Seki Jésus ti enseigné lor Royaume Bondié

“Li ti al dan enn la ville apré lot ek dan enn village apré lot, li ti [preche] . . . la bonne nouvelle lor royaume Bondié.”—LUC 8:1.

NOU content koz lor bann kitsoz ki important pou nou, bann kitsoz avek ki nou attaché. Pareil couma Jésus li-mem ti dire, “seki nou ena en abondance dan nou leker, sa-mem ki nou la bouche dire.” (Matthieu 12:34) Kan nou guette bann kitsoz lor ki Jésus ti kozé pendant so ministere, nou arrivé comprend ki Royaume Bondié ti bien important pou li.

Ki été Royaume Bondié? Enn royaume c’est enn gouvernement ki dirigé par enn le roi. Alors, Royaume Bondié li enn gouvernement ki’nn etabli par Bondié. Bien souvent, Jésus ti koz lor Royaume Bondié ek li ti faire li vinn theme so message. Dan bann l’Evangile inn mentionne sa Royaume-la plus ki 110 fois. Mais Jésus pa ti enseigne zis en parole. So bann action aussi ti aprann bann dimoune beaucoup kitsoz concernant Royaume Bondié ek seki sa Royaume-la pou faire.

Kisannla ki le Roi? Le Roi ki trouve dan Royaume Bondié li pa vinn au pouvoir par bann dimoune ki’nn vote pou li. Au contraire, c’est Bondié Li-mem ki’nn choisir sa dirigeant-la. Dan so l’enseignement, Jésus ti montré ki c’est li ki Bondié finn choisir pou vinn le Roi.

Jésus ti koné ki bann prophetie la Bible ti’nn predire ki Messie ti pou dirigé dan enn Royaume ki pou duré pou touletan. (2 Samuel 7:12-14; Daniel 7:13, 14; Matthieu 26:63, 64) Rappel ki Jésus ti dire en publik ki c’est li-mem Messie ki ti’nn predire. Alors, Jésus ti pé reconette ki c’est li le Roi ki finn choisir par Bondié. (Jean 4:25, 26) Li approprié alors ki plusieurs fois Jésus ti servi l’expression “mo royaume.”—Jean 18:36.

Jésus ti aussi enseigné ki pou ena lezot ki pou dirigé ensam avek li dan sa Royaume-la. (Luc 22:28-30) Li ti appel zot “ti troupeau,” parski zot pou enn ti groupe. Li ti dire concernant bann ki pou dirige avek li: “Zot Papa finn trouve bon pou donne zot le royaume.” (Luc 12:32) Dernier livre la Bible montré ki en tou pou ena 144,000 ki pou ena privilege pou regne avek Christ.—Révélation 5:9, 10; 14:1.

Kot-sa Royaume Bondié trouvé? Jésus ti dire gouverneur romain Ponce Pilate: “Mo royaume pa faire partie dan sa le monde-la.” (Jean 18:36) Royaume Bondié, avek Christ couma le Roi, pa pou dirigé par bann representant humain. Plusieurs fois, Jésus ti decrire Royaume Bondié couma “royaume ki dan le ciel.”a (Matthieu 4:17; 5:3, 10, 19, 20) Alors, Royaume Bondié li enn gouvernement ki trouve dan le ciel.

Jésus ti sur ki li ti pou retourne dan le ciel apré so sejour lor la terre. Li ti dire ki li ti pou “prepare enn place,” pou ouvert enn chemin pou ki bann ki ti pou dirige avek li, vinn joinde li.—Jean 14:2, 3.

Ki Royaume Bondié pou realisé? Jésus ti enseigne bann ki ti ecoute li pou prié Bondié coumsa: “Ki to royaume vini. Ki to volonté faire lor la terre pareil couma dan le ciel.” (Matthieu 6:9, 10) Volonté Bondié pé faire dan le ciel. Royaume Bondié c’est moyen ki Bondié servi pou realise so projet pou la terre. Pou realise sa, Royaume Bondié pou amenn bann changement extraordinaire lor sa la terre-la.

Ki sa Royaume-la pou faire pou la terre? Jésus ti enseigné ki Royaume Bondié pou tire tou mechanceté kan li pou detruire bann ki’nn bien decidé pou pratik seki mauvais. (Matthieu 25:31-34, 46) Sa pou represente la fin tou forme corruption ek mechanceté. Jésus ti enseigné ki la terre pou rempli avek bann dimoune ki “ena enn caractere doux,” ki juste, ki montré misericorde, ki “ena enn leker pur,” ek ki content la paix.—Matthieu 5:5-9.

