Eski ou bizin honnete touletan?

TOU dimoune honnete de temps en temps; beaucoup dimoune honnete la plupart du temps. Mais comié dimoune ou koné ki faire zeffort pou reste honnete touletan?

Zordi, dan beaucoup domaine dan la vie, bann dimoune pa honnete. Pourtant, la plupart dimoune koné seki Bondié pensé lor la. Par exemple, la plupart dimoune konn bien bann parole huitieme commandement ki dire: “Fodé pa to kokin.” (Exode 20:15) Pourtant, beaucoup pensé ki dan certaine situation, li pa grave ki enn dimoune kokin ou-soit malhonnete. Anou examine trois qualité fason ki bann dimoune kokin, ek ki beaucoup pa trouve grave.

Eski enn dimoune kapav kokin parski li pauvre?

Enn dirigeant romain ti dire enn jour: “Si ena crime, c’est surtout a cause la pauvreté.” Kitfois enn dimoune misere kapav pensé ki li gagne droit kokin, ek bann ki trouve li kokin, zot d’accord avek li. Ki Jésus ti pensé lor sa question-la? Li ti ena beaucoup compassion pou bann dimoune misere. “Li ti ena pitié pou zot.” (Matthieu 9:36) Pourtant, jamais—dan okenn situation—li pa ti montré ki enn dimoune gagne droit kokin. Alors, ki enn dimoune misere bizin faire?

Bondié ena compassion pou bann dimoune ki essaye obeir li avek sincerité, ek Li beni zeffort ki zot faire pou gagne seki zot bizin. (Psaume 37:25) La Bible faire sa promesse-la: “Jéhovah pa pou laisse nâme enn dimoune juste mort de faim, mais Li pou rejette desir bann mauvais dimoune ki envie gagne beaucoup kitsoz.” (Proverbes 10:3) Eski enn dimoune misere kapav compte lor sa promesse-la? Victorine ti sur ki li kapav ena confiance dan sa promesse-la.

Victorine li enn veuve ki ena cinq zenfant ki al lekol. So la vie pa facile. Li vive dan enn pays en developpement kot bann dimoune pa gagne beaucoup l’aide ar gouvernement. Bann dimoune passe la plupart zot le temps dehors ek l’occasion pou kokin pa manké. Mais Victorine li, li pa tenté pou kokin. Au contraire, li vann bann kitsoz dan la rue dan enn fason honnete, ek coumsa li essaye gagne so la vie. Kifer li reste honnete?

“Premierement, mo croire ki Bondié Li honnete, ek ki si mo imite Li, Li pou honnete avek moi. Deuxiemement, mo bann zenfant pou kapav aprann vinn honnete zis si zot trouvé ki mo honnete.”

Couma Victorine reussi gagne so la vie? “Nou ena mangé, linge ek enn lakaz. Mais kan mem, finn ena bann moment kot mo finn bizin demann l’aide mo bann camarade—par exemple, pou paye bann depense medical. Mo finn toujours gagne seki mo ti bizin. Kifer? Parski mo bann camarade koné ki mo raconte zot mo situation dan enn fason honnete ek ki mo pa essaye gagne plus ki seki mo bizin.

“Mo finn elevé mo bann zenfant pou ki zot honnete. Pa trop longtemps, enn voisine ti trouve l’argent lor nou la table ek li ti demann moi si mo pa peur ki mo bann zenfant prend sa. Kan mo ti dire li ki mo bann zenfant jamais pa pou faire enn kitsoz coumsa, li ti trouve sa difficile pou croire. Sans ki mo koné, li ti decide pou testé zot. Li ti mette deux piece 100 franc kot moi dan enn place kot bann zenfant ti pou trouve sa facilement. Kan li ti révini lendemain, li ti etonné pou trouve bann piece-la toujours dan zot place. Ena bann zenfant honnete faire moi gagne enn pli grand satisfaction ki ena enn quantité kitsoz materiel.”

