Question bann lecteur . . .

▪ “Si Adam ek Ève ti ena deux garson, Caïn ek Abel, kot sa madame Caïn ti sorti?” Mem si souvent bann dimoune ki ena doute lor la Bible pose sa question piege-la, la Bible donne assez renseignement pou nou gagne enn bon reponse.

Genèse chapitre 3 ek 4 donne nou sa bann renseignement-la: (1) Ève ti “mama tou dimoune vivant.” (2) Le temps ti’nn passé entre naissance Caïn ek lepok kot li ti offert enn sacrifice ki Bondié ti rejeté. (3) Apré ki li ti condamné pou quitte l’endroit pou vinn “enn kikenn ki trainé ek ki touletan bizin sauvé lor la terre,” Caïn ti tracassé pangar ‘n’importe kisannla ki trouve li’ kapav essaye touye li. (4) Bondié ti etabli enn signe pou protege Caïn, sa montré ki soit so bann frere ek soeur, soit lezot membre so famille ti kapav essaye touye li. (5) “Apré sa,” Caïn ti gagne relation avek so madame dan “pays bann Fugitif.”—Genèse 3:20; 4:3, 12, 14-17.

Dapré seki nou finn trouvé la-haut, nou kapav tire conclusion ki madame Caïn ti enn descendant Ève ki ti né enn date ki nou pa koné. Genèse 5:4 confirmé ki pendant sa 930 an ki li ti vive, Adam “ti vinn papa bann garson ek bann tifi.” Bien sur, la Bible pa precisé ki madame Caïn ti tifi Ève. En realité, parski mentionne so madame apré ki Caïn ti condamné pou quitte l’endroit, sa montré ki assez le temps ti’nn passé pou ki madame Caïn ti kapav mem enn ti-zenfant Adam ek Ève. A cause sa, The Amplified Old Testament decrire madame Caïn zis couma “enn parmi bann descendant Adam.”

Adam Clarke, enn kikenn ki’nn faire bann commentaire lor la Bible dan 19^eme siecle, ti faire enn supposition: si Bondié ti etabli enn signe a cause Caïn ti peur, c’est parski plusieurs generation bann descendant Adam ti deja existé—zot ti assez “pou fonde plusieurs village.”

Zordi, certain societé pa kapav accepté ki Caïn ti marié ar enn so soeur ou-soit ar enn lot madame dan descendant Adam, ki ti né bien apré kan so bann garson ou-soit so bann tifi ti marié. En general, zot ena sa l’attitude-la parski zot considere sa couma enn kitsoz ki pa gagne droit faire ou-soit pangar gagne bann maladie genetik. Selman, F. LaGard Smith faire sa commentaire-la dan The Narrated Bible in Chronological Order: “Li bien possible ki sa bann premier frere ek soeur-la ti marié entre zot, mem si bann generation apré ti pou considere sa bann mariage-la couma enn kitsoz ki pa faire.” Ek aussi, li bon nou remarké ki c’est selman kan Bondié ti donne Moïse la loi pou nation Israël en 1513 avant nou lepok, ki ti interdit dan enn fason precis bann relation sexuel entre bann membre enn famille proche coumsa.—Lévitique 18:9, 17, 24.

Zordi, plusieurs millier l’année separe nou ar perfection ki nou bann premier parent ti ena. L’effet ki bann gene ek seki nou herité ena lor nou kitfois pa ti affecté zot. En plus, bann l’etude ki’nn fek faire, couma par exemple seki’nn publié dan Journal of Genetic Counseling, montré ki bann prop cousin ek cousine ki marié entre zot ena moins risk pou gagne bann zenfant ki né avek bann malformation, couma bann dimoune pensé en general. Nou kapav pensé ki bann kitsoz coumsa pa ti vrai-mem enn probleme dan lepok Adam ou-soit mem dan lepok Noé. Alors, nou kapav tire conclusion ki madame Caïn ti enn parmi so bann famille.