Prend bann decision ki honore Bondié

“Enn dimoune ki ena enn bon jugement, faire attention kot li mette so lipié.”​—PROV. 14:15.

1, 2. (a) Ki l’objectif principal nou bizin ena dan tou bann decision ki nou prend? (b) Ki bann question nou pou examiné?

TOULÉ-JOUR surement nou ena par douzaine pou prend. Beaucoup pena bann consequence ki affecté nou pendant longtemps. Mais certain, kapav ena enn grand l’effet lor nou la vie. Ki zot été? Bann decision. Dan tou bann decision ki nou prend, ki zot grand ou-soit tipti, nou l’objectif principal c’est pou honore Bondié.​—Lire 1 Corinthiens 10:31.

² Eski ou trouve sa facile pou prend bann decision, ou-soit eski c’est enn probleme pou ou? Si nou envie progressé pou gagne maturité chretien, nou bizin aprann pou faire difference entre le bien ek le mal, ek apré prend bann decision ki en accord avek nou bann prop croyance, pa croyance enn lot dimoune. (Rom. 12:1, 2; Héb. 5:14) Ki bann lezot bon raison nou ena pou nou aprann prend bann bon decision? Kifer parfois li tellement difficile pou prend bann decision? Ek ki bann l’etape nou kapav suive pou nou sur ki bann decision ki nou prend zot honore Bondié?

Kifer bizin prend bann decision?

3. Ki bann obstacle nou bizin evité kan nou pé prend bann decision?

³ Si nou hesité pou prend bann decision kan bann principe biblik impliké, nou bann camarade lekol ou-soit nou bann collegue travail kapav pensé ki nou ena inpé doute lor nou bann croyance ek alors li facile pou zot influence nou. Li possible ki zot koz menti, zot agir dan enn fason malhonnete, zot kokin ek apré sa, zot essaye convaink nou pou “suive la foule,” setadir pou faire pareil couma zot ou-soit pou cachiette seki zot faire. (Ex. 23:2) Selman, enn dimoune ki konn prend bann decision ki honore Bondié, pa pou permette la peur ou-soit enn desir ki lezot accepté li, faire li agir dan enn fason ki pa en accord avek so conscience ki’nn formé par la Bible.​—Rom. 13:5.

4. Kifer lezot kapav envie prend bann decision dan nou place?

⁴ Parmi bann dimoune ki envie prend bann decision pou nou, pa zot tou ki oulé faire nou di-tort. Bann camarade ki ena bann bon l’intention kapav insisté ki nou suive zot conseil. Si nou nepli pé vive kot nou bann parent, kitfois zot encore bien interessé ar nou bien-etre, ek zot senti-zot obligé pou contigne implik-zot dan bann decision important ki nou bizin prend. Anou guette par exemple bann traitement medical. La Bible condamne dan enn fason bien clair enn mauvais utilisation di-sang. (Actes 15:28, 29) Mais, ena lezot domaine en rapport avek nou la santé kot pena bann principe bien precis, ek kot sakenn bizin prend enn decision personnel concernant traitement ki li pou accepté ou-soit refusé.a Bann dimoune ki nou content kapav ena bann l’opinion bien ferme lor sa bann sujet-la. Selman, chaque chretien ki’nn voué ek baptisé bizin “sarié so prop charge,” setadir prend so responsabilité kan li pé prend enn decision. (Gal. 6:4, 5) Nou l’objectif principal c’est pou garde enn bon conscience devant Bondié, pa devant bann dimoune.​—1 Tim. 1:5.

5. Couma nou kapav evité faire naufrage en seki concerne nou la foi?

⁵ Si nou hesité pou prend bann decision, sa kapav enn grand danger pou nou. Disciple Jacques ti ecrire ki enn dimoune ki hesité pou prend decision li “pa stable dan tou seki li faire.” (Jacq. 1:8) Pareil couma enn dimoune ki dan enn bateau ki pena gouvernail lor enn la mer ki bien mauvais, li pou ballotté par l’opinion bann dimoune, l’opinion ki souvent changé. Li pou tellement facile ki sa dimoune-la faire naufrage en seki concerne so la foi ek apré, blame lezot pou sa situation bien triste-la! (1 Tim. 1:19) Couma nou kapav evite sa? Nou bizin vinn “stable dan la foi.” (Lire Colossiens 2:6, 7.) Pou nou vinn stable, nou bizin aprann pou prend bann decision ki montré nou la foi dan Parole ki Bondié inn inspiré. (2 Tim. 3:14-17) Mais, ki kapav empeche nou pou prend bann bon decision?

