Ameliore zot bann la priere a travers l’etude la Bible
“Ah Jéhovah, s’il te plait, ki to zoreille ecoute la priere to serviteur.”—NEH. 1:11.
1, 2. Kifer sa pou aide nou pou examine certain la priere ki finn ecrire dan la Bible?
LA PRIERE ek l’etude la Bible c’est bann kitsoz important dan vrai l’adoration. (1 Thess. 5:17; 2 Tim. 3:16, 17) Bien sur, la Bible li pa enn livre la priere. Pourtant, ena beaucoup la priere ladan, parmi ena beaucoup ki trouve dan livre Psaumes.
2 A mesure ou lire ek etudié la Bible, surement ou pou trouve bann la priere ki adapté ar bann situation ki ou bizin faire face. En realité, qualité ou bann la priere amelioré kan ou ajoute dan seki ou dire bann l’expression ki trouve dan bann la priere ki’nn ecrire dan la Bible. Ki ou kapav aprann ar bann dimoune ki Bondié inn reponn zot supplication, ek ar seki zot inn dire dan zot bann la priere?
Rod direction Bondié ek suive sa direction-la
3, 4. Ki mission serviteur Abraham ti ena, ek ki nou kapav aprann ar seki Jéhovah ti faire?
3 Kan ou etudié la Bible, ou aprann ki touletan ou bizin prié pou gagne direction Bondié. Prend par exemple seki ti arrivé kan Abraham ti envoye so pli ancien serviteur—kitfois Éliézer—en Mésopotamie pou trouve enn femme ki ena la crainte pou Bondié, pou marié ar Isaac. Pendant ki bann femme ti pé tire de l’eau dan enn puit, sa serviteur-la ti prié: “Jéhovah . . . , seki bizin arrivé c’est ki sa jeune fille ar ki mo pou dire: ‘Baisse to pot de l’eau, s’il te plait, pou mo kapav boire,’ ek ki vrai-mem pou dire moi: ‘Boire, ek mo pou donne de l’eau to bann chameau aussi,’ c’est li-mem ki to bizin choisir pou to serviteur, pou Isaac; ek par sa, faire moi koné ki to finn montré enn l’amour fidele envers mo maitre.”—Gen. 24:12-14.
4 Jéhovah ti reponn la priere serviteur Abraham kan Rébecca ti donne de l’eau so bann chameau. Rébecca pa ti tardé pou accompagne Éliézer ziska Canaan ek li ti marié ar Isaac, ek Isaac ti bien content li. Bien sur, ou pa kapav attann ki Bondié pou donne ou enn signe special. Pourtant, Li pou guide ou dan ou la vie si ou prié Li ek si ou bien decidé pou laisse so l’esprit guide ou.—Gal. 5:18.
La priere kapav calmé nou kan nou tracassé
5, 6. Ki kitsoz interessant nou remarké dan la priere ki Jacob ti faire kan li ti pré pou joinde Esaü?
5 La priere kapav calmé nou kan nou tracassé. Kan Jacob ti peur pou so la vie kan li ti pou al joinde so frere jumeau Esaü, li ti faire sa la priere-la: “Ah Jéhovah, . . . mo pa merite tou sa l’amour fidele ek tou sa fidelité ki to’nn montré envers to serviteur-la . . . Mo prié pou ki to sap moi dan la main mo frere, dan la main Ésaü, parski mo peur li, pangar li vini ek vrai-mem li attak moi, mama ek zenfant ensam. Ek toi to finn dire: ‘Pena doute, mo pou traite toi bien ek mo pou faire to descendant vinn pareil couma bann la grain di-sable ki trouve dan bord la mer, ki pa kapav compté tellement zot beaucoup.’ ”—Gen. 32:9-12.
