Le Messie! Moyen ki Bondié servi pou sauve l’humanité
“Alors pareil couma dan Adam tou dimoune mort, pareil aussi, dan Christ tou dimoune pou gagne la vie.”—1 COR. 15:22.
1, 2. (a) Couma André ek Philippe ti reagir kan zot ti joinde Jésus? (b) Kifer nou dire ki nou ena beaucoup plus preuve ki Jésus li le Messie, ki bann chretien dan premier siecle?
“NOU finn trouve le Messie,” c’est seki André ti dire so frere Pierre, avek l’assurance ki Jésus ki ti sorti Nazareth, ti sa Kikenn ki Bondié ti choisir-la. Philippe aussi ti ena sa mem l’assurance-la ek li ti al rod so camarade Nathanaël ek ti dire li: “Nou finn trouve sa kikenn ki Moïse, dan la Loi, ek bann Prophete finn ecrire, setadir Jésus, garson Joseph, ki sorti Nazareth.”—Jean 1:40, 41, 45.
2 Eski ou ena enn l’assurance total ki Jésus li-mem Messie ki Bondié inn promette, ‘Agent principal ki Jéhovah servi pou sauve’ l’humanité? (Héb. 2:10) Zordi, nou ena beaucoup plus preuve ki Jésus li le Messie, ki bann disciple Jésus dan premier siecle ti ena. Depuis naissance Jésus ziska so resurrection, Parole Bondié donne bann vrai preuve ki Jésus li-mem le Christ. (Lire Jean 20:30, 31.) La Bible montré aussi ki Jésus ti pou contigne rempli so role Messie depuis le ciel. (Jean 6:40; lire 1 Corinthiens 15:22.) Dapré seki ou finn aprann dan la Bible, zordi ou aussi ou kapav dire ki ou finn “trouve le Messie.” Mais avant, anou guetté couma sa bann premier disciple-la ti’nn arrivé tire enn bon conclusion ki zot ti’nn trouve le Messie.
Jéhovah faire konn “saint secret” concernant le Messie, tigit par tigit
3, 4. (a) Couma bann disciple dan premier siecle ti pou kapav “trouve le Messie”? (b) Kifer ou pou dire ki c’est zis Jésus ki ti kapav realise tou bann prophetie lor le Messie?
3 Couma bann disciple Jésus dan premier siecle ti kapav dire avek l’assurance ki li ti le Messie? Par l’intermediaire bann prophete, tigit par tigit Jéhovah ti donne bann signe ki ti pou permette pou reconette le Messie ki ti pou vini. Enn specialiste lor la Bible compare fason ki Bondié finn faire sa ar fason ki monte enn statue ki’nn faire ar plusieurs morceau marbre. Maziné ki beaucoup zom ki jamais pa finn gagne contact avek zot camarade avant, sakenn amenn enn morceau sa bann marbre-la dan enn la chambre. Si, kan zot mette sa bann morceau-la ensam, chaque morceau rente bien sakenn dan so place ek forme enn statue parfait, surement ou pou dire ki’nn bizin ena enn kikenn ki finn dessine sa statue-la ek inn envoye chaque zom enn morceau marbre. Pareil couma chaque morceau sa statue-la, chaque prophetie lor le Messie ti pou donne enn renseignement bien important concernant le Messie.
4 Ki chance ena ki par coincidence enn sel zom realise tou bann prophetie lor le Messie? Enn kikenn ki faire bann recherche dire ki ena tellement enn tigit chance ki sa possible, ki sa pa kapav arrivé. “Jésus—ek zis Jésus a travers tou l’histoire l’humanité—ki’nn kapav faire sa.”
5, 6. (a) Couma pou faire jugement kont Satan? (b) Couma tigit par tigit, Bondié ti faire koné kisannla ti pou ancetre sa “descendance[-la]”?
