Vinn “zelé pou bann bon action”!

“[Jésus] finn donne li-mem pou nou, pou sap nou dan tou sorte qualité forme desobeissance la loi, ek purifié pou li-mem enn peuple ki vinn so prop di-bien, ki zelé pou bann bon action.”—TITE 2:14.

1. Ki arrivé dan la cour temple Jérusalem kan Jésus vini le 10 Nisan, l’an 33 nou lepok?

NOU le 10 Nisan, en l’an 33 nou lepok, deux-trois jour avant fête Pâque. Ena beaucoup dimoune ki’nn vinn Jérusalem pou adore Jéhovah. Zot dan la cour temple ek zot bien excité. Ki pou arrivé kan Jésus pou vini? Trois l’Evangile—Matthieu, Marc, ek Luc—dire ki pou enn deuxieme fois, Jésus pousse bann ki pé vendé ek acheté dan temple. Li devire enba-la-haut la table bann ki ti pé change kass ek banc bann ki pé vann bann pigeon. (Mat. 21:12; Marc 11:15; Luc 19:45) Zele ki Jésus ena pa ti’nn diminué depuis ki li ti faire mem zaffaire trois an avant.—Jean 2:13-17.

2, 3. Couma nou koné ki Jésus pa ti zelé zis pou purifié temple?

² L’Evangile Matthieu montré ki sa fois-la, Jésus pa ti zis zelé pou purifié temple. Li ti aussi gueri bann aveugle ek bann boiteux ki ti vinn vers li. (Mat. 21:14) L’Evangile Luc koz lor lezot kitsoz ki Jésus ti faire. “Chaque jour [Jésus] ti enseigné dan temple.” (Luc 19:47; 20:1) Oui, bann dimoune ti kapav trouve zele ki Jésus ti ena dan ministere ki li ti faire en publik.

³ Plitar, l’apotre Paul ti ecrire Tite ek ti expliké ki Jésus “finn donne li-mem pou nou, pou sap nou dan tou sorte qualité forme desobeissance la loi, ek purifié pou li-mem enn peuple ki vinn so prop di-bien, ki zelé pou bann bon action.” (Tite 2:14) Zordi, dan ki fason nou kapav vinn “zelé pou bann bon action”? Couma l’exemple bann bon le roi Juda kapav encourage nou?

Zele pou preché ek pou enseigné

4, 5. Dan ki fason quatre le roi Juda ti montré ki zot zelé pou bann bon action?

⁴ Asa, Yehoshaphat, Hizqiya, ek Yoshiya zot tou ti faire bann grand zeffort pou tire l’idolatrie dan Juda. Asa “ti tire bann l’autel etranger, ek bann place dan hauteur ek li ti crase bann colonne sacré ek li ti coupe bann poteau sacré.” (2 Chron. 14:3) Yehoshaphat, ki ti rempli ar zele pou l’adoration Jéhovah, “ti tire bann place dan hauteur ek bann poteau sacré dan Juda.”—2 Chron. 17:6; 19:3.a

⁵ Apré ki bann Israélite ti fini faire fête Pâque pendant sept jour celebration ki Hizqiya ti organisé dan Jérusalem, “tou bann Israélite ki ti la, ti al dan bann la ville Juda ek zot ti commence crase bann colonne sacré, ek coupe bann poteau sacré, zot ti crase bann place dan hauteur ek bann l’autel ki ti ena partout dan Juda ek Benjamin ek dan Éphraïm ek Manassé, ziska ki zot ti fini faire sa.” (2 Chron. 31:1) Yoshiya ti jeune kan li ti vinn le roi, li ti ena zis huit an. La Bible dire: “Dan huitieme l’année so regne, alors ki li ti encore enn garson, li ti commence rod Bondié David, so ancetre; ek dan douzieme l’année, li ti commence purifié Juda ek Jérusalem kan li ti tire tou bann place dan hauteur, bann poteau sacré ek bann statue ki’nn sculpté ek bann statue en metal ki’nn fonn.” (2 Chron. 34:3) Oui, tou sa quatre le roi-la ti zelé pou faire bann bon action.

