Gagne reconfort grace a bann l’activite spirituel

“Prend mo joug lor zot . . . , ek zot pou gagne reconfort pou zot nâme.”—MAT. 11:29.

1. Ki disposition Jéhovah ti prend lor montagne Sinaï, ek kifer?

BONDIÉ ti faire enn l’alliance avek nation Israël ek ti donne zot la Loi lor montagne Sinaï. Dan sa la Loi-la, ti ena enn disposition lor Sabbat ki bann Juif ti bizin faire toulé-semaine. Par so porte-parole Moïse, Jéhovah ti donne sa l’ordre-la nation Israël: “Pendant six jour to bizin faire to travail, mais septieme jour to bizin arrete tou travail, pou ki to taureau ek to bourrik reposé ek ki garson to esclave ek sa etranger ki parmi zot-la, kapav reprend zot souffle.” (Ex. 23:12) Oui, Jéhovah ti ena consideration pou bann ki ti suive la Loi. A cause sa, Li ti faire l’arrangement pou ki ena enn jour repos, coumsa so bann serviteur ti kapav “reprend zot souffle.”

2. Ki bienfait bann Israélite ti gagné kan zot ti observe sabbat?

² Eski jour sabbat ti zis enn jour pou relax? Non, sa jour-la ti forme partie dan l’adoration ki bann Israélite ti donne Jéhovah. Kan bann Israélite ti garde sabbat, sa ti permette bann chef famille pou enseigne zot famille pou “suive sa chemin ki Jéhovah inn tracé pou zot-la, pou zot pratik la justice.” (Gen. 18:19) Sa ti donne aussi bann famille ek bann camarade l’occasion pou joinde pou zot medite lor seki Jéhovah inn faire ek pou profite enn bon compagnie. (Is. 58:13, 14) Seki pli important, jour sabbat ti annonce dan enn fason prophetik lepok kot bann dimoune ti pou gagne enn vrai reconfort enba regne mille an Christ. (Rom. 8:21) Mais ki nou kapav dire pou nou lepok? Kot-sa, ek couma bann vrai chretien, ki envie suive bann principe Jéhovah, kapav gagne reconfort?

Gagne reconfort grace a frequentation bann chretien

3. Dan ki fason bann chretien premier siecle ti soutenir sakenn so camarade, ek ki resultat sa ti ena?

³ L’apotre Paul ti decrire congregation chretien couma “enn colonne ek enn support pou la verité.” (1 Tim. 3:15) Bann chretien premier siecle ti gagne beaucoup soutien kan sakenn ti encourage ek ti fortifié so camarade dan l’amour. (Éph. 4:11, 12, 16) Kan Paul ti Éphèse, li ti bien encouragé par bann membre congregation Corinthe ki ti vinn rann li enn visite. Remarké ki l’effet sa ti ena lor li: “Mo bien content ki Stéphanas ek Fortunatus ek Achaïcus, zot la . . . parski zot ti remonte mo moral.” (1 Cor. 16:17, 18) Li pareil aussi kan Tite ti al Corinthe pou servi so bann frere la-bas. Paul ti ecrire sa congregation-la ek ti dire zot: “Zot tou zot ti remonte so moral.” (2 Cor. 7:13) Zordi aussi pareil, bann Témoins de Jéhovah gagne enn vrai reconfort kan zot frequente zot bann frere ek soeur spirituel ki fortifié zot.

4. Couma bann reunion congregation encourage nou?

⁴ Ou koné par l’experience ki bann reunion congregation faire nou gagne enn grand la joie. La-bas, ena enn ‘l’echange l’encouragement par la foi sakenn nou camarade.’ (Rom. 1:12) Nou bann frere ek soeur spirituel zot pa zis bann connaissance, bann dimoune ki nou joinde coumsa de temps en temps. Zot nou bann vrai camarade, bann dimoune ki nou content ek ki nou respecté. Nou gagne enn grand la joie ek beaucoup reconfort kan nou rassemblé ensam avek zot regulierement dan nou bann reunion.—Philém. 7.

