Peché—Ki finn changé?

“AZORDI bann dimoune pa d’accord avek l’idée ki zot inn condamné a cause enn peché ki nou premier parent finn faire, ena bien longtemps. Mais, zot pa d’accord aussi avek l’idée peché li-mem. . . . Bann dimoune couma Adolf Hitler ek Josef Stalin kitfois finn faire peché, mais nou tou nou zis victime bann l’evenement ek nou bann innocent.”—The Wall Street Journal.

Couma sa citation-la montré, zordi, li parette ki l’idée ki bann dimoune ena lor peché pé konn enn grand crise. Mais kifer sa? Ki finn changé? En realité, ki l’idée concernant peché ki bann dimoune trouve difficile pou accepté?

Ena deux l’aspect concernant peché—peché ki nou finn herité ek peché ki nou faire personnellement. Premier-la li dan nou, ki nou content ou-soit non, alors ki deuxieme-la li, li enn kitsoz ki nou pratiké. Anou guette chaque l’aspect inpé plus en detail.

Eski vrai-mem peché nou premier parent ena enn l’effet lor nou?

La Bible dire ki nou premier parent ti commette enn faute lor plan moral—peché originel—ek zot finn transmette sa l’humanité en entier. A cause sa, nou tou nou finn né avek enn tache lor nou: l’imperfection. La Bible dire: “Tou l’injustice li enn peché.”—1 Jean 5:17.

Mais, beaucoup dimoune ki souvent al l’eglise, pa reussi comprend ni accepté l’idée ki tou dimoune finn né imparfait a cause enn faute ki finn arrivé bien longtemps ek dan ki zot pa finn prend part ek zot pa responsable. Edward Oakes, enn professeur ki enseigne la religion, dire ki bann dimoune ki tann sa doctrine-la, “soit zot etonné ou-soit zot gené, ou-soit zot refuse accepté dan enn fason categorik [ki l’Eglise demann so bann fidele pou croire dan peché], ou-soit minimum ki zot kapav faire c’est accepté li ki a faire, mais zot pa koné ki place zot pou donne li dan zot la vie en tant ki croyant.”

Enn raison kifer li difficile pou bann dimoune accepté l’idée concernant peché originel c’est a cause seki bann l’Eglise finn enseigné lor la. Par exemple, dan concile de Trente (1545-1563), l’Eglise ti condamne n’importe kisannla ki pa ti daccord ki bann zenfant ki fek né ti bizin baptisé pou gagne pardon zot peché. Bann ki etudié la religion dire ki si enn tibaba ti mort sans ki li’nn baptisé, so bann peché pa ti pou purifié. A cause sa, jamais li ti pou kapav rente dan le ciel. Calvin ti al pli loin kan li ti enseigné ki bann tibaba ‘zot condamné depuis dan ventre zot mama.’ Li ti dire aussi, ki sa peché ki sa bann tibaba-la finn herité li tellement grand ‘ki Bondié detesté sa.’

Pou la plupart dimoune, li normal pou considere bann tibaba ki fek né couma bann innocent. Pou zot li impossible pou bann dimoune pensé ki sa bann tibaba-la bizin souffert a cause peché ki zot finn herité. Li facile pou comprend kifer sa bann l’enseignement l’Eglise-la finn eloigne bann dimoune ar doctrine concernant peché originel. En realité, certain chef l’Eglise zot-mem pa ti ena courage pou condamne enn tibaba ki pa ti encore baptisé, pou al dan l’enfer. Pou zot, seki pou arrive sa tibaba-la reste enn confusion dan l’enseignement la religion. Mem si sa l’enseignement-la jamais pa ti vinn enn doctrine l’Eglise, pendant plusieurs siecle l’Eglise catholique ti enseigné ki nâme bann innocent ki pa ti baptisé ti pou reste dan bann Limbes, enn l’endroit entre paradis ek l’enfer.a

Enn lot raison kifer bann dimoune finn commence nepli croire dan peché originel c’est parski dan 19^eme siecle, bann philosophe, bann scientifik, ek bann ki etudié religion ti commence demandé si bann recit la Bible vrai-mem finn arrivé dan l’Histoire. Theorie Darwin lor l’evolution finn pousse beaucoup dimoune pou croire ki zistoire Adam ek Ève li enn zistoire fausse. A cause sa, beaucoup dimoune zordi, pensé ki la Bible reflete mentalité ek tradition so bann ecrivain au-lieu ki li enn revelation ki sorti kot Bondié.

Ki l’effet sa finn ena lor doctrine concernant peché originel? Pena doute ki si bann croyant zot sur ki Adam ek Ève jamais ti existé, conclusion logik ki zot pou tiré c’est ki jamais pa finn ena peché originel. Mem pou bann ki pré pou accepté ki tou dimoune imparfait, l’idée ki zot ena lor peché originel li zis enn fason simple pou expliké kifer zot imparfait.

Alors, si couma beaucoup dimoune pensé pena peché originel, ki nou kapav dire concernant bann peché ki nou faire personnellement?

