Kifer ou kapav faire confiance bann l’Evangile
“Zot pé gagne enn grand succès. Zot finn pousse [bann dimoune] pou ecrire bann film ki coute par million . . . ek bann livre ki finn plus vendé . . . bann secte chretien finn adopté zot bann l’enseignement. Zot finn donne naissance bann religion ek zot souleve bann theorie basé lor bann complot.”—SUPER INTERESSANTE, ENN JOURNAL BRÉSILIEN.
KIFER ti ena tou sa l’excitation-la? Sa journal-la ti pé faire sa bann commentaire-la pou montré nouveau l’interet bien populaire ki bann dimoune ti’nn commence ena ek bann l’activité ki ti pé centré lor plusieurs soi-disant l’evangile, lettre ek apocalypse ki ti’nn decouvert au millieu 20eme siecle dan Nag Hammadi ek lezot l’endroit dan l’Égypte. En general, finn decrire sa bann document-la ek lezot document dan sa genre-la, couma bann l’ecriture gnostique ou-soit apocryphe.a
Eski finn ena enn complot?
Dan enn lepok kot bann dimoune en general pa croire dan la Bible ek bann religion orthodoxe, bann livre gnostique ek apocryphe finn interesse beaucoup dimoune. Sa bann livre-la finn ena enn grand l’influence lor fason ki beaucoup considere bann l’enseignement Jésus ek religion chretien li-mem. Guetté seki enn journal ti dire: “L’Evangile Thomas ek lezot [livre] apocryphe touche leker enn groupe dimoune ki pé contigne augmenté dan sa lepok moderne-la: bann ki pé rod spiritualité mais ki pena confiance dan la religion.” Bann calcule inn montré ki zis dan Brésil, par exemple, “ena au moins 30 groupe ki zot croyance basé lor bann livre apocryphe.”
Kan finn decouvert sa bann document-la, enn theorie finn vinn bien populaire. Sa theorie-la c’est ki dan quatrieme siecle nou lepok, l’Eglise catholique ti faire enn complot pou cachiette la verité lor Jésus; ki certain recit concernant so la vie ki ena dan bann livre apocryphe ti’nn reste cachiette, ek ki finn faire bann changement dan bann quatre l’Evangile ki ena dan nou la Bible azordi. Elaine Pagels, enn professeur lor l’histoire bann religion, faire enn resumé lor sa theorie-la: “Asterla nou commence trouvé ki seki nou appel vrai religion chretien—ek seki nou considere couma bann tradition chretien—en realité li represente zis enn ti partie l’information ki sorti dan bann source bien precis ki finn choisiré parmi bann douzaine lezot source.”
Dapré bann bibliste couma Pagels, la Bible li pa sel livre lor ki bann chretien bizin base zot la foi, mais ena aussi bann lezot livre, couma bann livre apocryphe. Par exemple, enn programme lor BBC ki ti appel Les mystères de la Bible, dire ki bann livre apocryphe presente “vrai Marie Madeleine” couma “enn enseignant ek enn guide spirituel pou bann lezot disciple. Li pa zis enn disciple; li enn zapotre pou bann zapotre.” Dan enn journal brésilien, O Estado de S. Paulo, Juan Arias, ti faire sa commentaire-la lor soi-disant role ki Marie Madeleine ti ena: “Azordi tou kitsoz amenn nou pensé ki groupe bann premier chretien, ki Jésus ti formé, ti bien ‘soutenir droit bann femme,’ parski bann premier l’eglise ti lakaz bann femme, kot zot ti servi couma bann pretre ek bann l’eveque.”
