Developpe l’amour ki pa pou disparette jamais
‘L’amour endure tou. L’amour pa pou disparette jamais.’—1 COR. 13:7, 8.
1. (a) Couma souvent finn koz lor l’amour? (b) Kisannla ek ki kitsoz beaucoup dimoune content?
L’AMOUR c’est enn sujet lor ki bann dimoune finn faire beaucoup publicité. Bann chanteur finn vante sa qualité-la ek finn koz lor la dan enn fason exageré. L’amour c’est enn kitsoz bien important ki tou dimoune bizin. Mais bann livre ek bann film souvent koz lor bann zistoire ki’nn inventé lor l’amour ek ki pa realiste ditou, ek nou trouve sa beaucoup dan bann commerce zordi. Pourtant, beaucoup dimoune pena vrai l’amour, setadir enn l’amour sincere pou Bondié ek pou zot prochain. Nou pé trouve seki la Bible ti annoncé pou ena dan bann dernier jour. Bann dimoune zot ‘content zot-mem, zot content l’argent, zot content plaisir plutot ki Bondié.’—2 Tim. 3:1-5.
2. Ki l’avertissement la Bible donne nou en rapport avek l’amour pou bann mauvais kitsoz?
2 Bann dimoune ena capacité pou montré l’amour, selman Parole Bondié mette nou en garde kont l’amour pou bann mauvais kitsoz. La Bible decrire seki arrivé kan sa qualité l’amour-la prend racine dan leker enn dimoune. (1 Tim. 6:9, 10) Eski ou rappel seki l’apotre Paul ti ecrire lor Démas? Mem si li ti compagnon Paul, Démas ti commence content seki le monde ti offert. (2 Tim. 4:10) L’apotre Jean ti averti bann chretien kont sa grand danger-la. (Lire 1 Jean 2:15, 16.) Enn kikenn ki content le monde ek bann kitsoz temporaire ki le monde offert, pa kapav content Bondié ek seki sorti kot Bondié.
3. Ar ki difficulté nou bizin faire face, ek sa amenn nou pou pose ki question?
3 Nou pa forme partie dan le monde, mem si nou encore pé vive ladan. Alors, difficulté ki nou ena c’est pou rejette sa mauvais fason ki le monde considere l’amour-la. Li bien important ki nou pa tombe dan piege pou ena l’amour pou bann mauvais kitsoz. Alors, pou kisannla nou bizin developpe ek montré enn l’amour ki basé lor bann principe? Couma nou kapav developpe enn l’amour ki endure tou ek ki pa pou disparette jamais? Si nou suive sa chemin-la, ki bienfait nou pou gagné asterla ek couma sa pou influence nou l’avenir? Nou bizin gagne bann reponse lor fason ki Bondié pensé, pou nou kapav laisse nou bien dirigé.
Faire ou l’amour pou Jéhovah grandi
4. Couma nou l’amour pou Bondié grandi?
4 Couma nou kapav faire nou l’amour pou Jéhovah grandi? Mazinn enn planteur ki travail dur pou prepare la terre ek pou plante bann la grain. Li pou attann ki bann la grain-la poussé ek bann plante-la grandi. (Héb. 6:7) Li pareil aussi pou nou l’amour pou Bondié, li bizin grandi. Ki nou bizin faire pou sa arrivé? Nou bizin travail nou leker, ki couma enn bon la terre kot finn plante la grain la verité concernant Royaume Bondié. Nou kapav faire sa kan nou etudié Parole Bondié avek serieux pou augmente nou connaissance lor Bondié. (Col. 1:10) Kan nou assisté ek nou participe dan bann reunion regulierement sa aussi pou aide nou pou augmente nou connaissance. Eski sakenn parmi nou pé faire bann grand zeffort pou gagne enn pli grand connaissance?—Prov. 2:1-7.
5. (a) Couma nou kapav aprann lor bann qualité principal ki Jéhovah ena? (b) Ki ou kapav dire lor justice, sagesse ek puissance Bondié?
