Jeune—Resisté ar pression ou bann camarade

“Fodé ki zot parole . . . assaisonné ar di-sel, pou ki zot koné couma pou reponn chaque dimoune.”—COL. 4:6.

1, 2. Ki sentiment beaucoup jeune ena kan zot bizin montré-zot different, ek kifer?

PENA doute ki ou pa finn zis tann koz lor “pression bann camarade,” mais surement ki personnellement ou finn faire sa l’experience-la. Kitfois finn deja arrivé ki enn kikenn finn pousse ou pou faire enn kitsoz ki ou koné pa bon. Ki sentiment ou ena kan sa arrivé? Christopher, ki ena 14 an, dire: “Parfois mo ti pou content si mo ti kapav zis disparette, ou-soit ki mo pareil couma mo bann camarade lekol, coumsa mo pa ti pou bizin different.”

² Eski ou bann camarade ena enn grand l’influence lor ou? Si oui, kifer? Eski li possible ki ou envie ki zot accepté ou? Sa desir-la en li-mem, li pa toujours mauvais. En realité, bann adulte aussi envie ki zot bann camarade accepté zot. Ki li enn jeune ou-soit enn dimoune agé—personne pa content senti-li rejeté. Mais nou bizin realiste, prend position pou seki droite pa pou toujours faire plaisir certain dimoune. Mem Jésus ti faire sa l’experience-la. Kan-mem sa, Jésus ti faire touletan seki droite. Alors ki certain ti suive li ek ti vinn so bann disciple, lezot ti meprise Garson Bondié ek “ti considere li couma enn nanyin ditou.”—Is. 53:3.

Pression pou faire pareil couma ou bann camarade—ki quantité li fort?

3. Kifer li pou enn erreur si ou faire pareil couma ou bann camarade?

³ Parfois, li kapav arrivé ki ou tenté pou faire pareil couma ou bann camarade zis pou ki zot pa rejette ou. Li pou enn erreur si ou faire sa. Fodé pa ki bann chretien “couma bann tibaba ki coumadir pé ballotté par bann vague.” (Éph. 4:14) Bann zenfant kapav laisse-zot facilement influencé par lezot. Mais, en tant ki jeune, ou pé grandi pou vinn enn adulte. Alors, si ou croire ki bann principe Jéhovah zot pou ou prop di-bien, ou ena enn devoir envers ou-mem pou vive dapré ou bann croyance. (Deut. 10:12, 13) Si ou pa faire sa, sa vedir ki ou pé laisse lezot controle ou la vie. En realité, kan ou cedé enba pression lezot, ou pou vinn zot marionnette.—Lire 2 Pierre 2:19.

4, 5. (a) Couma Aaron ti cedé kan lezot ti faire pression lor li, ek ki bann leson ou kapav aprann ar sa? (b) Cite bann kitsoz ki ou bann camarade kapav essaye servi pou mette pression lor ou.

⁴ Enn fois, Aaron, frere Moïse, ti cedé enba pression lezot. Kan bann Israélite ti mette pression lor li pou faire enn bondié pou zot, li ti accepté. Mais Aaron pa ti enn capon. Avant sa, li ti soutenir Moïse kan zot ti affronte Pharaon, dimoune ki ti ena plus pouvoir dan l’Égypte. Aaron ti koz avek courage, li ti annonce Pharaon message Bondié. Mais kan bann lezot Israélite ti mette pression lor li, Aaron ti cedé. Pression lezot kapav ena enn grand pouvoir, pa vrai? Aaron ti trouve sa pli facile pou faire face ar le roi l’Égypte ki pou faire face ar so bann camarade Israélite.—Ex. 7:1, 2; 32:1-4.

⁵ Pareil couma l’exemple Aaron montré, pression bann camarade pa concerne zis bann jeune, ni li enn probleme ki concerne zis bann ki ena tendance pou faire le mal. Pression bann camarade kapav affecté mem bann ki envie faire seki bien avek tou zot leker, ou aussi ou parmi. Ou bann camarade kapav essaye force ou pou faire enn mauvais kitsoz kan zot lance ou enn defi, kan zot dire enn kitsoz ki fausse lor ou, ou-soit kan zot bouffonne ou. Li difficile pou faire face ar n’importe ki qualité pression ki ou bann camarade servi. Pou ou reussi resisté ar sa pression-la, d’abord ou bizin commence ena confiance dan ou bann croyance.