Pou beaucoup dimoune, bann l’information ki ena dan bann l’ecriture apocryphe parette ena plus poids ki bann l’information ki ena dan la Bible. Mais selman, sa preference-la souleve certain question ki bien important: Eski bann livre apocryphe li enn source acceptable lor ki bann chretien kapav base zot la foi? Kan zot al kont bann l’enseignement bien clair ki ena dan la Bible, ki bann l’information nou bizin croire—seki ena dan la Bible ou-soit seki ena dan bann livre apocryphe? Eski vrai-mem finn ena enn complot dan quatrieme siecle pou faire sa bann livre-la disparette ek eski finn retire bann l’information important concernant Jésus, Marie Madeleine, ek lezot encore dan bann quatre l’Evangile ki ena dan la Bible? Pou gagne reponse sa bann question-la, anou guette enn parmi bann quatre l’Evangile ki ena dan la Bible, l’Evangile dapré Jean.
Bann preuve ki trouve dan l’Evangile Jean
Au commencement 20eme siecle, dan l’Égypte ti decouvert enn partie manuscrit l’Evangile Jean ki ena enn grand valeur; azordi appel sa manuscrit-la Papyrus Rylands 457 (P52). Dan sa manuscrit-la ena seki nou lire dan Jean 18:31-33, 37, 38 dan bann la Bible moderne ek inn garde sa manuscrit-la dan librairie John Rylands, dan Manchester, en Angleterre. Sa-mem pli vié morceau manuscrit bann l’Écritures grecques chrétiennes ki existé. Beaucoup bibliste pensée ki sa manuscrit-la ti ecrire vers 125 nou lepok, zis enn quart siecle ou-soit enn tipé plus apré la mort Jean. Seki extraordinaire, c’est ki bann texte ki trouve dan sa morceau manuscrit-la, li preské exactement pareil avek bann texte ki ena dan bann lezot manuscrit ki’nn gagné apré. Reflechi lor la: Enn copie ki sa quantité vié-la ti’nn fini rente dan l’Égypte vers 125 nou lepok, alors, sa confirmé ki la bonne nouvelle dapré Jean vrai-mem ti’nn ecrire dan premier siecle nou lepok par Jean li-mem pareil couma la Bible dire. Alors livre Jean finn ecrire par enn kikenn ki finn temoin bann l’evenement ki finn ecrire dan sa l’Evangile-la.
Parkont, tou bann livre apocryphe finn apparette a partir deuxieme siecle, enn centaine l’année ou-soit plus apré bann l’evenement ki zot decrire finn arrivé. Certain expert essaye montré ki sa bann l’ecriture apocryphe-la zot basé lor bann l’ecriture ek bann tradition ki finn arrivé avant deuxieme siecle, mais pena okenn preuve ki montré sa. Alors, li bon ki ou pose ou sa question-la: Dan ki ou pou ena plus confiance—dan temoignage bann dimoune ki finn temoin enn l’evenement ou-soit dan temoignage bann dimoune ki’nn vive enn centaine l’année apré ki l’evenement-la finn arrivé? Reponse-la li clair.b
Ki nou kapav dire concernant bann declaration ki dire ki soi-disant finn ena bann changement dan bann l’Evangile ek ki’nn retire certain recit concernant la vie Jésus? Par exemple, eski ena bann preuve ki montré ki finn faire bann changement dan l’Evangile Jean dan quatrieme siecle pou deforme bann l’information? Pou reponn sa question-la, nou bizin rappel ki bann la bible moderne zot principalement basé lor Vaticanus 1209, enn manuscrit quatrieme siecle. Si dan nou la Bible ena bann changement ki finn faire dan quatrieme siecle, alors bizin ena sa bann changement-la dan sa manuscrit-la. Heureusement, ena enn lot manuscrit kot ena preské tou l’Evangile Luc ek Jean, ki appel Bodmer 14, 15 (P75), ki date a partir 175 nou lepok ziska 225 nou lepok. Dapré bann expert so bann texte bien pré avek Vaticanus 1209. Sa vedir, ki pa finn faire bann grand changement dan bann l’Evangile ki ena dan la Bible, ek nou ena Vaticanus 1209 pou prouve sa.
