Vinn proche ar Bondié

2 ROIS 18:1-7

BANN parent supposé donne enn bon l’exemple zot bann zenfant. Kan bann parent ena enn bon l’influence lor zot zenfant sa kapav aide zenfant-la pou developpe bann bon qualité. Sa kapav aide li aussi pou prend bann bon decision dan so la vie. Malheureusement, beaucoup parent laisse enn mauvais l’exemple zot bann zenfant. Eski sa vedir ki sa bann zenfant-la zot condamné pou suive mauvais l’exemple zot parent? Nou trouve reponse sa question-la dan enn verité ki bien rassure nou: Jéhovah finn honore nou kan Li finn donne sakenn parmi nou enn don, setadir liberté pou choisir. Anou examine l’exemple Hizqiya ki trouve dan 2 Rois 18:1-7.

Hizqiya ti “garson Ahaz le roi Juda.” (Verset 1) Ahaz ti faire so bann sujet eloigne-zot ar l’adoration Jéhovah ki pur. Sa mauvais le roi-la ti pratik l’adoration Baal, avek tou so bann ceremonie kot ti sacrifié bann dimoune. Li ti faire touye enn ou-soit plusieurs frere Hizqiya. Ahaz ti faire ferme bann la porte temple ek “li ti faire bann l’autel pou li-mem dan tou bann coin dan Jérusalem.” Li “ti offense Jéhovah.” (2 Chroniques 28:3, 24, 25) Li clair ki Hizqiya ti ena enn mauvais papa. Mais eski Hizqiya ti condamné pou repete bann mem erreur ki so papa ti faire?

Apré ki Hizqiya ti vinn le roi, bien vite li ti montré ki li pa ti pou laisse mauvais l’exemple so papa ena enn l’influence lor qualité dimoune ki li ti pou vini. Hizqiya “ti contigne faire seki droite devant lizié Jéhovah.” (Verset 3) Li ti mette so confiance en Jéhovah, ek “pa ti ena personne couma li parmi tou bann le roi dan Juda.” (Verset 5) Dan premier l’année so regne, sa jeune le roi-la ti faire enn campagne pou retabli vrai l’adoration ek sa finn amenn li pou tire bann place dan hauteur kot ti pé adore bann zidole païen. Temple ti ré-ouvert, ek l’adoration ki pur ti retabli. (Verset 4; 2 Chroniques 29:1-3, 27-31) Hizqiya “ti reste attaché ar Jéhovah . . . , ek Jéhovah ti avek li.”—Verset 6, 7.

Ki ti aide Hizqiya pou pa laisse mauvais l’exemple so papa influence li? Nou pena beaucoup l’information lor Abiya, mama Hizqiya. Eski li possible ki li ti ena enn bon l’influence lor Hizqiya? Eski bon l’exemple Isaïe, ki ti commence so service en tant ki prophete avant ki Hizqiya ti né, ti ena enn l’influence lor sa jeune prince-la?a La Bible pa dire nanyin lor la. En tou cas, seki nou sur c’est ki Hizqiya ti choisir pou suive enn chemin ki completement different ar chemin ki so papa ti prend.

L’exemple Hizqiya bien encourageant pou n’importe kisannla ki finn konn enn l’enfance difficile a cause mauvais l’exemple zot parent. Nou pa kapav change le passé, ni nou kapav efface bann l’experience difficile ki nou finn koné dan le passé. Mais sa pa vedir ki a cause sa bann mauvais l’experience-la nou finn condamné pou suive mauvais l’exemple nou bann parent. Bann choix ki nou faire asterla kapav amenn nou vers enn l’avenir heureux. Pareil couma Hizqiya, nou kapav choisir pou content ek pou adore sel vrai Bondié, Jéhovah. Si nou faire sa nou pou ena enn la vie ki donne nou satisfaction asterla-mem ek sa kapav amenn nou vers la vie eternel dan le monde nouveau ki Bondié inn promette. (2 Pierre 3:13; Révélation 21:3, 4) Nou bizin bien reconnaissant envers Bondié ki bien content nou ek ki’nn donne sakenn parmi nou enn don ki ena beaucoup valeur—liberté pou choisir!

[Note]