Jéhovah merité ki nou loué Li dan l’unité
“Loué Yah!”—PS. 111:1.
1, 2. Ki mot “Alleluia” vedir, ek couma servi sa mot-la dan bann l’Écritures grecques chrétiennes?
“ALLELUIA!” Souvent nou tann bann membre religion la chretienté servi sa l’expression-la. Certain dimoune servi sa l’expression-la toulé-jour dan zot conversation pou attire l’attention lor seki zot dire. Mais bien tigit dimoune konn so signification sacré, ek beaucoup dimoune ki servi sa mot-la deshonore Bondié par zot conduite. (Tite 1:16) Enn dictionnaire lor la Bible expliké ki “Alleluia” c’est enn “mot ki bann ecrivain plusieurs psaumes ti servi pou invite tou dimoune pou loué Jéhovah ensam avek zot.” Beaucoup bibliste precisé ki “Alleluia” vedir “ ‘Loué Yah,’ [setadir] Jéhovah.”
2 A cause sa, Traduction du monde nouveau traduire l’expression ki trouve dan Psaume 111:1 par “Loué Yah!” Enn fason ki ecrire sa mot-la en grec, parette quatre fois dan Révélation 19:1-6 pou celebré la fin fausse religion. Kan sa pou arrivé, bann vrai adorateur pou ena enn bon raison pou servi l’expression “Alleluia” avek respé.
Bann grand kitsoz ki Li’nn crée
3. Pou ki raison principal nou rassemblé regulierement?
3 Sa dimoune ki’nn compose Psaume 111-la donne beaucoup raison pou montré kifer Jéhovah merite bien ki nou loué Li dan l’unité. Verset 1 dire: “Mo pou loué Jéhovah avek tou mo leker, ensam avek bann dimoune droite ki proche avek moi, ek dan l’assemblée.” Bann Témoins de Jéhovah zordi ena mem sentiment. L’objectif principal pou kifer nou rassemblé ensam regulierement, ki li dan bann congregation ou-soit dan bann grand l’assemblée c’est pou loué Jéhovah.
4. Couma bann dimoune kapav rod bann travail Jéhovah?
4 “Bann kitsoz ki Jéhovah faire, zot grand, tou bann ki content sa bann kitsoz-la, rod sa.” (Ps. 111:2) Remark mot “rod.” Dapré enn livre reference, kapav applik sa verset-la ar bann dimoune ki “medite ek etudié” bann travail Bondié “avek enn grand sincerité.” Tou bann creation Jéhovah zot ena enn but extraordinaire. Li’nn mette soleil, la terre ek la lune sakenn dan so place, ek ena distance ki bizin entre zot, pou ki nou la terre kapav gagne chaleur ek la lumiere, la-nuit ek li-jour, bann saison ek bann marée.
5. Ki bann progré pou comprend l’univers finn montré?
5 Bann scientifik finn decouvert beaucoup kitsoz concernant position la terre dan nou systeme solaire ek aussi concernant la lune: so grandeur, so poids ek le tour ki li faire autour la terre, zot inn trouvé ki tousala parfait pou ki la terre gagne tou seki li bizin. Position la lune, soleil ek la terre ek relation ki ena entre zot permette ki regulierement ena bann changement saison ki bien joli. En plus, nou finn aprann beaucoup lor fason precis couma bann la force naturel dan l’univers finn reglé. C’est a cause sa ki dan enn lartik ki ena titre “Enn l’Univers ki’nn faire ‘par hasard,’ ” enn professeur ki enn ingenieur dan mecanik ti faire sa remark-la: “Li bien facile pou comprend kifer pendant sa 30 dernier l’année ki’nn passé-la, enn quantité scientifik finn change zot l’opinion, zot d’accord ki bizin ena beaucoup la foi pou croire ki l’univers finn existé par accident. Plus nou comprend couma nou la terre finn faire avek beaucoup soin, plus nou ena bann raison pou croire ki ena enn kikenn intelligent ki finn faire li.”
