Zot nepli peur la fin

VERS la fin bann l’année 1970, Gary ek Karen ti gagne conviction ki la fin le monde ti pré. A cause sa zot ti quitte la ville pou al reste dan la campagne ek zot ti decide pou produire par zot-mem tou seki zot ti bizin. Zot ti envie survive.

Pou zot reussi faire sa bann kitsoz-la, zot ti acheté bann livre, suive bann cour ek assisté bann causerie, ek zot ti koz ar maximum dimoune pou gagne bann conseil. Zot ti plante enn jardin legume ek 50 tipti pié fruit. Zot ti faire enn grand stock la grain ek zouti. Zot ti aprann produire ek conserve mangé. Enn camarade ti montré zot couma touye enn zanimo, coupe li ek conserve so la viande. Karen ti aprann pou identifié bann plante ek bann racine dan la foret ki zot kapav mangé si zot stock mangé fini. Gary ti aprann faire de l’huile moteur ar maïs, construire enn four en metal ki servi di-bois, ek construire enn lakaz ki pa ti depann lor bann facilité sa le monde-la.

Karen dire: “A cause bann condition difficile dan le monde sa lepok-la, mo ti pensé ki bientot civilisation ti pou al fini.” Gary expliké: “Pareil couma bann lezot jeune, mo ti pé lutté pou ki dimoune arrete faire distinction entre race, arrete la guerre Vietnam, ek corruption. Mais bien vite mo bann l’espoir inn tombe dan de l’eau. Mo ti ena l’impression ki l’humanité ti pé prend enn chemin kot li ti pé al detruire li-mem.”

Gary dire: “Enn soir, couma mo ti ena inpé le temps libre, mo’nn prend enn la bible ek mo’nn lire a partir Matthieu ziska Révélation. Pendant quatre la nuit ki’nn suive, mo’nn ré-lire li encore. Lendemain gramatin, mo’nn dire Karen: ‘Nou pé vive dan bann dernier jour. Bientot Bondié pou agir, Li pou nettoye la terre. Nou bizin trouve bann ki pou survive.’ ” Gary ek Karen inn commence al dan enn religion apré lot pou rod bann dimoune ki ti pou content prepare zot pou la fin.

Enn tipé apré, enn Témoin de Jéhovah ti vinn tape zot la porte, ek enn l’etude la Bible ti commencé. Karen rappel: “Mo ti extra content, parski [li] ti vrai-mem explik moi bann l’Ecriture. La verité concernant la fin, sa-mem ki mo ti pé rodé, ek finalement mo’nn reussi trouve li. Enn vrai l’espoir pou l’avenir vrai-mem ti existé. Mais seki ti pli important, c’est ki mo ti’nn commence crée enn l’amitié avek mo Papa ki dan le ciel, Createur ek Bondié l’univers.”

Gary dire: “Mo la vie ti vrai-mem ena enn sens. Enn fois ki mo’nn commence etudié la Bible, mo pa ti kapav arreté. Mo ti lire bann prophetie la Bible, mo ti examine bann preuve ki montré ki sa ti pé realisé, ek mo ti gagne conviction ki Bondié pou agir bientot. Mo ti pensé ki ‘bann dimoune bizin prepare-zot, pa pou enn malheur, mais pou la vie ki Bondié envie pou zot.’ ” Gary ek Karen ti commence ena enn l’attitude positif lor l’avenir. Au lieu ki zot ti tracasse-zot concernant la fin le monde, zot ti gagne l’assurance ki Bondié pou retire bann probleme ki pé affecté l’humanité ek ki Li pou transforme la terre en enn paradis.

Plus ki 25 an inn passé, ki Gary ek Karen pé faire asterla? Karen dire: “Mo contigne fortifié mo l’amour pou Bondié Jéhovah ek mo la foi en Li, ek mo essaye aide lezot pou faire pareil. Gary ek moi nou soutenir nou camarade ek nou faire tou pou ki nou famille reste fort ek reste uni dan nou l’adoration pou Bondié. Nou essaye touletan reste bien organisé, ek nou faire tou pou garde nou la vie simple, pou ki nou kapav consacré-nou pou lezot ek zot bann besoin.”

Gary ajouté: “Souvent mo prié ki Royaume Bondié vini ek amenn enn soulagement pou bann million dimoune. Chaque fois ki mo partage la bonne nouvelle lor Royaume Bondié avek lezot, mo prié pou ki mo reussi donne au moins enn dimoune l’espoir ki sorti dan la Bible. Pendant plus ki 25 an, Jéhovah inn reponn sa la priere-la avek bonté. Karen ek moi ena confiance ki bientot Jéhovah pou amenn bann grand changement lor la terre, mais nou nepli peur la fin.”—Matthieu 6:9, 10; 2 Pierre 3:11, 12.

[Zimage page 9]

Azordi Gary ek Karen content pou faire lezot konn l’espoir ki la Bible donné