Pa laisse zot distraire dan sa ‘jour pou bann bon nouvelle-la’

SA QUATRE lepreux-la ti reguette bann choix ki zot ti ena. Personne pa finn donne zot charité kot l’entrée la ville. Bann Syrien ti empeche mangé rente dan Samarie pou ki le peuple soit soumette ar zot ou-soit mort ar la famine. Sa pa ti pou servi nanyin pou rente dan la ville; prix mangé ti extra cher. Ti’nn fini ena enn cas kot dimoune ti pé mange dimoune.—2 Rois 6:24-29.

Sa bann lepreux-la ti pensé: ‘Kifer nou pa al dan camp bann Syrien? Nou pena nanyin pou perdi.’ Sa soir-la kan ti faire noir ek kan personne pa ti trouve zot, zot ti allé. Kan zot ti arrive dan sa camp-la, pa ti ena okenn tapage. Pa ti ena okenn garde. Bann cheval ek bann bourrik ti attaché, mais pa ti ena okenn soldat. Sa quatre-la ti guette dan enn la tente. Pa ti ena personne, mais selman ti ena mangé ek boire en abondance. Zot ti boire ek zot ti mangé. Sa bann lepreux-la ti trouve aussi l’or, l’argent, linge, ek lezot kitsoz ki ena valeur. Zot ti prend seki zot ti envie, zot ti al cachiette, ek zot ti retourné pou prend encore plus. Sa camp-la ti’nn abandonné net. Jéhovah par enn mirak ti faire bann Syrien tann son enn l’armée. Bannla ti’nn croire ki ti pé attak zot, ek zot ti sauvé. Tou zot bann kitsoz ti reste la-bas ek n’importe kisannla ti kapav prend seki li envie!

Sa bann lepreux-la ti pé al prend ek ti pé al cachiette bann kitsoz ki ena valeur. Mais kan zot ti pense bann dimoune dan Samarie ki ti pé mort de faim zot conscience inn commence troublé. Sakenn ti commence dire ar so camarade: “Li pa bon seki nou pé faire-la. Zordi, c’est enn jour pou bann bon nouvelle!” Bann lepreux-la ti degazé retourne Samarie ek zot ti raconte sa bon nouvelle lor seki zot ti decouvert-la.—2 Rois 7:1-11.

Nou aussi nou pé vive dan seki nou kapav appel “enn jour pou bann bon nouvelle.” Pou attire l’attention lor enn grand l’aspect sa “signe [ki] pou montré . . . conclusion sa systeme-la,” Jésus ti dire: “Sa bon nouvelle lor royaume-la pou preché partout kot dimoune resté lor la terre couma enn temoignage pou tou bann nation; ek lerla la fin pou vini.” (Mat. 24:3, 14) Ki l’effet sa bizin ena lor nou?

Bann tracas personnel kapav faire nou vinn lourd

Sa bann lepreux-la ti tellement content kan zot ti faire zot decouverte ki pou enn ti moment zot ti blié Samarie. Zot ti concentré lor seki zot ti kapav gagné. Eski enn kitsoz coumsa kapav arrive nou? La famine forme partie signe ki montré ki nou pé vive conclusion sa systeme-la. (Luc 21:7, 11) Jésus ti averti so bann disciple: “Faire attention ar zot-mem, pangar zot leker vinn lourd parski zot trop mangé ek boire, ek a cause bann tracas ki ena dan la vie.” (Luc 21:34) En tant ki chretien, nou bizin faire attention ki nou pa laisse bann tracas personnel ki ena dan la vie toulé-jour faire nou blié ki nou pé vive dan “enn jour pou bann bon nouvelle.”

Enn chretienne ki appel Blessing pa ti laisse so l’interet personnel ralenti li. Li ti enn pionnier ek en mem temps li ti suive enn cours pou vinn professeur; finalement li ti marié avek enn Béthélite, ek li ti accepté couma enn membre dan famille Béthel Bénin. Li dire: “Mo faire nettoyage ek mo content mo travail.” Azordi Blessing kapav mazinn so 12 l’année dan service a plein temps avek la joie ek li content ki li’nn reste concentré lor sa “jour pou bann bon nouvelle” ki nou pé vive asterla-la.

