa lepok-la, li ti parette ki pa ti ena okenn l’obstacle ni okenn limite pou progré l’humanité. Zordi, nou regard li bien-bien different ar seki li ti été ena enn siecle, mais kitfois li pli pré ar realité. Eski la peur, rechauffement la terre, ou-soit population ki pé gagne plus pouvoir, pou ena mem l’effet lor nou societé ki seki Premier Guerre mondial ti ena dan so lepok? Personne pa kapav donne enn reponse sur pou sa question-la.”
Alan Greenspan rappel ki kan li ti pé al l’université, enn economiste ki appel Benjamin Anderson (1886-1949) ti dire: “Bann ki ti adulte ki rappel ek ki comprend couma le monde ti été avant Premier Guerre mondial, koz sa lepok-la avek beaucoup tristesse. Ti ena enn sentiment securité ki jamais encore pa’nn ré-existé.”—Economics and the Public Welfare.
G. Meyer ti tire mem conclusion dan so livre Un monde défait (angl.), imprimé en 2006. Li ti ecrire: “Souvent nou dire ki bann l’evenement historik inn ‘change tou.’ Pou enn fois sa li vrai dan cas Premier Guerre mondial. Sa laguerre-la vrai-mem inn change tou: pa zis bann frontiere, pa zis bann gouvernement ek destin bann nation, mais la fason ki bann dimoune considere le monde ek zot-mem. Sa finn provok coumadir enn trou dan le temps, li’nn deconnecté le monde ki ti existé apré la guerre ar tou seki ti ena avant.”
[Zimage lor page 18]
Pendant Har-Maguédôn, Jéhovah pou largue so bann l’armée ange bien puissant