Enn bon nouvelle ki tou dimoune bizin
“La bonne nouvelle; avredir li puissance Bondié pou ki tou dimoune . . . kapav gagne la vie sauve.”—ROM 1:16.
1, 2. (a) Kifer ou preche sa “bon nouvelle lor royaume[-la]”? (b) Cite bann l’aspect sa bon nouvelle lor ki ou mette l’accent-la.
’M O CONTENT partage la bonne nouvelle chaque jour.’ Surement sa pensée-la finn deja traverse ou l’esprit ou-soit ou finn deja dire sa. En tant ki enn Témoin de Jéhovah ki devoué, ou koné ki quantité li important pou preche “sa bon nouvelle lor royaume-la.” Kitfois ou kapav recite par coeur prophetie ki Jésus ti annoncé ek ki trouve dan Matthieu 24:14.
2 Kan ou pé preche la “bonne nouvelle lor royaume,” en realité ou pé contigne seki Jésus ti commencé. (Lire Luc 4:43.) Sans okenn doute, enn sujet lor ki ou mette l’accent c’est: bientot Bondié pou prend bann action par rapport ar seki pé passé lor la terre. Kan la “grande tribulation,” pou vini, Bondié pou detruire la fausse religion ek Li pou tire tou mechanceté lor la terre. (Mat. 24:21) Surement enn lot sujet lor ki ou mette l’accent aussi c’est: Royaume Bondié pou retabli Paradis lor la terre pou ki ena la paix ek bonheur en abondance. En realité, sa “bon nouvelle lor royaume[-la]” forme partie ’la bonne nouvelle ki’nn annoncé a l’avance ar Abraham, setadir: “Par to moyen tou bann nation pou gagne benediction.”’—Gal. 3:8.
3. Kifer eski nou kapav dire ki l’apotre Paul ti mette l’accent lor la bonne nouvelle dan livre Romains?
3 Mais, eski li possible ki nou pa donne assez l’attention lor enn l’aspect bien important sa bonne nouvelle ki bann dimoune bizin-la? Dan lettre ki li ti ecrire bann Romain, l’apotre Paul ti servi mot “royaume” enn sel fois, mais li ti servi l’expression “bonne nouvelle” 12 fois. (Lire Romains 14:17.) Lor ki l’aspect la bonne nouvelle Paul ti faire reference sa quantité fois-la dan sa livre-la? Kifer eski surtout sa bonne nouvelle-la li bien important? Ek kifer nou bizin garde sa bien dan nou l’esprit kan nou pé preche “la bonne nouvelle Bondié” ar bann dimoune dan nou territoire?—Marc 1:14; Rom. 15:16; 1 Thess. 2:2.
Seki bann chretien dan Rome ti bizin
4. Alors ki li ti dan prison pou premier fois en Rome, lor ki kitsoz Paul ti preché?
4 Nou aprann beaucoup kan nou examine bann sujet lor ki Paul ti kozé kan li ti dan prison pou premier fois en Rome. Nou lire ki, kan plusieurs Juif ti vinn visite li, (1) li ti rann ’temoignage a fond lor royaume Bondié ek (2) li ti faire tou pou convaink zot concernant Jésus.’ Ki resultat sa finn ena? “Certain ti commence croire bann kitsoz ki li ti dire; mais lezot ti refuse croire.” Apré sa, Paul ’ti accueil avek bonté tou bann ki ti vinn kot li. Li (1) ti preche royaume Bondié ar zot ek (2) ti enseigne zot bann kitsoz concernant Seigneur Jésus Christ.’ (Actes 28:17, 23-31) Li clair ki Paul ti mette l’accent lor Royaume Bondié. Mais lor ki kitsoz encore li ti mette l’accent? Enn kitsoz ki fondamental par rapport ar Royaume Bondié—role ki Jésus ena dan projet Bondié.
5. Dan livre Romains, lor ki kitsoz ki tou bann dimoune bizin, Paul ti mette l’accent?
5 Tou dimoune bizin gagne enn connaissance lor Jésus ek mette zot la foi en li. Dan livre Romains, Paul ti koz lor la. Enn tipé avant, li ti ecrire concernant “Bondié, ar ki mo rann enn service sacré avek mo l’esprit, en seki concerne la bonne nouvelle lor so garson.” Li ti ajouté: “Mo pa honté a cause la bonne nouvelle; avredir li puissance Bondié pou ki tou dimoune ki ena la foi kapav gagne la vie sauve.” Plitar li ti faire reference ar lepok kan “Bondié, par Christ Jésus, pou juge seki bann dimoune pé cachiette, dapré la bonne nouvelle ki mo annoncé.” Ek li ti dire: “Depuis Jérusalem ek bann pays tout autour ziska Illyrie, mo ti preche la bonne nouvelle concernant Christ, a fond.”a (Rom. 1:9, 16; 2:16; 15:19) Dapré ou, kifer eski kan li ti ecrire bann Romain, Paul ti mette l’accent lor Jésus Christ?