6. Kifer nou kapav compare nou ministere ar campagne ki bann fidele le roi Juda ti faire?

⁶ Zordi, nou aussi nou participe dan enn campagne pou aide bann dimoune pou libere-zot ar l’enseignement bann fausse religion, parmi ena l’idolatrie. Nou predication porte en porte permette nou pou joinde tou sorte qualité dimoune. (1 Tim. 2:4) Enn jeune tifi ki reste en Asie rappel couma so mama ti pé faire la priere devant beaucoup zimage dan zot lakaz. Mais tifi-la ti reflechi lor la ek ti trouvé ki li impossible ki tou sa bann zimage-la represente vrai Bondié, alors souvent li ti prié pou koné kisannla vrai Bondié. Enn jour, li ti tann la porte tapé, kan li ti al guetté, li ti trouve deux Témoins ek bannla ti bien content pou aide li aprann nom vrai Bondié, Jéhovah. Li ti vrai-mem bien content pou aprann la verité lor bann zidole! Zordi, li montré enn grand zele par bann grand zeffort ki li faire dan predication ek li aide bann dimoune lor plan spirituel.—Ps. 83:18; 115:4-8; 1 Jean 5:21.

7. Ki nou kapav faire pou imite bann enseignant ki ti al partout dan pays, dan lepok Yehoshaphat?

⁷ Kan nou participe dan predication de porte en porte, ki quantité nou faire nou territoire a fond? Nou remark enn kitsoz interessant concernant regne Yehoshaphat: dan troisieme l’année so regne, li ti envoye cinq prince, neuf Lévite ek deux pretre partout dan pays. Li ti faire zot al dan tou bann la ville pou enseigne le peuple bann la loi Jéhovah. Zot ti faire sa travail-la tellement bien ki bann dimoune dan lezot nation ki ti tout autour, ti commence ena enn grand la crainte a cause Jéhovah. (Lire 2 Chroniques 17:9, 10.) Kan nou visite bann dimoune dan different ler ek different jour, kitfois nou kapav gagne enn conversation avek different membre enn famille.

8. Couma nou kapav rann temoignage ar pli beaucoup dimoune?

⁸ Dan nou lepok, beaucoup serviteur Bondié inn disposé pou demenagé pou zot al servi kot bien bizin bann proclamateur zelé. Eski ou kapav faire pareil ou’si? Certain parmi nou ki pa kapav demenagé, kitfois kapav rann temoignage ar bann dimoune ki vive dan nou l’endroit mais ki koz enn lot langue. Ron ki ena 81 an habitué joinde bann dimoune different nationalité dan so territoire, alors li’nn aprann pou dire bonjour dan 32 langue! Pa trop longtemps, li ti joinde enn couple Africain lor chemin ek li ti dire zot bonjour en Yoruba, langue ki zot kozé. Zot ti demann Ron si li’nn deja al l’Afrique. Kan Ron ti dire zot non, zot ti demann li couma li konn zot langue. Sa finn permette li pou donne zot enn bon temoignage. Zot ti accepté bann periodik avek plaisir ek sans hesité zot ti donne Ron zot l’adresse. Ron ti donne sa l’adresse-la congregation local pou ki couple-la kapav gagne enn l’etude la Bible.

9. Kifer li important ki nou lire la Bible dan nou ministere? Donne enn l’exemple.

⁹ Bann enseignant ki ti al partout dan pays pou suive l’ordre ki Yehoshaphat ti donné, ti ena “livre la loi Jéhovah” avek zot. Dan le monde entier, nou faire zeffort pou servi la Bible kan nou enseigne bann dimoune, parski c’est Parole Bondié. Nou montré l’importance ki la Bible ena dan nou ministere kan nou faire enn zeffort special pou lire directement seki ena ladan, coumsa bann dimoune kapav trouve bann parole-la par zot-mem. Enn madame avek ki enn Témoin ki appel Linda ti pé preché, ti explik Linda ki so mari ti’nn gagne enn attak ek li ti bizin occupe li. Avek beaucoup la peine, madame-la ti dire: “Mo pa koné ki mo’nn faire coumsa pou ki Bondié inn permette ki sa arrive moi.” Linda ti dire li: “Ena enn kitsoz ki ou bizin sur.” Lerla li ti lire Jacques 1:13 ek li ti ajouté: “Tou bann souffrance ki nou ek bann dimoune ki nou content pé gagné, c’est pa punition Bondié sa.” Kan li’nn tann sa, madame-la ti maye Linda tellement li ti content. Linda dire: “Mo ti kapav reconforte sa madame-la kan mo’nn servi la Bible. Parfois nou lire bann verset dan la Bible ki bann dimoune jamais inn tendé avant.” Apré sa conversation-la, sa madame-la inn commence etudié la Bible regulierement.