6. Ki ou sentiment lor fason ki Bondié inn faire bann dimoune?
6 Enn lot grand travail creation c’est fason ki Bondié finn faire nou. (Ps. 139:14) Kan Li’nn crée bann dimoune, Li’nn donne zot enn l’esprit ek enn lekor avek tou bann l’organe ki necessaire, ek capacité pou travail. Par exemple, ena bann capacité ki Bondié inn donne nou couma capacité pou kozé ek pou ecouté, ek aussi pou ecrire ek pou lire, bann capacité ki nou kapav considere couma bann mirak. Beaucoup dimoune ena sa bann capacité-la. Dan ou lekor aussi ena enn kitsoz extraordinaire—ou squelette ki permette ou pou deboute droite. Oui, fason ki ou lekor inn crée ek so capacité pou garde l’equilibre, pou bougé ek pou faire bann travail ek bann reaction chimik ki arrivé dan ou lekor, tousala impressionne nou beaucoup. En plus, ena bann connection entre nou bann nerf ki extraordinaire ek ki permette nou l’esprit ek nou bann sens fonctionné, ek bann scientifik pa’nn kapav invente nanyin ki pareil coumsa. En realité, c’est selman grace a l’esprit ek bann sens ki bann dimoune ena, ki zot kapav faire bann grand l’invention. Mem enn ingenieur ki pli qualifié ek ki ena plus capacité ki kapav existé, pa ti pou kapav faire nanyin ki aussi joli ek utile ki nou dix lé-doigt la main. Demann ou-mem: ‘Eski dimoune ti pou kapav faire bann grand travail dan art ek dan construction sans zot servi couma bizin bann lé-doigt ki Bondié inn donne zot?’
Bann grand travail Bondié ek so bann qualité
7. Kifer nou bizin considere la Bible couma enn parmi bann grand travail ki Jéhovah inn faire?
7 Parmi bann grand travail Jéhovah, ena bann kitsoz extraordinaire ki Li’nn faire pou bann dimoune ek nou kapav lire sa dan la Bible. La Bible li-mem c’est enn grand kitsoz ki Jéhovah inn faire ek tou bann livre ki ena ladan, zot en accord entre zot dan enn fason extraordinaire. Li pa pareil couma okenn lezot livre parski li’nn “inspiré par Bondié ek li utile pou enseigné.” (2 Tim. 3:16) Par exemple, premier livre la Bible, Genèse, expliké couma Bondié ti nettoye la terre ek ti tire mechanceté ki ti ena dan lepok Noé. Deuxieme livre, Exode, montré couma Jéhovah ti prouvé ki Li-mem vrai Bondié kan Li ti delivré nation Israël dan l’esclavage en Égypte. Sa psalmiste-la surement ti pé pense sa bann kitsoz-la kan li ti dire: “Seki [Jéhovah] faire li dignité ek enn grand beauté, ek so justice reste pou touletan. Li’nn faire enn memorial pou bann kitsoz extraordinaire ki Li’nn crée. Jéhovah ena compassion ek misericorde.” (Ps. 111:3, 4) Eski ou pa d’accord ki tou seki Jéhovah inn faire toute longue l’histoire, parmi ena bann kitsoz ki Li’nn faire pendant ki ou lor la terre, c’est enn memorial pou so ‘dignité ek so grand beauté’?
8, 9. (a) Ki bann difference ena entre seki Bondié faire avek seki bann dimoune faire? (b) Ki certain qualité Bondié ki ou apprecié?
