Jésus Christ—Couma eski so message concerne ou

“Moi, mo finn vini pou ki zot gagne la vie ek zot gagne li en abondance.”—JEAN 10:10.

JÉSUS CHRIST ti vinn lor la terre avant tou pou donné, pa pou gagné. Par so ministere, li ti donne l’humanité enn cadeau ki ena enn grand valeur—enn message ki ti montré la verité lor Bondié ek lor So volonté. Bann ki accepté sa message-la kapav profite enn la vie meilleur zordi, enn kitsoz ki bann million vrai chretien kapav temoigné.a Mais message ki Jésus ti preché ti tourne autour enn kitsoz bien important, enn cadeau ki ena pli grand valeur ki tou—la vie parfait ki li’nn donné pou nou. Nou bonheur eternel depann lor fason ki nou reagir envers sa l’aspect bien important so message-la.

Seki Bondié ek Christ ti donné Jésus ti koné ki li ti pou passe par enn la mort bien cruel dan la main so bann l’ennemi. (Matthieu 20:17-19) Pourtant, dan Jean 3:16, Jésus ti dire sa bann parole ki bann dimoune bien koné-la: “Bondié finn tellement content le monde ki Li finn donne so sel Garson ki Li finn crée direct, pou ki tou seki ena la foi en li pa detruire, mais gagne la vie pou touletan.” Jésus ti aussi dire ki li ti vini “pou donne so nâme [ou-soit so la vie] couma enn ranson en echange pou beaucoup.” (Matthieu 20:28) Kifer Jésus ti dire ki li ti pou donne so la vie au lieu ki ti pou prend so la vie?

Poussé par enn l’amour sans limite, Bondié ti prend disposition pou ki bann dimoune liberé ar peché ki zot inn herité ek so bann consequence—l’imperfection ek la mort. Bondié ti faire sa kan li ti envoye so sel Garson ki Li ti crée direct, lor la terre pou mort en sacrifice. Jésus volontairement ti accepté, kan li ti donne so la vie parfait pou nou. Sa disposition-la, ki appel la ranson, li pli grand cadeau ki Bondié inn donne l’humanité.b Li enn cadeau ki kapav faire bann dimoune gagne la vie eternel.

Seki ou bizin faire Eski la ranson li enn cadeau ki pou ou personnellement? Sa depann lor ou. Prend enn l’exemple: Maziné ki enn kikenn pé donne ou enn cadeau ki’nn bien enveloppé. Sa cadeau-la pa pou vinn pou ou tant ki ou pa envoye ou la main ek accepté-li. Li pareil aussi pou la ranson. Jéhovah pé offert ou la ranson, mais sa cadeau-la li pa pou vinn pou ou personnellement tant ki ou pa envoye ou la main ek accepté li. Couma ou kapav faire sa?

Jésus ti dire ki c’est bann ki “ena la foi” en li ki pou gagne la vie eternel. La foi implik fason ki ou amenn ou la vie. (Jacques 2:26) Ena la foi dan Jésus vedir amenn enn la vie ki en accord avek seki li ti dire ek faire. Pou faire sa, ou bizin konn Jésus ek so Papa bien. Jésus ti dire: “Sa-mem ki vedir la vie eternel: zot bizin aprann konn toi, sel vrai Bondié, ek celui ki to finn envoyé, Jésus Christ.”—Jean 17:3.

Finn gagne environ 2,000 an depuis ki Jésus ti partage enn message ki finn change la vie bann million dimoune a travers le monde. Eski ou ti pou content konn plus lor sa message-la ek couma ou ek bann dimoune ki ou content kapav gagne bann bienfait ar sa message-la, pa zis asterla mais pou touletan? Bann Témoins de Jéhovah pou content pou aide ou.

[Notes]