Bann jeune ki servi avek zele

10. Couma Yoshiya li enn bon l’exemple pou bann jeune chretien zordi?

¹⁰ Anou reguette l’exemple Yoshiya. Nou remarké ki li ti bien jeune kan li ti adore vrai Bondié ek li ti ena 20 an kan li ti prend bann grand disposition pou tire l’idolatrie dan so pays. (Lire 2 Chroniques 34:1-3.) Zordi, beaucoup jeune montré mem zele dan zot ministere.

11-13. Ki leson nou kapav aprann ar l’exemple bann jeune ki servi Jéhovah avek zele dan nou lepok?

¹¹ Hannah, ki reste en Angleterre, ti ena 13 an ek ti pé aprann français dan lekol. Enn jour li’nn tann dire ki enn groupe ki koz français inn formé dan enn la ville ki pa ti trop loin kot li. So papa ti accepté pou accompagne li pou al reunion la-bas. Asterla, Hannah ena 18 an ek li enn pionnier permanent, li rann temoignage avek zele en français. Eski ou’si ou kapav aprann enn lot langue pou aide bann dimoune konn Jéhovah?

¹² Rachel ti bien apprecié video Poursuivez des objectifs qui honorent Dieu. Li ti faire enn remark lor fason ki li ti pensé kan li ti commence servi Jéhovah en 1995: “Mo ti pensé ki mo ti pé bien faire dan la verité.” Apré li ajouté: “Apré ki mo’nn guette sa video-la, mo ti realisé ki mo ti pé zis faire bann kitsoz de base pendant plusieurs l’année. Mo’nn bizin lutté pou la verité ek faire bann zeffort sincere dan mo service ek mo l’etude personnel.” Asterla, Rachel trouvé ki li pé servi Jéhovah avek plus zele. Ki resultat li finn gagné? “Mo relation avek Jéhovah inn vinn pli profond. Mo bann la priere ena plus sens, mo etudié plus en profondeur ek mo gagne plus satisfaction, ek bann zistoire ki ena dan la Bible inn vinn pli réel pou moi. Resultat: mo apprecié predication beaucoup ek mo gagne enn vrai satisfaction a mesure ki mo trouvé couma bann parole Jéhovah encourage bann dimoune.”

¹³ Luc, li enn jeune ki’nn encouragé par enn lot video, Les jeunes s’interrogent... Que vais-je faire de ma vie ? Apré ki Luc inn guette sa video-la, li ecrire: “Sa ti pousse moi pou guetté ki mo pé faire ar mo la vie.” Li reconette: “Dan le passé, certain ti mette pression lor moi pou faire bann grand l’etude d’abord, pou ki mo gagne enn securité lor plan financier, ek apré, mo kapav prend compte mo bann l’objectif spirituel. Sa bann qualité pression-la pa aide enn kikenn pou developpe bann bon relation avek Jéhovah; au contraire, sa fini li net.” Jeune frere ek soeur, kifer ou pa guetté couma ou kapav servi seki ou’nn aprann dan lekol pou faire plus dan ou ministere pareil couma Hannah? Ek kifer ou pa imite l’exemple Rachel kan avek zele, ou poursuive bann l’objectif ki vrai-mem honore Bondié? Suive l’exemple Luc, ek evite bann danger ki finn vinn enn piege pou beaucoup jeune.

Prend compte bann l’avertissement, avek zele

14. Ki qualité l’adoration Jéhovah accepté, ek kifer li tellement difficile pou faire sa zordi?

¹⁴ Bann serviteur Jéhovah bizin reste pur si zot envie ki Bondié accepté zot l’adoration. Isaïe ti donne sa l’avertissement-la: “Al loin, al loin, sorti ladan, pa touche nanyin ki impur; sorti au milieu li [Babylone], reste pur, zot ki pé sarié bann kitsoz ki servi dan temple Jéhovah.” (Is. 52:11) Plusieurs l’année avant ki Isaïe ti ecrire sa bann parole-la, le roi Asa—ki ti enn bon le roi—ti prend bann disposition pou tire l’immoralité net dan Juda. (Lire 1 Rois 15:11-13.) Ek plusieurs siecle plitar, l’apotre Paul ti dire Tite ki Jésus ti donne li-mem en sacrifice pou purifié so bann disciple pou faire zot vinn “enn peuple ki vinn so prop di-bien, ki zelé pou bann bon action.” (Tite 2:14) Dan sa le monde kot bann dimoune ena beaucoup vice-la, li pa facile—surtout pou bann jeune—pou reste pur lor plan moral. En realité, tou bann serviteur Bondié, jeune ek vié, bizin lutté pou pa laisse-zot contaminé ar pornographie ek bann zimage erotik ki nou kapav trouvé lor bann grand l’affiche publicité, dan television, dan bann film, ek surtout lor Internet.

