La priere

PARMI tou bann la priere chretien, c’est la priere ki bann dimoune plus recité partout. Ki li vrai ou-soit non, la priere modele Jésus—ki parfois bann dimoune appel Notre Père—sans okenn doute, c’est la priere ki beaucoup dimoune pa comprend. Plusieurs million dimoune repete li par coeur toulé-jour, kitfois-mem plusieurs fois pendant la journée. Mais, sa pa ti dan l’intention Jésus pou ki bann dimoune servi sa la priere-la coumsa. Couma nou konn sa?

Zis avant ki li ti prononce sa la priere-la, Jésus ti dire: “Kan zot prié, pa repete toujours bann mem kitsoz.” (Matthieu 6:7) Eski Jésus ti pé contredire li-mem kan li ti pé cite enn serie phrase pou ki bann dimoune rappel par coeur ek repeté? Nou sur ki non! Au contraire, Jésus ti pé montré nou pou ki kitsoz nou kapav prié, ek li ti pé donne nou enn la liste bann priorité ki nou kapav garde dan nou l’esprit kan nou prié. Anou examine seki li ti dire. Nou trouve sa la priere-la dan Matthieu 6:9-13.

“Nou Papa ki dan le ciel, ki to nom sanctifié.”

Par sa bann parole-la, Jésus ti rappel so bann disciple ki bizin adresse tou la priere ar so Papa, Jéhovah. Mais eski ou koné kifer nom Bondié li bien important ek kifer bizin sanctifié li, setadir faire li vinn saint?

Depuis commencement l’histoire l’humanité, Satan, adversaire Bondié, finn dire bann fausseté pou sali nom sacré Bondié. Satan ti dire ki Jéhovah, Li enn dirigeant egoïste ki koz menti, ki pena vrai-mem droit pou dirige So bann creation. (Genèse 3:1-6) Beaucoup dimoune finn mette-zot dan coté Satan, kan zot finn enseigné ki Bondié Li insensible, cruel, ek garde rancune ou-soit kan zot pa reconette ki Li-mem Createur. Lezot finn mem attak so nom, kan zot inn tire nom Jéhovah dan bann traduction la Bible ek empeche bann dimoune servi sa nom-la.

La Bible montré ki Bondié pou repare tou sa bann l’injustice-la. (Ézékiel 39:7) Kan Li pou faire sa Li pou donne ou tou seki ou bizin ek Li pou reglé aussi tou ou bann probleme. Couma Li pou faire sa? Bann prochain parole dan la priere Jésus donne nou so reponse.

“Ki to royaume vini.”

Azordi ena beaucoup confusion parmi bann enseignant religieux lor Royaume Bondié. Mais depuis bien longtemps bann prophete Bondié ti predire ki le Messie, enn Sauveur ki Bondié finn choisir, ti pou dirige enn Royaume ki ti pou change le monde. Sa c’est enn kitsoz ki bann ki ti ecoute Jésus ti koné. (Isaïe 9:6, 7; Daniel 2:44) Li pou sanctifié nom Bondié kan li pou devoile bann fausseté ki Satan inn fané ek detruire Satan ek tou bann travail ki li’nn faire. Royaume Bondié pou tire la guerre, maladie, la famine—ek mem la mort. (Psaume 46:9; 72:12-16; Isaïe 25:8; 33:24) Kan ou prié pou ki Royaume Bondié vini ou pé prié pou ki tou sa bann promesse-la realisé.

“Ki to volonté faire lor la terre pareil couma dan le ciel.”

Bann parole Jésus montré ki sans okenn doute volonté Bondié pou faire lor la terre pareil couma li pé faire dan le ciel, kot Bondié resté. Personne pa finn kapav empeche ki volonté Bondié faire dan le ciel; la-bas, Garson Bondié ti faire la guerre kont Satan ek so l’armée, ek li ti jette zot lor la terre. (Révélation 12:9-12) Sa troisieme kitsoz ki nou demandé dan la priere modele-la, pareil couma deux premier-la, aide nou pou reste concentré lor seki pli important—pa nou prop volonté, mais volonté Bondié. C’est grace a so volonté ki la creation kapav touletan gagne seki bon. A cause sa, mem Jésus ki ti enn zom parfait ti dire so Papa: “Ki to volonté li faire, mais pa mo volonté.”—Luc 22:42.

“Donne nou, nou di-pain pou zordi.”

Apré sa, Jésus ti montré ki nou kapav prié aussi pou bann kitsoz ki nou bizin lor plan personnel. Pena nanyin de mal ki nou prié Bondié pou donne nou bann kitsoz ki nou bizin chaque jour. En realité kan nou faire sa, sa aide nou rappel ki c’est Jéhovah ki “donne tou dimoune la vie ek souffle ek tou kitsoz.” (Actes 17:25) La Bible montré ki Li enn papa ki content so bann zenfant ek ki prend plaisir pou donne zot seki zot bizin. Si zot demann bann kitsoz ki pa bon pou zot, pareil couma enn bon papa, Li pa pou donne zot sa bann kitsoz-la.

“Pardonne-nou nou bann dette.”

Eski vrai-mem ou ena enn dette envers Bondié? Eski ou bizin so pardon? Zordi, beaucoup dimoune nepli comprend ki été peché ek ki li enn kitsoz bien grave. Mais la Bible enseigné ki c’est peché ki racine nou bann probleme pli grave, parski c’est sa-mem ki faire bann dimoune mort. Parski nou finn né couma bann dimoune ki faire peché, alors nou tou, souvent nou faire peché, ek nou sel l’espoir pou ena enn l’avenir durable depann lor pardon Bondié. (Romains 3:23; 5:12; 6:23) Sa soulage nou kan nou aprann ki la Bible dire: “Toi, o Jéhovah, to bon ek to disposé pou pardonné.”—Psaume 86:5.

“Delivré nou ar sa kikenn ki mauvais-la.”

Eski ou rann-ou compte couma li urgent ek bien important ki ou gagne protection Bondié? Beaucoup pa’lé croire ki “sa kikenn ki mauvais-la,” setadir Satan, vrai-mem existé. Mais Jésus ti enseigné ki Satan li enn personne réel, li ti mem appel li “chef sa lé-monde-la.” (Jean 12:31; 16:11) Satan finn contamine sa le monde ki li pé controlé-la, ek li bien envie contamine ou aussi lor plan spirituel, pou empeche ou ena enn relation bien proche avek ou Papa, Jéhovah. (1 Pierre 5:8) Mais selman, Jéhovah beaucoup pli fort ki Satan ek Li prend plaisir pou protege bann ki content Li.

Sa ti resumé lor bann point important dan la priere modele Jésus-la pa couvert tou sujet lor ki nou kapav prié. Pa blié seki 1 Jean 5:14 dire concernant Bondié: “N’importe ki kitsoz nou demandé en accord avek so volonté, Li ecoute nou.” Alors pa pensé ki ou bann probleme pa assez important pou koz sa dan la priere avek Bondié.—1 Pierre 5:7.

Mais, ki nou kapav dire concernant ler ek place kot nou prié? Kan ek kot-sa nou bizin prié? Eski sa ena l’importance?