Certain pou dirigé, mais beaucoup pou gagne benediction

DEPUIS lepok bann zapotre, Bondié pé choisir parmi bann dimoune, enn ti groupe chretien fidele ek Li adopté zot couma so bann garson. Changement ki sa bann garson adoptif-la koné li tellement complet, ki Parole Bondié decrire sa couma enn nouveau naissance. Raison kifer ena sa nouveau naissance-la c’est pou prepare sa bann serviteur Bondié-la pou vinn bann dirigeant dan le ciel. (2 Timothée 2:12) Pou gagne sa privilege-la, zot bizin mort ek ressuscité pou al vive dan le ciel. (Romains 6:3-5) Ek dan le ciel, ensam avek Christ “zot pou regne couma bann le roi ki dirige la terre.”—Révélation 5:10; 11:15.

Mais, Parole Bondié dire aussi ki a part bann ki né encore enn fois, ena lezot dimoune, ki pou gagne la vie pou touletan. La Bible (ki li bann Écritures hébraïques ou-soit grecques chrétiennes) montré ki Bondié ena projet pou sauve deux groupe dimoune—enn groupe assez tipti ki pou al vive dan le ciel couma bann le roi ek enn groupe ki pli grand ki pou vive lor la terre enba direction sa bann le roi-la. Guette, par exemple, ki l’apotre Jean ti ecrire lezot chretien ki finn konn enn nouveau naissance. Li ti dire concernant Jésus: “Li enn sacrifice ki couvert nou bann peché, selman pa zis nou bann peché [ti groupe], mais aussi peché le monde entier [grand groupe].”—1 Jean 2:2.

Pareil, l’apotre Paul ti ecrire: “Parski avek beaucoup impatience la creation [grand groupe] pé attann ler kot pou revele bann garson Bondié [ti groupe].” (Romains 8:19-21) Couma nou bizin comprend bann parole l’apotre Jean ek l’apotre Paul? Bann ki finn né encore enn fois, zot pou forme parti dan enn gouvernement dan le ciel. Ki zot pou faire dan le ciel? Zot pou faire bann million dimoune, ki pou vive lor la terre enba direction sa Royaume-la, profite bann benediction eternel. A cause sa, Jésus ti encourage so bann disciple pou prié: “Ki to royaume vini. Ki to volonté faire lor la terre pareil couma dan le ciel.”—Matthieu 6:10.

Bann Écritures hébraïques aussi koz lor deux groupe bann dimoune ki pou sauvé. Par exemple guetté ki Jéhovah ti dire Abraham, ancetre Jésus: “Par moyen to descendance [ti groupe], tou bann nation lor la terre [grand groupe] pou vrai-mem attire benediction lor zot.” (Genèse 22:18) Vrai-mem, grace a “descendance” Abraham tou bann nation ti pou kapav gagne bann benediction.

Kisannla sa “descendance[-la]”? C’est Jésus Christ ek ensam avek li ena bann ki finn gagne nouveau naissance, bann garson ki Bondié inn adopté. L’apotre Paul ti dire: “Si zot pou Christ, zot vrai-mem descendance Abraham.” (Galates 3:16, 29) Ki benediction bann dimoune dan tou nation pou gagné grace a sa “descendance[-la]”? Bann dimoune pou ena privilege pou regagne faveur Bondié ek pou vive pou touletan lor enn la terre transformé en paradis. Psalmiste David ti prophetisé: “Bann dimoune juste pou possede la terre, ek zot pou reste lor la pou touletan.”—Psaume 37:29; Isaïe 45:18; Révélation 21:1-5.

Mem si privilege pou regné dan le ciel finn reservé zis pou enn ti groupe dimoune, mais beaucoup dimoune pou kapav profite bann benediction ki zot pou gagné grace a sa regne-la—zot pou gagne la vie eternel lor la terre ek tou bann lezot benediction ki vinn ensam avek sa. Nou souhaité ki ou ek ou famille parmi bann ki pou profite sa bann benediction eternel ki Royaume Bondié pou amené-la.

[Zimage lor page 12]

Bann million dimoune pou vive pou touletan lor la terre. Eski ou pou parmi zot?