Né encore enn fois—Eski c’est chemin ki amenn vers enn delivrance?

COUMA ou pou reponn sa question-la: “Eski ou né encore enn fois?” Bann million chretien a travers le monde pou reponn avek enn grand “Oui!” Zot pensé ki né encore enn fois c’est enn kitsoz ki identifié tou bann vrai chretien ek ki c’est sel fason pou gagne la vie sauve. Zot accepté l’idée bann chef religieux, couma Robert Charles Sproul, ki ti ecrire: “Si enn dimoune pa né encore enn fois, . . . alors li pa enn chretien.”

Eski ou parmi sa bann dimoune ki croire ki si ou né encore enn fois, sa vedir ki ou lor chemin ki permette ou gagne la vie sauve? Si oui, pena doute ki ou envie aide ou bann famille ek ou bann camarade pou trouve sa chemin-la ek marche lor-la. Mais pou zot kapav faire sa, zot bizin konn faire difference entre enn dimoune ki né encore enn fois ek enn dimoune ki pa né encore enn fois. Couma ou pou explik zot ki sa vedir né encore enn fois?

Beaucoup pensé ki servi sa l’expression “né encore enn fois[-la]” kan pé koz lor enn dimoune ki faire enn voeu pou servi Bondié ek Christ ek, lerla sa dimoune ki ti mort lor plan spirituel-la li vinn vivant lor plan spirituel. En realité, concernant enn dimoune ki né encore enn fois, enn dictionnaire donne sa definition-la: “C’est enn chretien ki’nn renouvelé ou-soit ki’nn confirme l’engagement so la foi surtout apré ki li’nn passe par enn l’experience religieux ki’nn bien touche li.”—Merriam-Webster’s Collegiate Dictionary—Eleventh Edition.

Eski sa pou sok ou, pou aprann ki la Bible pa d’accord avek sa definition-la? Eski ou ti pou content koné ki Parole Bondié enseigné vrai-mem concernant né encore enn fois? Ou pou tire beaucoup profit si ou examine sa sujet-la plus en detail. Kifer? Parski enn connaissance exact lor seki vedir né encore enn fois pou affecté ou la vie ek seki ou pé attann pou l’avenir.

Ki la Bible enseigné?

Sel place dan la Bible kot faire mention sa l’expression “né encore enn fois[-la]” trouve dan Jean 3:1-12, ki koz lor enn conversation interessant ki ti ena entre Jésus ek enn chef religieux dan Jérusalem. Ou pou trouve sa recit biblik-la en entier dan l’encadré. Nou invite ou pou lire li avek attention.

Dan sa bann passage-la, Jésus attire nou l’attention lor plusieurs point ki concerne enn “nouveau naissance.”a Avredir, conversation Jésus aide nou pou reponn sa cinq question important-la:

◼ Ki l’importance enn nouveau naissance ena?

◼ Eski c’est nou ki decidé si nou pou gagne enn nouveau naissance?

◼ Ki so but?

◼ Couma li arrivé?

◼ Ki changement eski li amené?

Anou examine sa bann question-la enn par enn.

[Note]

[Zimage ek l’encadré lor page 4]

“Zot bizin né encore enn fois”

“Ti ena enn zom parmi bann Pharisien: So nom ti Nicodème, li ti enn chef parmi bann Juif. Li ti vinn vers Jésus a soir ek li ti dire li: ‘Rabbi, nou koné ki toi en tant ki enn enseignant, to’nn sorti kot Bondié; parski personne pa kapav accompli sa bann signe ki to faire-la a moins ki Bondié avek li.’ Pou reponn li, Jésus ti dire li: ‘Oui, vrai-mem mo dire toi, si enn kikenn pa né encore enn fois, li pa kapav trouve royaume Bondié.’ Nicodème ti dire li: ‘Couma enn dimoune kapav né kan li’nn vié? Li pa kapav rente dan ventre so mama enn deuxieme fois ek né, pa vrai?’ Jésus ti dire li: ‘Oui, vrai-mem, mo dire toi, si enn kikenn pa né avek de l’eau ek l’esprit, li pa kapav rente dan royaume Bondié. Seki finn né avek la chair li la chair, ek seki finn né avek l’esprit li l’esprit. Pa soké parski mo’nn dire toi, ki zot bizin né encore enn fois. Di-vent soufflé kot li envie, ek to tann so son, mais to pa koné kot-sa li sorti ni kot-sa li pé allé. C’est coumsa ki tou dimoune ki né avek l’esprit, été.’ Nicodème ti dire li: ‘Couma sa bann kitsoz-la kapav arrivé?’ Jésus ti dire li: ‘To enn enseignant en Israël ek pourtant to pa konn sa bann kitsoz-la? Vrai-mem mo dire toi, nou dire seki nou koné ek nou rann temoignage lor seki nou’nn trouvé, mais zot pa accepté temoignage ki nou donné. Si mo’nn dire zot bann kitsoz ki lor la terre ek pourtant zot pa croire, couma eski zot pou croire si mo dire zot bann kitsoz ki dan le ciel?’ ”—Jean 3:1-12.