6 Mem si apré so la priere, Jacob ti prend bann precaution ki bizin pou protege so famille, c’est Bondié ki ti permette li pou reconcilié avek Esaü. (Gen. 33:1-4) Lire bien sa la priere-la, ou pou trouvé ki Jacob pa ti zis prié pou gagne l’aide. Dan bann parole ki li ti dire, li ti aussi montré ki li ti ena la foi dan descendance ki Bondié ti promette ek reconnaissance pou l’amour fidele Bondié. Eski ou ressenti la ‘frayeur dan ou leker’? (2 Cor. 7:5) Si oui, supplication Jacob kapav faire ou rappel ki la priere kapav calmé ou kan ou tracassé. Selman, fodé ki dan ou bann la priere ou pa zis demann kitsoz, ou bizin aussi exprime ou la foi.
Prié pou gagne sagesse
7. Kifer Moïse ti prié pou gagne connaissance lor fason agir Jéhovah?
7 C’est ou desir pou faire Jéhovah plaisir ki bizin pousse ou pou demann Li la sagesse. Moïse ti prié pou gagne enn connaissance lor fason ki Bondié agir. Li ti suppliye Jéhovah: “Guetté, [Jéhovah] to pé dire moi: ‘Faire sa peuple-la sorti [dan l’Égypte]’ . . . Ek asterla, s’il te plait, si mo finn trouve faveur devant to lizié, faire moi konn to bann chemin, s’il te plait, . . . pou ki mo kapav trouve faveur devant to lizié.” (Ex. 33:12, 13) Alors, pou reponn so la priere, Bondié ti donne Moïse enn pli grand connaissance lor fason ki Li agir—enn kitsoz necessaire pou ki Moïse kapav dirige peuple Jéhovah.
8. Ki bienfait ou kapav gagné kan ou medite lor 1 Rois 3:7-14?
8 David aussi ti faire sa la priere-la: “Ah Jéhovah, faire moi konn to bann chemin.” (Ps. 25:4) Salomon, garson David, ti suppliye Bondié pou donne li sagesse ki li ti bizin pou prend so responsabilité en tant ki le roi en Israël. La priere Salomon ti faire Jéhovah plaisir, ek Li pa ti donne li zis seki li ti demandé mais aussi la richesse ek la gloire. (Lire 1 Rois 3:7-14.) Si ou gagne bann privilege dan congregation ek ou pensé ki ou pena capacité pou prend sa responsabilité-la, prié pou gagne la sagesse ek montré-ou humble. Lerla Bondié pou aide ou pou gagne connaissance ek agir avek sagesse ki bizin pou prend ou responsabilité dan enn bon fason ek avek amour.
Prié avek tou ou leker
9, 10. Ki ou finn remarké concernant bann reference ki Salomon ti faire ar leker dan so la priere pou l’inauguration temple?
9 Pou ki Bondié ecoute nou la priere, nou bizin prié avek tou nou leker. Dan 1 Rois chapitre 8 nou trouve la priere ki Salomon ti faire avek tou so leker devant enn grand la foule ki ti rassemblé dan Jérusalem pou l’inauguration temple Jéhovah en 1026 avant nou lepok. Apré ki ti mette l’arche de l’alliance dan Très-Saint ek ki nuage Jéhovah ti rempli temple, Salomon ti loué Bondié.
10 Etudié la priere Salomon ek remarké ki quantité fois li ti faire reference ar mot, leker. Salomon ti reconette ki c’est zis Jéhovah tousel ki konn leker enn dimoune. (1 Rois 8:38, 39) Sa-mem la priere-la montré ki ena l’espoir pou enn dimoune ki’nn faire peché pou ‘retourne vers Bondié avek tou so leker.’ Si enn l’ennemi ti faire bann serviteur Bondié vinn prisonnier, Bondié ti pou tann zot supplication si zot leker ti complet envers Li. (1 Rois 8:48, 58, 61) Alors, pena doute ki ou la priere bizin sorti dan ou leker.
Couma bann Psaumes kapav ameliore nou bann la priere
11, 12. Ki ou finn aprann ar la priere enn Lévite ki pa ti kapav al dan temple Bondié pendant enn certain temps?