5 Jéhovah faire nou konn so personnalité a travers so Parole. Kan nou etudié la Bible ek tigit par tigit nou gagne connaissance lor Jéhovah, nou kapav apprecié plus so bann qualité principal—so justice, so puissance, so sagesse ek surtout, so grand l’amour. Nou trouve justice Jéhovah dan tou seki Li faire ek dan so la loi ki parfait. (Deut. 32:4; Ps. 19:7) Nou kapav medite lor tou seki Jéhovah inn crée ek ena enn grand respé pou so sagesse ki bien-bien grand. (Ps. 104:24) L’univers aussi donne nou bann preuve ki Jéhovah Li-mem la Source l’energie ki actif ek enn puissance ki jamais pa fini.—Is. 40:26.
6. Couma Bondié inn manifesté so l’amour envers nou, ek ki l’effet sa inn ena lor ou?
6 Ki nou aprann lor qualité principal ki Bondié ena, setadir so l’amour? Li touche beaucoup dimoune ek li ena enn l’effet lor nou tou. Li ti manifesté sa l’amour-la kan Li ti donne la ranson pou delivré l’humanité ar peché ek la mort. (Lire Romains 5:8.) Bondié finn donne la ranson en faveur tou dimoune lor la terre, mais zis bann ki ena reconnaissance pou l’amour Bondié ek ki ena la foi dan so Garson, ki pou tire bann bienfait ar sa disposition-la. (Jean 3:16, 36) Bondié inn offert Jésus en sacrifice pou couvert nou peché, sa bizin pousse-nou pou content Li en retour.
7, 8. (a) Ki nou bizin faire pou montré nou l’amour pou Bondié? (b) Malgré ki situation bann serviteur Bondié suive so bann commandement?
7 Couma nou kapav montré nou l’amour pou Bondié pou tou seki Li’nn faire pou nou? La Bible donne nou enn reponse bien precis: “Ala seki vedir l’amour Bondié: suive so bann commandement; ek pourtant so bann commandement pa lourd.” (1 Jean 5:3) Oui, l’amour pou Jéhovah pousse nou pou suive so bann commandement. C’est a cause sa ki nou rann temoignage lor so nom ek lor so Royaume, ek sa kapav aide lezot. Kan nou faire sa avek enn leker rempli ar reconnaissance, nou montré ki nou suive bann commandement Bondié avek bann bon mobile.—Mat. 12:34.
8 Nou bann frere a travers le monde pé perseveré pou zot kapav suive bann commandement Bondié malgré ki bann dimoune indifferent ek rejette dan enn fason categorik message lor Royaume Bondié. Zot faire tou zeffort ki bizin pou accompli zot ministere a fond. (2 Tim. 4:5) Li pareil aussi pou nou, nou senti-nou poussé pou partage connaissance Bondié avek lezot ek pou suive tou so bann lezot commandement.
Kifer nou content nou Seigneur Jésus Christ?
9. Ki Christ finn enduré, ek ki finn pousse li pou faire sa?
9 En plus ki nou content Bondié, nou ena beaucoup raison pou developpe l’amour pou so Garson. Mem si jamais nou pa finn trouve Jésus, nou l’amour pou li vinn pli grand a mesure ki nou aprann konn li. (1 Pierre 1:8) Ki certain kitsoz Jésus finn enduré? Pendant ki li ti pé faire volonté so Papa, bann dimoune ti ena la haine pou li sans okenn raison, ti persecute li, ti mette bann fausse l’accusation lor li ek ti insulté li. Li ti aussi souffert kan so bann l’ennemi ti humilié li dan lezot fason. (Lire Jean 15:25.) L’amour ki Jésus ti ena pou so Papa dan le ciel ti donne li la force pou endure sa bann l’epreuve-la. Ek c’est l’amour aussi ki’nn pousse li pou donne so la vie en ranson pou beaucoup dimoune.—Mat. 20:28.
