Eski ou ena la haine pou seki mauvais?

“To [Jésus] finn ena la haine pou desobeissance la loi.” —HÉB. 1:9.

1. Ki Jésus ti enseigné concernant l’amour?

POU montré l’importance pou ena l’amour, Jésus Christ ti dire so bann disciple: “Mo pé donne zot enn nouveau commandement: zot bizin content zot camarade. Pareil couma mo finn content zot, zot aussi, zot bizin content zot camarade. Par sa tou dimoune pou koné ki zot mo bann disciple, si zot ena l’amour entre zot.” (Jean 13:34, 35) Jésus ti donne so bann disciple l’ordre pou montré enn l’amour ki pousse-zot pou faire sacrifice sakenn pou so prochain. Sa l’amour-la ti pou permette identifié zot. Jésus ti aussi donne zot sa conseil-la: “Contigne content zot bann l’ennemi ek prié pou bann ki persecute zot.”—Mat. 5:44.

2. Pou ki kitsoz bann disciple Christ bizin ena la haine?

² En plus ki li ti enseigne so bann disciple lor l’amour, Jésus ti dire zot pou ki kitsoz zot ti bizin ena la haine. Concernant Jésus, la Bible dire: “To finn content la justice ek to finn ena la haine pou desobeissance la loi [seki mauvais].” (Héb. 1:9; Ps. 45:7) Sa montré ki nou bizin pa zis developpe l’amour pou la justice mais aussi la haine pou peché, ou-soit pou desobeissance la loi. Nou remarké aussi ki l’apotre Jean ti precisé: “Tou dimoune ki pratik peché pé aussi desobeir la loi, alors peché vedir desobeir la loi.”—1 Jean 3:4.

3. En rapport avek la haine pou seki mauvais, ki bann domaine dan nou la vie nou pou examiné dan sa lartik-la?

³ Alors, en tant ki chretien, li bon ki nou demann nou-mem: ‘Eski mo ena la haine pou seki mauvais?’ Anou guetté couma nou kapav montré nou la haine pou seki mauvais dan quatre domaine nou la vie: (1) nou l’attitude concernant boire beaucoup lalkol, (2) spiritisme, (3) couma nou considere l’immoralité, ek (4) bann ki content seki mauvais.

Pa vinn esclave lalkol

4. Kifer Jésus ti kapav koz franc kan li ti donne bann conseil pou pa boire lalkol plus ki bizin?

⁴ Parfois Jésus ti boire di-vin ek li ti reconette ki c’est enn don ki Bondié inn donné. (Ps. 104:14, 15) Selman, jamais li pa ti boire plus ki bizin. (Prov. 23:29-33) Alors, kan Jésus ti donne bann conseil kont sa danger-la, li ti kapav koz franc, sans ki li ti ena nanyin pou reproche li-mem. (Lire Luc 21:34.) Si nou boire trop beaucoup lalkol, sa kapav amenn-nou pou faire lezot peché grave. A cause sa, l’apotre Paul ti ecrire: “Pa soule-zot ar di-vin, parski ena conduite immoral ladan, mais contigne rempli-zot avek l’esprit.” (Éph. 5:18) Li ti aussi conseil bann femme agé dan congregation pou pa vinn “esclave beaucoup di-vin.”—Tite 2:3.

5. Si nou decidé pou boire lalkol, ki bann question nou bizin pose nou-mem?

⁵ Si ou decide pou boire lalkol, li bon ki ou demann ou-mem: ‘Eski mo ena mem l’attitude ki Jésus concernant boire beaucoup lalkol? Si mo bizin conseil lezot lor sa sujet-la, eski mo pou kapav koz franc, sans ki mo ena nanyin pou reproche mo-mem? Eski mo boire pou blié mo bann tracas ek pou tire mo stress? Ki quantité lalkol mo boire chaque semaine? Couma mo reagir kan enn kikenn rod dire moi dan enn fason indirect ki mo pé boire trop beaucoup? Eski mo rod defann mo-mem ou-soit eski mo vinn amer kont li?’ Si nou laisse-nou vinn esclave lalkol, sa kapav affecté nou capacité pou raisonné couma bizin ek pou prend bann bon decision. Mais bann disciple Christ zot, zot faire tou pou protege zot capacité pou raisonné.—Prov. 3:21, 22.

Rejette spiritisme

6, 7. (a) Couma eski Jésus ti agir avek Satan ek bann demon? (b) Kifer bann pratik ki ena enn rapport avek spiritisme bien populaire zordi?