Eski sa li vrai-mem enn peché?

Kan demann bann dimoune ki peché ki zot considere couma bann peché personnel, beaucoup pense dix commandement—pena droit touye dimoune, trompe so conjoint, envié enn kitsoz ki pa pou ou, gagne relation avant mariage, kokin, ek encore lezot peché. Bann l’Eglise ti enseigné ki bann ki’nn mort sans ki zot finn repenti, pou tourmenté pou touletan dan l’enfer.b

Dapré l’Eglise catholique, pou ki enn dimoune evite enn sort coumsa, li ti bizin confesse so bann peché ar enn pretre, ki dapré zot ena pouvoir pou pardonne sa bann peché-la. Mais selman, pou la plupart bann catholique, sa nepli la mode asterla pou faire confession, gagne absolution (pardon pou bann peché par enn pretre), ek faire penitence. Par exemple, dapré enn sondage ki finn fek faire, plus ki 60% bann italien ki catholique nepli al confessé.

Li clair ki l’idée ki la plupart ti ena lor peché ki enn dimoune faire ek so bann consequence—couma bann l’Eglise expliké—pa finn reussi aide zot pou arrete pratik peché. Beaucoup dimoune ki al la messe nepli croire ki sa bann kitsoz-la, pa bon. Par exemple, certain raisonne coumsa: si deux dimoune d’accord pou gagne relation sexuel ek ki sa pa pé faire di-tort enn troisieme dimoune, pena nanyin de mal ladan.

Kitfois sa bann dimoune-la ena sa qualité raisonnement-la parski au fond zot-mem zot ena doute lor seki finn enseigne zot concernant peché. En realité, beaucoup trouve sa difficile pou croire ki enn Bondié ki ena l’amour, pou tourmente pou touletan bann ki faire peché, dan l’enfer. Ek kitfois sa bann doute-la explik en partie kifer zot nepli considere “peché” couma enn kitsoz ki serieux. Mais ena encore lezot facteur ki finn contribué pou ki bann dimoune nepli donne peché mem l’importance.

Rejette bann valeur bien etabli

Seki finn arrivé dan le monde pendant bann dernier siecle finn amenn grand-grand changement dan la societé ek dan mentalité bann dimoune. Sa deux la guerre mondial ki finn ena-la, lezot ti la guerre ki pa kapav compté, ek plusieurs la guerre kot finn touye bann groupe dimoune a cause zot race, religion, etc., finn amenn beaucoup pou demann zot-mem ki l’importance bann valeur moral ena. Zot demandé: ‘Eski li logik, dan enn lepok kot ena bann grand progré dan domaine technologie, pou vive dapré bann principe ki’nn etabli inn gagne plusieurs siecle ek ki nepli kapav appliké zordi?’ Bann ki pensé ki enn dimoune so bann action bizin basé lor bann raison ek bann ki etudié bann principe moral, finn tire conclusion ki sa li pa logik. Zot pensé ki bann dimoune bizin ignore bann ancien croyance ek instruire zot-mem pou ki zot arrive ziska zot top.

Sa fason pensé-la finn detourne bann dimoune ar Bondié. Dan beaucoup pays en Europe, bien tigit dimoune al l’eglise. De plus en plus dimoune nepli croire dan enn kitsoz precis ek beaucoup montré dan enn fason clair ki zot pa content ditou bann l’enseignement de base bann l’Eglise. Zot trouvé ki zot pena okenn sens. Zot raisonne coumsa: si bann dimoune inn evolué ek pena Bondié, alors kifer bizin casse la tête concernant bann principe moral?

Parski bann dimoune ti commence nepli prend compte bann valeur moral dan bann pays l’Europe ek l’Amérique dan 20^eme siecle, sa finn amenn beaucoup changement. Enn parmi sa bann changement-la ena seki bann dimoune appel enn revolution sexuel. Protestation bann etudiant, bann mouvement ki lutte kont tou valeur traditionnel, ek methode contraception, tousala finn contribué pou ki dimoune rejette bann l’idée bien etabli lor seki bon ek seki pa bon. Bien vite, dimoune en general inn rejette bann principe moral biblik. Enn nouveau generation inn adopté enn nouveau moralité ek enn nouveau l’attitude envers peché. Enn ecrivain dire ki depuis sa, “sel la loi ki ti existé ti la loi l’amour”—enn l’expression ki’nn developpé surtout parski partout dimoune pé accepté bann relation sexuel ki pa acceptable.

Bann l’enseignement religieux ki pa donne bann dimoune mauvais conscience

Journal Newsweek ti faire enn commentaire bien franc lor situation dan l’Amérique. Li ti dire ki bann pretre bizin koz lor bann kitsoz ki attire bann dimoune sinon zot pou al lot place. Zot peur tension zot pou perdi zot bann fidele si zot demann bannla bann kitsoz trop difficile lor plan moral. Bann dimoune pa envie ki lezot dire zot ki zot bizin cultive l’humilité, ena controle lor zot-mem, faire seki droite ou-soit ki zot bizin ecoute zot conscience ki pé troublé-zot ek repenti pou tou zot peché. Alors beaucoup l’Eglise pé adopté seki Chigago Sun-Times appel “enn message chretien, ki faire enn dimoune senti-li bien, ki utile pou li, ou-soit ki basé lor message ‘guette zis pou ou tousel,’ [ek] mette l’evangile enn coté.”