10, 11. Ki l’objectif nou ena par reconnaissance pou tou seki Christ inn faire pou nou?
10 L’attitude Jésus pousse nou pou reagir. A mesure ki nou pense tou seki Christ inn faire pou nou, nou l’amour pou li, vinn pli fort. En tant ki so bann disciple, nou bizin ena l’objectif pou developpe ek pou manifesté mem l’amour ki li. Sa l’amour-la pou donne nou la force pou suive commandement ki li’nn donne nou pou rann temoignage lor Royaume Bondié ek pou faire bann disciple.—Mat. 28:19, 20.
11 Pou montré ki nou touché par l’amour ki Christ inn ena pou bann dimoune, nou senti-nou obligé pou fini nou mission avant ki la fin vini. (Lire 2 Corinthiens 5:14, 15.) L’amour ki Christ inn manifesté ti bien important pou li kapav accompli projet ki Bondié ena pou l’humanité. Si nou suive bien l’exemple Jésus, nou aussi nou pou kapav faire nou part pou soutenir realisation projet Bondié. Pou nou reussi faire sa, nou bizin developpe l’amour pou Bondié autant ki nou kapav. (Mat. 22:37) Kan nou suive seki Jésus inn enseigné ek kan nou garde so bann commandement, nou montré ki nou content li ek ki nou bien decidé pou soutenir droit ki Bondié ena pou dirigé, n’importe ki sa coute nou, pareil couma Jésus ti faire.—Jean 14:23, 24; 15:10.
Suive sa chemin ki beaucoup pli superieur-la —l’amour
12. Ki Paul ti pé rod dire kan li ti servi l’expression “enn chemin ki beaucoup pli superieur”?
12 L’apotre Paul ti imite Christ. Parski li ti suive trace Christ bien, Paul ti kapav permette-li pou dire so bann frere imite li. (1 Cor. 11:1) Mem si li ti encourage bann chretien dan Corinthe pou contigne rod avek zele certain don l’esprit saint ki ti existé dan premier siecle, par exemple bann don pou faire bann guerison ek pou koz en langue, Paul ti montré zot ki zot ti bizin rod enn pli bon kitsoz. Dan 1 Corinthiens 12:31, li ti expliké: “Pourtant mo montré zot enn chemin ki beaucoup pli superieur.” Bann verset ki suive montré ki sa chemin ki beaucoup pli superieur-la c’est l’amour. Dan ki sens li ti beaucoup pli superieur? Paul ti donne bann l’exemple pou explik seki li ti pé rod dire. (Lire 1 Corinthiens 13:1-3.) Si li ti ena certain capacité extraordinaire ek li ti faire bann grand kitsoz mais ki li pa ti ena l’amour, eski sa ti pou vaut kitsoz? L’esprit saint Bondié ti pousse li pou donne enn reponse bien clair lor la kan li ti dire ki sa pa ti pou servi li nanyin. Sa reponse-la touche nou beaucoup!
13. (a) Ki texte pou l’année 2010? (b) Dan ki sens l’amour pa pou disparette jamais?
13 Apré, Paul donne definition l’amour, seki li été ek seki li pa été. (Lire 1 Corinthiens 13:4-8.) Asterla, prend le temps pou examiné ki quantité ou pé faire seki bizin pou montré ki ou ena l’amour. Prend compte surtout dernier partie verset 7, ek premier phrase verset 8: ‘L’amour endure tou. L’amour pa pou disparette jamais,’ nou texte pou l’année 2010. Remarké ki dan verset 8, Paul ti dire ki bann don l’esprit saint, parmi ti ena don pou prophetisé ek pou koz en langue—ki ti utile kan congregation chretien ki ti fek crée—ti pou disparette. Ti pou nepli ena sa bann don-la. Mais l’amour pou toujours existé. Jéhovah Li-mem Li l’amour, ek Li eternel. Alors, l’amour jamais pou disparette, ou-soit pou fini. Li pou contigne existé pou touletan couma enn qualité nou Bondié eternel.—1 Jean 4:8.