⁶ Kan Jésus ti lor la terre, li ti oppose-li dan enn fason bien ferme kont Satan ek so bann demon. Kan Satan ti attak so fidelité dan enn fason direct, Jésus ti repousse li. (Luc 4:1-13) Kan certain ti essaye influence so bann pensée ek so bann action dan enn fason indirect, li ti fini comprend ki zot ti pé rod faire ek li ti resisté kont sa. (Mat. 16:21-23) Jésus ti aide bann dimoune sincere pou zot reussi sorti enba domination cruel bann demon.—Marc 5:2, 8, 12-15; 9:20, 25-27.

⁷ Apré ki Jésus ti vinn le roi en 1914, li ti purifié le ciel ar mauvais l’influence Satan ek so bann demon. Ki resultat sa finn ena? Zordi plus ki avant, Satan bien decidé pou “mette tou bann dimoune lor la terre entier dan l’erreur.” (Rév. 12:9, 10) Alors, fodé pa nou etonné ki partout bann dimoune attiré par spiritisme ek ki sa pé augmenté. Ki bann precaution nou kapav prend pou protege nou?

8. Concernant choix nou bann divertissement, ki bann question ki pou aide nou pou examine nou-mem?

⁸ La Bible averti nou dan enn fason bien clair kont bann danger ki ena enn rapport avek spiritisme. (Lire Deutéronome 18:10-12.) Zordi, Satan ek bann demon influence l’esprit bann dimoune a travers bann film, bann livre, ek bann video games, ki encourage bann pratik ki ena enn rapport avek spiritisme. Alors, kan nou choisir enn divertissement, sakenn parmi nou bizin demann li-mem: ‘Pendant bann mois ki’nn passé, eski mo finn choisir pou detann-moi ar bann film, bann programme television, bann video games, bann livre ou-soit bann bande dessiné kot ena bann kitsoz surnaturel? Eski mo comprend l’importance pou rejette bann l’influence ki spiritisme ena, ou-soit eski mo pa prend serieux sa bann danger-la? Eski mo finn mem reflechi ki sentiment Jéhovah kapav ena concernant choix mo bann divertissement? Si mo finn laisse sa bann l’influence satanik-la rente dan mo la vie, eski mo l’amour pou Jéhovah ek pou so bann principe juste pou pousse-moi pou prend enn decision bien ferme ek pou rejette zot?’—Actes 19:19, 20.

Suive bann l’avertissement Jésus lor l’immoralité

9. Couma enn dimoune kapav developpe l’amour pou seki mauvais?

⁹ Jésus ti defann bann principe Jéhovah en rapport avek sexualité. Li ti dire: “Eski zot pa finn lire ki celui ki ti crée zot, depuis commencement, ti faire zot enn zom ek enn femme, ek Li ti dire: ‘A cause sa-mem enn missié pou quitte so papa ek so mama ek li pou attache-li avek so madame, ek toulé-deux pou vinn enn sel la chair’? Oui, zot nepli deux, mais enn sel la chair. Alors, seki Bondié finn mette enba enn sel joug, fodé ki personne pa separe sa.” (Mat. 19:4-6) Jésus ti koné ki seki nou guetté kapav influence nou leker. A cause sa, dan so Sermon lor montagne, li ti dire: “Zot inn tendé ki finn dire: ‘Fodé pa to commette l’adultere.’ Mais moi mo dire zot ki enn dimoune ki contigne guette enn femme ziska ki sa faire li gagne enn desir pou li, finn fini commette l’adultere avek li dan so leker.” (Mat. 5:27, 28) Bann ki pa prend compte l’avertissement ki Jésus inn donné, en realité pé developpe l’amour pou seki mauvais.

10. Raconte enn l’experience ki montré ki enn dimoune kapav rejette pornographie.

¹⁰ Satan encourage l’immoralité sexuel par moyen pornographie. Sa le monde zordi-la rempli ar pornographie. Bann ki guette pornographie trouve sa bien difficile pou efface bann scene immoral dan zot l’esprit. Zot kapav mem vinn esclave pornographie. Guette seki ti arrive enn chretien. Li dire: “Mo ti guette pornographie en secret. Dan mo l’esprit mo ti crée enn le monde pou mo-mem, kot mo ti kapav faire seki mo ti envie, ek mo ti pensé ki sa ti deconnecté ar le monde kot mo ti pé servi Jéhovah. Mo ti koné ki sa l’habitude-la ti mauvais, mais mo ti dire mo-mem ki Bondié ti pé toujours accepté mo service.” Ki ti faire sa frere-la change so fason pensé? Li dire: “Mem si c’est kitsoz pli difficile ki mo finn faire, mo ti decidé pou koz mo probleme ar bann ancien.” Finalement, sa frere-la ti reussi rejette sa mauvais l’habitude-la. Li reconette: “Apré ki mo ti purifié mo la vie ek ti arrete faire sa peché-la, enfin mo ti senti ki mo ti ena enn conscience pur.” Bann ki ena la haine pou seki mauvais bizin aprann pou ena la haine pou pornographie.