“Zot tou faire sa”

Preské partout bann dimoune kokin dan travail. A cause sa, beaucoup dimoune dire: “Si zot tou kokin, kifer pa moi?” Mais la Bible dire: “Fodé pa to suive la foule pou faire seki mauvais.” (Exode 23:2) Enn soeur ki appel Victoire ti suive sa conseil-la. Eski sa inn faire li di-bien?

Kan li ti ena 19 an, Victoire ti gagne enn travail dan enn l’usine kot faire de l’huile palme. Bien vite li ti remarké ki toulé 40 madame ki ti travail dan sa l’usine-la ti kokin bann la grain palmier ki zot ti cachiette dan zot panier. Chaque week-end, zot ti vann sa bann la grain-la ek zot ti gagne trois a quatre jour salaire. Victoire raconté: “Vrai-mem zot tou sans exception ti pé faire sa. Zot ti attann ki mo faire pareil couma zot, mais mo ti refusé, mo ti dire zot ki dan mo la vie mo faire tou pou reste honnete. Zot ti bouffonne moi, ek zot ti dire moi ki mo pou sorti perdant.”

“Enn jour, alors ki nou ti pé quitte l’usine, enn coup directeur ti rentré. Li ti fouille dan panier tou dimoune ek ti trouve bann la grain palmier dan tou panier excepté dan pou moi. Tou bann ki ti kokin ti pou, soit perdi zot travail desuite, soit zot ti pou bizin travail deux semaine sans la paye. Pendant sa deux semaine-la, sa bann madame-la ti’nn reconette ki pa moi ki ti sorti perdant.”

“Mo’nn trouve enn kitsoz, li’nn vinn pou moi”

Couma ou agir kan ou’nn trouve enn kitsoz ki ena valeur ki enn dimoune inn perdi? Beaucoup dimoune pensé desuite ki sa kitsoz-la inn vinn pou zot ek zot pa pense pou retourne li. Zot ena sa principe-la: “Mo’nn trouve enn kitsoz, li’nn vinn pou moi.” Certain pensé ki pena nanyin de mal ladan. Zot dire ki apré tou, surement sa dimoune ki’nn perdi sa kitsoz-la pa attann pou regagne li. Lezot dire ki c’est pa zot ki bizin al rod proprietaire sa kitsoz-la—enn demarche ki demann beaucoup zeffort.

Couma Bondié considere sa? Deutéronome 22:1-3 montré ki enn dimoune ki ti trouve enn kitsoz pa ti bizin garde sa pou li, mais li ti bizin garde li “ziska ki [proprietaire-la] vinn rod li; lerla li ti bizin retourne li sa.” (Bible en français courant) Si li pa ti dire nanyin, ti pou kapav accuse li ki li’nn kokin sa. (Exode 22:9) Eski sa principe-la encore ena valeur zordi? Pou Christine oui.

Christine li directrice enn lekol privé. Enn mercredi, li ti prend so salaire enn mois. Pareil couma bann dimoune faire en Afrique de l’Ouest, li ti mette tou billet ensam ek li ti fonce zot dan so sac. Apré sa, li ti monte lor enn taxi-motocyclette pou al reunion. Kan li ti arrivé, li ti fouille dan so sac pou rod bann piece pou paye chauffeur-la. Dan noir, so bann billet ti tombe enba sans ki li koné.

Deux-trois minute apré, Blaise, enn jeune 19 an ki pa ti reste dan sa l’endroit-la, ti passe par mem chemin. Li ti faire l’arrangement pou joinde enn camarade ki al mem reunion ki Christine. Li ti trouve sa bann billet-la, li ti ramasse sa ek li ti mette zot dan so poche. Apré reunion, li ti faire so camarade koné ki li finn ramasse kitsoz dehors ek ki si enn kikenn inn perdi kitsoz, li kapav telephone li ek faire li koné ki li’nn perdi.