8 Remarké ki sa psalmiste-la mette aussi l’accent lor bann qualité extraordinaire ki Jéhovah ena, couma par exemple so justice, so compassion ek so misericorde. Ou koné ki seki bann dimoune imparfait faire, bien rare sa basé lor la justice. Souvent, zot faire sa parski zot ena enn desir exageré pou gagne kitsoz, zot envie sa bann kitsoz-la ek zot ena l’orgueil. Nou trouve sa bien kan nou mazinn bann zarme cruel ki bann dimoune inn fabriké pou faire bann la guerre ki zot inn provoké ek pou gagne l’argent. Sa faire plusieurs million dimoune innocent souffert ek amenn bann malheur ki nou pa kapav decrire. Ena aussi beaucoup kitsoz ki dimoune inn accompli ki’nn faire bann ti-dimoune bien souffert. Enn l’exemple ki beaucoup pou kapav cité c’est bann esclave ki’nn servi pou construire bann pyramide. Sa bann pyramide-la ti surtout servi couma bann tombe pou bann Pharaon ki ti bien orgueilleux. En plus, beaucoup kitsoz ki bann dimoune faire zordi pa zis faire lezot souffert, mais zot aussi “detruire la terre.”—Lire Révélation 11:18.
9 C’est vrai-mem enn grand difference avek seki Jéhovah faire, ki toujours basé lor la justice! Parmi bann kitsoz ki Li faire ena enn disposition ki rempli ar misericorde pou sauve l’humanité imparfait. Kan Jéhovah inn donne la ranson, Li’nn “montré so prop justice.” (Rom. 3:25, 26) Oui, “so justice reste pou touletan”! Concernant so compassion, Li’nn manifesté sa kan Li’nn agir avek patience envers bann dimoune imparfait. Parfois, Li ti mem servi l’expression “s’il vous plait” kan Li ti suppliye zot pou arrete faire peché ek pou faire seki droite.—Lire Ézékiel 18:25.
Jéhovah Li fidele envers so bann promesse
10. Ki l’exemple fidelité Jéhovah inn laissé concernant so l’alliance avek Abraham?
10 “Li’nn donne mangé bann ki ena la crainte pou Li. Pou touletan, Li pou rappel so l’alliance.” (Ps. 111:5) Li parette ki ici sa psalmiste-la ti pé faire reference ar l’alliance abrahamik. Jéhovah ti promette pou beni descendance Abraham ek Li ti dire ki zot pou prend la ville zot bann l’ennemi. (Gen. 22:17, 18; Ps. 105:8, 9) Dan premier realisation sa bann promesse-la, descendance Abraham ti vinn nation Israël. Sa nation-la ti esclave en Égypte pendant longtemps, mais apré “Bondié ti rappel l’alliance ki Li ti faire avek Abraham” ek ti delivré zot. (Ex. 2:24) Maniere ki Jéhovah ti agir avek zot montré ki quantité Li genereux. Li ti donne zot mangé pou nourri-zot lor plan materiel ek bann instruction pou aide zot suive so bann principe. (Deut. 6:1-3; 8:4; Neh. 9:21) Dan bann siecle ki’nn suive, souvent sa nation-la ti desobeir Bondié, mem si Li ti envoye bann prophete pou suppliye zot pou retourne vers Li. Plus ki 1,500 an apré ki Li ti delivré bann Israélite dan l’Égypte, Bondié ti envoye lor la terre, so sel Garson ki Li ti crée direct. La plupart bann Juif ti rejette Jésus ek ti laisse so bann l’ennemi touye li. Apré, Jéhovah ti forme enn nouveau nation, enn nation spirituel, “Israël Bondié.” Ensam avek Christ, sa nation-la forme descendance spirituel Abraham ek Jéhovah ti annoncé ki Li ti pou servi sa descendance-la pou beni l’humanité.—Gal. 3:16, 29; 6:16.
11. Couma Jéhovah pé contigne “rappel l’alliance ki Li ti faire” avek Abraham?
11 Jéhovah contigne “rappel so l’alliance” ek bann benediction ki Li’nn promette par sa l’alliance-la. Zordi, Li donne nou enn grand quantité nourriture spirituel dan plus ki 400 langue. Li aussi contigne ecoute bann la priere ki nou faire pou gagne seki nou bizin lor plan physik, en accord avek sa bann parole-la: “Donne nou nou di-pain pou sa jour-la dapré seki nou bizin.”—Luc 11:3; Ps. 72:16, 17; Is. 25:6-8.