5. Couma nou kapav encourage sakenn nou camarade pendant bann l’assemblée district ek circonscription?

⁵ Enn lot fason ki nou gagne l’encouragement c’est kan nou al bann l’assemblée district ek circonscription. Sa bann grand rassemblement-la pa zis donne nou de l’eau la verité ki faire nou gagne la vie ek ki sorti dan Parole Bondié, la Bible. Zot aussi donne nou l’occasion pou “ouvert [nou] leker bien grand” dan nou frequentation. (2 Cor. 6:12, 13) Mais ki nou pou faire si nou timide ek nou trouve sa difficile pou faire connaissance avek lezot dimoune? Enn fason pou faire connaissance avek nou bann frere ek soeur c’est kan nou porte-nou volontaire pou aidé pendant bann l’assemblée. Enn soeur ki ti aidé dan enn l’assemblée international ti dire: “A part mo famille ek deux-trois camarade, mo pa ti konn beaucoup dimoune la-bas. Mais kan mo ti’nn aidé pou nettoyé, mo ti joinde beaucoup frere ek soeur! Sa ti vrai-mem enn grand la joie!”

6. Cite enn kitsoz ki kapav fortifié nou kan nou faire enn sortie en famille.

⁶ Bann Israélite ti habitué voyagé pou al Jérusalem pou al adore Jéhovah pendant trois fête ki zot ti celebré toulé l’année. (Ex. 34:23) Souvent sa ti demann zot pou quitte zot karo, zot commerce ek voyagé pendant plusieurs jour, ek marche lor bann la route kot ti ena la poussiere. Kan mem, kan zot ti arrive dan temple ek zot ti trouvé couma bann ki ti present “ti pé loué Jéhovah,” sa ti donne zot enn “grand la joie.” (2 Chron. 30:21) Li pareil aussi zordi, beaucoup serviteur Jéhovah finn trouvé ki kan zot inn al visite Béthel avek zot famille, sa finn donne zot enn grand la joie. Eski ou kapav mette sa dan ou programme prochaine fois ki ou faire enn sortie avek ou famille?

7. (a) Ki bienfait nou gagné dan bann fête? (b) Ki nou kapav faire pou ki dan bann fête, nou passe enn bon moment ki encourage nou tou?

⁷ Kan nou faire enn ti fête avek nou famille ek nou bann camarade, sa aussi kapav encourage nou. Le roi Salomon, ki ti sage ti dire: “Pena nanyin ki pli bon pou enn zom ki li mangé, oui, ki li boire ek ki li faire ki so nâme trouve bann bon kitsoz a cause sa travail dur ki li’nn faire-la.” (Eccl. 2:24) Bann ti fête pa zis encourage nou mais sa fortifié nou l’amour pou nou bann frere a mesure ki nou aprann pou konn zot pli bien. Pou nou kapav passe enn bon moment ki encourage nou tou, li pli bon ki pena trop beaucoup dimoune dan sa bann fête-la ek ki nou bien controle zot, surtout si nou servi lalkol.

Nou ministere encourage nou

8, 9. (a) Ki difference ti ena entre message ki Jésus ti preché ek message bann scribe ek bann Pharisien? (b) Ki bienfait nou gagné kan nou partage bann verité biblik avek lezot?

⁸ Jésus ti bien zelé dan so ministere, ek li ti encourage so bann disciple pou ki zot aussi zot bien zelé. C’est seki nou trouvé kan li ti dire: “Recolte-la grand, mais bann travailleur tigit. Alors, suppliyé Maitre recolte pou Li envoye bann travailleur dan so recolte.” (Mat. 9:37, 38) L’enseignement Jésus ti bien encourageant, sa ti enn “bon nouvelle.” (Mat. 4:23; 24:14) Li ti bien different ar bann regle ki ti bien lourd, ki bann Pharisien ti oblige bann dimoune pou suive.—Lire Matthieu 23:4, 23, 24.

⁹ Kan nou partage message lor Royaume Bondié avek lezot, nou encourage zot lor plan spirituel, ek en mem temps, nou augmente nou connaissance ek nou reconnaissance pou bann verité biblik ki ena valeur. Enn psalmiste ti ena raison pou dire: “Loué Yah, parski li bon ki nou chante pou nou Bondié; parski sa faire plaisir.” (Ps. 147:1) Eski ou kapav augmente la joie ki ou gagné pou loué Jéhovah ar ou bann voisin?

