Frere—seme pou l’esprit ek ena desir pou servi!
“Sa kikenn ki pé semé pou l’esprit-la, pou recolté . . . la vie eternel.”—GAL. 6:8.
1, 2. Couma Matthieu 9:37, 38 pé realisé zordi, ek a cause sa, ki bien bizin dan bann congregation?
OU PÉ temoin bann grand l’evenement dan l’Histoire! Jésus ti koz lor enn grand travail ki pé faire zordi ek ki pé bien progressé. Jésus ti dire ki “recolte-la grand, mais bann travailleur tigit. Alors, suppliyé Maitre recolte pou Li envoye bann travailleur dan so recolte.” (Mat. 9:37, 38) Jéhovah pé reponn sa bann la priere-la couma jamais Li finn faire avant. Pendant l’année service 2009, quantité congregation bann Témoins de Jéhovah finn augmenté par 2,031, zordi ena 105,298 congregation. En moyenne, 757 dimoune ti prend bapteme chaque jour!
2 A cause sa l’accroissement-la, bien bizin bann frere qualifié dan bann congregation pou prend la tête dan l’enseignement ek pou prend soin bann frere ek soeur. (Éph. 4:11) Pendant bann dizaine l’année ki’nn passé, Jéhovah finn etabli bann zom qualifié pou prend soin so bann brebis, ek nou sur ki Li pou contigne faire sa. Prophetie ki trouve dan Mika 5:5 donne nou l’assurance ki pendant lepok dernier jour, pou ena “sept berger” ek “huit duc” ki pou dirige peuple Jéhovah. Sa vedir ki pou ena beaucoup zom qualifié ki pou prend la tête parmi zot.
3. Expliké ki sa vedir “semé pou l’esprit.”
3 Si ou enn frere, ki kapav aide ou pou envie rempli bann condition pou prend bann responsabilité dan congregation? Enn kitsoz important ki ou bizin faire c’est “semé pou l’esprit.” (Gal. 6:8) Pou faire sa, ou bizin vive dan enn fason ki permette l’esprit saint Jéhovah influence ou la vie. Ou bizin bien decidé pou pa ‘semé pou faire plaisir ou lekor.’ Faire tou seki ou kapav pou ki bann kitsoz couma ou confort, bann passe-temps, ek bann divertissement pa diminué ou desir pou donne ou a fond dan service Bondié. Tou bann chretien bizin “semé pou l’esprit,” ek, bann frere ki faire sa, kapav avek le temps qualifié-zot pou gagne bann privilege dan congregation. Zordi pena assez assistant ministeriel ek ancien dan bann congregation, alors, sa lartik-la inn faire surtout pou bann frere. Alors frere, nou suppliye ou pou examine bien sa lartik-la dan la priere.
Ena desir pou faire enn bon travail
4, 5. Ki responsabilité bann frere encouragé pou prend dan congregation, ek ki zot bizin faire pou sa?
4 Li pa automatik ki enn frere vinn enn ancien. Li bizin ena desir pou faire sa “bon travail[-la],” sa implik servi bann lezot chretien. Li faire sa kan li prend compte avek amour seki zot bizin. (1 Tim. 3:1; lire Isaïe 32:1, 2.) Enn frere ki ena desir pou servi avek bann bon mobile, pa pé faire sa zis pou gagne bann privilege. Au contraire, li ena enn desir ki pa egoïste pou aide lezot.
5 Enn frere ki envie vinn assistant ministeriel ou-soit ancien bizin faire zeffort pou rempli bann condition ki ena dan la Bible. (1 Tim. 3:1-10, 12, 13; Tite 1:5-9) Si ou enn frere, demann ou-mem: ‘Eski mo participe avek zele dan predication, ek eski mo pé aide lezot pou faire pareil? Eski mo encourage mo bann frere ek soeur kan mo interesse-moi sincerement avek zot? Eski mo ena reputation enn kikenn ki etudié la Bible avek serieux? Eski mo pé ameliore qualité mo bann commentaire dan reunion? Eski mo prend serieux bann responsabilité ki bann ancien donne moi?’ (2 Tim. 4:5) Reflechi bien lor sa bann question-la.