11 Si nou etudié bann Psaumes, sa kapav ameliore qualité nou bann la priere ek aide nou pou attann ki Bondié reponn zot. Prend par exemple patience ki enn Lévite ki ti en exil ti manifesté. Mem si li pa ti kapav al dan temple Jéhovah pendant enn lepok, li ti chanté: “Ah mo nâme, kifer to abatte coumsa, ek kifer to pa pé laisse moi trankil endan mo-mem? Attann Bondié, parski mo pou loué Li encore, couma enn kikenn ki delivré moi dan enn fason extraordinaire ek couma mo Bondié.”—Ps. 42:5, 11; 43:5.
12 Ki ou kapav aprann ar sa Lévite-la? Si bann opposant inn mette ou dan prison parski ou pé faire seki juste, ek ki a cause sa ou pa kapav rassemblé ensam avek bann lezot chretien dan reunion pendant enn certain temps, attann avek patience ki Bondié agir dan ou faveur. (Ps. 37:5) Medite lor bann bienfait ki ou finn gagné dan service Bondié dan le passé, ek prié pou ou ena l’endurance pendant ki ou pé ‘attann ki Bondié’ retabli ou situation pou ou kapav recommence frequente so bann serviteur dan enn fason regulier.
Prié avek la foi
13. En accord avek Jacques 1:5-8, kifer nou bizin prié avek la foi?
13 Dan n’importe ki situation ou été, prié touletan avek la foi. Si ou pé faire face ar enn difficulté ki pé testé ou fidelité, suive conseil ki disciple Jacques ti donné. Prié Jéhovah ek pa douté ki Li kapav donne ou sagesse ki ou bizin pou faire face ar ou difficulté. (Lire Jacques 1:5-8.) Bondié konn n’importe ki pensée ki pé fatigue ou, ek Li kapav guide ou ek reconforte ou par so l’esprit saint. Ouvert ou leker ar Li avek enn grand la foi, ‘sans ena bann doute,’ ek accepté direction so l’esprit ek conseil ki sorti dan so Parole.
14, 15. Kifer ou kapav dire ki Hanna ti prié ek ti agir avek la foi?
14 Hanna, enn parmi deux femme Elqana, enn Lévite, ti prié ek ti agir avek la foi. Peninna, lot femme Elqana, ki ti ena plusieurs zenfant, ti bouffonne Hanna ki pa ti ena zenfant. Kan zot ti al tabernacle, Hanna ti faire enn voeu: li ti dire Jéhovah ki si li gagne enn garson, li pou donne li Jéhovah. Kan Hanna ti pé prié Jéhovah, so la levre ti pé tremblé, ek a cause sa, grand pretre Éli ti croire ki li ti sou. Kan li ti aprann ki Hanna pa ti sou, Éli ti dire li: “Ki Bondié Israël donne toi seki to’nn demann Li.” Mem si Hanna pa ti koné exactement ki resultat sa ti pou ena, li ti ena la foi ki Bondié ti pou reponn so la priere. Alors, “so figure ti nepli parette tracassé.” Li ti nepli chagrin, ni bouleversé.—1 Sam. 1:9-18.
15 Apré ki Samuel ti’nn né ek kan li ti’nn arrete boire avek so mama, Hanna ti presente li devant Jéhovah pou li faire enn service sacré dan tabernacle. (1 Sam. 1:19-28) Si ou prend le temps pou medite lor la priere ki Hanna ti faire dan sa l’occasion-la, sa kapav aide ou pou ameliore ou prop la priere. Sa pou kapav aide ou aussi pou trouvé ki si ou prié Jéhovah ek ou ena la foi ki Li pou reponn ou, ou pou kapav faire face mem ar enn grand tristesse a cause enn situation difficile.—1 Sam. 2:1-10.
16, 17. Ki ti arrivé parski Nehémia ti prié ek ti agir avek la foi?