10. Eski nou succès dan ministere depann lor reaction positif bann dimoune ar nou message? Expliké.

¹⁰ Li vrai ki dan certain territoire, bann dimoune plus ecoute la bonne nouvelle, ki dan lezot territoire. (Lire Actes 18:1, 5-8.) Si ou vive dan enn l’endroit kot bann dimoune pa trop interessé ar message lor Royaume Bondié, essaye pense bann bon kitsoz ki ou pé faire dan ou ministere. Rappel ki bann zeffort ki ou pé contigne faire pou annonce nom Jéhovah, zot pa dan vide. (1 Cor. 15:58) En plus, nou succès dan nou ministere pa depann lor fason ki bann dimoune reagir ar la bonne nouvelle. Nou kapav ena l’assurance ki Jéhovah pou veillé ki bann dimoune sincere pou gagne l’occasion accepté message lor Royaume Bondié.—Jean 6:44.

L’etude familial encourage nou

11. Ki responsabilité Jéhovah inn donne bann parent, ek couma zot kapav rempli sa?

¹¹ Bann parent ki ena la crainte pou Bondié ena responsabilité pou enseigne zot zenfant lor Jéhovah ek lor so bann principe. (Deut. 11:18, 19) Si ou enn parent, eski ou reserve le temps pou enseigne ou zenfant lor nou bon Papa Jéhovah? Pou aide ou pou rempli sa responsabilité bien important-la ek prend soin ou famille, Jéhovah finn donne enn quantité nourriture spirituel ki faire nou di-bien a travers bann livre, bann periodik, bann video, ek bann cassette audio.

12, 13. (a) Couma bann famille kapav gagne bann bienfait ar soirée ki zot reservé pou zot l’etude familial? (b) Couma bann parent kapav faire sur ki zot l’etude familial li enn moment encourageant?

¹² En plus, l’esclave fidele et avisé finn prend bann disposition pou ki bann famille ena enn soirée pou zot etudié en famille. C’est enn soirée ki zot reservé chaque semaine pou zot etudié la Bible en famille. Beaucoup finn trouvé ki sa disposition-la finn augmente l’amour ki zot ena entre zot ek finn fortifié zot relation avek Jéhovah. Mais couma bann parent kapav faire sur ki zot l’etude familial li enn moment ki encourage zot tou lor plan spirituel?

¹³ Fodé pa ki soirée ki’nn reservé pou l’etude familial li pa interessant ou-soit li trop serieux. Apré tou, nou adore enn “Bondié heureux,” ek Li envie ki nou joyeux kan nou adore Li. (1 Tim. 1:11; Phil. 4:4) Li enn vrai benediction ki nou ena enn soirée en plus pou koz lor bann verité ki sorti dan la Bible. Bann parent kapav servi different methode pou enseigne zot bann zenfant ek servi zot l’imagination pou rann zot l’enseignement interessant. Par exemple, enn famille ti laisse zot ti garson dix an, ki appel Brandon, presente enn sujet lor “Kifer la Bible compare Satan ar enn serpent?” Sa question-la ti bouleverse Brandon, parski li ti content bann serpent, ek li pa ti content ki associé zot ar Satan. Certain famille finn rann zot lecture la Bible pli interessant kan zot finn faire chaque membre prend role enn personnage kan li lire, ou-soit zot finn joué bann l’evenement ki zot lire, inpé pareil couma dan bann drame dan l’assemblée. Sa bann methode pou lire la Bible-la zot pa zis interessant, mais zot faire ou bann zenfant participé, coumsa bann principe la Bible kapav touche zot leker.a

Evite seki kapav mette enn poids lor ou

14, 15. (a) Kifer bann dimoune senti-zot plus stressé ek pa en securité dan lepok dernier jour? (b) Ki lezot stress kitfois nou gagné?

¹⁴ Nou pé vive dan bann dernier jour sa mauvais le monde-la, alors pli allé bann dimoune stressé ek zot pa senti-zot en securité. Plusieurs million dimoune pena travail ek bizin faire face ar bann difficulté economik. Mem bann ki ena enn travail ena l’impression ki sa l’argent ki zot gagné-la, coumadir zot pé sarié li dan enn poche ki rempli ar trou, ek zot famille pa reussi profite sa couma bizin. (Compare avek Haggaï 1:4-6.) Bann politicien ek bann lezot dirigeant nepli koné ki pou faire pendant ki zot pé lutté pou combatte terrorisme ek lezot mauvais kitsoz. Beaucoup dimoune decouragé par zot prop faiblesse.—Ps. 38:4.

¹⁵ Bann vrai chretien aussi konn bann probleme ek bann pression ki le monde Satan faire bann dimoune gagné. (1 Jean 5:19) Dan certain cas, kitfois bann disciple Christ gagne lezot stress parski ki zot pé faire zeffort pou reste fidele ar Jéhovah. Jésus ti dire: “Si bannla finn persecute moi, bannla pou persecute zot aussi.” (Jean 15:20) Selman, mem si “nou gagne persecution,” Jéhovah “pa abandonne nou.” (2 Cor. 4:9) Kifer?