5 Bann prophetie concernant le Messie ti tourne autour enn “saint secret.” Sa saint secret-la implik plusieurs l’aspect ki ena enn grand l’importance ek ki ti pou concerne zot tou dan l’univers. (Col. 1:26, 27; Gen. 3:15) Sa secret-la ti implik jugement kont Satan le Diable, “serpent originel,” ki finn plonge tou dimoune dan peché ek la mort. (Rév. 12:9) Couma pou faire sa jugement-la? Jéhovah ti annoncé ki ti pou ena enn “descendance” ki enn “femme” ti pou produire, ki ti pou crase la tête Satan. Sa “descendance” ki Bondié ti annoncé-la, pou crase la tête sa serpent-la, setadir pou tire la source rebellion, maladie ek la mort. Selman, avek permission Bondié, d’abord Satan ti pou blesse dan enn fason symbolik, talon “descendance” sa femme-la.
6 Tigit par tigit, Jéhovah ti faire koné kisannla sa “descendance[-la]” ti pou été. Bondié ti faire sa serment-la avek Abraham: “Par moyen to descendance, tou bann nation lor la terre pou vrai-mem attire benediction lor zot.” (Gen. 22:18) Moïse ti annoncé ki sa Kikenn-la ti pou “enn prophete,” ki ti pou pli grand ki Moïse. (Deut. 18:18, 19) David ti gagne l’assurance, ek plitar bann prophete ti confirmé ki le Messie ti pou enn parmi so descendant ek ti pou herite so trone ek regne pou touletan.—2 Sam. 7:12, 16; Jér. 23:5, 6.
Bann qualification Jésus en tant ki Messie
7. Dan ki fason Jésus ti sorti direct dan l’organisation Bondié, ki couma enn “femme” pou Li?
7 Bondié ti envoye so Garson, so premier creation, pou li vinn sa “descendance” ki Li ti promette-la. Jésus ti forme partie dan l’organisation Jéhovah ki couma enn femme pou Li ek kot ena bann creature spirituel, dan le ciel. Pou li vinn lor la terre, sa sel Garson ki Bondié ti crée direct-la ti bizin “laisse tou,” quitte la vie ki li ti ena dan le ciel ek né couma enn dimoune parfait. (Phil. 2:5-7; Jean 1:14) Kan l’esprit saint Bondié ti ‘couvert Marie avek so l’ombrage,’ sa ti enn garanti ki sa zenfant ki ti pou né-la ti pou ‘appel li saint, Garson Bondié.’—Luc 1:35.
8. Couma Jésus ti realise enn prophetie concernant le Messie kan li ti presente li-mem pou prend bapteme?
8 Bann prophetie lor Messie ti montré kot-sa ek kan Jésus ti pou parette. Couma ti annoncé, Jésus ti né dan Bethléhem. (Mika 5:2) Dan premier siecle, bann Juif ti pé attann avek enn grand impatience sa Messie ki ti pou vini-la. Kan certain ti trouve Jean le Baptiste, zot ti demandé: “Eski c’est pa li-mem kitfois ki le Christ?” Mais Jean ti reponn: “Sa kikenn ki pli fort ki moi-la pé vini.” (Luc 3:15, 16) Kan li ti vinn vers Jean en l’an 29 nou lepok pou faire-li baptisé l’age 30 an, Jésus ti presente li-mem couma le Messie zis dan ler ki bizin. (Dan. 9:25) Lerla, li ti commence so ministere ki ti rempli ar bann l’evenement, ek li ti dire: “Le temps fixé inn arrivé, ek royaume Bondié inn kosté.”—Marc 1:14, 15.
