L’amour Christ pousse nou pou content lezot

“Jésus, ki ti content bann ki ti pou li dan le monde, ti content zot ziska la fin.”—JEAN 13:1.

1, 2. (a) Dan ki fason l’amour ki Jésus ti ena ti extraordinaire? (b) Ki bann l’aspect lor l’amour nou pou examiné dan sa lartik-la?

JÉSUS inn donne enn l’exemple parfait en seki concerne l’amour. Dan tou seki li ti faire—fason ki li ti kozé, so comportement, so l’enseignement, ek so la mort en sacrifice—ti montré so l’amour. Ziska la fin so la vie lor la terre, Jésus ti montré l’amour envers bann dimoune ki li ti joinde ek surtout envers so bann disciple.

² L’exemple extraordinaire ki Jésus inn laissé lor l’amour, montré nou ki modele nou bizin suive. Sa pousse nou pou montré mem l’amour envers nou bann frere ek soeur spirituel, ek aussi envers lezot dimoune. Dan sa lartik-la, nou pou guetté couma bann ancien dan congregation kapav imite Jésus ek traite avek amour bann dimoune ki faire peché, mem bann peché grave. Nou pou guetté aussi couma l’amour ki Jésus ti manifesté pousse bann chretien pou aide zot bann frere ek lezot dimoune ki dan bann situation economik difficile, kan ena bann catastrophe, ek kan zot malade.

3. Mem si Pierre ti faire enn peché grave, couma Jésus ti considere li?

³ Dan la nuit avant la mort Jésus, Pierre, so prop zapotre, ti renié li trois fois. (Marc 14:66-72) Pourtant, apré ki Pierre ti change so l’attitude, ti retourné, pareil couma Jésus ti dire li pou faire, Jésus ti pardonne li ek ti mem donne li bann grand responsabilité. (Luc 22:32; Actes 2:14; 8:14-17; 10:44, 45) Ki nou aprann ar l’attitude Jésus envers bann dimoune ki finn faire bann peché grave?

Manifesté mem l’etat d’esprit ki Christ, envers bann ki faire peché

4. Dan ki situation li surtout necessaire pou montré mem l’etat d’esprit ki Christ?

⁴ Ena plusieurs situation kot nou bizin manifesté mem l’etat d’esprit ki Christ. Enn parmi bann situation ki kapav bien triste c’est kan enn membre nou famille ou-soit enn kikenn dan congregation inn faire enn peché grave. Malheureusement, a mesure ki bann dernier jour le monde Satan pé al fini, l’esprit le monde pé faire encore plus degat parmi beaucoup frere ek soeur. Dan le monde, ena enn l’attitude ki mauvais ek indifferent en seki concerne le bien ek le mal. Sa kapav influence nou tou, ki nou jeune ou-soit nou vié, ek affaibli nou determination pou faire seki bon. Dan premier siecle, ti bizin exclu certain dan congregation, ek discipline lezot dan enn fason severe. Zordi aussi pareil. (1 Cor. 5:11-13; 1 Tim. 5:20) Selman, kan bann ancien ki traite sa bann cas-la montré l’amour pareil couma Christ, sa kapav ena enn grand l’effet lor sa dimoune ki’nn faire peché-la.

5. Couma bann ancien bizin imite l’attitude Christ envers bann ki’nn faire peché?

⁵ Pareil couma Jésus, bann ancien bizin touletan suive bann principe juste ki Jéhovah inn etabli. Kan zot faire sa, zot reflete douceur, bonté, ek l’amour Jéhovah. Kan enn chretien li vrai-mem repenti, li ena “enn grand chagrin dan [so] leker” ek li “demoralisé” a cause so peché, kitfois li pa difficile pou bann ancien “redresse sa dimoune-la avek douceur.” (Ps. 34:18; Gal. 6:1) Mais couma zot bizin traite enn kikenn ki rebelle ek ki pa montré preské okenn repentance?

6. Ki bann ancien bizin evité faire kan zot traite avek bann ki’nn faire peché, ek kifer?

⁶ Kan enn dimoune ki’nn faire peché rejette bann conseil ki sorti dan la Bible ou-soit essaye mette tort lor lezot pou seki li’nn faire, kitfois sa faire bann ancien ek lezot, en colere. Alors ki zot bien koné ki tort sa dimoune-la inn faire, sa kapav pousse-zot pou dire li seki zot pensé lor seki li’nn faire ek lor so l’attitude. Mais, la colere faire di-tort ek pa reflete “pensée Christ.” (1 Cor. 2:16; lire Jacques 1:19, 20.) Jésus ti averti certain dan so lepok dan enn fason bien ferme ek franc, mais jamais li’nn dire kitsoz ki montré la haine, ni ki ti pou blesse zot. (1 Pierre 2:23) Au contraire, par so parole ek so action, li ti laisse enn la porte ouvert pou ki bann ki ti faire peché, kapav repenti ek regagne faveur Jéhovah. Oui, enn parmi bann raison principal kifer Jésus ti vinn dan le monde c’est pou “sauve bann ki faire peché.”—1 Tim. 1:15.

