Reste en securité parmi peuple Bondié
“Mo envie loué toi dan grand l’assemblée.”—PS. 35:18.
1-3. (a) Ki kapav amenn certain chretien dan enn situation dangereux lor plan spirituel? (b) Ki coté bann serviteur Bondié kapav gagne protection?
KAN Joe ek so madame ti en vacance, zot ti al plongé pré ar bann recif kot ti ena enn quantité poisson tou sorte couleur ek tou sorte grosseur. Zot ti al inpé pli loin pou admire bann corail ki ti ena dan fond. Kan zot ti’nn arrive dan enn place kot enn coute de l’eau ti bien fond, madame Joe ti dire so missié: “Mo pensé nou pé al trop loin.” Joe ti reponn li: “Pa peur toi. Mo koné ki mo pé faire.” Joe rappel ki enn tipé apré, li ti demann li-mem: ‘Kot tou poisson inn allé?’ Li ti gagne sok kan li ti decouvert kifer bann poisson pa ti la. Dan sa de l’eau bien fond-la, ti ena enn requin ki ti pé vinn droite lor li. Li pa ti kapav sauvé. Kan requin-la ti zis apepré enn metre ar li, requin-la ti tourné ek ti disparette dan la mer.
2 Enn chretien kapav tellement attiré par bann distraction ki ena dan le monde Satan—divertissement, travail, kitsoz materiel—ki li pa realisé ki li pé al loin, coumadir dan bann de l’eau dangereux. Joe, ki enn ancien dan congregation, dire: “Sa l’experience-la ti faire moi reflechi lor nou bann frequentation. Nage kot de l’eau bon ek kot ou en securité, setadir dan congregation!” Pa nage dan bann de l’eau ki profond kot ou kapav retrouve-ou tousel ek ou mette ou spiritualité en danger. Si jamais ou remarké ki ou finn al dan sa qualité de l’eau-la, retourne desuite kot ou en securité. Sinon, ou riské perdi la vie lor plan spirituel.
3 Zordi, le monde li enn place dangereux pou bann chretien. (2 Tim. 3:1-5) Satan koné ki li pena beaucoup le temps, ek li’nn sorti pou devore bann ki pa lor zot garde. (1 Pierre 5:8; Rév. 12:12, 17) Selman, nou ena enn protection. Jéhovah finn donne so bann serviteur enn place kot zot en securité lor plan spirituel—congregation chretien.
4, 5. Ki sentiment beaucoup dimoune ena lor zot l’avenir, ek kifer?
4 Bann societé dan le monde pa donne enn grand securité, ki li lor plan physik ou-soit affectif. Beaucoup dimoune ena sentiment ki zot pa en securité lor plan physik parski ena crime, violence, la vie pé vinn pli cher, ek ena mem bann probleme a cause pollution. Arrive enn moment, nou tou nou bizin faire face ar la vieillesse ek enn mauvais la santé. Bann ki ena enn travail, enn lakaz, assez l’argent pou vive ek enn bon la santé, kitfois zot demann zot-mem comié temps sa pou contigné.
5 Ena beaucoup ki pa finn kapav gagne securité lor plan affectif aussi. Li bien triste ki beaucoup dimoune ki ti ena l’espoir ki zot ti pou heureux ek satisfait dan zot mariage ek avek enn famille, finn trouvé ki zot l’espoir finn tombe dan de l’eau. Lor plan spirituel, beaucoup dimoune ki al l’eglise, zot dan confusion, zot mette en doute direction ki zot finn gagné. Zot ena sa sentiment-la surtout kan zot trouve mauvais conduite ki zot bann chef religieux ena ek aussi a cause zot l’enseignement ki pa biblik. Alors, beaucoup pensé ki asterla sel choix ki zot ena c’est mette zot confiance dan la science ou-soit compte lor bonté ek bon sens bann dimoune. Avek enn situation coumsa, nou pa etonné ki bann dimoune autour nou pa senti-zot en securité ou-soit prefere pa pense trop lor zot l’avenir.
6, 7. (a) Kifer l’attitude bann serviteur Bondié li different avek bann ki pa servi Li? (b) Ki nou pou examiné?