6. Couma ou kapav prepare-ou pou prend bann responsabilité dan congregation?
6 Pou ou kapav prend sa bann responsabilité-la dan congregation, ou bizin aussi faire ki ‘sa dimoune ki ou été endan-la vinn fort avek puissance, grace a l’esprit Bondié.’ (Éph. 3:16) Nou pa vinn enn assistant ministeriel ou-soit enn ancien dan congregation grace a enn election. Nou gagne sa privilege-la zis si nou progressé lor plan spirituel. Couma nou kapav progressé? Enn fason c’est kan nou “contigne marche par l’esprit” ek developpe so fruit dan nou la vie. (Gal. 5:16, 22, 23) A mesure ki ou montré ki ou ena bann qualité spirituel ki bizin pou prend plus responsabilité ek ou mette en pratik bann conseil ki ou gagné pou ameliore ou, ‘tou dimoune pou trouve bien ou bann progré.’—1 Tim. 4:15.
Ou bizin ena l’esprit sacrifice
7. Ki enn frere bizin disposé pou faire pou servi lezot?
7 Pou ou kapav servi lezot, ou bizin disposé pou travail dur ek pou manifesté enn l’esprit sacrifice. Bann ancien zot bann berger spirituel, alors zot bien concerné ar probleme ki bann brebis Jéhovah gagné. Par exemple, guetté couma Paul ti prend so responsabilité en tant ki enn berger spirituel, avek serieux. Li ti dire so bann frere ek soeur dan Corinthe: “C’est dan beaucoup difficulté ek la peur dan leker ki mo ti ecrire zot avek beaucoup larme, pa pou ki zot chagrin, mais pou ki zot kapav konn l’amour ki mo ena surtout pou zot.” (2 Cor. 2:4) Li clair ki Paul ti travail avek tou so leker pou so bann frere ek soeur.
8, 9. Donne bann l’exemple biblik ki montré couma bann zom finn prend soin lezot.
8 Bann zom ki Jéhovah finn servi pou prend soin so bann serviteur finn touletan manifesté enn l’esprit sacrifice. Par exemple, li difficile pou pensé ki Noé ti dire so famille: ‘Faire moi koné kan zot fini arrange l’arche, lerla mo pou vinn ar zot.’ Moïse pa ti dire bann Israélite en Égypte: ‘Mo pou joinde zot pré kot la mer Rouge. Faire tou seki zot kapav pou arrive ziska la-bas.’ Jamais Josué ti dire: ‘Faire moi koné kan muraille Jéricho tombé.’ Ek Isaïe pa ti montré enn lot dimoune kan li ti dire: ‘Ala li la. Envoye li.’—Is. 6:8.
9 Pli grand l’exemple enn kikenn ki finn laisse l’esprit Bondié influence li c’est Jésus Christ. Avek tou so leker, li ti accepté mission ki Bondié ti donne li: sauve l’humanité. (Jean 3:16) Eski l’amour ek l’esprit sacrifice ki Jésus ti manifesté pa pousse nou pou ena enn grand reconnaissance? Enn frere ki ancien depuis longtemps ti decrire sentiment ki li ena pou so bann frere ek soeur, li ti dire: “Seki Jésus ti dire Pierre—prend soin mo bann ti brebis—touche moi beaucoup. Avek le temps, mo’nn rann moi compte ki quantité deux-trois mot gentil ou-soit zis enn simple bon action kapav encourage enn kikenn. Mo bien content sa travail berger-la.”—Jean 21:16.
10. Ki kapav pousse bann frere pou imite l’exemple Jésus pou servi lezot?
10 Jésus ti dire: “Mo pou reconforte zot.” (Mat. 11:28) Pena doute ki bann zom ki voué ar Jéhovah surement envie ena mem l’attitude ki Jésus kan zot prend soin peuple Bondié. Confiance en Bondié ek l’amour pou la congregation pousse bann frere pou ena enn desir pou faire sa bon travail-la. Zot pa pensé ki sa travail-la trop difficile ou-soit ki zot pou bizin faire trop beaucoup. Mais si enn frere pa trop ena sa desir-la, ki li kapav faire? Eski li kapav developpe sa desir pou servi dan congregation-la?