Pena okenn preuve, lor papier ou-soit par lezot fason ki montré ki bann texte l’Evangile Jean, ou-soit dan lezot l’Evangile, finn changé pendant quatrieme siecle. Apré ki Dr. Peter M. Head ki dan l’université Cambridge, ti examine plusieurs morceau manuscrit ki ti decouvert dan Oxyrhynchos, en Égypte, li ti ecrire: “En general sa bann manuscrit-la, confirme texte bann grand oncial [bann manuscrit ki finn ecrire en majuscule ki date a partir quatrieme siecle ek apré] lor ki bann la bible moderne zot basé. Pena nanyin ladan ki demann enn nouveau explication concernant fason ki ti transmette texte NT [Nouveau Testament] au commencement.”
Ki conclusion nou kapav faire?
Bann quatre Evangile inspiré—Matthieu, Marc, Luc, ek Jean—ti accepté dan le monde entier par bann chretien au millieu deuxieme siecle ek apré. Entre 160 ek 175 nou lepok, Tatien ti ecrire so Diatessaron (enn expression grec ki vedir “par moyen [bann] quatre”), ki ti basé zis lor bann quatre l’Evangile inspiré mais pa lor bann “l’evangile” gnostique. (Guette l’encadré “Enn parmi bann premier ki ti defann bann l’Evangile.”) Li interessant aussi pou note enn commentaire ki Irénée ti faire vers la fin deuxieme siecle. Li ti dire ki bizin ena quatre l’Evangile pareil couma ena quatre point cardinal ek quatre di-vent principal. Mem si so comparaison kapav pa convaink bann dimoune, li soutenir l’idée ki sa lepok-la ti ena zis quatre l’Evangile inspiré.
Ki tou sa bann l’information-la montré? Ki bann l’Écriture grecques chrétiennes—parmi ena bann quatre l’Evangile—couma nou ena zordi pa finn konn bann grand changement depuis deuxieme siecle ziska zordi. Pena okenn raison solide pou croire ki ti ena enn complot dan quatrieme siecle pou change ou-soit pou faire disparette enn certain partie dan bann l’Ecriture ki finn inspiré par Bondié. Au contraire, Bruce Metzger enn bibliste ti ecrire: “Vers la fin deuxieme siecle, . . . preské tou bann groupe chretien ti accepté bann livre dan Nouveau Testament, pa zis bann ki reste dan Méditerranée mais bann ki reste dan bann region pli loin encore, prend depuis l’Angleterre ziska Mésopotamie.”
L’apotre Paul ek l’apotre Pierre ti soutenir la verité ki ena dan Parole Bondié. Toulé-deux ti donne zot bann compagnon chretien bann l’avertissement bien ferme pou pa accepté ou-soit pou croire bann lezot kitsoz a part seki zot finn aprann. Par exemple, Paul ti ecrire Timothée sa bann parole-la: “Ah Timothée, garde bien seki finn confié toi, ek detourne-toi ar bann discours ki pena okenn sens ek ki sali seki saint, ek ar bann contradiction ki forme partie dan seki zot appel soi-disant ‘connaissance.’ Certain finn detourne zot ar la foi, parski zot inn faire l’etalage ar sa qualité connaissance-la.” Pierre li, li ti dire sa: “Non, c’est pa kan nou’nn suive bann fausse zistoire ki’nn bien arrangé ki nou ti faire zot konn puissance ek presence nou Seigneur Jésus Christ, mais c’est kan nou finn vinn bann temoin so beauté extraordinaire.”—1 Timothée 6:20, 21; 2 Pierre 1:16.
Plusieurs siecle avant, Bondié ti inspire prophete Isaïe pou dire: “L’herbe vert finn sec, fleur finn fletri; mais parole nou Bondié li, li pou contigne pou touletan.” (Isaïe 40:8) Nou kapav ena mem confiance ki sa Kikenn ki finn inspire bann l’Ecriture Sacré-la, finn aussi preserve zot a travers le temps pou ki “tou sorte qualité dimoune sauvé ek gagne enn connaissance exact lor la verité.”—1 Timothée 2:4.