‘Contigne examiné seki ou-mem ou été’

6, 7. (a) Kifer li important ki ou sur ki ou bann croyance zot vrai, ek couma ou kapav developpe sa conviction-la? (b) Ki bann question ou kapav demann ou-mem, pou fortifié ou conviction?

⁶ Pou ou resisté ar pression ou bann camarade, ou-mem ou bizin d’abord sur ki ou bann croyance zot vrai ek ki ou bann principe zot droite. (Lire 2 Corinthiens 13:5.) Kan ou ena sa l’assurance-la, sa pou aide ou pou ena courage, mem si ou enn dimoune timide. (2 Tim. 1:7, 8) Mais mem si enn dimoune ena courage, sa kapav difficile pou li pou prend position pou enn kitsoz ki li pa croire cent pour cent. Alors, kifer ou pa examine par ou-mem si seki finn enseigne ou lor la Bible c’est vrai-mem la verité? Commence avek bann croyance de base. Par exemple, ou croire dan Bondié, ek ou finn tann lezot dire kifer zot ena la foi dan so l’existence. Alors, demann ou-mem: ‘Ki convaink moi ki Bondié existé?’ But sa question-la, c’est pa pou faire ou ena bann doute mais pou faire ou la foi vinn pli fort. Avek sa-mem fason pensée-la, demann ou-mem: ‘Couma mo koné ki la Bible li inspiré par Bondié?’ (2 Tim. 3:16) ‘Kifer mo sur ki nou pé vive dan “bann dernier jour”?’ (2 Tim. 3:1-5) ‘Ki kitsoz ki faire moi croire ki bann principe Jéhovah zot pou mo bien?’—Is. 48:17, 18.

⁷ Kitfois ou hesité pou demann ou-mem sa bann question-la, parski ou peur pangar ou pa gagne bann reponse. Lerla, li pou coumadir ou pé hesité pou guette ou l’indicateur l’essence lor ou tableau de bord dan ou l’auto pangar zaiguille-la montré ki ou tank l’essence vide! Li important ki ou koné si ou tank l’essence vide, pou ou kapav faire kitsoz. Li pareil pou ou, li bon ki ou reconette dan ki domaine ou mank conviction pou ou kapav travail lor la.—Actes 17:11.

8. Expliké couma ou kapav fortifié ou conviction ki li sage pou suive commandement Bondié pou rejette fornication.

⁸ Anou prend enn l’exemple. La Bible encourage ou pou “sauvé, al loin ar fornication.” Demann ou-mem: ‘Kifer sa commandement-la li sage?’ Reflechi lor tou bann raison ki pousse ou bann camarade pou commette fornication. Reflechi aussi lor different raison kifer enn dimoune ki pratik fornication li “pé peche kont so prop lekor.” (1 Cor. 6:18) Asterla, examine sa bann raison-la, ek demann ou-mem: ‘Ki chemin ki pli bon pou mo suive? Eski li vrai-mem vaut la peine ki mo engage-moi dan enn mauvais conduite sexuel?’ Reflechi pli bien lor la, demann ou-mem: ‘Ki mo pou ressenti si mo cedé pou commette l’immoralité sexuel?’ Kitfois au commencement, ou pou gagne faveur certain parmi ou bann camarade, mais ki ou pou ressenti plitar kan ou pou avek ou bann parent ou-soit avek bann lezot chretien dan la salle du Royaume? Ki bann sentiment ou pou ena kan ou pou essaye prié Bondié? Eski ou vrai-mem disposé pou sacrifié ou bann bon relation avek Bondié zis pou faire plaisir ou bann camarade lekol?

9, 10. Couma confiance ki ou ena dan ou bann croyance pou permette ou ena plus l’assurance kan ou avek ou bann camarade?

⁹ Si ou enn adolescent, ou pé vive enn periode ou la vie kot ou “capacité pou raisonné” pé plus developpé. (Lire Romains 12:1, 2.) Servi sa le temps-la pou reflechi bien seki sa vedir pou ou personnellement ki ou enn parmi bann Témoins de Jéhovah. Sa qualité meditation-la pou aide ou pou ena plus confiance dan ou bann croyance. Lerla, kan ou faire face ar pression ou bann camarade, ou pou kapav reponn zot sans hesité ek avek confiance. Ou pou ena mem sentiment ki enn jeune soeur ki dire: “Kan mo resisté ar pression mo bann camarade, mo pé zis faire lezot koné ki mo été. [Pou moi,] c’est pa zis ‘enn religion.’ Tou mo bann pensée, mo bann l’objectif, mo bann principe moral, ek mo l’existence basé lor la.”