Developpe desir pou servi lezot
11. Couma enn kikenn kapav developpe desir pou servi lezot?
11 Si ou pensé ki ou pena capacité ek bann qualité ki bizin pou servi lezot, li bon ki ou prié pou gagne l’esprit saint. (Luc 11:13) L’esprit saint Jéhovah pou aide ou pou faire face ar la crainte ki ou ena dan sa domaine-la. C’est Bondié ki donne enn kikenn desir pou servi lezot, parski c’est so l’esprit saint ki pousse enn frere pou ena desir pou servi dan congregation ek ki donne li la force pou rann Bondié enn service sacré. (Phil. 2:13; 4:13) Alors, pa hesité pou demann Jéhovah so l’aide pou ki ou envie accepté bann privilege pou servi lezot.—Lire Psaume 25:4, 5.
12. Couma enn frere kapav gagne assez sagesse pou prend bann responsabilité ki finn donne li?
12 Li possible ki enn frere hesité pou servi dan la congregation parski li pensé ki occupe troupeau Bondié c’est enn travail ki compliké ek ki li pou ena trop beaucoup pou faire. Ou-soit li kapav pensé ki li pena assez sagesse pou prend sa responsabilité-la. Dan sa cas-la, li kapav gagne la sagesse si li etudié la Bible ek bann publication biblik plus en profondeur. Li kapav demann li-mem: ‘Eski mo reserve le temps pou etudié la Bible? Eski mo prié pou gagne la sagesse?’ Disciple Jacques ti ecrire: “Si kikenn parmi zot mank sagesse, laisse li contigne demann Bondié, parski Bondié content pou donne tou dimoune, sans faire okenn reproche; ek li pou gagné.” (Jacq. 1:5) Eski ou croire dan sa declaration ki’nn inspiré-la? Pou reponn la priere Salomon, Jéhovah ti donne li “enn leker sage ek intelligent,” ki ti permette li discerne entre seki bon ek seki mauvais kan li ti bizin rann bann jugement. (1 Rois 3:7-14) Li vrai ki cas Salomon ti special. Mais selman, nou kapav sur ki Bondié pou donne la sagesse bann zom ki ena bann responsabilité dan congregation pou ki zot kapav prend soin bann brebis Jéhovah couma bizin.—Prov. 2:6.
13, 14. (a) Expliké couma Paul ti touché par “l’amour ki Christ ena.” (b) Couma “l’amour ki Christ ena” bizin influence nou?
13 Enn lot kitsoz ki kapav aide enn frere pou developpe desir pou servi lezot c’est si li reflechi bien lor tou seki Jéhovah ek so Garson finn faire pou bann dimoune. Par exemple, anou examine 2 Corinthiens 5:14, 15. (Lire.) Dan ki sens “l’amour ki Christ ena, mette enn l’obligation lor nou”? En accord avek volonté Bondié, Christ inn donne so la vie pou nou. Kan li’nn faire sa, li’nn montré enn l’amour tellement extraordinaire ki sa augmente nou reconnaissance ek touche nou leker. L’amour Christ ti influence Paul dan tou seki li ti faire. Sa ti empeche li pou agir dan enn fason egoïste. Sa ti aide li aussi pou ena l’objectif principal pou servi Bondié ek so prochain, dan congregation ek en dehors congregation toulé-deux.
14 Kan nou medite lor l’amour ki Christ ena pou bann dimoune, sa faire nou ena reconnaissance. Sa aide nou pou realisé ki li pa bon ki nou contigne ‘semé pou faire plaisir nou lekor’ kan nou rod nou prop desir egoïste ek nou vive surtout pou nou prop plaisir. Au contraire, nou faire bann changement necessaire pou ki travail ki Bondié inn donne nou occupe premier place dan nou la vie. L’amour pousse nou pou “travail couma bann esclave” pou nou bann frere. (Lire Galates 5:13.) Si nou considere nou-mem couma bann esclave ki travail avek humilité pou bann serviteur Jéhovah, nou pou traite zot avek dignité ek respé. Oui, nou pa pou envie ena l’attitude ki Satan encouragé pou ena dan sa le monde-la, setadir critik ek juge lezot.—Rév. 12:10.
Role la famille
15, 16. Ki role enn famille ena pou ki enn frere nommé couma assistant ministeriel ou-soit ancien?
15 Kan bann ancien decidé si enn frere ki marié ek ki ena zenfant, rempli condition pou vinn enn assistant ministeriel ou-soit enn ancien, zot pou guetté couma so situation familial été. Oui, pou li nommé, sa pou depann beaucoup lor spiritualité ek reputation so famille. Nou trouvé alors ki role enn famille li bien important kan enn frere pé rod rempli bann condition pou servi en tant ki enn assistant ministeriel ou-soit enn ancien.—Lire 1 Timothée 3:4, 5, 12.
