Anou aprann ar Parole Bondié
Kisannla Jésus Christ?
Sa lartik-la souleve bann question ki kitfois ou finn deja demann-ou-mem ek li montré kot-sa ou kapav trouve bann reponse dan ou la Bible. Bann Témoins de Jéhovah pou bien content pou examine sa bann reponse-la avek ou.
1. Kisannla Jésus Christ?
Jésus pa ti pareil couma lezot dimoune. Li, li ti vive dan le ciel en tant ki enn l’esprit avant ki li ti né lor la terre. (Jean 8:23) Li ti premier creation Bondié, ek li ti aide Bondié pou crée tou lezot kitsoz. Li tousel ki Jéhovah inn crée direct ek c’est a cause sa ki appel li “sel Garson ki [Bondié] inn crée direct.” Jésus ti servi en tant ki Porte-parole Bondié, alors appel li aussi “la Parole.”—Jean 1:1-3, 14; lire Proverbes 8:22, 23, 30; Colossiens 1:15, 16.
2. Kifer Jésus ti vinn lor la terre?
Bondié ti envoye so Garson lor la terre. Li ti transfere la vie so Garson, ki ti avek li dan le ciel, dan ventre enn vierge, enn Juive ki ti appel Marie. Alors Jésus so papa pa ti enn humain. (Luc 1:30-35) Jésus ti vinn lor la terre (1) pou enseigne la verité lor Bondié, (2) pou laisse enn l’exemple en seki concerne faire volonté Bondié, ek (3) pou donne so la vie parfait couma ”enn ranson.”—Lire Matthieu 20:28; Jean 18:37.
3. Kifer nou bizin enn ranson?
Enn ranson c’est prix ki payé pou libere enn dimoune. La mort ek la vieillesse pa ti forme partie dan projet ki Bondié ti ena au commencement pou bann dimoune. Couma nou konn sa? Bondié ti dire premier zom, Adam, ki si li ti faire seki la Bible appel enn peché, li ti pou mort. Si Adam pa ti faire peché, jamais li pa ti pou mort. Mem si c’est apré plusieurs siecle ki Adam ti mort, li ti commence mort jour ki li ti desobeir Bondié. (Genèse 2:16, 17; 5:5) Adam ti transmette tou so bann descendant peché avek so condamnation, setadir la mort. Alors, la mort “finn rente” dan le monde a travers Adam. Ala kifer nou bizin enn ranson.—Lire Romains 5:12; 6:23.
4. Kifer eski Jésus ti mort?
Kisannla ti pou kapav paye sa ranson-la pou libere nou ar la mort? Kan nou mort, nou paye zis pou nou prop peché. Okenn humain imparfait pa kapav paye pou peché lezot.—Lire Psaume 49:7-9.
Parski Jésus pa ti herite l’imperfection avek enn papa humain, li ti mort, pa pou so prop peché, mais pou peché lezot. Bondié ti envoye so Garson pou mort pou nou, pou montré l’amour extraordinaire ki Li ena pou bann dimoune. Jésus aussi ti manifesté so l’amour pou nou kan li ti obeir so Papa ek ti donne so la vie pou nou bann peché.—Lire Jean 3:16; Romains 5:18, 19.
5. Ki Jésus pé faire asterla?
Jésus ti gueri bann dimoune malade, li ti ressuscite bann dimoune mort ek li ti donne so la vie pou sap bann dimoune ar peché ek la mort. Kan li ti faire sa, li ti montré seki li ti pou faire plitar pou tou bann dimoune obeissant. (Luc 18:35-42; Jean 5:28, 29) Apré ki Jésus ti mort, Bondié ti ressuscite li en tant ki enn l’esprit. (1 Pierre 3:18) Lerla, Jésus ti attann dan coté droite Bondié ziska ki Jéhovah ti donne li pouvoir pou regné en tant ki le Roi lor la terre entier. (Hébreux 10:12, 13) Zordi, Jésus pé regné en tant ki le Roi dan le ciel, ek so bann disciple ki lor la terre pé annonce la bonne nouvelle partout lor la terre.—Lire Daniel 7:13, 14; Matthieu 24:14.
Bientot, Jésus pou servi so pouvoir en tant ki le Roi pou tire tou souffrance ek tou bann ki derriere sa. Plusieurs million dimoune ki ena la foi en Jésus ek ki obeir li pou profite la vie lor la terre ki pou vinn enn paradis.—Lire Psaume 37:9-11.
Pou gagne plus renseignement, guette chapitre 4 dan livre Ki la Bible enseigné vrai-mem?, publié par bann Témoins de Jéhovah.
[Zimage page 11]
Plusieurs million dimoune ki ena la foi en Jésus ek ki obeir li pou profite la vie lor la terre ki pou vinn enn paradis