9. Mem si zot pa ti ena tou bann detail, ki conviction bien ferme bann disciple Jésus ti ena?
9 Mais bann dimoune ti pou bizin corrige zot fason pensée en rapport avek seki zot ti pé esperé. Zot ti ena raison pou accueillir Jésus couma enn le Roi, mais c’est bien plitar ki zot ti pou bien comprend ki c’est dan l’avenir ki li pou commence regné ek ki so Royaume pou dan le ciel. (Jean 12:12-16; 16:12, 13; Actes 2:32-36) Selman, kan Jésus ti demandé: “Ki zot dire mo été?” Sans hesité Pierre ti reponn: “To-mem Christ, Garson Bondié vivant.” (Mat. 16:13-16) Pierre ti donne mem reponse kan beaucoup ti soké ek ti quitte Jésus parski zot pa ti comprend enn parmi so bann l’enseignement.—Lire Jean 6:68, 69.
Ecoute le Messie
10. Kifer Jéhovah ti mette l’accent lor l’importance pou ecoute so Garson?
10 Dan le ciel, Garson ki Bondié ti crée direct ti enn creature spirituel bien puissant. Lor la terre, Jésus ti “representant le Père.” (Jean 16:27, 28) Li ti dire: “Seki mo enseigné pa sorti ar moi, mais ar sa Kikenn ki finn envoye moi-la.” (Jean 7:16) Pou confirmé ki Jésus li-mem le Messie, pendant transfiguration, Jéhovah ti donne sa l’ordre-la: “Ecoute li.” (Luc 9:35) Oui, nou bizin ecoute, setadir obeir sa Kikenn ki Jéhovah inn choisir-la. Pou nou faire sa, nou bizin ena la foi ek faire bann bon action; sa deux kitsoz-la bien important pou faire Bondié plaisir ek pou gagne la vie eternel.—Jean 3:16, 35, 36.
11, 12. (a) Cite different raison ki ti pousse bann Juif dan premier siecle pou rejette Jésus couma le Messie. (b) Kisannla ti ena la foi en Jésus?
11 Mem si Jésus ti ena bann qualification extraordinaire ki ti prouvé ki li-mem le Messie, majorité bann Juif dan premier siecle pa ti accepté li couma le Messie. Kifer? Parski zot ti ena zot prop l’idée concernant Messie ki ti pou vini, par exemple zot ti pensé ki li ti pou enn dirigeant politik ki ti pou delivré zot ar domination bann Romain. (Lire Jean 12:34.) A cause sa, zot pa ti kapav accepté enn Messie ki ti realise bann prophetie ki ti dire ki bann dimoune ti pou meprise li, evite li, ki li ti pou bizin souffert ek gagne enn connaissance lor maladie, ek finalement ki so bann l’ennemi ti pou touye li. (Is. 53:3, 5) Mem certain parmi bann disciple fidele Jésus ti bien deçu ki li pa ti delivré zot ar domination bann Romain. Mais zot ti reste fidele, ek avek le temps, zot ti comprend exactement couma bann kitsoz bizin été.—Luc 24:21.
12 Enn lot raison kifer bann dimoune ti rejette Jésus couma Messie ki Bondié ti’nn promette, c’est a cause so l’enseignement ki beaucoup ti trouve difficile pou accepté. Pou rente dan Royaume Bondié, bann dimoune ti pou bizin ‘renié zot-mem,’ “mange” la chair ek di-sang Jésus, “né encore enn fois,” ek “pa faire partie dan le monde.” (Marc 8:34; Jean 3:3; 6:53; 17:14, 16) Bann dimoune ki ti ena l’orgueil, bann riche, ek bann hypocrite, ti considere sa couma bann kitsoz ki trop difficile pou suive. Pourtant, bann Juif ki ti ena l’humilité ti accepté Jésus couma le Messie, pareil couma certain Samaritain ki ti dire: “Sa zom-la li vrai-mem sauveur le monde.”—Jean 4:25, 26, 41, 42; 7:31.