16 Sa faire Jéhovah content kan bann membre enn famille coopere sakenn avek so camarade. (Éph. 3:14, 15) Enn chef famille bizin ena l’equilibre pou li kapav prend so bann responsabilité dan congregation ek pou “dirige so prop famille dan enn bon fason.” Sa vedir ki li bien important ki enn ancien ou-soit enn assistant ministeriel etudié la Bible avek so femme ek so bann zenfant pou ki chaque semaine zot tou tire profit ar l’etude familial. Li bizin preche avek zot regulierement. Alors, li important ki bann membre enn famille soutenir bann zeffort ki chef zot famille faire.
Eski zot disposé pou ré-servi encore?
17, 18. (a) Si enn frere nepli rempli condition pou servi dan congregation, ki li bizin disposé pou faire? (b) Ki l’attitude enn frere ki nepli ancien ou-soit assistant ministeriel, bizin ena?
17 Kitfois avant ou ti enn ancien ou-soit enn assistant ministeriel. Ou content Jéhovah ek ou kapav sur ki Li encore toujours interessé ar ou. (1 Pierre 5:6, 7) Eski bann ancien finn dire ou ki ou ena bann changement pou faire? Accepté ki ou ena enn probleme ek travail lor la avek l’aide Bondié. Faire attention pou ou pa vinn amer. Agir avek sagesse ek manifesté enn l’attitude positif. Enn frere ki ti ancien pendant plusieurs l’année mais ki finn perdi so privilege ti dire: “Mo ti bien decidé pou contigne assisté reunion, sorti en predication ek lire la Bible pareil couma mo ti pé faire kan mo ti enn ancien. Mo’nn reussi realise sa l’objectif-la. Mo’nn aprann pou ena patience parski mo ti pensé ki mo ti pou ré-gagne mo bann privilege apré enn ou deux an, mais mo’nn bizin attann sept an pou mo ré-nommé ancien. Pendant sa le temps-la, seki ti bien aide moi c’est l’encouragement pou pa baisse lé-bras mais pou contigne rod servi lezot.”
18 Si ou aussi ou dan sa situation-la, pa decouragé. Reflechi couma Jéhovah pé beni ou ministere ek ou famille. Fortifié ou famille lor plan spirituel, visite bann malade, ek encourage bann ki faible. Mais surtout, considere sa couma enn grand privilege pou loué Jéhovah ek pou annonce la bonne nouvelle lor so Royaume en tant ki enn Témoin de Jéhovah.a—Ps. 145:1, 2; Is. 43:10-12.
Ré-examine ou situation
19, 20. (a) Ki tou bann frere encouragé pou faire? (b) Ki nou pou examiné dan prochain lartik?
19 Zordi plus ki avant, bien bizin bann frere pou servi couma ancien ek assistant ministeriel. Alors, nou encourage tou bann frere pou ré-examine zot situation ek pou demann zot-mem: ‘Kifer mo pa enn ancien ou-soit enn assistant ministeriel? Ki kitsoz ki empeche moi pou servi mo bann frere ek soeur?’ Laisse l’esprit saint Bondié aide ou pou ena enn bon l’attitude lor sa question bien important-la.
20 Tou bann membre congregation pou tire profit ar bann sacrifice ki nou tou faire. Kan nou agir avek bonté ek dan l’interet lezot, sa donne nou la joie parski nou pé servi lezot ek nou pé semé pou l’esprit. Dan prochain lartik, nou pou trouvé ki fodé pa nou faire la peine l’esprit saint Bondié. Couma nou kapav evité faire sa?
[Note]
a Guette La Tour de Garde 15 août 2009, en français, page 30-32.
Couma ou pou reponn?
• Ki l’assurance prophetie ki trouve dan Mika 5:5 donne nou?
• Ki sa vedir ena enn l’esprit sacrifice?
• Couma enn kikenn kapav developpe desir pou servi lezot?
• Si enn frere envie rempli bann condition pou vinn assistant ministeriel ou-soit ancien, couma so famille kapav soutenir li?
[Zimage page 25]
Ki ou kapav faire pou rempli bann condition pou servi dan congregation?