11, 12. Couma nou kapav montré ki nou ena la haine pou seki mauvais kan nou choisir la musik ki nou ecouté?

¹¹ La musik ek so bann parole kapav ena enn grand l’influence lor nou bann sentiment ek finalement lor nou leker. La musik c’est enn don ki Bondié inn donné ek depuis longtemps li ena enn place dan vrai l’adoration. (Ex. 15:20, 21; Éph. 5:19) Mais mauvais le monde Satan donne valeur enn la musik ki glorifié l’immoralité. (1 Jean 5:19) Couma ou kapav koné si la musik ki ou ecouté pé contamine-ou ou-soit non?

¹² Kitfois ou kapav demann ou-mem: ‘Eski bann chanté ki mo ecouté encourage crime, l’adultere, fornication ek blaspheme? Si mo lire bann parole certain chanté ar enn lot dimoune, eski li pou pensé ki mo ena la haine pou seki mauvais ou-soit li pou pensé ki mo leker inn contaminé?’ Nou pa kapav dire ki nou ena la haine pou seki mauvais ek en mem temps ecoute bann la musik ki glorifié bann mauvais kitsoz. Jésus ti dire: “Bann kitsoz ki sorti dan la bouche, zot sorti dan leker, ek c’est sa bann kitsoz-la ki faire enn dimoune vinn impur. Par exemple, c’est dan leker ki bann mauvais raisonnement, crime, adultere, fornication, vol, fausse temoignage, blaspheme, sorti.”—Mat. 15:18, 19; compare avek Jacques 3:10, 11.

Ena mem l’attitude ki Jésus envers bann ki content seki mauvais

13. Couma Jésus ti considere bann dimoune ki ti persisté pou faire peché?

¹³ Jésus ti dire ki li ti vini pou appel bann ki faire peché, setadir bann ki desobeir la loi, pou ki zot repenti. (Luc 5:30-32) Alors, couma li ti considere bann dimoune ki ti persisté pou faire peché? Jésus ti donne bann l’avertissement bien severe kont l’influence sa bann dimoune-la. (Mat. 23:15, 23-26) Li ti dire aussi dan enn fason bien clair: “Pa tou seki dire moi: ‘Seigneur, Seigneur,’ ki pou rente dan royaume ki dan le ciel, mais celui ki faire volonté mo Papa ki dan le ciel. Sa jour-la [kan Bondié pou faire so jugement] beaucoup pou dire moi: ‘Seigneur, Seigneur, eski c’est pa par to nom ki nou’nn prophetisé, ek par to nom ki nou’nn tire bann demon, ek par to nom ki nou’nn faire bann mirak?’ ” Mais, li pou rejette bann ki pratik seki kont la loi sans ki zot repenti ek li pou dire zot: “Sorti devant moi, allé.” (Mat. 7:21-23) Kifer sa bann dimoune-la pou gagne enn jugement coumsa? Parski, par zot bann pratik ki kont la loi zot deshonore Bondié ek faire lezot di-tort.

14. Pou ki raison tire bann dimoune ki pa’lé repenti dan congregation?

¹⁴ Parole Bondié donne l’ordre pou tire bann dimoune ki faire peché ek ki pa repenti dan congregation. (Lire 1 Corinthiens 5:9-13.) Sa disposition-la necessaire pou au moins trois raison: (1) pou pa jette deshonneur lor nom Jéhovah, (2) pou protege congregation pou li pa contaminé, ek (3) pou aide sa kikenn ki’nn faire peché-la pou repenti si possible.

15. Si nou envie reste fidele envers Jéhovah, ki bann question important nou bizin pose nou-mem?

¹⁵ Eski nou ena mem l’attitude ki Jésus lor bann ki bien decidé pou contigne pratik peché? Nou bizin reflechi lor sa bann question-la: ‘Eski mo pou choisir pou frequente regulierement enn kikenn ki finn exclu ou-soit ki finn retire-li dan congregation? Ki mo pou faire si sa exclu-la li enn membre mo famille ki nepli reste kot moi?’ Sa situation-la kapav enn grand test pou nou l’amour pou la justice ek nou fidelité envers Bondié.a

16, 17. Ki difficulté enn mama ti gagné, ek ki ti aide li pou soutenir disposition concernant bann exclu?