[Notes]
a “Gnostique” sorti dan enn mot grec ki kapav faire reference ar “connaissance ki reste secret” ek “apocryphe” sorti dan enn mot grec ki kapav faire reference ar seki “finn bien cachiette.” Servi sa bann l’expression-la pou faire reference ar bann l’ecriture ki pa vrai ou-soit ki pa inspiré ek ki essaye imite bann l’Evangile, livre Actes, bann lettre ek bann revelation ki trouve dan bann livre inspiré l’Écriture grecques chrétiennes.
b Enn lot probleme avek bann l’ecriture apocryphe, c’est ki reste zis enn tigit copie mem. Par exemple, reste zis trois morceau manuscrit L’Évangile de Marie Madeleine, ki’nn faire reference avant, deux tipti morceau ek enn pli longue, preské la moitié texte original manké. En plus, ena bann grand difference dan sa bann manuscrit-la.
[L’encadré page 9]
Papyrus Rylands 457 (P52), enn morceau manuscrit l’ Evangile Jean ki date deuxieme siecle nou lepok, ti’nn ecrire zis deux-trois dizaine l’année apré ki ti ecrire l’original
[L’encadré page 11]
Enn parmi bann premier ki ti defann bann l’Evangile
Au commencement dan l’histoire la chretienté, certain ti pretann ki ti ena bann contradiction entre bann l’Evangile ek a cause sa pa ti kapav faire confiance bann recit ki ena ladan. Tatien enn ecrivain syrien (vers 110-180 nou lepok) ti defann bann l’Evangile. Li ti ena sentiment ki tou ti trace contradiction ti pou disparette si ti bien classe bann recit ki ena dan sa bann l’Evangile-la dan enn l’ordre chronologie ek si ti faire sa bann l’Evangile-la vinn enn sel recit au lieu quatre.
Tatien ti commence mette sa bann l’Evangile-la ensam. Nou pa koné si sa document-la so original ti en grec ou soit en syriaque. Mais seki nou koné, c’est ki vers 170 nou lepok, Tatien ti termine so travail, ki ti appel Diatessaron, enn mot grec ki vedir “par moyen [bann] quatre.” Kifer ou bizin interessé ar sa recit-la, mem si li pa finn inspiré par Bondié?
Dan 19eme siecle, bann historien ti dire ki okenn bann l’Evangile pa finn ecrire avant millieu deuxieme siecle nou lepok. Sa ti mette en doute valeur historik ki sa bann l’Evangile-la ti kapav ena. Mais bann ancien manuscrit Diatessaron ki finn decouvert depuis sa, donne enn preuve ki pa kapav contesté ki bann quatre l’Evangile—ek zis sa bann quatre l’Evangile-la—ti forme partie dan enn livre ki ti deja bien koné ek accepté vers millieu deuxieme siecle nou lepok.
Kan ti decouvert Diatessaron ek bann commentaire ki ti faire lor la en arabe, arménien, grec, ek latin, sa ti pousse bibliste Sir Frederic Kenyon pou ecrire: “Sa bann decouverte-la finalement tire tou ti doute ki kapav ena concernant Diatessaron, ek prouvé ki vers 170 nou lepok, bann quatre l’Evangile inspiré ti ena enn place bien-bien important ek enn grand reputation comparé ar lezot livre ki raconte la vie nou sauveur.”
[Zimage page 10]
Vaticanus 1209
Manuscrit Vaticanus 1209 ki date quatrieme siecle, montré ki ti ena bien tigit changement dan texte bann l’Evangile
[Remerciement photo]
Zimage livre Bibliorum Sacrorum Graecus Codex Vaticanus, 1868
[Tableau page 8, 9]
(Guette publication)
“v.” signifie “vers.”
33 nou lepok
Jésus inn mort
v. 41
ti ecrire Matthieu
v. 58
ti ecrire Luc
v. 65
ti ecrire Marc
v. 98
ti ecrire Jean
125
Rylands 457 (P52)
v. 140
commence ecrire bann livre apocryphe
v. 175
Bodmer 14, 15 (P75)
Quatrieme siecle
Vaticanus 1209