L’amour endure tou
14, 15. (a) Couma l’amour kapav aide nou pou endure bann l’epreuve? (b) Kifer enn jeune frere ti refusé pou desobeir la loi Bondié?
14 Ki permette bann chretien pou endure n’importe ki l’epreuve, situation difficile, ek probleme ki zot gagné? C’est surtout grace a l’amour ki basé lor bann principe. Si nou ena sa qualité l’amour-la, nou pa pou zis disposé pou abandonne nou bann di-bien, mais nou pou bien decidé pou reste fidele ek mem pou mort pou Christ. (Luc 9:24, 25) Medite lor fidelité bann Témoins ki ti souffert dan bann camp concentration, dan bann camp travail, ek dan bann prison pendant ek apré Deuxieme Guerre mondial.
15 L’exemple enn jeune Témoin allemand, ki ti appel Wilhelm, montré sa bien. Au lieu ki li ti desobeir la loi Bondié, li ti reste fidele kan li ti en face ar bann soldat nazi ki ti pou touye li. Dan enn lettre ki li ti envoye so famille pou dire zot adieu, li ti ecrire: “Avant tou, nou bizin content Bondié, pareil couma nou Conducteur Jésus Christ ti donne nou l’ordre. Si nou prend position pou Li, Li pou recompense nou.” Plitar, dan enn lartik La Tour de Garde, enn membre so famille ti ecrire: “Pendant tou bann l’epreuve ki nou finn gagné avek le temps, en tant ki famille nou finn toujours veillé pou mette nou l’amour pou Jéhovah en premier.” Beaucoup frere ki dan prison zordi en Arménie, en Corée du Sud, en Érythrée, ek dan lezot pays, ena sa mem l’attitude-la. Sa bann frere-la pé reste ferme dan zot l’amour pou Jéhovah.
16. Ki nou bann frere finn bizin enduré dan Malawi?
16 Dan beaucoup l’endroit, tou sorte qualité l’epreuve testé la foi ek l’endurance nou bann frere. Pendant 26 an, bann Témoins de Jéhovah dan Malawi finn souffert parski gouvernement ti interdit zot l’activité, zot ti gagne enn grand l’opposition ek zot ti bizin supporte bann kitsoz horrible ek cruel. Mais Bondié ti recompense zot l’endurance. Kan persecution ti commencé, ti ena apepré 18,000 Témoins dan sa pays-la. Trente an apré, ti ena plus ki deux fois sa quantité Témoins-la, setadir 38,393. Finn ena mem resultat dan lezot pays.
17. Ki certain finn enduré avek zot famille ki pa dan la verité, ek kifer zot inn kapav endure sa bann mauvais traitement-la?
17 Li bien difficile pou enduré kan gouvernement attak peuple Bondié dan enn pays. Mais sa kapav encore pli difficile pou enduré kan enn chretien gagne persecution ar so prop famille. Enn chretien kapav stressé kitfois parski bann membre so famille ki reste dan so prop lakaz ou-soit bann lezot famille opposé ar li. Eski Jésus pa ti annoncé ki sa ti pou arrivé? Oui, ek beaucoup chretien finn faire sa l’experience-la. (Mat. 10:35, 36) Bann adolescent finn gagne l’opposition ar zot parent ki pa Témoins. Finn ena mem ki zot famille finn mette zot dehors, mais bann Témoins inn manifesté la bonté envers zot ek inn accueillir zot. Ena ki finn renié par zot famille. Ki finn aide sa bann chretien-la pou endure bann mauvais traitement? Pa zis zot l’amour pou zot bann frere, mais avant tou, zot l’amour sincere pou Jéhovah ek so Garson.—1 Pierre 1:22; 1 Jean 4:21.
