Le “temps fixé” inn approché

PAREIL couma prophete Habaqouq, bann disciple Jésus ti bien envie trouve souffrance disparette. Kan zot ti aprann seki Royaume Bondié ti pou faire pou reglé bann probleme lor la terre, zot ti demann Jésus: “Kan eski sa bann kitsoz-la pou arrivé, ek ki signe pou montré to presence ek conclusion sa systeme-la?” (Matthieu 24:3) Pou reponn zot, Jésus ti dire ki zis Jéhovah ki ti konn ler exact kan sa royaume-la ti pou dirige la terre. (Matthieu 24:36; Marc 13:32) Mais selman, Jésus li-mem ek certain so bann disciple ti annonce certain l’evenement ki ti pou montré ki sa le temps-la inn approché.—Guette l’encadré ki trouve dan coté droite.

Eski ou pa pou d’accord ki sa bann kitsoz-la arrivé toulé-jour? Jésus ti aussi annoncé ki ti pou ena enn grand travail pou enseigne bann dimoune, ki ti pou accompli lor la terre entier. Li ti dire: “Sa bon nouvelle lor royaume-la pou preché partout kot dimoune resté lor la terre couma enn temoignage pou tou bann nation; ek lerla la fin pou vini.”—Matthieu 24:14.

C’est exactement seki pé arrivé zordi. Bann Témoins de Jéhovah pé faire sa travail-la. Dan environ 236 pays ek territoire, plus ki sept million Témoins pé dire bann dimoune ki Bondié pou elimine souffrance ek chagrin par moyen so Royaume, ek zot pé aide sa bann dimoune-la pou vive en accord avek bann principe juste Bondié. Contigne aprann lor Royaume Bondié, ek ou pou ena possibilité pou vive dan enn le monde kot pa pou ena okenn souffrance—pou touletan.

[Tableau lor page 8]

Bann verset la Bible ki decrire bann dernier jour

MATTHIEU 24:6, 7; RÉVÉLATION 6:4

• La guerre couma jamais finn ena

MATTHIEU 24:7; MARC 13:8

• Bann grand tremblement de terre

• Pena assez mangé

LUC 21:11; RÉVÉLATION 6:8

• Bann l’epidemie

MATTHIEU 24:12

• Bann pratik kont la loi pou augmenté

• Dimoune pena l’amour pou zot prochain