16. Ki kapav aide nou pou garde nou la joie?

¹⁶ Jésus ti dire: “Vinn vers moi, zot tou ki pé rinté ek ki ena fardeau lor zot, ek moi mo pou reconforte zot.” (Mat. 11:28) Kan nou ena enn la foi total dan sacrifice Christ, c’est coumadir nou pé mette nou-mem dan la main Jéhovah. Dan sa fason-la, nou gagne “sa puissance ki plus ki seki normal-la.” (2 Cor. 4:7) “L’assistant,” setadir l’esprit saint Bondié, li fortifié nou la foi beaucoup. Sa permette nou supporte bann l’epreuve ek bann difficulté ek aussi pou garde nou la joie.—Jean 14:26; Jacq. 1:2-4.

17, 18. (a) Kont ki l’attitude nou bizin faire bien attention? (b) Ki kapav arrivé si bann plaisir sa le monde-la vinn enn priorité dan nou la vie?

¹⁷ Zordi, bann vrai chretien bizin reste lor zot garde pou pa laisse-zot influencé par tendance ki bann dimoune dan le monde ena pou rod plaisir avant tou kitsoz. (Lire Éphésiens 2:2-5.) Sinon, nou kapav tombe dan piege ‘desir la chair, desir lizié, tendance pou faire l’etalage ar seki nou moyen permette nou ena.’ (1 Jean 2:16) Ou-soit, kitfois nou kapav ena enn fausse pensée ek croire ki si nou cedé ar bann desir la chair, nou pou senti-nou pli bien. (Rom. 8:6) Par exemple, certain dimoune finn commence prend la drogue ek boire beaucoup lalkol, finn guette pornographie, finn faire bann sport dangereux, ou-soit finn faire different qualité mauvais kitsoz pou gagne bann grand sensation. L’objectif bann “manigance” ki Satan servi c’est pou embete bann dimoune ek faire zot senti-zot bien alors ki en realité li pa vrai.—Éph. 6:11.

¹⁸ Li vrai ki pena nanyin mauvais dan mangé, boire ek ena bann bon divertissement kan nou faire sa dan enn fason raisonnable. Selman, fodé pa nou laisse sa bann kitsoz-la vinn nou priorité dan la vie. Alors, li bien important ki nou garde nou l’equilibre ek nou controle nou-mem, surtout kan nou considere lepok ki nou pé vive. Bann l’objectif personnel kapav mette enn poids lor nou ziska ki nou vinn “inactif ou-soit pa produire okenn fruit en rapport avek connaissance exact lor nou Seigneur Jésus Christ.”—2 Pierre 1:8.

19, 20. Couma nou kapav gagne vrai l’encouragement?

¹⁹ Kan nou agir en accord avek bann principe Jéhovah, nou reconette ki n’importe ki plaisir ki sa le monde-la offert, zot temporaire. Moïse ti konn sa, ek nou aussi pareil. (Héb. 11:25) En realité, seki vrai-mem encourage nou, seki faire nou gagne enn la joie profond ki pou dure pou touletan, ek seki donne nou enn vrai satisfaction, c’est kan nou faire volonté nou Papa ki dan le ciel.—Mat. 5:6.

²⁰ Anou contigne gagne reconfort grace a bann kitsoz spirituel. Kan nou faire sa, nou pé “rejette seki Bondié pa content ek bann desir sa le monde-la . . . pendant ki nou pé attann sa l’esperance ki donne beaucoup la joie-la ek manifestation nou grand Bondié ek nou Sauveur, Christ Jésus, manifestation ki rempli ar la gloire.” (Tite 2:12, 13) Alors, anou bien decidé pou reste enba joug Jésus kan nou soumette ar so l’autorité ek so direction. Lerla, nou pou gagne enn vrai l’encouragement ek nou pou vrai-mem heureux!

[Note]

Couma ou pou reponn?

• Couma bann serviteur Jéhovah gagne l’encouragement zordi?

• Dan ki fason nou ministere encourage nou ek encourage bann dimoune ki ecoute nou?

• Ki bann chef famille kapav faire pou zot sur ki zot l’etude la en famille fortifié zot famille?

• Lor plan spirituel, ki bann kitsoz ki mette enn poids lor nou?