6, 7. Ki nou kapav dire concernant commencement congregation Rome ek bann ki ti forme partie ladan?
6 Nou pa koné couma congregation dan Rome ti commencé. Eski bann Juif ou-soit bann prosélyte ki ti present pendant Pentecôte l’an 33 nou lepok, ti vinn bann chretien ek zot ti retourne Rome? (Actes 2:10) Ou-soit eski bann chretien ki ti bann marchand ek bann voyageur ti preche la verité dan Rome? N’importe couma sa ti arrivé, nou koné ki vers 56 nou lepok, kan Paul ti ecrire sa livre-la, sa congregation-la ti deja etabli depuis longtemps. (Rom. 1:8) Ki bann dimoune ki ti forme partie dan sa congregation-la?
7 Certain ti bann Juif. Paul ti envoye compliment Andronicus ek Junias ek li ti appel zot “mo bann famille.” Li parette ki bannla ti so bann famille, ek aussi bann Juif. Aquila, ki ti faire bann la tente dan Rome, ek so madame, Priscille, zot aussi zot ti bann Juif. (Rom. 4:1; 9:3, 4; 16:3, 7; Actes 18:2) Mais, li parette ki beaucoup parmi bann frere ek soeur ki Paul ti passe so bonjour, ti bann non-Juif. Kitfois, ti ena certain ki ti “dan lakaz César,” setadir bann esclave César ek bann ti fonctionnaire.—Phil. 4:22; Rom. 1:6; 11:13.
8. Ar ki situation difficile, bann chretien dan Rome ti faire face?
8 Chaque chretien dan Rome ti faire face ar enn situation difficile, ek nou aussi pareil. Guetté couma Paul ti decrire sa: “Tou dimoune inn faire peché ek zot pa reussi arrive ziska la gloire Bondié.” (Rom. 3:23) Li clair ki tou bann dimoune ki Paul ti ecrire ti bizin reconette ki zot faire peché ek ki zot ti bizin ena la foi dan moyen ki Bondié ti mette en place pou reglé sa situation-la.
Bann dimoune bizin reconette ki zot faire peché
9. Lor ki resultat ki ena enn rapport avek la bonne nouvelle, Paul ti attire l’attention?
9 Au commencement lettre ki li ti ecrire bann Romain, l’apotre Paul ti koz lor resultat extraordinaire ki ena enn rapport avek la bonne nouvelle ki li ti pé contigne mentionné. Li ti dire: “Mo pa honté a cause la bonne nouvelle; avredir li puissance Bondié pou ki tou dimoune ki ena la foi kapav gagne la vie sauve, bann Juif avant ek bann Grec aussi.” Oui, ti ena enn possibilité ki bann dimoune gagne la vie sauve. Mais, la foi ti necessaire, ek sa li en accord avek enn verité ki trouve dan Habaqouq 2:4 ek ki Paul inn reprend: “Sa kikenn ki juste-la—par la foi li pou vive.” (Rom. 1:16, 17; Gal. 3:11; Héb. 10:38) Mais couma eski la bonne nouvelle ki kapav faire bann dimoune gagne la vie sauve, ena enn rapport avek sa verité-la: “Tou dimoune inn faire peché”?
10, 11. Kifer eski l’idée ki trouve dan Romains 3:23, li pa bizarre pou certain mais pou lezot li bizarre?
10 Avant ki enn dimoune kapav developpe la foi ki pou faire li gagne la vie sauve, li bizin reconette ki li faire peché. Bann ki croire dan Bondié depuis tipti ek ki konn la Bible, zot pa pou trouve sa l’idée-la bizarre. (Lire Ecclésiaste 7:20.) Ki zot d’accord lor la ou-soit zot ena bann doute, au moins zot ena enn l’idée lor seki Paul ti pé rod faire comprend kan li ti dire: “Tou dimoune inn faire peché.” (Rom. 3:23) Pourtant, kan nou pé accompli nou ministere, nou kapav joinde beaucoup dimoune ki pa comprend sa bann parole-la.
11 Dan certain pays, bann dimoune en general pa grandi avek l’idée ki zot finn né avek peché, ki zot finn herite peché. Li vrai ki enn dimoune coumsa, kitfois realisé ki li faire bann erreur, ki li ena bann defaut, ek ki kitfois li’nn faire certain mauvais kitsoz. Ek li remarké ki lezot aussi dan mem situation ki li. Mais, a cause l’education ki li’nn gagné, li pa arrivé bien comprend kifer li ek lezot dimoune zot coumsa. En realité, dan certain langage, si ou dire enn dimoune ki li faire peché, lezot kapav pensé ki ou pé dire ki sa dimoune-la li’nn faire enn kitsoz ki kont la loi. Alors li clair ki enn dimoune ki’nn gagne enn l’education coumsa, kitfois pa pou accepté desuite ki li enn kikenn ki faire peché dan sens ki Paul ti pé rod dire.