Kifer sa kapav difficile pou prend bann decision

6. Ki l’effet la peur kapav ena lor nou?

⁶ La peur kapav blok nou​—nou peur pangar nou prend enn mauvais decision, nou pa reussi, ou-soit nou parette bete devant lezot. Li normal ki nou ena sa la peur-la. Personne pa content prend enn mauvais decision, enn decision ki pou faire li gagne probleme ek kitfois ki pou faire li honté. Mais malgré sa, l’amour pou Bondié ek pou so Parole kapav diminué nou la peur. Dan ki fason? L’amour pou Bondié pou touletan pousse-nou pou examine so Parole ek bann publication ki basé lor la Bible avant nou prend bann decision important. Lerla, nou pou faire moins erreur. Kifer? Parski la Bible kapav “donne bann dimoune ki pena l’experience, enn bon jugement, enn jeune homme, connaissance ek capacité pou reflechi.”​—Prov. 1:4.

7. Ki l’exemple le roi David kapav enseigne nou?

⁷ Eski touletan nou pou prend bann bon decision? Non. Nou tou nou faire erreur. (Rom. 3:23) Par exemple, le roi David ti enn zom sage ek fidele. Pourtant, parfois li ti prend bann mauvais decision ki ti faire li ek lezot souffert. (2 Sam. 12:9-12) Selman, David pa ti laisse so bann erreur affaibli so capacité pou prend bann decision ki ti faire Bondié plaisir. (1 Rois 15:4, 5) Nou kapav prend bann decision malgré bann erreur ki nou finn faire dan le passé, si pareil couma David, nou rappel ki Jéhovah pa prend compte nou bann erreur ek Li pardonne nou bann peché. Li pou contigne soutenir bann ki content Li ek ki obeir Li.​—Ps. 51:1-4, 7-10.

8. Ki nou aprann ar seki l’apotre Paul ti dire lor mariage?

⁸ Nou kapav diminué la crainte ki nou ena pou prend decision. Couma? Kan nou reconette ki parfois ena plusieurs bon choix ki nou kapav faire. Anou examine fason ki l’apotre Paul ti raisonne avek bann chretien lor mariage. Li ti inspiré par Bondié pou ecrire: “Mais si kikenn pensé ki li pé mal agir envers so virginité, si li’nn fini passe fleur la jeunesse, ek si sa bizin arrive coumsa, laisse li faire seki li envie; li pa faire peché. Ki zot marié. Mais si enn kikenn bien decidé dan so leker, sans ki li senti ki li bizin marié, mais li ena pouvoir lor so prop volonté ek ki li’nn prend sa decision-la dan so prop leker: pou garde so prop virginité, li pou bien faire.” (1 Cor. 7:36-38) Paul ti encourage pou reste celibataire ek li ti dire ki c’est pli bon fason vive, mais pa ti ena zis sa choix-la ki ti bon.

9. Eski nou bizin tracassé ar fason ki lezot considere nou bann decision? Expliké.

⁹ Eski nou bizin tracassé ar fason ki lezot considere bann decision ki nou prend? Oui, ziska enn certain point. Remarké seki Paul ti dire concernant mange bann mangé ki ti parette inn sacrifié ar bann zidole. Li ti reconette ki kitfois enn decision en li-mem pa ti mauvais, pourtant sa ti pou kapav faire di-tort enn kikenn ki ti ena enn conscience faible. Ki decision Paul ti prend? Li ti ecrire: “Si enn mangé faire mo frere tombé, jamais mo pa pou mange la viande encore, pou ki mo pa faire mo frere tombé.” (1 Cor. 8:4-13) Nou aussi nou bizin guetté ki l’effet nou bann decision pou ena lor conscience lezot. Bien sur, seki bizin surtout tracasse-nou c’est l’effet ki nou bann choix pou ena lor nou l’amitié avek Jéhovah. (Lire Romains 14:1-4.) Ki bann principe la Bible pou aide nou prend bann decision ki honore Bondié?

Six l’etape pou prend bann bon decision

10, 11. (a) Couma nou kapav rejette l’orgueil dan la famille? (b) Ki bann ancien bizin rappel kan zot prend bann decision ki ena enn l’effet lor congregation?

¹⁰ Rejette l’orgueil. Avant nou choisir pou faire enn kitsoz, nou bizin demann nou-mem: ‘Eski mo gagne droit prend sa decision-la?’ Le roi Salomon ti ecrire: “Eski l’orgueil inn vini? Alors deshonneur pou vini; mais la sagesse li avek bann dimoune ki reconette zot limite.”​—Prov. 11:2.

