Couma Jésus inn glorifié la justice Bondié

“Bondié finn presente [Christ] couma enn sacrifice ki couvert peché grace a la foi dan so di-sang. Bondié finn faire sa pou montré so prop justice.”—ROM. 3:25.

1, 2. (a) Ki la Bible enseigné lor situation bann dimoune? (b) Ki bann question nou pou examiné dan sa lartik-la?

BEAUCOUP dimoune konn recit ki la Bible mentionné lor rebellion ki ti ena dan jardin Éden. Nou tou nou ressenti l’effet bann consequence peché Adam, couma sa verset-la expliké: “Par enn sel zom, peché finn rente dan le monde ek peché finn amenn la mort, ek coumsa tou dimoune passe par la mort parski zot tou ti’nn faire peché.” (Rom. 5:12) N’importe ki quantité zeffort nou faire pou faire seki droite, nou commette bann erreur, ek pou sa nou bizin pardon Bondié. Mem l’apotre Paul ti dire avek beaucoup la peine: “Bon kitsoz ki mo envie faire, mo pa faire, mais mauvais kitsoz ki mo pa envie faire, sa-mem ki mo faire. Mo enn dimoune desesperé!”—Rom. 7:19, 24.

² Parski nou tou nou faire peché, sa amenn nou pou pose sa bann question important-la: Couma Jésus, ki ti sorti Nazareth, ti kapav né sans peché ki nou tou finn herité, ek kifer li ti prend bapteme? Couma la vie ki Jésus inn amené, glorifié la justice Jéhovah?

Satan inn mette en doute la justice Bondié

3. Couma Satan ti embete Ève?

³ Nou bann premier parent, Adam ek Ève, ti agir dan enn fason bete kan zot ti rejette souveraineté Bondié ek ti choisir domination “sa serpent originel-la, ki appel Diable ek Satan.” (Rév. 12:9) Anou guetté couma sa ti arrivé. Satan ti mette en doute ki Jéhovah dirige avek la justice. Li ti faire sa kan li ti demann Ève: “Eski vrai-mem Bondié finn dire ki fodé pa zot mange bann fruit lor tou bann pié dan jardin?” Ève ti repete l’ordre bien clair ki Bondié ti donne zot: c’est enn sel pié ki fodé pa zot touché, sinon zot pou mort. Lerla, Satan ti accuse Bondié ek ti faire croire ki Li enn menteur. Satan ti dire: “Non, zot pa pou mort zot.” Li ti embete Ève ek ti faire li croire ki Bondié ti pé prive li ar enn kitsoz ki bon ek ki si li mange sa fruit-la, li pou vinn pareil couma Bondié, li pou libre pou decide seki bon ek seki mauvais.—Gen. 3:1-5.

4. Couma tou dimoune ti’nn vinn enba domination Satan, ki opposé ar Bondié?

⁴ En realité, Satan ti pretann ki bann dimoune ti pou pli heureux si zot ti independant ar Bondié. Au lieu ki Adam ti soutenir domination Bondié, enn domination ki juste, li ti ecoute so femme ek li aussi li ti mange fruit ki Bondié ti defann zot mangé. C’est coumsa ki Adam ti perdi so position en tant ki enn zom parfait ki ti ena faveur Jéhovah. Lerla li ti’nn mette peché ek la mort couma enn fardeau bien lourd lor nou. En mem temps, tou dimoune inn vinn enba domination Satan, “bondié sa le monde-la,” enn domination ki opposé ar Bondié.—2 Cor. 4:4, Bible de Jérusalem; Rom. 7:14.

5. (a) Couma Jéhovah ti montré ki Li tini so parole? (b) Ki l’espoir Bondié ti donne bann descendant Adam ek Ève?

⁵ Exactement pareil couma Li ti dire, Jéhovah ti condamne Adam ek Ève a mort. (Gen. 3:16-19) Mais sa pa vedir ki projet Bondié ti’nn tombe dan de l’eau. Jamais! Kan Li ti condamne Adam ek Ève, Jéhovah ti donne bann descendant ki zot ti pou gagné, enn raison pou zot garde l’espoir. Li ti faire sa kan Li ti annonce so projet pou produire enn “descendance” ki Satan ti pou blessé dan so talon. Selman, sa descendance ki Bondié ti’nn promette-la, ti pou gueri ar sa blessure-la ek li ti pou ‘crase la tête Satan.’ (Gen. 3:15) La Bible donne plus detail lor sa sujet-la kan li dire concernant Jésus Christ: “C’est pou sa raison-la ki Garson Bondié finn manifesté, pou detruire travail ki Diable finn faire.” (1 Jean 3:8) Mais couma conduite Jésus ek so la mort finn glorifié la justice Bondié?

