1^er Secret

KI LA BIBLE ENSEIGNÉ? “L’amour pou l’argent li enn racine tou sorte qualité mauvais kitsoz.”—1 Timothée 6:10.

KIFER LI DIFFICILE? Bann dimoune ki faire reclame mette pression lor nou pou ki nou pa satisfait avek seki nou ena. Zot envie ki nou travail couma bann esclave pou gagne kass pou ki nou depense sa lor bann kitsoz ki pli nouveau, pli bon, pli gros. L’argent bien attirant, ek li bien facile pou content li. Mais selman, la Bible averti nou ki enn dimoune ki content la richesse jamais pa pou satisfait. Le roi Salomon ti ecrire: “Sa kikenn ki content l’argent-la jamais li pa pou assez ar l’argent, ni sa kikenn ki content la richesse-la, ar kass ki rentré.”—Ecclésiaste 5:10.

KI OU KAPAV FAIRE? Imite Jésus, ek aprann pou content bann dimoune plus ki bann kitsoz. Jésus ti disposé pou donne tou seki li ti ena—mem so la vie—parski li ti content bann dimoune. (Jean 15:13) Li ti dire: “Ena plus bonheur kan donné ki kan recevoir.” (Actes 20:35) Si nou prend l’habitude pou donne lezot nou le temps ek seki nou ena, bann dimoune pou faire pareil. Jésus ti dire: “Prend l’habitude donné, ek dimoune pou donne zot.” (Luc 6:38) Bann dimoune ki galope derriere l’argent ek bann kitsoz materiel faire zot-mem di-tort ek zot souffert. (1 Timothée 6:9, 10) Parkont, nou pou ena enn vrai satisfaction kan nou content bann dimoune ek kan bann dimoune content nou.

Kifer ou pa reflechi si ou kapav simplifié fason ki ou pé vive? Eski ou kapav diminué quantité di-bien ki ou ena ou-soit ki ou envie acheté? Si ou faire sa, kitfois ou pou trouvé ki ou ena plus le temps ek la force pou bann kitsoz ki pli important dan la vie—aide bann dimoune ek servi Bondié, ki finn donne ou tou seki ou ena.—Matthieu 6:24; Actes 17:28.

[Zimage page 4]

“Prend l’habitude donné, ek dimoune pou donne zot”