Sa finn developpe enn maniere pensé religieux ki decrire Bondié dapré sa pensé-la. Bann l’Eglise pa attire l’attention lor Bondié ek lor seki Li demann nou faire, mais plutot lor bann zom ek seki pou augmente l’estime ki zot ena lor zot-mem. L’objectif principal c’est pou satisfaire seki la congregation bizin. Ki resultat sa finn donné? Enn religion kot pena okenn doctrine. The Wall Street Journal pose sa question-la: “Ki kitsoz rempli sa vide ki ena au milieu, kot bann principe moral chretien ti habitué été? Sel principe ‘moral’, ki ena c’est ki ‘nou bizin enn bon dimoune,’ ek sa kapav pardonne nou, tou kitsoz.”

Li logik ki resultat ki sa finn ena c’est ki n’importe ki religion ki offert enn sentiment bien-etre, li enn bon religion. The Wall Street Journal dire ki n’importe kisannla ki accepté sa l’idée-la, “kapav rente dan n’importe ki religion, tant ki sa religion-la pa demann so bann fidele pou suive bann code moral bien precis—consolé mais pa jugé.” Ek bann l’Eglise zot, zot disposé pou accepté bann dimoune “exactement couma zot été,” sans oblige zot pou suive bann principe moral.

Seki nou’nn trouvé dan sa bann paragraphe avant-la kitfois faire bann ki lire la Bible, rappel enn prophetie ki l’apotre Paul ti ecrire dan premier siecle nou lepok. Li ti dire: “Pou arrive enn lepok kot zot pou nepli supporte l’enseignement ki en accord avek la verité. Mais, a cause zot bann prop desir, zot pou entoure-zot avek enn quantité enseignant pou ki bannla faire zot tann seki zot zoreille envie tendé; ek zot pou detourne zot zoreille ar la verité.”—2 Timothée 4:3, 4.

Bann chef religieux ki ferme lizié lor bann peché, ki pa admette so l’existence ek ki caresse zoreille zot bann fidele kan zot dire bannla seki zot envie tendé au lieu seki la Bible dire, pé faire zot beaucoup di-tort. Enn message coumsa li fausse ek li dangereux. Sa donne enn fausse l’idée lor enn parmi bann l’enseignement pli important ki Jésus finn enseigné. Peché ek pardon occupe enn place bien important dan bonne nouvelle ki Jésus ek so bann zapotre ti enseigné. Pou trouvé dan ki sens, nou invite ou pou lire prochain lartik.

[Notes]

[L’encadré page 7]

Bann l’enseignement religieux ki pa donne bann dimoune mauvais conscience, produire bann mauvais fruit

[L’encadré page 6]

Peché? “Li nepli enn probleme pou nou”

▪ “Enn parmi bann pli grand l’obstacle ki l’Eglise gagné zordi, concerne sa probleme-la. Nou nepli considere nou-mem couma ‘bann dimoune ki faire peché’ ek ki bien bizin gagne pardon. Kitfois longtemps peché ti enn probleme, mais aster li nepli enn probleme. Alors, mem si l’Eglise li, li ena enn solution pou peché, pou la plupart bann américain sa li pa enn probleme—au moins pa enn probleme grave.”—John A. Studebaker, enn specialiste ki ecrire lor religion.

▪ “Bann dimoune dire: ‘Lor plan moral mo strict ar mo-mem ek ar lezot. Mais mo koné ki nou tou nou bann humain, alors mo faire seki mo kapav.’ Nou’nn trouve enn degré moralité ki ni trop haute, ni trop bas kot nou senti-nou bien, kot nou pensé nou pé faire seki bien. Nou coupe nou gazon. Nou pa park nou l’auto zis a coté enn lot l’auto pou blok li. Mais nou pa prend compte bann question pli important lor peché.”—Albert Mohler, president Southern Baptist Theological Seminary.

▪ “Azordi bann dimoune fiere pou bann kitsoz ki avant ti faire gagne honté [couma par exemple ‘ les sept peché capitaux ’]: bann parent encourage zot zenfant pou developpe enn certaine fierté parski sa li important pou zot l’amour-prop; plusieurs chef cuisinier français ti envoye enn petition Vatican pou ki li pa considere mangé sans moderation couma enn peché. L’envie, c’est seki encourage bann dimoune pou reste a-jour avek tou seki ena dan bann magazine. Bann agent servi bann reclame couma enn zouti pou faire dimoune envie contigne acheté. La colere inn vinn enn kitsoz ki normal kan enn dimoune inn offense ou. Parfois mo zis envie faire paresse.”—Nancy Gibbs, Time magazine.

[Zimage page 5]

Azordi beaucoup considere zistoire Adam ek Ève couma enn zistoire fausse