7, 8. Ki bizin guide bann ancien kan zot faire bann comité judiciaire?

⁷ Couma l’exemple Jésus dan sa domaine-la bizin influence nou l’attitude envers bann ki bizin discipline dan congregation? Nou pa blié ki sa disposition biblik pou ena enn comité judiciaire dan congregation-la, sa protege so bann membre ek kapav pousse enn dimoune ki’nn gagne sa discipline-la, pou repenti. (2 Cor. 2:6-8) Li bien triste ki certain pa repenti ek ki bizin exclu zot, mais li bien encourageant pou koné ki beaucoup parmi sa bann dimoune-la plitar retourne vers Jéhovah ek la congregation. Kan bann ancien imite l’etat d’esprit Christ, zot faire sa vinn pli facile pou sa kikenn ki’nn faire peché-la pou réexamine so conduite ek pou repenti, ek finalement pou retourne vers Jéhovah. Dan l’avenir, certain parmi sa bann dimoune ki’nn faire peché-la kitfois pa pou rappel tou bann conseil biblik ki bann ancien ti donne zot, mais seki surement zot pou rappel, c’est ki bann ancien ti respecté zot dignité ek ti traite zot avek amour.

⁸ Alors, bann ancien bizin manifesté “fruit l’esprit,” surtout l’amour pareil couma Christ ti manifesté, mem si bann ki’nn faire peché pa accepté bann conseil biblik. (Gal. 5:22, 23) Fodé jamais zot pressé pou exclu enn dimoune ki’nn faire peché. Zot bizin montré ki zot envie ki sa bann ki’nn faire peché-la retourne vers Jéhovah. Lerla, kan plitar enn kikenn ki’nn faire peché repenti, couma beaucoup faire, kitfois li pou bien reconnaissant envers Jéhovah ek aussi envers “bann zom [ki] couma bann don” ki’nn faire sa pli facile pou li pou retourne dan congregation.—Éph. 4:8, 11, 12.

Montré l’amour pareil couma Christ, dan lepok la fin

9. Donne enn l’exemple couma Jésus ti montré so l’amour pou so bann disciple dan enn fason pratik.

⁹ Luc raconte enn l’occasion kot Jésus ti montré so l’amour kan li ti mette so bann disciple en garde kont enn danger. Jésus ti koné ki ti pou arrive enn lepok kot bann soldat romain ti pou attak la ville Jérusalem ki ti’nn condamné, ek ki personne pa ti pou kapav sorti dan sa la ville-la. Jésus ti donne sa l’avertissement-la so bann disciple: “Kan zot trouve Jérusalem entouré par bann l’armée ki pé campé, zot pou koné ki so destruction finn kosté.” Ki zot ti pou bizin faire? Depuis avant-mem, Jésus ti donne zot bann l’instruction bien clair ek precis. Li ti dire zot: “Lerla, bann ki dan Judée bizin sauvé, al dan bann montagne, ek bann ki dan la ville bizin sorti allé, ek bann ki dan la campagne zot, fodé pa ki zot rente dan la ville; parski c’est bann jour kot bizin faire la justice, ek kot tou kitsoz ki finn ecrire, kapav realisé.” (Luc 21:20-22) Apré ki l’armée romain ti entoure Jérusalem en 66 nou lepok, bann ki ti obeir ti suive sa bann l’instruction-la.

10, 11. Kan nou examiné couma bann chretien ti comporte-zot kan zot ti sauvé pou quitte Jérusalem, couma sa kapav aide nou pou prepare-nou pou la ‘grande tribulation’?

¹⁰ Pendant ki zot ti sauvé pou quitte Jérusalem, bann chretien ti bizin montré l’amour sakenn pou so camarade, pareil couma Christ ti montré envers zot. Surement zot ti bizin partage seki zot ti ena entre zot. Mais prophetie Jésus ti ena enn pli grand realisation ki zis destruction sa ancien la ville-la. Jésus ti annoncé: “Pou ena enn grand tribulation couma jamais pa finn ena depuis commencement le monde ziska zordi, non, ek ki pa pou ena encore.” (Mat. 24:17, 18, 21) Avant ek pendant sa “grand tribulation” ki pé vini-la, nou aussi kitfois nou pou gagne bann difficulté ek nou pa pou ena seki nou bizin lor plan materiel. Si nou ena mem l’etat d’esprit ki Christ, nou pou reussi endure sa.