18. Couma l’amour ki endure tou aide bann chretien ki marié?
18 Ena beaucoup lezot situation dan la vie ki demann nou pou ena sa l’amour ki endure tou-la. Dan mariage, l’amour aide bann couple pou respecté seki Jésus ti dire: “Seki Bondié finn mette enba enn sel joug, fodé ki personne pa separe sa.” (Mat. 19:6) Kan bann chretien ki marié gagne bann “tribulation dan zot la vie,” zot bizin rappel ki Jéhovah ena enn role bien important dan zot mariage. (1 Cor. 7:28) So Parole dire ki ‘l’amour endure tou,’ ek enn mari ek enn femme ki finn mette sa qualité-la couma enn linge lor zot, zot pli fort pou reste attaché ar zot camarade ek pou garde zot mariage intact.—Col. 3:14.
19. Couma bann frere finn reagir apré bann catastrophe naturel?
19 L’amour aide nou pou endure tou kan ena bann catastrophe naturel. Nou ti trouve sa kan ti ena enn tremblement de terre dan sud Pérou, ek kan cyclone Katrina ti devasté plusieurs region dan golfe Mexique, en Amérique. Beaucoup parmi nou bann frere ti perdi zot lakaz ou-soit zot bann di-bien dan sa bann catastrophe-la. L’amour ti pousse bann frere dan le monde entier pou envoye bann secours, ek bann volontaire ti aidé pou reconstruire bann lakaz ek pou repare bann la Salle du Royaume. Sa qualité action-la montré ki nou bann frere ena l’amour ek zot interesse-zot sakenn ar zot camarade touletan ek dan n’importe ki situation.—Jean 13:34, 35; 1 Pierre 2:17.
L’amour pa pou disparette jamais
20, 21. (a) Kifer l’amour ena enn valeur ki depasse tou? (b) Kifer ou bien decidé pou suive sa chemin ki beaucoup pli superieur-la, setadir l’amour?
20 Kan nou observe bann serviteur Jéhovah zordi, nou trouvé ki li sage pou contigne suive sa chemin ki beaucoup pli superieur-la. Vrai-mem, l’amour permette nou pou faire face ar tou sorte qualité situation. Remarké couma l’apotre Paul ti mette l’accent lor sa verité-la. Premierement, li ti dire ki bann don l’esprit saint ti pou disparette ek ki congregation chretien ti pou progressé ziska maturité. Apré, li ti tire sa conclusion-la: “Mais asterla, reste sa trois-la: la foi, l’esperance, l’amour; mais seki pli grand parmi sa trois-la, c’est l’amour.”—1 Cor. 13:13.
21 Avek le temps, bann kitsoz dan ki nou ena la foi pou vinn bann realité, lerla pou nepli necessaire ki nou ena la foi dan sa bann kitsoz-la. Kan bann promesse ki nou pé attann pou realisé ek ki tou kitsoz pou vinn nouveau, nou pou nepli bizin ena l’esperance dan sa bann promesse-la. Mais ki nou kapav dire lor l’amour? L’amour jamais pou disparette ou-soit pou fini. Li pou resté. Nou pou ena la vie eternel devant nou, pena doute ki nou pou trouve beaucoup lezot l’aspect lor l’amour Bondié ek nou pou comprend sa pli bien. Si ou faire volonté Bondié ek ou montré sa kan ou rod sa chemin ki beaucoup pli superieur-la, setadir enn l’amour ki jamais pa pou disparette, ou pou vive pou touletan.—1 Jean 2:17.
Couma ou pou reponn?
• Kifer nou bizin faire attention pou pena l’amour pou bann mauvais kitsoz?
• Ki qualité l’amour kapav aide nou pou enduré?
• Dan ki sens l’amour pa pou disparette jamais?
[L’encadré page 27]
Texte pou l’année 2010 c’est: ‘L’amour endure tou. L’amour pa pou disparette jamais.’—1 Cor. 13:7, 8.
[Zimage page 26]
Enn l’amour bien fort finn aide nou bann frere ek soeur dan Malawi pou endure bann l’epreuve