15. Ki kapav aide nou pou developpe enn grand la haine pou seki mauvais?

¹⁵ Si nou prend compte bann l’avertissement Bondié avek zele, sa kapav aide nou pou developpe la haine pou seki mauvais. (Ps. 97:10; Rom. 12:9) Nou bizin ena enn grand la haine pou pornographie pou nou kapav “libere-nou ar sa l’attraction bien fort ki li ena lor nou couma enn lema-la,” c’est seki enn chretien ti dire. Pou tire enn piece ki’nn collé avek enn lema, la force ki nou bizin ena, bizin pli fort ki sa la force ki tini sa piece-la ar sa lema-la. Li pareil aussi pou pornographie, nou bizin faire bann grand zeffort pou pa tombe dan so piege. Mais si nou comprend ki quantité degat pornographie kapav faire lor nou, sa pou aide nou pou ena enn grand degout pou sa. Enn frere ti faire bann grand zeffort pou arrete l’habitude ki li ti ena pou al lor bann site porno lor Internet. Li ti mette so computer dan enn place kot zot tou dan so famille ti kapav trouvé. En plus, li ti bien decidé pou purifié li-mem ek pou vinn zelé pou bann bon action. Li ti mem faire enn lot kitsoz. Parski li ti bizin servi Internet pou so travail, li ti prend decision pou al lor la zis kan so femme ti pré kot li.

Valeur enn bon conduite

16, 17. Ki l’effet nou bon conduite kapav ena lor bann ki observe nou? Donne enn l’exemple.

¹⁶ Bann jeune gens ek bann jeune fille ki servi Jéhovah ena vrai-mem enn bon l’attitude, ek sa impressionne bann dimoune ki observe zot! (Lire 1 Pierre 2:12.) Enn missié ki ti bizin faire servicing lor enn imprimante dan Béthel Londres, ti change net so l’attitude lor bann Témoins de Jéhovah apré ki li’nn passe enn journée la-bas. So femme ki ti pé etudié la Bible avek enn Témoin, ti remarké ki so mari ti’nn changé. Avant, li pa ti oulé ki bann Témoins vinn kot li. Mais kan li ti retourne lakaz apré sa travail-la dan Béthel, li pa ti fini raconté ki quantité li’nn apprecié fason ki bannla ti traite li avek bonté. Li ti dire ki personne pa ti servi enn mauvais langage. Zot tou ti ena patience, ek ti ena enn l’atmosphere kot ena la paix. Li ti surtout impressionné ki bann jeune frere ek soeur travail avek zele ek sans ki zot gagne okenn la paye, zot donne zot le temps ek zot la force pou publié la bonne nouvelle.

¹⁷ Li pareil aussi pou bann frere ek soeur ki travail pou prend soin zot famille. Zot faire zot travail avek tou zot leker. (Col. 3:23, 24) Souvent, grace a sa, zot ena plus chance pou garde zot travail parski zot patron remarké ki zot serieux ek pa envie perdi bann employé couma zot.

18. Couma nou kapav “zelé pou bann bon action”?

¹⁸ Kan nou faire confiance Jéhovah, kan nou obeir so bann instruction, ek kan nou prend soin bann place kot nou faire reunion, tousala c’est bann fason pou nou montré nou zele pou lakaz Jéhovah. En plus, nou envie participe autant ki nou kapav pou preche Royaume Bondié ek pou faire bann disciple. Ki nou jeune ou-soit agé, si nou faire tou seki nou kapav pou reste pur en rapport avek nou l’adoration, nou pou recolté bann grand bienfait. Ek nou pou contigne garde reputation enn peuple “ki zelé pou bann bon action.”—Tite 2:14.

[Note]

Ki ou finn aprann ar bann l’exemple ki ena dan la Bible ek bann l’exemple moderne lor

• fason ki ou kapav montré-ou zelé dan predication ek dan l’activité pou faire bann disciple?

• fason ki bann jeune chretien kapav “zelé pou bann bon action” ?

• fason ki nou kapav rejette bann pratik ki gate nou spiritualité?

[Zimage lor page 18]

Eski ou servi la Bible souvent dan ou ministere?

[Zimage lor page 20]

Si ou aprann enn lot langue dan lekol, sa kapav aide ou pou koz avek pli beaucoup dimoune dan ou ministere