¹¹ Kan sa pou arrivé, nou pou bizin suive l’exemple Jésus ek montré enn l’amour ki pa egoïste. En rapport avek sa, Paul ti donne sa conseil-la: “Fodé ki sakenn parmi nou faire so prochain plaisir dan seki bon pou fortifié li. Parski mem Christ pa finn faire li-mem plaisir . . . Asterla, ki Bondié ki donne l’endurance ek consolation, faire zot ena mem l’etat d’esprit entre zot, pareil couma Christ Jésus ti ena.”—Rom. 15:2, 3, 5.

12. Ki qualité l’amour nou bizin developpé asterla, ek kifer?

¹² Pierre, ki ti gagne l’amour Jésus, ti aussi conseil bann chretien pou developpe “enn l’amour fraternel ki pa hypocrite” ek pou montré “l’obeissance pou la verité.” Zot ti bizin “content sakenn zot camarade avek enn grand l’amour ki sorti dan zot leker.” (1 Pierre 1:22) Zordi, plus ki avant, nou bizin developpe bann qualité pareil couma Christ. Deja asterla, bann pression pé augmenté lor bann serviteur Bondié. Sa bouleversement ki fek ena dan le monde a cause crise economik montré bien ki fodé pa nou mette nou confiance dan okenn partie sa le monde-la. (Lire 1 Jean 2:15-17.) Au contraire, a mesure ki la fin sa systeme-la pé pli kosté, nou bizin vinn pli proche ar Jéhovah ek ar sakenn nou camarade, ek developpe bann vrai l’amitié dan congregation. Paul ti donne sa conseil-la: “Dan l’amour fraternel, ena enn grand l’affection sakenn pou so camarade. Zot bizin toujours premier pou honore sakenn so camarade.” (Rom. 12:10) Ek Pierre ti mette l’accent encore lor sa point-la kan li ti dire: “Avant tou, zot bizin ena enn l’amour profond sakenn pou zot camarade, parski l’amour couvert enn grand quantité peché.”—1 Pierre 4:8.

13-15. Couma certain frere inn montré mem l’amour ki Christ apré bann catastrophe?

¹³ Partout dan le monde, bann Témoins de Jéhovah ena reputation pou montré vrai l’amour envers zot prochain. Prend l’exemple bann Témoins ki ti porte-zot volontaire pou al aidé apré ki bann tempete ek bann cyclone ti’nn detruire bann grand region dan sud l’Amérique en 2005. Plus ki 20,000 volontaire ti senti-zot poussé par l’exemple Jésus, ek beaucoup parmi zot ti quitte zot lakaz bien confortable ek enn travail ki ti donne zot enn certain securité, pou al aide zot bann frere ek soeur ki ti affecté par sa bann catastrophe-la.

¹⁴ Dan enn l’endroit, enn vague 10 metre hauteur ti al ziska enn distance 80 kilometre dan pays. Kan sa de l’eau-la ti baissé, enn tiers bann lakaz ek bann batiment ki ti lor so passage ti’nn detruire net. Bann Témoins volontaire ti sorti dan plusieurs pays pou vinn aidé; certain ti qualifié, zot ti amenn zot zouti ek lezot materiaux ek zot ti disposé pou faire n’importe ki travail ki ti necessaire. Deux prop soeur, toulé-deux ti veuve, ti mette tou seki zot ti ena dan enn van ek ti conduire plus ki 3,000 km pou al aidé. Pli jeune soeur-la finn reste dan sa l’endroit-la, li pé contigne aide comité secours local ek li pé servi en tant ki pionnier permanent.

¹⁵ Bann volontaire ti construire ou-soit ti repare plus ki 5,600 lakaz pou bann Témoins de Jéhovah ek pou lezot dimoune dan sa l’endroit-la. Ki sentiment sa bann Témoins-la ti ena kan zot ti trouve bannla manifesté sa grand l’amour-la envers zot? Enn soeur ki so lakaz ti’nn detruire, ti al reste dan enn ti caravane ek plafond sa caravane-la ti coulé, ek en plus, so four ti cassé. Bann frere ti construire enn lakaz bien simple mais bien confortable pou li. Kan li ti deboute devant so nouveau ti lakaz, li ti ploré tellement li ti reconnaissant envers Jéhovah ek envers so bann frere. Dan beaucoup cas, bann Témoins ki ti perdi zot lakaz ek ki ti bizin al reste dan lezot place dan enn fason temporaire, ti contigne reste dan sa bann place-la pendant enn an ou plus, mem apré ki bann volontaire ti fini reconstruire zot lakaz. Kifer? Zot ti laisse zot nouveau lakaz pou bann volontaire ki ti vinn aidé. Zot ti vrai-mem montré ki zot ena mem l’etat d’esprit ki Christ!

Manifesté mem l’etat d’esprit ki Christ envers bann ki malade

16, 17. Dan ki fason nou kapav imite l’etat d’esprit Christ envers bann ki malade?