6 L’attitude bann ki forme partie dan congregation bien different avek bann ki en dehors. Mem si nou, en tant ki Témoins de Jéhovah nou bizin faire face ar mem probleme ki tou dimoune, nou pena mem reaction ki zot. (Lire Isaïe 65:13, 14; Malaki 3:18.) Kifer? Parski dan la Bible, nou’nn gagne enn explication clair ki montré nou kifer le monde li dan sa situation-la zordi, ek nou, nou bien equipé pou faire face ar bann probleme ki nou gagné dan la vie. A cause sa, nou pa tracassé plus ki bizin concernant nou l’avenir. Parski nou adore Jéhovah, nou protegé kont bann mauvais raisonnement ki pa biblik, kont bann pratik immoral ek kont zot consequence. Sa vedir ki bann membre congregation konn enn trankilité ki lezot pa koné.—Is. 48:17, 18; Phil. 4:6, 7.
7 Certain l’exemple kapav aide nou pou reflechi lor securité ki bann serviteur Jéhovah ena, enn securité ki bann dimoune ki pa adore Jéhovah, pena. Sa bann l’exemple-la kapav pousse nou pou examine nou prop raisonnement ek nou bann action ek guetté si nou bizin applik pli bien bann conseil ki Bondié donne nou, conseil ki’nn faire pou protege nou.—Is. 30:21.
“Mo lipié ti’nn preské prend enn lot direction”
8. Ki bann serviteur Jéhovah finn touletan bizin faire?
8 Bien boner dan l’histoire l’humanité, bann ki ti choisir pou servi ek pou obeir Jéhovah ti essaye evite frequente trop pré bann dimoune ki pa ti adore Jéhovah. Oui, Jéhovah ti montré ki ti pou ena la haine entre so bann adorateur ek bann ki suive Satan. (Gen. 3:15) Bann serviteur Bondié reste ferme lor zot position en rapport avek bann principe biblik, a cause sa, zot finn agir dan enn fason different ar bann dimoune ki autour zot. (Jean 17:15, 16; 1 Jean 2:15-17) Li pa’nn toujours facile pou zot prend sa position-la. Oui, mem parmi bann serviteur Jéhovah, certain finn parfois douté si li vrai-mem sage pou amenn enn la vie sacrifice.
9. Ar ki probleme ecrivain Psaume 73 ti bizin faire face?
9 Enn serviteur Jéhovah ki ti commence douté si vrai-mem li’nn prend bann decision ki sage, ti kitfois enn parmi bann descendant Asaph ki ti ecrire Psaume 73. Sa psalmiste-la ti demandé kifer bann mauvais dimoune souvent parette pé reussi, zot parette heureux ek zot prosperé, alors ki bann ki pé faire zeffort pou servi Bondié, konn bann l’epreuve ek bann probleme.—Lire Psaume 73:1-13.
10. Kifer bann question ki sa psalmiste-la ti posé, zot important pou ou?
10 Eski ou finn deja pose-ou bann question pareil couma sa psalmiste-la ti posé? Si oui, fodé pa ki ou senti-ou trop coupable ou-soit pensé ki ou pé perdi ou la foi. En realité, plusieurs serviteur Jéhovah, parmi ena certain ki Jéhovah ti servi pou ecrire la Bible, finn ena mem pensée. (Job 21:7-13; Ps. 37:1; Jér. 12:1; Hab. 1:1-4, 13) Oui, tou bann ki envie servi Jéhovah bizin reflechi ek accepté reponse sa question-la: Eski servi Bondié ek obeir Li c’est pli bon kitsoz ki nou kapav faire? Sa ena enn rapport avek question ki Satan ti soulevé dan jardin Éden, question ki lié ar souveraineté Bondié. (Gen. 3:4, 5) Alors, nou tou nou bizin examine sa question ki sa psalmiste-la ti posé. Eski nou bizin envié bann mauvais dimoune ki faire vantard ek ki parette pé vive zot la vie sans okenn probleme? Eski nou bizin quitte Jéhovah pou imite zot? C’est exactement seki Satan ti pou content nou faire.
11, 12. (a) Couma sa psalmiste-la ti surmonte so bann doute, ek ki sa enseigne nou? (b) Ki finn aide ou pou tire mem conclusion ki sa psalmiste-la?