¹⁰ Oui, sa demann bann zeffort pou reste ferme pou faire seki ou koné droite. (Luc 13:24) Surement ou demann ou-mem si sa vaut la peine. Mais rappel sa: si ou parette embarrassé ou-soit honté dan decision ki ou’nn prend pou faire seki droite, lezot pou remark sa, ek zot kapav mem mette plus pression lor ou. Mais, si ou koz avek l’assurance, kitfois ou pou etonné avek ki vitesse ou bann camarade pou arrete mette pression lor ou.—Compare avek Luc 4:12, 13.

‘Medité pou ou kapav reponn’

11. Couma enn bon preparation pou aide ou pou faire face ar pression ou bann camarade?

¹¹ Enn lot kitsoz important ki pou aide ou pou resisté ar pression ou bann camarade, c’est preparation. (Lire Proverbes 15:28.) Preparation vedir reflechi a l’avance ki bann situation ki kapav arrivé. Parfois, zis enn ti preparation a l’avance kapav aide ou pou evite enn situation bien difficile. Par exemple, supposé ki ou trouve enn groupe camarade lekol pli devant ek zot pé fumé. Ki risk ena ki zot propose ou enn cigarette? Si ou’nn fini maziné a l’avance ki ou pou bizin faire face ar enn situation difficile, ki ou kapav faire? Proverbes 22:3 dire: “Li ena enn bon jugement sa dimoune ki al cachiette kan li trouve malheur.” Si ou prend enn lot chemin, kitfois ou pou kapav evite joinde ar zot ek ou pa pou bizin faire face ar sa situation-la. Sa pa vedir ki ou peur, mais sa montré ki ou ena la sagesse.

12. Couma ou kapav reponn dan enn bon fason, enn camarade ki mette pression lor ou?

¹² Mais ki ou pou faire si ou bizin faire face ar enn situation ki ou pa kapav evité? Supposé ki enn camarade pose ou sa question-la: “Pa dire moi, to encore vierge?” parski li pa’lé croire ki sa vrai. Pou ou reussi reponn li, ou bizin suive conseil ki trouve dan Colossiens 4:6: “Fodé ki zot parole faire toujours plaisir pou tendé, assaisonné ar di-sel, pou ki zot koné couma pou reponn chaque dimoune.” Pareil couma sa verset-la montré, fason ki ou pou reponn sa question-la pou depann lor bann situation. Kitfois li pa pou necessaire ki ou faire enn longue discours lor la Bible. Li possible ki enn reponse ferme ek simple pou assez. Par exemple, pou reponn enn kikenn ki demann ou si ou encore vierge, ou kapav zis dire: “Oui,” ou-soit: “Sa c’est enn question personnel.”

13. Kifer discernement important kan ou reponn enn camarade ki provok ou?

¹³ Souvent Jésus ti donne enn reponse bien courte kan li ti koné ki sa pa ti pou servi nanyin pou dire plus. En realité, Jésus pa ti dire nanyin kan Hérode ti questionne li. (Luc 23:8, 9) Souvent, kan nou reste trankil c’est enn bon moyen pou traite bann question embarrassant. (Prov. 26:4; Eccl. 3:1, 7) De lot coté, kitfois ou kapav remarké ki enn dimoune ki pa arrivé comprend ou conduite, couma par exemple lor moralité sexuel, li sincere, mem si sa dimoune-la finn deja koz en mal lor ou avant. (1 Pierre 4:4) Dan sa cas-la, kitfois dimoune-la bizin enn l’explication pli detaillé lor ou position ki en accord avek la Bible. Si ou bizin donne li enn l’explication, pa hesité parski ou peur. Fodé ki ou toujours ‘pré pou defann ou-mem.’—1 Pierre 3:15.

14. Couma, dan certain situation, ou kapav retourne avek tact pression ki ou camarade mette lor ou?

¹⁴ Dan certain situation, ou kapav retourne sa pression-la lor ou camarade. Selman, essaye faire sa avek tact. Par exemple, si enn camarade lekol mette pression lor ou pou accepté enn cigarette, ou kapav dire: “Non merci” ek apré ajouté: “Toi to fumé! Mo ti pensé ki to vaut plus ki sa!” Eski ou remarké couma ou finn retourne sa pression-la? Au lieu ki ou bizin expliké kifer ou pa fumé, ou camarade obligé reflechi kifer li, li fumé.a

15. Kan eski li necessaire ki ou quitte ou bann camarade ki pé essaye mette pression lor ou, ek kifer?

¹⁵ Ki ou pou faire si, malgré ou bann zeffort, ou bann camarade contigne mette pression lor ou? Dan sa cas-la, li preferable ki ou allé. Plus ou reste ar zot, plus ena risk ki dan enn certain fason ou desobeir bann principe. Alors, quitte zot allé. Ou kapav faire sa sans ki ou pensé ki ou’nn perdi point. Apré tou, ou finn reussi controle sa situation-la. Ou pa’nn vinn enn marionnette dan la main ou bann camarade, ek ou finn faire leker Jéhovah content.—Prov. 27:11.

