Question bann lecteur

Nou koné ki Jéhovah defann adore bann zidole, alors, kifer Li pa ti puni Aaron parski li ti faire enn veau en or?

Exode chapitre 32 raconté ki Aaron ti faire enn veau en or. Kan li ti faire sa, li ti desobeir la loi ki Bondié ti donné lor l’idolatrie. (Ex. 20:3-5) A cause sa, “Jéhovah ti tellement en colere [kont Aaron] ziska ki Li ti envie extermine li; mais [Moïse] ti suppliye aussi pou Aaron, dan sa lepok-la.” (Deut. 9:19, 20) Eski supplication Moïse, enn zom juste, ti’nn kapav “faire beaucoup kitsoz” pou Aaron? (Jacq. 5:16) Oui. Li parette ki a cause supplication Moïse, ek pou au moins deux lezot raison, Jéhovah ti reponn la priere Moïse ek li pa ti puni Aaron.

Enn raison kitfois ti ena enn rapport avek fidelité ki Aaron ti’nn manifesté avant. Kan Moïse ti gagne mission pou parette devant Pharaon ek pou faire bann Israélite sorti dan l’Égypte, Jéhovah ti choisir Aaron pou accompagne Moïse ek pou koz pou li. (Ex. 4:10-16) Sa deux zom-la ti obeir Jéhovah ek ti al plusieurs fois devant le roi l’Égypte, zot ti bizin affronte enn dimoune ki ti ena enn leker bien dur. Alors, deja kan li ti dan l’Égypte, Aaron ti montré so fidelité envers Jéhovah ek so fermeté.—Ex. 4:21.

Anou guetté aussi seki ti pousse Aaron pou faire sa veau en or-la. Moïse ti lor montagne Sinaï pendant 40 jour. Kan “le peuple ti trouvé ki Moïse [ti] pé tardé pou desann lor montagne,” zot ti convaink Aaron pou faire enn zidole pou zot. Aaron ti accepté ek ti faire statue enn veau en or. (Ex. 32:1-6) Pourtant, so bann action apré ti montré ki so leker pa ti vrai-mem avek seki li ti faire. Pena doute ki li ti cedé kan le peuple ti mette pression lor li. Kan Moïse ti prend enn decision ferme pou reglé sa probleme-la, tou bann garson Lévi—parmi ti ena Aaron aussi—ti prend enn position bien ferme pou Jéhovah. Zot ti touye trois mille adorateur zidole ki ti bann principal responsable sa rebellion-la.—Ex. 32:25-29.

Apré sa, Moïse ti dire le peuple: “Zot inn faire peché, ek sa peché-la bien grand.” (Ex. 32:30) Sa vedir ki pa zis Aaron ki ti coupable pou sa peché-la. Li ek le peuple toulé-deux ti kapav gagne misericorde Jéhovah.

Apré seki ti passé concernant sa veau en or-la, Jéhovah ti donne l’ordre pou etabli Aaron couma grand pretre. Bondié ti dire Moïse: “To bizin mette bann linge sacré lor Aaron, faire li vinn enn oint ek faire li vinn saint, ek lerla li pou bizin servi moi couma enn pretre.” (Ex. 40:12, 13) Li clair ki Jéhovah ti pardonne Aaron pou so faiblesse. Dan so leker, Aaron ti soutenir vrai l’adoration avek fidelité, li pa ti enn adorateur bann zidole, ni enn rebelle.