11 Ki ti aide sa psalmiste-la pou surmonte so bann doute? Mem si li ti admette ki li ti preské detourne-li ar la justice, so fason pensée ti changé kan li ti rente dan “temple Bondié ki extra joli,” ou-soit tabernacle, kot li ti associé-li avek lezot serviteur Bondié ek kot li ti medite lor projet Bondié. Lerla, sa ti vinn clair pou sa psalmiste-la ki li pa ti envie partage mem sort ki bann mauvais dimoune. Li ti kapav trouvé ki zot conduite ek bann choix ki zot ti faire dan zot la vie ti mette zot lor enn “terrain ki glissé.” Sa psalmiste-la ti trouvé aussi ki tou bann ki quitte Jéhovah dan enn fason immoral, pou konn “bann malheur ki [pou vini] enn sel coup,” alors ki bann ki servi Jéhovah zot, zot pou gagne so soutien. (Lire Psaume 73:16-19, 27, 28.) Pena doute ki ou finn trouvé ki seki sa psalmiste-la ti dire, li vrai. Kitfois pou beaucoup dimoune, zot trouve sa bon pou vive pou zot-mem sans prend compte la loi Bondié. Mais zot pa pou kapav evite bann mauvais consequence ki enn conduite coumsa amené.—Gal. 6:7-9.
12 Ki nou kapav aprann encore ar l’experience ki sa psalmiste-la ti faire? Li ti trouve securité ek sagesse parmi bann serviteur Bondié. Li ti commence raisonne dan enn fason clair ek logik kan li ti al dan l’endroit kot ti adore Jéhovah. Zordi aussi pareil, nou kapav trouve bann dimoune ki donne bann bon conseil ek gagne enn bon nourriture spirituel dan bann reunion. Alors, pou bann bon raison Jéhovah demann so bann serviteur pou assisté reunion. La-bas, zot pou senti-zot encouragé ek zot pou motivé pou agir avek sagesse.—Is. 32:1, 2; Héb. 10:24, 25.
Choisir ou bann frequentation avek sagesse
13-15. (a) Ki l’experience Dina ti faire, ek ki sa montré? (b) Kifer frequentation nou bann frere ek soeur, li enn protection?
13 Dina, tifi Jacob, c’est l’exemple enn kikenn ki’nn gagne bann probleme bien grave parski li ti frequente bann camarade ki pa ti servi Jéhovah. Livre Genèse raconte nou couma li ti ena l’habitude pou frequente bann jeune femme cananéenne ki ti reste dan l’endroit kot so famille ti resté. Bann Cananéen pa ti ena mem principe moral elevé ki bann adorateur Jéhovah. Au contraire, seki bann archeologue finn decouvert montré ki a cause zot fason vive, zot pays ti rempli ar l’idolatrie, l’immoralité, l’adoration sexe ki ti bien immoral, ek la violence. (Ex. 23:23; Lév. 18:2-25; Deut. 18:9-12) Anou reguette seki ti arrive Dina a cause so frequentation avek sa bann dimoune-la.
14 Enn zom dan l’endroit ki ti appel Shekèm, ki la Bible decrire couma “pli respectable parmi tou bann ki ti vive dan lakaz so papa,” ti trouve Dina “ek ti prend li ek ti viole li.” (Gen. 34:1, 2, 19) C’est enn grand malheur, pa vrai? Eski ou pensé ki Dina ti attann ki enn kitsoz coumsa ti pou arrive li? Kitfois li ti pé zis rod faire camarade avek bann jeune dan l’endroit, ek li pa ti pensé ki zot ti pou faire li di-tort. Mais Dina ti pé faire enn grand erreur.
15 Ki sa recit-la enseigne nou? Ki nou pa kapav frequente bann dimoune ki pa adore Jéhovah ek esperé ki pa pou arrive nou nanyin. La Bible dire ki “bann mauvais frequentation gate bann bon l’habitude.” (1 Cor. 15:33) De lot coté, kan ou frequente bann dimoune ki ena mem croyance ki ou, mem principe moral elevé, ek mem l’amour pou Jéhovah, c’est enn protection. Sa qualité bon frequentation-la pou encourage ou pou agir avek sagesse.—Prov. 13:20.
“Finn purifié zot”
16. Ki l’apotre Paul ti dire lor certain dan congregation Corinthe?
16 Congregation chretien inn aide beaucoup dimoune pou debarrasse-zot ar beaucoup pratik immoral. Kan l’apotre Paul ti ecrire so premier lettre congregation Corinthe, li ti koz lor bann changement ki bann chretien la-bas ti’nn faire pou vive en accord avek bann principe biblik. Certain ti bann fornicateur, bann idolatre, bann adultere, bann homosexuel, bann voleur ek bann soulard, ek zot ti pratik encore lezot kitsoz. Paul ti dire zot: “Mais finn purifié zot.”—Lire 1 Corinthiens 6:9-11.