16 Nehémia enn serviteur Jéhovah ki ti juste ek ki ti vive dan cinquieme siecle avant nou lepok, ti prié ek ti agir avek la foi. Li ti suppliye Jéhovah: “Ah Jéhovah, s’il te plait, ki to zoreille ecoute la priere to serviteur ek la priere to bann serviteur ki content pou ena la crainte pou to nom; s’il te plait, faire to serviteur reussi zordi ek faire sa missié-la ena pitié pou li.” Kisannla “sa missié-la” ti été? Le roi perse Artaxerxès ek Nehémia ti pé servi li di-vin.—Neh. 1:11.
17 Nehémia ti prié avek la foi pendant plusieurs jour kan li ti aprann ki bann Juif ki ti’nn liberé dan Babylone ti “dan enn mauvais situation ek dan deshonneur; ek muraille Jérusalem [ti’nn] demoli.” (Neh. 1:3, 4) Bondié ti reponn la priere Nehémia plus ki seki li ti pé attann kan le roi Artaxerxès ti donne li permission pou al reconstruire muraille Jérusalem. (Neh. 2:1-8) Bann Israélite pa ti tardé pou repare sa muraille-la. Si Bondié ti reponn bann la priere Nehémia c’est parski li ti mette l’accent lor vrai l’adoration ek li ti prié avek la foi. Eski ou bann la priere aussi pareil?
Pa blié pou loué ek pou remercié Jéhovah
18, 19. Pou ki different raison enn serviteur Jéhovah bizin loué Li ek remercié Li?
18 Kan ou faire la priere, pa blié pou loué ek pou remercié Jéhovah. Ena beaucoup raison pou faire sa! Par exemple, David ti ena enn grand desir pou loué royauté Jéhovah. (Lire Psaume 145:10-13.) Eski ou bann la priere montré ki ou apprecié privilege pou annonce Royaume Jéhovah? Bann parole ki bann ecrivain psaume ti ecrire kapav aussi aide ou pou dire Bondié dan bann la priere sincere ki quantité ou apprecié bann reunion ek bann l’assemblée.—Ps. 27:4; 122:1.
19 Reconnaissance pou bann bon relation ki ou ena avek Bondié kapav pousse ou pou faire bann la priere ki sorti dan ou leker avek bann pensée pareil coumsa: “Mo pou loué toi parmi bann peuple, o Jéhovah; mo pou chante pou toi parmi bann nation. Parski to l’amour fidele li grand ziska le ciel, ek to fidelité ziska bann nuage. Eleve-toi pli haute ki le ciel, o Bondié; ki to la gloire li pli haute ki la terre entier.” (Ps. 57:9-11) C’est bann sentiment bien encourageant, pa vrai? Eski ou pa d’accord ki sa bann parole touchant ki sorti dan bann psaume-la kapav ena enn l’effet lor ou bann la priere ek ameliore zot?
Suppliye Bondié avek enn grand respé
20. Couma Marie ti exprime so l’attachement pou Bondié?
20 Ou bann la priere bizin montré ki ou ena enn grand respé pou Jéhovah. Bann parole ki Marie ti dire zis apré ki li ti aprann ki li ti pou vinn mama le Messie, ti pareil avek bann parole ki Hanna ti dire kan li ti presente so jeune garson Samuel pou servi dan tabernacle. Nou trouve bien sa grand respé ki Marie ti ena-la kan li ti dire: “Mo nâme loué Jéhovah, ek pa kapav empeche mo l’esprit pou ena enn grand la joie concernant Bondié, mo Sauveur.” (Luc 1:46, 47) Eski ou kapav ameliore ou la priere avek bann sentiment pareil coumsa? Li pa etonnant ki Bondié ti choisir Marie, enn femme ki ti ena la crainte pou Li, pou vinn mama Jésus, le Messie!
