Anou aprann ar Parole Bondié

Sa lartik-la examine bann question ki kitfois ou finn deja demann ou-mem ek li montré kot-sa ou kapav trouve bann reponse dan ou la Bible. Bann Témoins de Jéhovah pou bien content pou examine sa bann reponse-la avek ou.

1. Ki l’espoir ena pou bann dimoune mort?

Kan Jésus ti arrive Béthanie, pré avek Jérusalem, so camarade Lazare ti’nn mort depuis quatre jour. Jésus ti al dan l’endroit kot tombe Lazare ti été, avek Marthe ek Marie, so bann soeur. Bien vite, enn grand la foule ti’nn rassemblé. Eski ou kapav mazinn la joie ki Marthe ek Marie ti ressenti kan Jésus ti ressuscite Lazare?​—Lire Jean 11:20-24, 38-44.

Marthe ti croire ki bann dimoune mort pou ressuscité. Bann serviteur fidele Jéhovah koné depuis longtemps ki, dan l’avenir, Bondié pou ressuscite bann dimoune mort pou zot vive encore lor la terre.​—Lire Job 14:14, 15.

2. Dan ki condition bann dimoune mort été?

Mem si ena enn la force la vie, ou-soit “l’esprit,” ki faire bann dimoune ek bann zanimo contigne vive, nou pa zis bann l’esprit ki pé reste dan enn lekor la chair. (Ecclésiaste 3:19; Genèse 7:21, 22) Nou bann creature physik ki finn faire avek la poussiere. (Genèse 2:7; 3:19) Kan nou cerveau mort, nou nepli ena okenn pensée. Alors, apré ki li finn ressuscité, Lazare pa ti dire nanyin lor so la mort parski bann dimoune mort pa konn nanyin.​—Lire Psaume 146:4; Ecclésiaste 9:5, 10.

Li clair ki bann dimoune mort pa kapav souffert. Alors l’enseignement ki dire ki Bondié faire bann dimoune souffert apré la mort, pa vrai. Li faire Bondié passe pou mauvais. Sa l’idée pou tourmente bann dimoune dan difé-la, faire Bondié gagne degout.​—Lire Jérémie 7:31.

3. Eski nou kapav koz avek bann dimoune mort?

Bann dimoune mort pa kapav kozé. (Psaume 115:17) Mais kan bann mauvais ange koz avek bann dimoune, zot kapav embete sa bann dimoune-la ek faire zot croire ki c’est zot-mem l’esprit bann dimoune mort. (2 Pierre 2:4) Jéhovah defann nou pou essaye koz avek bann dimoune mort.​—Lire Deutéronome 18:10, 11.

4. Kisannla ki pou ressuscité?

Dan le monde nouveau, plusieurs million dimoune ki dan tombe pou ressuscité. Mem certain ki ti pratik bann mauvais kitsoz parski zot pa ti konn Jéhovah, pou ressuscité.​—Lire Luc 23:43; Actes 24:15.

Bann ki pou ressuscité pou kapav aprann la verité lor Bondié ek montré la foi dan Jésus, kan zot obeir li. (Révélation 20:11-13) Bann ki ressuscité ek faire bann bon kitsoz pou kapav gagne la vie pou touletan lor la terre. Mais selman, certain ki pou ressuscité pou contigné faire bann mauvais kitsoz. Zot resurrection pou enn ’resurrection pou enn jugement.’​—Lire Jean 5:28, 29.

5. Ki nou aprann lor Jéhovah grace a resurrection?

Bann dimoune kapav ressuscité parski Bondié ti envoye so Garson pou donne so la vie pou nou. Alors c’est enn fason ki Jéhovah manifesté so l’amour ek so faveur ki personne pa merité, envers nou.​—Lire Jean 3:16; Romains 6:23.

Pou gagne plus renseignement, guette chapitre 6 ek 7 dan livre Ki la Bible enseigné vrai-mem?, publié par bann Témoins de Jéhovah.

[Zimage page 22]

Adam ti crée avek la poussiere