17. Couma la vie beaucoup finn transformé kan zot finn commence vive en accord avek bann principe biblik?
17 Bann dimoune ki pena la foi, zot pena bann bon principe biblik pou guide zot. Zot decide par zot-mem seki zot pou faire, ou-soit zot laisse-zot gagné par conduite immoral bann dimoune autour zot, pareil couma certain Corinthien, avant zot ti vinn chretien. (Éph. 4:14) Mais enn connaissance exact lor Parole Bondié ek lor so projet, ena pouvoir pou transforme en bien la vie tou bann ki applik seki la Bible dire. (Col. 3:5-10; Héb. 4:12) Parmi bann ki forme partie dan congregation zordi, beaucoup kapav dire ou ki avant ki zot ti aprann ek applik bann principe Jéhovah, zot ti amenn zot la vie sans okenn controle lor plan moral. Pourtant, zot pa ti satisfait, ni heureux. Zot ti trouve la paix selman kan zot ti commence frequente bann serviteur Bondié ek kan zot ti vive en accord avek bann principe biblik.
18. Ki l’experience enn jeune ti faire, ek ki sa montré?
18 Parkont, certain ki dan le passé ti choisir pou quitte sa ‘de l’eau kot zot ti en securité-la,’ setadir congregation chretien, zot bien regretté asterla. Enn soeur ki nou pou appel Tanya, expliké ki kan li ti tipti, li “ti ena contact avek la verité,” mais kan li ti ena 16 an, li ti quitte congregation pou “poursuive bann plaisir ki ti ena dan sa le monde-la.” Parmi bann consequence ki li ti gagné, li ti tombe enceinte sans ki li ti envie, ek li ti faire enn avortement. Zordi li dire: “Sa trois an ki mo’nn passé en dehors congregation-la finn laisse bann vilain cicatrice lor plan affectif ek sa pou resté pou touletan. Enn kitsoz ki contigne tourmente moi c’est ki mo finn touye mo zenfant ki pa ti encore né. . . . Mo envie dire tou bann jeune ki pé souhaité ‘goute’ sa le monde-la zis pou enn ti moment: ‘Pa faire sa!’ Au commencement, li kapav parette bon, mais a la fin, li laisse enn gout bien amer. Le monde pena nanyin pou offert a part malheur. Mo konn sa parski mo’nn faire l’experience. Reste dan l’organisation Jéhovah! C’est sel fason ki nou kapav heureux.”
19, 20. Ki protection nou gagné dan congregation, ek couma nou gagne sa protection-la?
19 Maziné ki pou arrive ou si ou abandonne protection ki ou ena dan congregation. Kan beaucoup chretien rappel couma zot la vie ti été avant zot ti accepté la verité, sa faire zot gagne frisson. (Jean 6:68, 69) Ou pou kapav contigne reste en securité ek gagne protection kont bann malheur ek bann probleme ki ena dan le monde Satan, si ou reste bien proche ar ou bann frere ek soeur spirituel. Kan ou frequente zot ek ou assisté reunion regulierement, sa pou contigne rappel ou ki bann principe Jéhovah zot sage ek pou encourage ou pou vive en accord avek zot. Pareil couma sa psalmiste-la, ou pou ena tou bann raison pou ‘loué Jéhovah dan grand l’assemblée.’—Ps. 35:18.
20 Bien sur, pou plusieurs raison, tou bann chretien passe par bann moment kot li parette difficile pou garde zot fidelité. Kitfois zot zis bizin ki enn kikenn dirige zot dan enn bon direction. Ki ou kapav faire—ek ki la congregation kapav faire—pou aide sa bann chretien-la dan sa bann moment-la? Dan prochain lartik, nou pou examiné couma nou kapav ‘contigne console ek fortifié’ nou bann frere.—1 Thess. 5:11.
Couma ou pou reponn?
• Ki nou aprann ar l’experience ki ecrivain Psaume 73 ti faire?
• Ki nou aprann ar l’experience ki Dina ti faire?
• Kifer ou kapav gagne securité dan congregation chretien?
[Zimage page 9]
Nage kot ou en securité; reste dan congregation!