Faire attention ar bann distraction ki prend trop ou le temps

Kan Jésus ti envoye 70 disciple preché, li ti dire: “Recolte-la li grand, mais bann travailleur zot tigit. Alors, suppliye Maitre recolte pou Li envoye bann travailleur dan so recolte.” (Luc 10:2) Pareil couma enn dimoune kapav perdi enn partie so plantation si li trop tardé pou faire recolte pendant ler recolte, bann dimoune kapav perdi zot la vie si nou neglige travail predication. Alors, Jésus ti ajouté: “Lor chemin, pa maye personne dan zot lé-bras pou dire bonjour.” (Luc 10:4) Mot ki’nn servi pou “bonjour” dan langue original kapav vedir plus ki enn simple “bonjour, ki maniere.” Dan sa lepok-la zot ti maye zot camarade plusieurs fois ek zot ti faire enn longue conversation kan zot ti joinde enn camarade. Alors Jésus ti donne so bann disciple l’instruction pou evite bann distraction ki pa necessaire ek pou bien servi zot le temps. Message ki zot ti ena pou preché ti urgent.

Pense lor quantité le temps ki bann distraction kapav prend. Pendant plusieurs l’année, c’est devant television ki bann dimoune inn passe plus zot le temps libre. Ki nou kapav dire concernant telephone portable ek ordinateur? Dapré enn sondage ki’nn faire avek 1,000 dimoune dan l’Angleterre, finn trouvé ki “en moyenne dan enn jour enn Anglais passe 88 minute lor enn telephone normal, encore 62 minute lor enn telephone portable, 53 minute pou envoye e-mail ek 22 minute pou envoye message.” Kan nou compte tousala li arrive plus ki deux fois quantité l’heure ki enn pionnier auxiliaire passé dan so ministere chaque jour. Comié le temps eski ou passé lor telephone, pou envoye e-mail, ek envoye message?

Ernst ek Hildegard Seliger ti faire bien attention ar fason ki zot ti servi zot le temps. Toulé-deux finn passe en tou plus ki 40 l’année dan camp concentration nazi ek dan bann prison communiste. Apré ki ti libere zot, zot ti faire pionnier ziska ki zot ti termine zot la vie lor la terre.

Beaucoup ti envie garde contact avek bann Seliger a travers bann lettre. Sa couple-la ti kapav passe la plupart zot journée pou lire ou-soit pou ecrire bann lettre. Mais, c’est bann kitsoz spirituel ki ti passe en premier dan zot la vie.

Li vrai, ki nou tou nou content pou contigne garde contact avek bann dimoune ki nou content, ek pena nanyin mauvais ladan. Kan de temps en temps nou change bann l’habitude dan nou la vie toulé-jour ek nou faire bann activité ki nou’nn bien choisir, sa faire nou di-bien. Mais selman, li sage ki nou veillé pou controle bann distraction ki prend trop le temps pendant sa jour pou preche bon nouvelle-la.

Preche la bonne nouvelle a fond

C’est vrai-mem enn benediction pou vive dan “enn jour pou bann bon nouvelle.” Fodé pa nou laisse-nou distraire pareil couma ti arrive sa quatre lepreux-la au commencement. Rappel ki zot ti tire sa conclusion-la: “Li pa bon seki nou pé faire-la.” Pareil, li pa bon ki nou laisse bann l’occupation personnel ou-soit bann distraction ki prend trop nou le temps empeche nou faire maximum dan nou ministere.

Dan sa domaine-la, nou ena enn bon l’exemple pou suive. Kan li ti pense lor so 20 premier l’année dan so ministere, l’apotre Paul ti ecrire: “Mo ti preche la bonne nouvelle concernant Christ, a fond.” (Rom. 15:19) Paul pa ti laisse nanyin diminué so zele. Anou montré-nou zelé pareil couma li, kan nou koz lor message Royaume dan sa “jour pou bann bon nouvelle[-la].”

[Zimage lor page 31]

Blessing pa ti laisse bann l’interet personnel empeche li faire so service a plein temps

[Zimage lor page 32]

Bann Seliger ti faire attention ar maniere ki zot ti servi zot le temps