La priere

EN SEKI concerne la priere, beaucoup tradition religieux mette l’accent lor bann l’aspect physik couma par exemple position ki nou prend, seki nou dire, ek bann rite ki nou faire. Selman, la Bible aide nou pou mette sa bann kitsoz-la enn coté ek pou fixé nou l’esprit lor bann l’aspect ki pli important lor sa sujet-la: “Couma nou bizin prié?”

La Bible decrire bann serviteur fidele Bondié ki ti prié dan beaucoup l’endroit ek different position. Zot ti prié en silence ou-soit fort dapré bann situation ki ti ena. Kan zot ti prié, zot ti guette le ciel ou-soit zot ti prosterné. Au lieu ki zot ti servi bann zimage, bann chapelet, ou-soit bann livre la priere pou aide zot, zot ti zis prié dan zot leker, dan zot prop mot. Kifer zot la priere ti efficace?

Pareil couma nou ti trouvé dan lartik avant, zot ti prié zis enn sel Bondié—Jéhovah. Ena enn lot kitsoz important. Dan 1 Jean 5:14, nou lire: “Sa c’est confiance ki nou ena envers Li, ki, n’importe ki kitsoz nou demandé en accord avek so volonté, Li ecoute nou.” Nou bann la priere bizin en accord avek volonté Bondié. Ki sa vedir?

Pou prié en accord avek volonté Bondié, nou bizin koné ki été so volonté. Alors, etudié la Bible c’est enn kitsoz bien important en seki concerne la priere. Eski sa vedir ki Bondié pou refuse ecoute nou si nou pa finn faire bann grand l’etude lor la Bible? Non, mais Bondié attann ki nou aprann pou konn so volonté, ki nou rod comprend ek ki nou agir en accord avek sa volonté-la. (Matthieu 7:21-23) Nou bizin prié en accord avek seki nou aprann.

A mesure ki nou aprann lor Jéhovah ek lor so volonté, nou la foi grandi—sa c’est enn lot kitsoz bien important en seki concerne la priere. Jésus ti dire: “Tou seki zot demandé dan la priere, zot pou gagné si zot ena la foi.” (Matthieu 21:22) La foi pa vedir croire tou kitsoz. Au contraire, la foi vedir croire dan enn kitsoz ki mem si nou pa trouve li, ena bann preuve solide ki montré ki li existé. (Hébreux 11:1) Dan la Bible ena beaucoup preuve ki Jéhovah, ki nou pa kapav trouvé, Li réel, nou kapav compte lor Li ek Li disposé pou reponn la priere bann dimoune ki ena la foi en Li. En plus, nou kapav toujours demann Li plus la foi, ek Jéhovah content pou donne nou seki nou bizin.—Luc 17:5; Jacques 1:17.

Selman ena enn lot kitsoz bien important concernant fason ki nou bizin prié. Jésus ti dire: “Personne pa kapav vinn vers le Père sans passe par moi.” (Jean 14:6) Alors, Jésus c’est moyen ki permette nou pou approche le Père, Jéhovah. A cause sa, Jésus ti dire so bann disciple prié en so nom. (Jean 14:13; 15:16) Sa pa vedir ki nou bizin prié Jésus. Au contraire, nou prié au nom Jésus, nou rappel ki Jésus c’est moyen ki permette nou pou approche nou Papa ki parfait ek ki saint.

Enn fois bann pli proche disciple Jésus ti demann li: “Seigneur, montré nou couma nou bizin prié.” (Luc 11:1) Li clair ki zot pa ti pé demann li bann kitsoz de base couma nou finn fek examiné. Zot ti vrai-mem envie koné ki zot ti bizin dire kan zot prié—coumadir zot ti pé demandé: ‘Concernant ki kitsoz nou bizin prié?’

[L’encadré page 6]

Bann la priere efficace zot en accord avek volonté Bondié, zot bizin faire avek la foi ek au nom Jésus