Signification bapteme Jésus

6. Couma nou koné ki Jésus pa ti herite peché Adam?

⁶ Kan Jésus ti enn adulte, li ti bizin corresponn exactement ar Adam kan li ti parfait. (Rom. 5:14; 1 Cor. 15:45) Sa vedir ki Jésus ti bizin né parfait. Couma sa ti possible? Ange Gabriel ti donne sa explication bien clair-la ar Marie, mama Jésus: “L’esprit saint pou vinn lor toi, ek puissance sa Kikenn ki Pli Grand-la pou couvert toi avek so l’ombrage. C’est a cause sa aussi, ki pou appel sa kikenn ki pou né-la saint, Garson Bondié.” (Luc 1:35) Surement kan Jésus ti tipti, Marie ti dire li certain kitsoz lor so naissance. C’est a cause sa ki enn fois, kan Marie ek Joseph, papa adoptif Jésus, ti trouve li dan temple Bondié, Jésus, ki ti jeune, ti demann zot: “Eski zot pa koné ki mo bizin dan lakaz mo Papa?” (Luc 2:49) Pena doute ki depuis ki li ti jeune, Jésus ti koné ki li ti Garson Bondié. Alors, pou Jésus, glorifié la justice Bondié ti enn kitsoz bien important.

7. Ki bann kitsoz ki ena valeur, Jésus ti ena?

⁷ Jésus ti montré ki li ti bien interessé ar bann kitsoz spirituel kan li ti assisté regulierement bann reunion kot ti adore Jéhovah. Li ti ena enn l’esprit parfait, alors li ti kapav aprann ek comprend tou seki li ti tendé ek seki li ti lire dan bann l’Écriture hébraïques. (Luc 4:16) Li ti ena aussi enn lot kitsoz ki ena beaucoup valeur—enn lekor humain parfait ki li ti pou kapav donne en sacrifice en faveur bann dimoune. Kan li ti prend bapteme, Jésus ti prié ek kitfois li ti pé pense bann parole prophetik ki trouve dan Psaume 40:6-8.—Luc 3:21; lire Hébreux 10:5-10.a

8. Kifer Jean Baptiste pa ti oulé ki Jésus prend bapteme?

⁸ Au commencement, Jean Baptiste pa ti oulé ki Jésus prend bapteme. Kifer? Parski bann Juif ti faire Jean baptise zot pou montré ki zot ti repenti ar zot peché kont la Loi. Jean ti enn famille bien proche ar Jésus, alors surement li ti koné ki Jésus pa ti ena peché ek pa ti bizin repenti. Mais Jésus ti donne Jean l’assurance ki c’est bon ki Li prend bapteme. Jésus ti explik li: “Coumsa-mem ki nou bizin faire tou seki juste.”—Mat. 3:15.

9. Ki bapteme Jésus ti representé?

⁹ Jésus ti parfait, alors li ti kapav tire conclusion ki, pareil couma Adam, li ti ena possibilité pou vinn papa enn descendance parfait. Mais jamais Jésus pa ti envie gagne enn l’avenir coumsa, parski sa pa ti volonté ki Jéhovah ti ena pou li. Bondié ti envoye Jésus lor la terre pou vinn sa Descendance ki Li ti promette-la, setadir le Messie. Sa ti implik ki Jésus sacrifié so la vie humain parfait. (Lire Isaïe 53:5, 6, 12.) Bien sur, bapteme Jésus pa ti ena mem signification ki nou bapteme. Li pa ti bizin voué-li ar Jéhovah, parski li ti deja forme partie dan nation Israël ki ti voué ar Bondié. Mais, kan Jésus ti prend bapteme li ti montré ki li ti pé presente li-mem ar Bondié pou faire So volonté pareil couma sa ti annoncé dan bann l’Ecriture pou le Messie.

10. Ki volonté Bondié ti impliké pou le Messie, ek ki Jésus ti pensé lor la?

¹⁰ Jéhovah ti attann ki Jésus preche la bonne nouvelle lor So Royaume, faire bann disciple, ek prepare zot pou ki apré, zot aussi zot faire bann lezot disciple. Kan Jésus ti presente li-mem ar Bondié, sa ti implik aussi ki li ti disposé pou endure bann persecution ek enn la mort cruel pou soutenir domination Bondié, enn domination ki juste. Jésus ti vrai-mem bien content so Papa ki dan le ciel, alors li ti content pou faire So volonté ek li ti ena enn grand satisfaction pou donne so lekor en sacrifice. (Jean 14:31) Sa ti faire li plaisir aussi pou koné ki li ti pou kapav offert Bondié valeur so la vie parfait couma enn ranson pou delivré nou ar l’esclavage peché ek la mort. Eski Bondié ti accepté ki Jésus presente li-mem pou prend sa bann grand responsabilité-la? Oui, Li ti accepté!