Kan Christine ti rente kot li sa soir-la, li ti gagne sok kan li ti remarké ki so la paye enn mois ti’nn perdi. Enn semaine apré, li ti raconte so camarade Josephine seki ti’nn arrive li. Josephine ti dire li ki enn visiteur ki ti vinn reunion kot zot ti’nn ramasse enn kitsoz. Christine ti telephone Blaise ek ti faire li koné exactement seki li ti’nn perdi. Li ti extra content kan Blaise ti retourne li so kass. Ki Blaise ti ressenti? Li ti garde sa kass-la pendant enn semaine, mais li ti dire: “Mo ti ena plus la joie pou retourne sa kass-la ki garde li pou moi.”

Kifer zot faire zeffort pou reste honnete touletan?

Victorine, Victoire ek Blaise reste dan different l’endroit ek personne pa konn so camarade. Mais lor enn point zot pareil: zot tou zot bann Témoins de Jéhovah ki suive seki la Bible dire lor l’honneteté. Zot pé attann kan Bondié realise so promesse pou faire enn le monde nouveau. “Mais nou pé attann, couma Li’nn promette, bann nouveau le ciel ek enn nouveau la terre, kot pou ena la justice.” Lerla, tou bann dimoune ki pou vive, pou juste ek honnete.—2 Pierre 3:13.

Victorine pena beaucoup l’espoir ki so situation economik pou amelioré ziska ki Bondié change situation lor la terre. Selman, lor plan spirituel, li riche, enn richesse ki l’argent pa kapav acheté. So bann zenfant honnete ek bien elevé. Chaque dimanche, zot ‘deborde’ ar la joie kan zot koz ar zot voisin lor bonté ki Bondié ena ek kan zot expliké couma Li pou satisfaire “tou bann ki invok Li avek fidelité” ek “tou bann ki content Li.”—Psaume 145:7, 18, 20.

Avek le temps, Victoire ti quitte sa l’usine kot faire de l’huile palme-la. Li ti commence travail pou li-mem ek li ti vann garri (enn mangé ki faire avek manioc) dan bazar. Parski li ti honnete, sa ti faire li gagne beaucoup client. Enn tipé apré, li ti mem kapav diminué le temps ki li ti passé pou travail dan bazar, pou passe plus le temps pou koz avek lezot lor so l’esperance pou vive dan enn le monde kot pa pou ena bann dimoune malhonnete. Plitar, li’nn marié, ek zordi, li ek so mari zot bann serviteur a plein temps.

Christine ti perdi so kass devant enn la Salle du Royaume bann Témoins de Jéhovah. Blaise pa ti konn beaucoup dimoune dan sa reunion-la, mais li ti koné ki zot tou ti so bann frere ek soeur spirituel, ki faire tou seki zot kapav pou reste honnete touletan.

Ki quantité dimoune ou koné ki faire bann zeffort sincere pou reste honnete touletan? Maziné ki ou ensam avek 50, 100, ou-soit 200 dimoune ki honnete. C’est sa la joie-la ki bann Témoins de Jéhovah ena kan zot dan zot la Salle du Royaume. Kifer ou pa rann zot enn visite ek faire zot connaissance?

[L’encadré page 12]

“Ena bann zenfant honnete faire moi gagne enn pli grand satisfaction ki ena enn quantité kitsoz materiel.”—VICTORINE

[L’encadré page 14]

Eski dapré Proverbes 6:30, enn dimoune gagne droit kokin?

Proverbes 6:30 dire: “Bann dimoune pa meprise enn voleur zis parski li’nn kokin pou rempli so nâme kan li faim.” Eski dapré sa verset-la, enn dimoune gagne droit kokin? Non! Contexte sa verset-la montré ki enn dimoune ki kokin, li kan-mem coupable devant Bondié. Verset suivant dire: “Mais, kan pou decouvert li, li pou bizin rann sept fois plus; li pou donne tou bann kitsoz ki ena valeur ki dan so lakaz.” (Proverbes 6:31) Mem si sa voleur ki kokin parski li faim-la li pa aussi coupable ki enn kikenn ki kokin pou satisfaire enn grand desir pou gagne enn kitsoz ou-soit pou faire di-tort enn lot dimoune, mais kan-mem, li ena responsabilité pou “rann” seki li’nn kokin. Fodé jamais ki bann ki envie gagne faveur Bondié kokin, dan n’importe ki situation.