La force extraordinaire ki Jéhovah ena
12. Dan ki fason nation Israël ti gagne “l’heritage bann nation”?
12 “Li’nn faire so peuple konn puissance so bann action, kan Li’nn donne zot l’heritage bann nation.” (Ps. 111:6) Enn l’evenement bien important dan l’histoire nation Israël ki sa psalmiste-la kitfois ti pé pensé c’est bann mirak ki Jéhovah ti faire pou delivré so peuple dan l’Égypte. Kan finalement Jéhovah ti permette bann Israélite rente dan la Terre promise, zot ti kapav gagne la victoire lor bann royaume ki ti trouve dan l’est ek dan l’ouest la riviere Jourdain. (Lire Nehémia 9:22-25.) Oui, Jéhovah ti donne bann Israélite “l’heritage bann nation.” Sa vrai-mem montré grand puissance ki Bondié ena!
13, 14. (a) Ki l’evenement concernant fason ki Bondié ti servi so pouvoir en rapport avek Babylone kitfois sa psalmiste-la ti pé pensé? (b) Ki grand delivrance encore Jéhovah inn accompli?
13 Mais nou bien koné ki malgré tou seki Jéhovah ti faire pou zot, bann Israélite pa ti ena respé pou Li, ni pou zot bann ancetre Abraham, Isaac ek Jacob. Zot ti contigne rebellé ziska ki Bondié ti servi bann Babylonien pou tire zot dan zot pays ek amenn zot couma prisonnier dan Babylone. (2 Chron. 36:15-17; Neh. 9:28-30) Certain bibliste dire ki sa dimoune ki’nn compose Psaume 111-la ti vive dan lepok kan bann Israélite ti’nn fini delivré dan Babylone ek ti’nn retourne dan zot pays. Si sa li vrai, sa dimoune-la ti ena encore plus raison pou loué Jéhovah pou So fidelité ek So pouvoir. Bondié ti montré so fidelité ek so pouvoir kan Li ti delivré bann Juif dan Babylone alors ki sa l’empire-la ti ena enn regle pou pa largue so bann prisonnier.—Is. 14:4, 17.
14 Apepré cinq siecle plitar, Jéhovah ti servi so pouvoir dan enn fason encore pli grand kan Li ti delivré bann dimoune ki ti’nn repenti, ar l’esclavage peché ek la mort. (Rom. 5:12) Enn parmi bann resultat ki sa inn produire c’est ki sa inn donne possibilité 144,000 dimoune pou vinn bann disciple Christ ki oint ar l’esprit saint. En 1919, Jéhovah ti servi so pouvoir pou delivré enn reste sa bann chretien oint ki ti bann esclave fausse religion-la. Tou seki zot inn faire dan lepok la fin, c’est selman grace a pouvoir Bondié ki zot inn reussi faire sa. Kan zot inn fini montré zot fidelité ziska la mort, zot pou regne avek Jésus Christ dan le ciel pou dirige la terre ek pou accorde bann bienfait bann dimoune ki’nn repenti. (Rév. 2:26, 27; 5:9, 10) Zot pou herite la terre dan enn fason beaucoup pli extraordinaire ki bann Israélite dan le passé.—Mat. 5:5.
Bann principe eternel, ki nou kapav faire confiance
15, 16. (a) Ki lezot kitsoz encore la main Bondié inn faire? (b) Ki bann l’ordre Bondié ti donne nation Israël?