¹⁶ Prend l’exemple enn soeur ki so garson, enn adulte, ti ena l’amour pou Jéhovah avant. Plitar, garson-la ti choisir pou pratik seki mauvais ek li pa ti repenti. Alors, li ti exclu dan congregation. Nou soeur ti content Jéhovah, mais li ti content aussi so garson ek ti trouve sa bien difficile pou mette en pratik commandement biblik pou arrete frequente enn exclu.

¹⁷ Ki conseil ou ti pou donne sa soeur-la? Enn ancien ti aide li pou realisé ki Jéhovah ti comprend la peine ki li ti ressenti. Frere-la ti invite li pou reflechi lor la peine ki Jéhovah Li-mem ti ressenti kan certain parmi bann ange, so bann garson spirituel, ti rebellé. Ancien-la ti raisonne avek li ek ti dire li ki mem si Jéhovah koné ki quantité enn situation coumsa kapav faire nou la peine, Li demann nou pou exclu bann dimoune ki faire peché ek ki pa’lé repenti. Sa soeur-la ti prend conseil sa ancien-la couma enn kitsoz serieux ek li ti soutenir avek fidelité disposition concernant bann exclu.b Sa qualité fidelité-la faire leker Jéhovah content.—Prov. 27:11.

18, 19. (a) Kan nou coupe tou contact avek enn kikenn ki pratik seki mauvais, ki sa montré? (b) Ki kapav arrivé si nou reste fidele envers Bondié ek nou soutenir disposition ki Li prend?

¹⁸ Si ou dan mem situation, surtout pa blié ki Jéhovah comprend ou. Kan ou coupe tou contact avek enn kikenn ki’nn exclu ou-soit ki’nn retire-li dan congregation, ou pé montré ki ou ena la haine pou l’attitude ek bann action ki finn amenn sa dimoune-la pou exclu. Selman, ou pé aussi montré ki ou tellement content sa dimoune-la ki ou disposé pou faire seki pli bon pou li. Ou fidelité envers Jéhovah kapav augmente possibilité ki sa exclu-la repenti ek retourne vers Jéhovah.

¹⁹ Enn soeur ki ti’nn exclu ek ki plitar ti reintegré, ti ecrire: “Mo bien content ki Jéhovah ena tellement l’amour pou so bann serviteur ki Li veillé ki so l’organisation reste pur. Pou bann dimoune ki en dehors congregation, sa kapav parette dur, mais c’est enn kitsoz ki necessaire ek ki montré enn vrai l’amour.” Si bann membre congregation ek so famille ti contigne garde contact regulierement avek sa soeur-la pendant ki li ti exclu, eski ou pensé ki sa ti pou aide li pou tire sa conclusion-la? Kan nou soutenir bann disposition biblik concernant bann exclu, nou montré ki nou content la justice ek ki nou reconette ki Jéhovah ena droit pou etabli bann principe en rapport avek nou conduite.

“Ena la haine pou seki mauvais”

20, 21. Kifer li important ki nou aprann pou ena la haine pou seki mauvais?

²⁰ L’apotre Pierre ti donne sa l’avertissement-la: “Garde zot bon sens, ek reste lor zot garde.” Kifer? Parski “zot adversaire, le Diable, pé circulé couma enn lion ki pé criyé ek ki pé rod kikenn pou devoré.” (1 Pierre 5:8) Eski ou pou sa kikenn-la? Sa depann surtout lor ki quantité zeffort ou pé faire pou aprann ena la haine pou seki mauvais.

²¹ Li pa facile pou developpe la haine pou seki mauvais. Nou finn né dan peché, ek nou pé vive dan enn le monde ki encourage nou pou obeir bann desir nou la chair. (1 Jean 2:15-17) Mais kan nou imite Jésus Christ ek nou developpe enn l’amour profond pou Jéhovah, nou kapav reussi developpe la haine pou seki mauvais. Anou bien decidé pou “ena la haine pou seki mauvais,” ek ena l’assurance ki Jéhovah ‘protege so bann fidele ek Li sap zot dan la main bann mauvais dimoune.’—Ps. 97:10.

[Notes]

Couma ou pou reponn?

• Ki pou aide nou pou examine nou l’attitude concernant lalkol?

• Ki precaution nou kapav prend pou protege nou kont spiritisme?

• Kifer pornographie c’est enn kitsoz dangereux?

• Couma nou kapav montré ki nou ena la haine pou seki mauvais kan enn kikenn ki nou content, exclu?

[Zimage page 29]

Si ou decidé pou boire lalkol, lor ki kitsoz ou bizin reflechi?

[Zimage page 30]

Faire attention ar l’influence Satan dan bann divertissement

[Zimage page 31]

Enn kikenn ki guette pornographie developpe l’amour pou ki kitsoz?