11. Couma Jéhovah ti montré ki Li ti accepté Jésus en tant ki Messie, setadir Christ?

¹¹ Toulé-quatre ecrivain bann l’Evangile ti confirmé ki Jéhovah ti dire dan enn fason clair ki Li ti accepté Jésus kan li ti sorti dan de l’eau apré so bapteme dan la riviere Jourdain. Jean Baptiste ti rann sa temoignage-la: “Mo ti trouve l’esprit sorti dan le ciel ek desann couma enn colombe, ek li ti reste lor [Jésus] . . . Ek mo finn trouve sa, ek mo finn temoigné ki c’est li-mem Garson Bondié.” (Jean 1:32-34) En plus, dan sa l’occasion-la, Jéhovah ti dire: “Li-mem mo Garson ki mo bien content ek ki mo finn approuvé.”—Mat. 3:17; Marc 1:11; Luc 3:22.

Fidele ziska la mort

12. Ki Jésus ti faire pendant trois an et demi apré so bapteme?

¹² Apré so bapteme, pendant trois an et demi, Jésus ti donne-li a fond pou enseigne bann dimoune lor so Papa ek pou prouvé ki domination Bondié li juste. Li ti marché partout a travers la Terre Promise ek parfois li ti bien fatigué, mais nanyin pa ti kapav empeche li pou rann enn temoignage a fond lor la verité. (Jean 4:6, 34; 18:37) Jésus ti enseigne lezot lor Royaume Bondié. Kan li ti faire bann mirak pou gueri bann dimoune malade, pou nourri bann la foule ki ti pé faim, ek mem kan li ti leve bann mort, li ti montré seki Royaume Bondié pou faire pou bann dimoune.—Mat. 11:4, 5.

13. Ki Jésus ti enseigné concernant la priere?

¹³ Au lieu ki Jésus ti rod gagne l’honneur pou so l’enseignement ek so bann mirak, li ti donne nou enn bon l’exemple: avek humilité, li ti donne tou l’honneur Jéhovah. (Jean 5:19; 11:41-44) Jésus ti aussi faire nou koné pou ki kitsoz ki pli important nou bizin prié. Dan nou la priere, nou bizin demandé ki nom Bondié, Jéhovah, “consideré couma saint,” ki domination Bondié remplace mauvais domination Satan pou ki So “volonté faire lor la terre, pareil couma dan le ciel.” (Mat. 6:9, 10; note.) Jésus ti aussi encourage nou pou agir en accord avek nou la priere kan ‘avant tou kitsoz nou rod le royaume ek justice Bondié.’—Mat. 6:33.

14. Mem si Jésus ti parfait, kifer sa ti demann li enn grand zeffort pou rempli so role dan projet Bondié?

¹⁴ A mesure ki ler so la mort ti pé kosté, Jésus ti prend plus conscience ki li ti ena enn grand responsabilité lor so zepaule. Projet ek reputation so Papa ti depann lor enn kitsoz: si li ti pou accepté pou endure enn l’epreuve injuste ek enn la mort cruel. Cinq jour avant so la mort, Jésus ti faire sa la priere-la: “Asterla mo nâme bouleversé, ek ki mo pou dire? Papa, sauve moi ar sa ler-la. Selman, c’est pou sa ki mo finn vinn dan sa ler-la.” Apré ki Jésus ti exprime sa bann sentiment ki naturel pou enn humain-la, li ti nepli pense li-mem, li ti concentré lor seki ti ena plus l’importance ek li ti faire sa la priere-la: “Papa, glorifié to nom.” Desuite Jéhovah ti reponn li: “Mo finn glorifié li, ek mo pou glorifié li encore.” (Jean 12:27, 28) Oui, Jésus ti disposé pou passe par pli grand l’epreuve ki ti ena ek ki ti pou testé so l’integrité. Jamais okenn dimoune pa finn bizin passe par sa qualité l’epreuve-la. Mais nou kapav sur ki, kan li ti tann so Papa dire sa bann parole-la, sa ti donne Jésus enn grand confiance ki li ti pou reussi glorifié ek justifié souveraineté Jéhovah. Ek vrai-mem li ti reussi faire sa!