15 “Bann kitsoz ki so la main inn faire zot la verité ek jugement; nou kapav ena confiance dan tou bann l’ordre ki Li donné, zot bien fixé pou touletan, oui pou toujours, zot inn faire avek la verité ek la justice.” (Ps. 111:7, 8) Parmi bann ‘kitsoz ki la main Jéhovah inn faire’ ti ena deux tablette roche lor ki Li ti grave dix la loi important pou Israël. (Ex. 31:18) Sa bann la loi-la, ensam avek tou bann lezot la loi ki ti forme partie dan l’alliance la Loi mosaïk, zot basé lor bann principe eternel, ki nou kapav faire confiance.
16 Par exemple, enn parmi sa bann l’ordre ou-soit bann la loi ki ti ecrire lor sa bann tablette-la dire: “Moi Jéhovah to Bondié, mo enn Bondié ki oulé ki zot reste attaché zis ar mo tousel.” Pli loin li dire ki Jéhovah montré “l’amour fidele envers millieme generation pou bann ki content [Li] ek ki garde [so] bann commandement.” Lor sa bann tablette roche-la ti ena aussi bann principe ki pa changé ek ki applik ar tou situation, couma par exemple “honore to papa ek to mama” ek “fodé pa to kokin.” Ena aussi sa la loi ki montré enn grand discernement-la ek ki condamne enn desir pou gagne bann kitsoz ki pou lezot.—Ex. 20:5, 6, 12, 15, 17.
Nou Sauveur ki saint ek pou ki nou ena la crainte
17. Ki raison bann Israélite ti ena pou considere nom Bondié couma sacré?
17 “Li ti delivré so peuple. Li ti donne l’ordre pou touletan concernant so l’alliance. So nom li saint ek li faire nou ena la crainte.” (Ps. 111:9) Encore enn fois, sa psalmiste-la kitfois ti pé pense fidelité ki Jéhovah ti ena envers l’alliance ki Li ti faire avek Abraham. En accord avek sa, Jéhovah pa ti abandonne so peuple, premierement kan zot ti esclave en Égypte ek plitar kan zot ti prisonnier dan Babylone. Dan toulé-deux cas, Bondié ti delivré so peuple. Sa deux l’evenement-la-mem ti assez pou ki nation Israël considere nom Bondié couma sacré.—Lire Exode 20:7; Romains 2:23, 24.
18. Kifer ou pensé ki c’est enn privilege pou porte nom Bondié?
18 Dan nou lepok, nou kapav dire mem zaffaire pou bann chretien ki finn delivré ar l’esclavage peché ek la mort. Nou bizin faire tou seki nou kapav pou vive en accord avek premier kitsoz ki nou demandé dan la priere Notre Pere: “Ki to nom sanctifié.” (Mat. 6:9) Kan nou medite lor sa grand nom-la, sa bizin faire nou ena la crainte pou Bondié. Ecrivain Psaume 111 ti ena enn bon l’opinion lor la crainte pou Bondié, li ti dire: “La crainte pou Jéhovah, c’est commencement la sagesse. Tou bann ki pratik sa [suive so bann commandement], ena enn bon jugement.”—Ps. 111:10.
19. Ki nou pou examiné dan prochain lartik?
19 La crainte pou Bondié pou aide nou pou ena la haine pou seki mauvais. Sa pou aide nou aussi pou imite bann bon qualité ki Bondié ena couma nou trouvé dan Psaume 112, ki nou pou examiné dan prochain lartik. Sa psaume-la montré couma nou kapav rempli bann condition pou forme partie parmi bann million dimoune ki pou ena privilege pou loué Bondié pou touletan. Oui vrai-mem, Jéhovah merite sa! “So louange reste pou touletan.”—Ps. 111:10.
Question lor ki nou kapav medité
• Kifer Jéhovah merité ki nou loué Li dan l’unité?
• Ki bann qualité Jéhovah nou trouvé dan seki Li’nn faire?
• Couma ou considere privilege pou porte nom Bondié?
[Zimage lor page 20]
Raison principal kifer nou rassemblé regulierement c’est pou loué Jéhovah
[Zimage lor page 23]
Tou bann la loi Jéhovah zot basé lor bann principe eternel, ki nou kapav faire confiance