Ena ‘bann plan ki faire ou gagne l’avantage’

16. Couma certain ki dire ki zot bann chretien kapav mette pression lor ou?

¹⁶ Parfois, c’est bann lezot jeune ki dire ki zot servi Jéhovah ki mette pression lor ou pou faire bann kitsoz ki pa bon. Par exemple, ki ou pou faire si ou arrive dan enn fête ki finn organisé par enn jeune coumsa ek ou decouvert ki pena okenn adulte pou veillé ki tou passe bien? Ou-soit, ki ou pou faire si enn jeune ki dire ki li enn chretien, amenn lalkol dan enn fête, alors ki ni ou, ni lezot jeune ki present, pena l’age pou boire? Beaucoup situation kapav arrivé kot ou pou bizin suive ou conscience ki’nn formé par la Bible. Enn adolescente raconté: “Mo soeur ek moi nou ti arrete guette enn film ek nou ti allé parski dan film-la ti ena beaucoup parole grossier. Lezot camarade dan sa groupe-la ti decide pou resté. Nou bann parent ti felicite nou pou seki nou ti faire. Selman, bann camarade dan sa groupe-la ti en colere parski nou finn faire zot passe pou mauvais.”

17. Kan ou al enn fête, ki bann kitsoz pratik ou kapav faire pou obeir bann principe Bondié?

¹⁷ Pareil couma sa l’exemple-la montré, li possible ki, kan ou suive ou conscience ki’nn formé par la Bible, sa mette-ou dan enn situation embarrassant. Mais reste attaché ar seki ou koné bon. Prepare-ou. Si ou pé al enn fête, ena toujours enn plan pou ou kapav quitte fête-la pli boner si jamais bann kitsoz pa pé passe couma ou ti pé attann. Certain jeune finn faire enn l’arrangement avek zot parent: enn simple coute telephone assez pou vinn cherche zot pli boner. (Ps. 26:4, 5) Sa qualité ‘plan-la faire ou gagne enn l’avantage.’—Prov. 21:5.

‘Trouve la joie dan to jeunesse’

18, 19. (a) Kifer ou kapav sur ki Jéhovah envie ki ou heureux? (b) Ki sentiment Bondié ena concernant bann ki resisté ar pression zot bann camarade?

¹⁸ Jéhovah inn crée ou pou ou profite la vie ek Li envie ki ou heureux. (Lire Ecclésiaste 11:9.) Rappel bien ki, seki beaucoup parmi ou bann camarade pé faire, zot pé “profite plaisir temporaire ki gagné dan peché.” (Héb. 11:25) Vrai Bondié Li, Li envie ki ou gagne kitsoz ki beaucoup pli bon ki sa. Li envie ki ou heureux pou touletan. Alors, kan ou tenté pou faire enn kitsoz ki ou koné pa bon devant Bondié, rappel ki, seki Jéhovah demann ou, li pou toujours dan ou l’interet asterla ek dan l’avenir.

¹⁹ Jeune, ou bizin comprend ki mem si ou gagne faveur ou bann camarade, dan deux-trois l’année la plupart parmi zot pa pou mem rappel ou nom. Parkont, kan ou resisté ar pression ou bann camarade, Jéhovah remark sa, ek jamais Li pa pou blié ou, ou-soit ou fidelité. Li pou ‘ouvert le ciel en grand ek Li pou vide lor ou enn benediction ziska ki personne pa mank nanyin.’ (Mal. 3:10) En plus, Li donne so l’esprit saint avek generosité pou aide ou pou fortifié ou determination dan bann moment kot ou senti-ou faible. Oui, Jéhovah kapav aide ou pou resisté ar pression ou bann camarade!

[Note]

Eski ou rappel?

• Ki pouvoir pression lezot kapav ena?

• Couma, kan ou sur ki ou bann croyance vrai, sa aide ou pou resisté ar pression ou bann camarade?

• Couma ou kapav prepare-ou pou faire face ar pression ou bann camarade?

• Couma ou koné ki ou fidelité ena valeur devant Jéhovah?