13. Couma dan enn fason symbolik, Jésus ti blessé dan so talon?
13 Jésus ti annoncé ki bann chef pretre ti pou condamne li ek ki bann non-Juif ti pou couloute li lor enn poteau, mais ki troisieme jour, li ti pou ressuscité. (Mat. 20:17-19) Kan li ti dire devant Sanhédrin ki li “Christ, Garson Bondié,” bannla ti accuse li ki li ti pé blasphemé. (Mat. 26:63-66) Pilate pa ti trouve “nanyin ki [ti] merite la mort” ar Jésus, mais parski bann Juif ti accuse li aussi ki li ti pé rebelle kont gouvernement, Pilate “ti livré Jésus, pou zot faire seki zot envie ar li.” (Luc 23:13-15, 25) C’est coumsa ki zot ti “renié” Jésus, ek zot ti trouve enn moyen pou touye “Agent principal ki faire gagne la vie,” malgré tou bann preuve ki ti montré ki c’est Bondié ki ti’nn envoye li. (Actes 3:13-15) Alors, pareil couma ti annoncé, Messie ti “mort” coulouté lor enn poteau, jour Pâque, en l’an 33 nou lepok. (Dan. 9:26, 27; Actes 2:22, 23) Par sa la mort cruel-la, Jésus ti blessé dan so “talon,” pareil couma Genèse 3:15 ti annoncé.
Kifer le Messie ti bizin mort
14, 15. (a) Cite deux raison kifer Jéhovah ti permette ki Jésus mort. (b) Ki Jésus ti faire apré so resurrection?
14 Jéhovah ti permette ki Jésus mort pou deux raison bien important. Premier raison: fidelité Jésus ziska la mort ti reglé enn l’aspect important dan “saint secret.” Li ti prouvé ziska la mort ki enn dimoune parfait kapav garde so “l’attachement pou Bondié” ek soutenir souveraineté Bondié malgré bann l’epreuve pli dur ki Satan kapav faire li gagné. (1 Tim. 3:16) Deuxieme raison: couma Jésus ti dire, “Fils de l’homme inn vini . . . pou donne so la vie couma enn ranson en echange pou beaucoup.” (Mat. 20:28) Sa “ranson ki corresponn[-la]” ti paye punition pou peché ki bann descendant Adam ti herité ek sa ti permette pou donne la vie eternel tou bann ki accepté Jésus couma moyen ki Bondié servi pou sauve l’humanité.—1 Tim. 2:5, 6.
15 Apré trois jour dan tombe, Christ ti ressuscité, ek pendant 40 jour li ti apparette ar so bann disciple. Sa ti prouvé ki vrai-mem li ti vivant ek li ti donne zot lezot instruction. (Actes 1:3-5) Apré sa, li ti monte dan le ciel pou presente Jéhovah valeur so sacrifice, ek li ti attann moment fixé kan so presence en tant ki le Roi messianik ti pou commencé. Entre-temps, li finn ena beaucoup pou faire.
Li complete so role en tant ki Messie
16, 17. Decrire role Jésus en tant ki Messie apré ki li ti monte dan le ciel.
16 Depuis so resurrection ek pendant plusieurs siecle ki’nn suive, Jésus finn dirige avek fidelité bann activité congregation chretien lor ki li pé regné en tant ki le Roi. (Col. 1:13) Dan ler ki ti’nn fixé, li ti pou vinn le Roi dan Royaume Bondié. Bann prophetie la Bible ek bann l’evenement ki pé arrivé dan le monde confirmé ki en 1914, so presence couma le Roi, ek “conclusion sa systeme-la,” finn commencé. (Mat. 24:3; Rév. 11:15) Enn tipé apré sa, li ti dirige bann ange ki saint, pou tire Satan ek so bann demon dan le ciel.—Rév. 12:7-10.