21. Couma bann la priere Jésus ti montré so grand respé ek so la foi?
21 Jésus ti prié avek respé ek enn grand la foi. Par exemple, avant li ti ressuscite Lazare: “Jésus ti leve so lizié vers le ciel ek ti dire: ‘Papa, mo remercié toi ki to’nn tann moi. Li vrai, mo koné ki touletan to tann moi.’ ” (Jean 11:41, 42) Eski ou bann la priere montré ki ou ena enn grand respé ek la foi coumsa? Etudié la priere modele ki Jésus ti faire avek enn grand respé, ou pou trouvé ki bann kitsoz bien important ki ena ladan c’est sanctification nom Jéhovah, ki so Royaume vini, ek ki so volonté realisé. (Mat. 6:9, 10) Reflechi lor ou prop la priere. Eski zot montré ki Royaume Bondié ek sanctification so nom ena enn grand l’importance pou ou, ek ki ou envie faire so volonté? Zot bizin montré sa.
22. Kifer ou kapav sur ki Jéhovah pou donne ou courage pou annonce la bonne nouvelle?
22 A cause persecution ou-soit lezot difficulté, souvent dan nou la priere nou suppliye Jéhovah pou aide nou pou servi Li avek courage. Kan Sanhédrin ti donne Pierre ek Jean l’ordre pou arrete “enseigne au nom Jésus,” avek courage sa bann zapotre-la ti refuse pou suive sa l’ordre-la. (Actes 4:18-20) Apré ki ti largue zot, zot ti dire zot bann compagnon chretien seki ti’nn arrivé. Lerla tou bann ki ti present ti suppliye Bondié pou aide zot pou koz so parole avek courage. Sa ti surement enn kitsoz extraordinaire kan Bondié ti reponn sa la priere-la, parski zot ti “rempli avek l’esprit saint ek zot ti pé koz parole Bondié avek courage”! (Lire Actes 4:24-31.) Resultat: plusieurs millier dimoune ti vinn bann adorateur Jéhovah. La priere kapav aussi fortifié ou pou annonce la bonne nouvelle avek courage.
Contigne ameliore ou la priere
23, 24. (a) Cite bann lezot l’exemple pou montré couma l’etude la Bible kapav ameliore ou la priere. (b) Ki ou pou faire pou ameliore ou la priere?
23 Nou kapav cite encore beaucoup l’exemple pou montré ki lecture ek l’etude la Bible kapav ameliore ou bann la priere. Par exemple, pareil couma Yona, ou kapav reconette ki “delivrance li pou Jéhovah.” (Yona 2:1-10) Si ou bien bouleversé a cause enn peché grave ek ou finn rod l’aide bann ancien, bann sentiment ki David ti exprimé dan bann psaume kapav aide ou pou dire Jéhovah dan ou bann la priere personnel ki ou finn repenti. (Ps. 51:1-12) Dan certain la priere, ou kapav loué Jéhovah pareil couma Jérémie ti faire. (Jér. 32:16-19) Si ou pé rod enn kikenn pou marié, etudié la priere ki trouve dan Ezra chapitre 9, ek faire bann supplication personnel, sa kapav fortifié ou pou ou bien decidé pou obeir commandement Bondié pou marié “selman dan le Seigneur.”—1 Cor. 7:39; Ezra 9:6, 10-15.
24 Contigne lire, etudié ek faire recherche dan la Bible. Rod bann point ki ou kapav mentionné dan ou bann la priere. Kitfois ou pou kapav ajoute sa bann pensée biblik-la kan ou pé suppliye Jéhovah, kan ou pé remercié Li ek kan ou pé loué Li. Ou kapav sur ki ou pou vinn encore pli proche ar Jéhovah a mesure ki ou ameliore ou bann la priere par l’etude la Bible.
Couma ou pou reponn?
• Kifer nou bizin rod direction Bondié ek suive sa direction-la?
• Ki bizin pousse nou pou prié pou gagne la sagesse?
• Couma livre Psaumes kapav ameliore nou la priere?
• Kifer nou bizin prié avek la foi ek enn grand respé?
[Zimage page 15]
Serviteur Abraham ti prié pou gagne direction Bondié. Eski ou aussi ou faire pareil?
[Zimage page 17]
L’etude la Bible en famille kapav ameliore ou la priere