Eski sa bann dimoune fidele-la pou bizin vive lor enn planete pollué? Pa ditou! Jésus ti promette ki la terre pou konn bann changement extraordinaire kan Royaume Bondié pou dirigé. Enn zom ki ti lor enn poteau a coté Jésus, ti dire: “Jésus, rappel moi kan to pou vini dan to royaume.” Ek Jésus ti reponn li: “Vrai-mem mo dire toi zordi: To pou avek moi dan Paradis.” (Luc 23:42, 43) Oui, Royaume Bondié pou transforme sa la terre-la en entier en enn paradis—ki pou ressemblé paradis ki ti ena dan jardin Éden.

Ki lezot kitsoz sa Royaume-la pou faire pou l’humanité? Jésus pa ti zis faire bann promesse lor seki Royaume Bondié pou faire. Li ti montré aussi seki li pou faire. Jésus ti faire beaucoup guerison extraordinaire, coumsa li ti montré seki li pou faire dan enn fason pli grand pou la terre entier dan l’avenir pendant so regne. Bann l’Evangile inspiré dire concernant Jésus: “Li ti al partout dan Galilée, li ti enseigne dan zot bann synagogue ek ti preche la bonne nouvelle lor royaume ek li ti gueri toute sorte qualité maladie ek toute sorte qualité handicap parmi le peuple.”—Matthieu 4:23.

Jésus ti faire plusieurs qualité guerison. Li ti “faire enn dimoune ki [ti] aveugle depuis so naissance, trouve clair.” (Jean 9:1-7, 32, 33) Avek tendresse, Jésus ti touche ek gueri enn missié ki ti ena la lepre, enn maladie degoutant. (Marc 1:40-42) Kan ti amenn “enn missié ki ti sourde ek ki ti gagne difficulté pou kozé” ar li, Jésus ti montré ki li kapav faire “bann sourde tendé ek bann ki pa kapav kozé, kozé.”—Marc 7:31-37.

Mem la mort pa finn ena pouvoir devant le Roi ki Bondié inn choisir. La Bible faire mention trois l’occasion kot Jésus ti ressuscite bann mort. Li ti ressuscite garson unique enn veuve, enn tifi 12 an, ek Lazare, so camarade ki li ti bien content.—Luc 7:11-15; 8:41-55; Jean 11:38-44.

Pou decrire l’avenir extraordinaire ki pé attann bann dimoune ki pou vive enba direction Royaume Bondié, Jésus ti predire a travers l’apotre Jean “Guetté! La tente Bondié avek bann dimoune, ek Li pou reste avek zot, ek zot pou vinn so peuple. Ek Bondié Li-mem pou avek zot. Li pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur. Bann kitsoz avant finn disparette.” (Révélation 1:1; 21:3, 4) Mazinn enn coute—enn le monde kot pena larme, pena douleur, ek pena la mort! Lerla la priere pou ki volonté Bondié faire lor la terre pareil couma dan le ciel pou realisé dan enn sens complet.

Kan eski Royaume Bondié pou vini? Jésus ti enseigné ki lepok ki li ti pou commence regné en tant ki le Roi ti pou coincide avek enn periode le temps bien precis ki li ti appel so “presence.” Jésus ti donne enn prophetie bien detaillé pou montré kan eski so presence en tant ki le Roi pou commencé. Dan sa periode le temps-la pou ena bann bouleversement partout, parmi pou ena la guerre, la famine, tremblement de terre, bann l’epidemie, ek bann pratik ki kont la loi pou augmenté. (Matthieu 24:3, 7-12; Luc 21:10, 11) Nou finn trouve sa bann bouleversement-la ek beaucoup lezot evenement ki Jésus ti predire surtout a partir 1914, l’année ki Premier Guerre Mondial ti eclaté. Alors, asterla Jésus pé regné en tant ki le Roi. Bientot pou arrive ler pou ki sa Royaume-la vini ek faire volonté Bondié lor la terre.b

Kan Royaume Bondié pou vini, ki sa pou representé pou ou personnellement? Sa depann lor couma ou choisir pou reagir par rapport ar message Jésus.

[Notes]