Seki nou aprann ar Jésus

La fin ki kitsoz?

Bann disciple Jésus ti demann li: “Ki signe pou montré to presence ek conclusion sa systeme-la?” (Matthieu 24:3) Kan Jésus ti reponn sa question-la, li pa ti dire ki la terre ti pou disparette. Avant, li ti koz lor enn “systeme” ek li ti servi sa mot-la pou koz lor tou systeme politik, commercial ek religieux ki dominé par Satan. (Matthieu 13:22, 40, 49) Alors, c’est sa systeme-la ki li ti pé pensé kan li ti dire: “La fin pou vini.”—Matthieu 24:14.

Couma Jésus ti decrire la fin?

La fin sa mauvais systeme-la c’est enn “bon nouvelle.” Jésus ti dire: “Sa bon nouvelle lor royaume-la pou preché partout kot dimoune resté lor la terre couma enn temoignage pou tou bann nation; ek lerla la fin pou vini.” Jésus ti decrire la fin sa systeme kot nou pé vive-la coumsa: “Pou ena enn grand tribulation couma jamais pa finn ena depuis commencement le monde ziska zordi, non, ek ki pa pou ena encore. En realité, si pa ti faire sa bann jour-la vinn pli courte, okenn dimoune pa ti pou sauvé.”—Matthieu 24:14, 21, 22.

Kisannla ki pou detruire?

Zis bann ki pa content ek ki pa servi Jéhovah ek Jésus ki pou detruire. Sa bann dimoune-la pa obeir Bondié. Jésus ti dire: “Pareil couma li ti été dan lepok Noé, coumsa-mem presence Fils de l’homme pou été. Parski pareil couma zot ti été zis avant deluge, . . . zot pa ti prend compte, ziska ki deluge ti vini ek ti balié zot tou.” (Matthieu 24:36-39) Jésus ti dire ki ena beaucoup ki lor chemin ki al vers destruction. Selman, li ti donne l’assurance ki ena enn ‘chemin ki serré ki amenn vers la vie.’—Matthieu 7:13, 14.

Kan sa systeme-la pou fini?

Kan so bann disciple ti demann li concernant signe so presence “ek conclusion sa systeme-la,” Jésus ti reponn: “Nation pou leve kont nation ek royaume kont royaume, pa pou ena assez mangé ek pou ena bann tremblement de terre . . . ek parski bann pratik ki kont la loi pou augmenté, l’amour beaucoup dimoune pou refroidi.” (Matthieu 24:3-12) Alors, tou sa bann mauvais nouvelle ki nou pé tendé zordi-la ena enn signification ki encourage nou—bientot Royaume Bondié pou amenn la paix pou bann dimoune obeissant. Jésus ti dire: “Kan zot trouve sa bann kitsoz-la arrivé, zot bizin koné ki royaume Bondié pé kosté.”—Luc 21:31.

Ki ou bizin faire?

Jésus ti dire ki Bondié “finn donne so sel Garson ki Li finn crée direct, pou ki tou seki ena la foi en li pa detruire, mais gagne la vie pou touletan.” (Jean 3:16) Pou ou kapav ena la foi dan Bondié ek dan so Garson, ou bizin konn zot bien. A cause sa Jésus ti enseigné: “Sa-mem ki vedir la vie eternel: zot bizin aprann konn toi, sel vrai Bondié, ek celui ki to finn envoyé, Jésus Christ.”—Jean 17:3.

Faire attention ki bann tracas la vie ek bann probleme pa empeche ou pou aprann couma pou montré ou l’amour pou Bondié. Jésus ti donne sa l’avertissement-la: “Faire attention ar zot-mem, pangar zot leker vinn lourd . . . a cause bann tracas ki ena dan la vie, ek ki enn sel coup sa jour-la vinn lor zot couma enn piege. Parski li pou [vini].” Si ou prend compte l’avertissement Jésus, ou pou “reussi sapé ar tou sa bann kitsoz ki bizin arrivé-la.”—Luc 21:34-36.

Pou gagne plus renseignement, guette chapitre 9, “Eski nou pé vive dan bann ‘dernier jour’?” dan livre Ki la Bible enseigné vrai-mem?a

[Note]