¹¹ Bann parent kapav donne zot zenfant l’occasion pou prend certain decision, mais fodé pa ki bann zenfant pensé ki zot ena droit pou prend decision par zot-mem. (Col. 3:20) Bann femme ek bann mama ena enn certain liberté pou prend bann decision dan zot famille, mais li bon ki zot reconette l’autorité zot mari. (Prov. 1:8; 31:10-18; Éph. 5:23) Li pareil aussi pou bann mari, zot bizin reconette ki zot l’autorité li limité ek ki zot soumette ar Christ. (1 Cor. 11:3) Bann ancien prend bann decision ki ena enn l’effet lor congregation. Selman, zot faire sur ki zot “pa al pli loin ki seki finn ecrire” dan Parole Bondié. (1 Cor. 4:6) Zot aussi suive bien direction ki zot gagné ar l’esclave fidele. (Mat. 24:45-47) Nou kapav evité ki nou-mem ek lezot gagne beaucoup tracas ek la peine si nou reconette nou limite ek nou prend bann decision zis kan nou gagne droit faire sa.

12. (a) Kifer nou bizin faire bann recherche? (b) Expliké couma enn kikenn kapav faire sa bann recherche-la.

¹² Faire bann recherche. Salomon ti ecrire: “Bann plan enn kikenn ki travail dur pou faire li gagne l’avantage, mais pena doute ki enn kikenn ki agir sans reflechi pou tombe dan la misere.” (Prov. 21:5) Par exemple, eski enn kikenn inn propose ou pou faire business ek ou pé reflechi lor la? Pa laisse ou bann sentiment controle ou. Rassemblé tou bann renseignement approprié, rod conseil ar bann ki ena enn connaissance dan sa domaine-la, ek rod bann principe la Bible ki ena enn rapport avek sa. (Prov. 20:18) Pou organise ou bann recherche, prepare deux la liste​—enn kot ou ecrire bann avantage, ek enn lot kot ou mette bann desavantage. Avant ou prend enn decision, ‘calcule bien bann depense.’ (Luc 14:28) Reflechi lor l’effet ki ou decision pou kapav ena pa zis lor ou situation financier, mais aussi lor ou relation avek Jéhovah. Sa prend le temps ek demann bann zeffort pou faire recherche. Mais, kan ou faire sa, ou pou kitfois evite prend bann decision vite-vite ki pou kapav faire ou gagne bann probleme ek bann tracas plitar.

13. (a) Ki l’assurance nou trouvé dan Jacques 1:5? (b) Kan nou prié pou gagne sagesse, couma sa kapav aide nou?

¹³ Prié pou gagne sagesse. Bann decision ki nou prend, pou honore Bondié selman si nou demann Li aide nou pou prend zot. Disciple Jacques ti ecrire: “Si kikenn parmi zot mank sagesse, laisse li contigne demann Bondié, parski Bondié content pou donne tou dimoune, sans faire okenn reproche; ek li pou gagné.” (Jacq. 1:5) Fodé pa nou honté pou reconette ki nou bizin sagesse Bondié pou aide nou prend bann decision. (Prov. 3:5, 6) Apré tou, si nou compte zis lor nou prop l’intelligence, sa kapav faire nou prend enn mauvais chemin. Kan nou prié pou gagne sagesse ek nou rod bann principe dan Parole Bondié, nou laisse l’esprit saint aide nou pou trouvé ki bann vrai mobile ki pé pousse-nou pou agir dan enn certaine fason.​—Héb. 4:12; lire Jacques 1:22-25.

14. Kifer nou bizin evite renvoye nou decision pou plitar?

¹⁴ Prend ou decision. Pa pressé pou prend enn decision avant ki ou finn faire bann recherche ek ou finn prié pou gagne sagesse. Enn dimoune sage prend le temps pou reflechi “kot li mette so lipié.” (Prov. 14:15) Selman, pa touletan renvoye ou decision pou plitar. Enn dimoune ki touletan pé renvoye so decision pou plitar, kitfois pou trouve tou sorte qualité excuse pou pa agir. (Prov. 22:13) Mais kan-mem sa, li pé prend enn decision​—en realité, li pé decide pou laisse lezot dirige so la vie.

15, 16. Ki nou bizin faire pou applik enn decision?

¹⁵ Applik seki ou finn decidé. Bann zeffort ki nou faire pou prend enn bon decision kapav dan vide si nou pa faire tou seki nou finn decidé ek nou pa applik sa decision-la dan enn fason ferme. Salomon ti ecrire: “Tou seki to la main trouve pou faire, faire li avek to la force.” (Eccl. 9:10) Pou nou reussi, nou bizin disposé pou servi tou moyen ki necessaire pou applik nou bann decision. Par exemple, enn proclamateur kapav decidé pou faire pionnier. Eski li pou reussi? Oui, a condition ki li pa consacré plus le temps ki bizin dan so travail profane, ek laisse sa ek bann divertissement diminué so la force ek le temps ki li bizin pou accompli so ministere.