¹⁶ Pa beaucoup parmi nou ki finn passe par enn grand catastrophe naturel dan so la vie. Mais preské nou tou nou bizin faire face ar probleme la santé, soit nou prop la santé, soit la santé enn membre nou famille. L’etat d’esprit Jésus envers bann malade donne nou enn l’exemple pou suive. So l’amour ti pousse li pou ena pitié pou zot. Kan bann la foule ti amenn zot malade vers li, ‘li ti gueri zot tou.’—Mat. 8:16; 14:14.

¹⁷ Zordi, bann chretien pena mem pouvoir ki Jésus pou gueri bann malade, mais pareil couma Jésus, zot ena pitié pou bann malade. Couma zot montré sa? Enn preuve ki bann ancien montré ki zot ena mem l’etat d’esprit ki Christ, c’est kan zot prend bann disposition pou aide bann malade dan congregation ek zot veillé ki mette en pratik sa bann disposition-la. C’est coumsa ki zot suive seki Matthieu 25:39, 40, dire.a (Lire.)

18. Couma deux soeur ti montré enn vrai l’amour pou enn lot soeur, ek ki resultat sa ti produire?

¹⁸ Bien sur, li pa necessaire ki enn kikenn li enn ancien pou li faire di-bien envers lezot. Anou prend l’exemple Charlene, ki ena 44 an. Li ti ena enn cancer ek docteur ti dire li ki li ti reste zis dix jour pou vive. Deux soeur dan congregation, Sharon ek Nicolette ti trouvé ki Charlene ti bizin l’aide, ek aussi ki quantité sa ti difficile lor plan physik ek affectif pou so mari occupe li. Alors, zot ti propose pou aide Charlene a plein temps pendant bann dernier moment ki li ti resté pou vive. Finalement, Charlene ti vive six semaine, mais sa deux soeur-la ti montré zot l’amour ziska so la mort. Sharon dire: “Li bien difficile kan ou koné ki enn kikenn pa pou gueri. Mais, Jéhovah ti donne nou la force. Sa situation-la inn rapproche nou ar Jéhovah ek ar sakenn nou camarade.” Mari Charlene dire: “Mo pou toujours rappel sa soutien rempli ar l’amour ek pratik ki sa deux soeur-la inn donne nou. Zot bon mobile ek zot l’attitude positif ti faire sa dernier l’epreuve-la pli facile pou mo Charlene ki ti reste fidele, ek sa ti donne moi enn soulagement ki mo ti bien bizin lor plan physik ek affectif. Touletan mo pou reconnaissant envers zot. Zot l’esprit sacrifice finn fortifié mo la foi en Jéhovah ek mo l’amour pou tou mo bann frere ek soeur.”

19, 20. (a) Cite cinq l’aspect concernant l’etat d’esprit ki Christ ti manifesté, ki nou finn examiné. (b) Ki ou finn bien decidé pou faire?

¹⁹ Dan sa trois lartik-la, nou finn guette cinq l’aspect lor l’etat d’esprit ki Jésus ti ena ek couma nou kapav pense ek agir pareil couma li. Anou “ena enn caractere doux ek enn leker humble,” pareil couma Jésus. (Mat. 11:29) Anou aussi faire zeffort pou traite lezot avek bonté, mem kan nou trouve bien zot l’imperfection ek zot faiblesse. Ek avek courage, anou obeir tou bann commandement Jéhovah, mem kan nou gagne bann l’epreuve.

²⁰ Finalement, anou ena l’amour pou tou nou bann frere pareil couma Christ li-mem ti manifesté “ziska la fin.” C’est sa qualité l’amour-la ki faire tou dimoune koné ki nou bann vrai disciple Jésus. (Jean 13:1, 34, 35) Oui, “ki [nou] contigne ena l’amour fraternel.” (Héb. 13:1) Pa hesité pou montré nou l’amour! Anou servi nou la vie pou loué Jéhovah ek pou aide lezot! Jéhovah pou beni nou bann zeffort sincere.

[Note]

Eski ou kapav expliké?

• Couma bann ancien kapav manifesté mem l’etat d’esprit ki Christ envers bann ki’nn faire peché?

• Kifer li important ki nou imite l’amour ki Christ ti montré surtout dan sa lepok la fin-la?

• Couma nou kapav reflete l’etat d’esprit Christ envers bann ki malade?

[Zimage lor page 19]

Bann ancien envie ki bann ki’nn faire peché retourne vers Jéhovah

[Zimage lor page 21]

Couma bann chretien ki ti quitte Jérusalem ti reflete l’etat d’esprit ki Christ ti ena?

[Zimage lor page 22]

Bann Témoins de Jéhovah ena reputation pou mette en pratik mem l’amour ki Christ ti manifesté