Seki la mort Jésus finn accompli

15. Juste avant li mort, kifer Jésus ti dire: “Sa finn accompli”?

¹⁵ Alors ki Jésus ti lor enn poteau souffrance ek pré pou rann so dernier souffle, li ti dire: “Sa finn accompli!” (Jean 19:30) Avek l’aide Bondié, Jésus ti reussi accompli bann kitsoz extraordinaire pendant trois an et demi, depuis so bapteme ziska so la mort! Kan Jésus ti mort, ti ena enn grand tremblement de terre, ek sa ti pousse sa officier romain ki ti en charge so la mort-la, pou dire: “Vrai-mem, sa zom-la ti Garson Bondié.” (Mat. 27:54) Surement sa officier-la ti trouve bann dimoune bouffonne Jésus parski li ti dire ki li Garson Bondié. Malgré tou bann souffrance par ki li’nn passé, Jésus ti garde so l’integrité ek ti prouvé ki Satan enn grand menteur. Concernant tou seki soutenir domination Bondié, Satan ti lance sa defi-la: “Enn dimoune pou donne tou seki li ena pou sauve so la vie.” (Job 2:4, Bible du Rabbinat français) Par so fidelité, Jésus ti montré ki Adam ek Ève ti kapav reste fidele devant sa l’epreuve beaucoup pli facile ki zot ti gagné-la. Mais seki ti pli important, la vie ek la mort Jésus ti soutenir ek ti glorifié domination Bondié, enn domination ki juste. (Lire Proverbes 27:11.) Eski la mort Jésus ti accompli enn lot kitsoz encore? Oui!

16, 17. (a) Kifer li ti possible ki Bondié considere so bann temoin ki ti vive avant lepok Jésus, couma bann dimoune juste? (b) Couma Jéhovah ti recompense fidelité so Garson, ek ki nou Seigneur Jésus Christ pé contigne faire?

¹⁶ Beaucoup serviteur Jéhovah ti vive avant ki Jésus vinn lor la terre. Jéhovah ti considere zot couma bann dimoune juste, ek zot ti ena l’esperance resurrection. (Is. 25:8; Dan. 12:13) Mais lor ki base legal eski Jéhovah, ki enn Bondié saint, ti kapav beni bann dimoune imparfait dan sa fason-la? La Bible explik nou: “Bondié finn presente [Jésus Christ] couma enn sacrifice ki couvert peché grace a la foi dan so di-sang. Bondié finn faire sa pou montré so prop justice parski Li ti pé pardonne peché ki bann dimoune ti’nn faire dan le passé pendant ki Bondié ti pé montré so patience; pou montré so prop justice dan nou lepok, pou ki Li kapav juste mem kan Li considere couma juste, enn dimoune ki ena la foi en Jésus.”—Rom. 3:25, 26.b

¹⁷ Jéhovah ti recompense Jésus kan Li ti ressuscite li ek ti donne li enn pli grand position ki seki li ti ena avant li vinn lor la terre. Asterla, Jésus ena l’immortalité en tant ki enn creature spirituel ki ena enn grand la gloire. (Héb. 1:3) En tant ki Grand Pretre ek le Roi, nou Seigneur Jésus Christ pé contigne aide so bann disciple pou glorifié la justice Bondié. Nou vrai-mem bien reconnaissant ki nou Papa ki dan le ciel, Jéhovah, Li-mem ki recompense tou seki pé faire sa ek ki pé servi Li fidelement pareil couma so Garson!—Lire Psaume 34:3; Hébreux 11:6.

18. Ki nou pou examiné dan prochain lartik l’etude?

¹⁸ Bann dimoune fidele depuis lepok Abel ti ena bann relation bien proche avek Jéhovah parski zot ti ena la foi ek zot ti sur ki Descendance ki Bondié ti promette ti pou vini ek ti pou accompli seki ti annoncé. Jéhovah ti koné ki so Garson ti pou reste fidele ek ki so la mort ti pou enn sacrifice parfait pou couvert “peché le monde.” (Jean 1:29) Bann dimoune dan nou lepok, zot aussi zot gagne bann bienfait ar la mort Jésus. (Rom. 3:26) Alors, ki bann bienfait ou, ou kapav gagné grace a la ranson ki Christ inn offert? Nou pou examine sa dan prochain lartik l’etude.

[Notes]

Couma ou pou reponn?

• Couma Satan inn mette en doute la justice Bondié?

• Ki bapteme Jésus representé?

• Ki la mort Jésus inn accompli?

[Zimage page 15]

Eski ou koné ki bapteme Jésus ti representé?