17 L’activité predication ek l’enseignement ki Jésus ti commencé en l’an 29 nou lepok, pré pou fini. Bientot, li pou juge tou bann ki vivant. Lerla, li pou dire bann dimoune ki couma bann mouton ek ki finn accepté li couma moyen ki Jéhovah inn choisir pou sauve l’humanité, pou “herite royaume ki finn preparé pou zot depuis fondation le monde.” (Mat. 25:31-34, 41) Kan Jésus pou dirige bann l’armée ki dan le ciel pou tire tou mechanceté, li pou detruire tou bann ki’nn rejette li couma le Roi. Apré sa, Jésus pou attache Satan ek pou jette li ek so bann demon dan “l’abime.”—Rév. 19:11-14; 20:1-3.
18, 19. Ki Jésus pou accompli en tant ki Messie, ek grace a sa, ki benediction bann dimoune obeissant pou gagné?
18 Pendant so regne mille an, Jésus pou faire tou seki so bann titre impliké, bann titre couma “Conseiller extraordinaire, Bondié fort, Papa eternel, Prince la paix.” (Is. 9:6, 7) Kan so Royaume pou dirigé, tou bann dimoune lor la terre pou vinn parfait, parmi pou ena aussi bann dimoune ki pou ressuscité. (Jean 5:26-29) Le Messie pou guide bann dimoune ki bien disposé vers “bann la source de l’eau la vie,” ek pou permette bann dimoune obeissant pou ena la paix avek Jéhovah. (Lire Révélation 7:16, 17.) Apré l’epreuve final, Jésus pou “jette” tou bann rebelle, parmi pou ena Satan ek so bann demon, dan “lac difé,” c’est coumsa ki li pou crase la tête sa ‘serpent-la’ ek pou touye li.—Rév. 20:10.
19 C’est vrai-mem dan enn fason extraordinaire ek sans reproche ki Jésus rempli so role couma le Messie! La terre pou vinn enn paradis ek pou rempli ar bann dimoune ki’nn delivré ar peché ek la mort, ek ki pou vive pou touletan heureux ek en bonne santé. Nom sacré Jéhovah pou’nn purifié ar tou blame, ek so droit pou gouverne l’univers pou’nn justifié dan enn fason complet. C’est enn grand l’heritage ki pé attann tou bann ki obeir sa Kikenn ki Bondié inn choisir-la!
Eski ou finn trouve le Messie?
20, 21. Ki bann raison ou ena pou koz lor le Messie ar lezot?
20 Depuis 1914, nou pé vive dan lepok parousia, setadir presence Christ. Mem si so presence couma le Roi dan Royaume Bondié li invisible, realisation bann prophetie prouvé ki li present. (Rév. 6:2-8) Mais malgré sa, pareil couma bann Juif dan premier siecle, la plupart dimoune zordi pa prend compte bann preuve ki montré ki Messie li present. Zot aussi zot envie enn dirigeant politik ou-soit enn kikenn ki au moins pou travail a travers bann dirigeant politik. Mais ou, ou finn aprann ki asterla Jésus pé regné en tant ki le Roi dan Royaume Bondié. Eski ou pa ti bien content kan ou ti aprann sa? Pareil couma bann disciple dan premier siecle, sa ti pousse ou pou dire: “Nou finn trouve le Messie.”
21 Zordi, kan ou koz lor la verité, eski ou mette l’accent lor role Jésus en tant ki le Messie? Si ou faire sa ou pou augmente ou l’appreciation pou seki li’nn faire pou ou, seki li pé faire asterla, ek seki li pou faire encore dan l’avenir. Pareil couma André ek Philippe, surement ou finn koz ar ou bann famille ek ou bann camarade lor le Messie. Kifer ou pa koz avek zot avek encore plus zele, ek montré zot ki Jésus Christ li vrai-mem sa Messie ki Bondié ti promette-la, moyen ki Bondié servi pou sauve l’humanité?
Eski ou kapav expliké?
• Couma bann disciple dan premier siecle ti kapav trouve le Messie?
• Pou ki deux raison important Jésus inn mort?
• Ki Jésus pou faire encore pou rempli so role en tant ki le Messie?