¹⁶ Li bien rare ki bann pli bon decision c’est bann decision ki pli facile pou appliké. Kifer? Parski “le monde entier li dan pouvoir sa kikenn ki mauvais-la.” (1 Jean 5:19) Nou bizin lutte kont “bann dirigeant le monde ki dan sa noirté-la, kont bann mauvais l’esprit ki trouve dan le ciel.” (Éph. 6:12) L’apotre Paul ek disciple Jude toulé-deux ti montré ki bann ki decidé pou honore Bondié pou bizin lutté.​—1 Tim. 6:12; Jude 3.

17. Ki Jéhovah attann concernant bann decision ki nou prend?

¹⁷ Ré-guette ou decision ek faire bann changement si necessaire. Pa tou decision ki reussi couma nou ti attann. Nou tou nou “passe par bann moment ek bann situation ki [nou] pa attann.” (Eccl. 9:11) Malgré sa, Jéhovah attann ki nou perseveré dan certain decision ki nou prend mem si nou gagne bann l’epreuve. Si enn dimoune inn voué so la vie ar Jéhovah, ou-soit inn faire enn voeu jour so mariage, li pa kapav change sa decision-la. Bondié attann ki nou vive en accord avek bann decision coumsa. (Lire Psaume 15:1, 2, 4.) Mais la plupart decision pa aussi important ki sa. De temps en temps, enn dimoune sage pou ré-guette decision ki li’nn prend. Li pa pou trop fiere ou-soit li pa pou faire la tête dur ek laisse sa empeche li pou change so decision ou-soit pou prend enn decision ki completement different. (Prov. 16:18) So l’objectif principal c’est pou faire sur ki so fason vive contigne honore Bondié.

Forme lezot pou prend bann decision ki honore Bondié

18. Couma bann parent kapav forme zot zenfant pou prend bann bon decision?

¹⁸ Bann parent kapav faire beaucoup pou aide zot zenfant pou aprann couma prend bann decision ki honore Bondié. Meilleur fason ki zot kapav enseigne zot zenfant c’est par zot bon l’exemple. (Luc 6:40) Kan li approprié, bann parent kapav explik zot zenfant ki bann kitsoz zot-mem zot inn faire pou prend enn certain decision. Zot kapav aussi laisse zot zenfant prend certain decision par zot-mem ek apré, felicite zot kan sa marche bien. Mais ki enn parent pou faire si so zenfant finn prend enn mauvais decision? Kitfois premier kitsoz ki li pou ena tendance pou faire, c’est protege zenfant-la pou li pa gagne bann consequence, mais kan li faire sa, sa pa pou touletan dan l’interet zenfant-la. Par exemple, enn parent kapav laisse so zenfant tire so permis conduire. Supposé ki zenfant-la pa respecté enn code la route ek li gagne enn contravention. Li possible ki parent-la pou paye sa contravention-la. Selman, si zenfant-la bizin travail pou paye sa contravention-la, li pou pli kapav aprann prend so responsabilité.​—Rom. 13:4.

19. Ki nou bizin enseigne nou bann etudiant la Bible, ek couma nou kapav faire sa?

¹⁹ Jésus ti dire so bann disciple enseigne lezot. (Mat. 28:20) Enn parmi bann leson pli important ki nou kapav enseigne nou bann etudiant la Bible, c’est couma pou prend bann bon decision. Pou nou reussi faire sa bien, nou bizin resisté ar l’envie pou dire zot seki zot bizin faire. Li beaucoup pli bon ki nou enseigne zot pou raisonne lor bann principe la Bible pou ki zot kapav decidé par zot-mem couma zot pou agir. Apré tou, “sakenn parmi nou pou rann compte pou li-mem devant Bondié.” (Rom. 14:12) Alors, nou tou nou ena bann bon raison pou prend bann decision ki honore Bondié.

[Note]

Couma ou pou reponn?

• Kifer nou bizin aprann pou prend bann decision?

• Ki l’effet la peur kapav ena lor nou, ek couma nou kapav surmonte nou la peur?

• Ki six l’etape nou kapav suive pou faire sur ki nou bann decision honore Bondié?

[L’encadré/​Zimage page 20]

Bann l’etape pou prend bann bon decision

1 Rejette l’orgueil

2 Faire bann recherche

3 Prié pou gagne sagesse

4 Prend ou decision

5 Applik seki ou finn decidé

6 Ré-guette ou decision ek faire bann changement

[Zimage page 19]

Enn dimoune ki hesité pou prend decision ressemblé enn kikenn ki dan enn bateau sans gouvernail lor enn la mer ki mauvais