12. Kifer eski beaucoup pa croire ki tou dimoune faire peché?
12 Mem dan bann pays kot la chretienté ena enn l’influence, beaucoup pa accepté l’idée ki nou faire peché. Kifer? Mem si zot al l’eglise de temps en temps, zot considere recit la Bible concernant Adam ek Ève zis couma enn zistoire ki’nn inventé. Lezot grandi dan enn famille ki pa croire dan Bondié, alors, zot pa sur ki Bondié vrai-mem existé. Zot pa comprend couma enn Kikenn ki ena Tout Pouvoir kapav etabli bann principe moral pou bann dimoune ek kan zot pa reussi obeir sa bann principe-la sa vedir ki zot faire peché. Dan enn sens, zot pareil couma bann dimoune dan premier siecle ki Paul ti decrire couma bann ki “pa ti ena okenn l’esperance” ek ki “ti sans Bondié dan le monde.”—Éph. 2:12.
13, 14. (a) Cite enn raison kifer bann ki pa croire dan Bondié ek dan peché zot pena okenn excuse. (b) Parski beaucoup pa finn croire dan Bondié, kot-sa finn amenn zot?
13 Dan lettre ki li ti ecrire bann Romain, Paul cite deux raison kifer enn l’education coumsa li pa kapav enn excuse ni dan sa lepok-la, ni zordi. Premier raison c’est ki creation li-mem rann temoignage ki ena enn Createur. (Lire Romains 1:19, 20.) Sa li en accord avek seki Paul ti ecrire bann Hébreu, alors ki li ti dan Rome: “Tou lakaz inn construire par enn kikenn, mais Celui ki finn crée tou kitsoz, c’est Bondié.” (Héb. 3:4) Sa raisonnement-la attire l’attention ki ena enn Createur ki’nn construire, ou-soit ki’nn crée l’univers en entier.
14 Alors Paul ti base li lor bann raison bien solide kan, dan so lettre, li ti dire bann Romain ki n’importe kisannla—parmi ti ena bann Israélite dan le passé—ki ti adore bann zimage ki pena la vie, li “pena okenn excuse.” Nou kapav dire mem kitsoz pou bann zom ek bann femme ki ti cedé devant bann pratik sexuel immoral ki al kont seki naturel pou zot lekor. (Rom. 1:22-27) Paul ti tire sa conclusion-la: “Bann Juif pareil couma bann Grec, zot tou zot enba peché.”—Rom. 3:9.
Enn ’temoin’
15. Kisannla ena enn conscience, ek ki l’effet sa ena lor zot?
15 Livre Romains identifié enn lot raison kifer bann dimoune bizin reconette ki zot faire peché ek ki zot bizin enn moyen pou sorti dan sa situation difficile-la. Concernant code la loi ki Bondié ti donne bann Israélite dan le passé, Paul ti ecrire: “Tou bann ki faire peché enba la loi, pou jugé par la loi.” (Rom. 2:12) Pou contigne so raisonnement, li ti dire ki bann dimoune dan tou nation ou-soit tou race ki pa konn sa code la loi-la souvent “par zot-mem zot faire bann kitsoz ki ena dan la loi.” Kifer eski sa bann dimoune-la bien souvent condamne bann kitsoz couma relation sexuel entre bann membre enn famille, crime ek kokin? Paul ti dire pou ki raison: zot ena enn conscience.—Lire Romains 2:14, 15.
16. Kifer kan nou ena enn conscience sa pa vedir ki nou kapav evite faire peché?
16 Pena doute ki surement ou finn trouvé ki mem si enn dimoune ena enn conscience ki fonctionne couma enn temoin en li-mem, sa pa vedir ki dimoune-la pou ecoute so conscience. L’exemple bann Israélite dan le passé montré nou sa. Bondié ti donne bann Israélite enn conscience ek bann la loi bien precis ki ti condamne vol ek l’adultere. Mais malgré sa, bien souvent zot pa ti obeir ni zot conscience ni la Loi Jéhovah. (Rom. 2:21-23) A cause sa, zot ti coupable ek bien sur zot ti faire peché parski zot pa ti reussi obeir bann principe Bondié ek faire so volonté. Sa ti bien affecté zot relation avek zot Createur.—Lév. 19:11; 20:10; Rom. 3:20.
17. Ki l’encouragement nou trouvé dan livre Romains?
17 Seki nou finn examiné dan livre Romains kapav donne nou enn mauvais zimage lor condition bann dimoune devant Tout-Puissant, parmi ena nou condition aussi. Mais Paul pa arrete la-mem. Li ti cite bann parole David ki trouve dan Psaume 32:1, 2, kan li ti ecrire: “Heureux bann dimoune ki zot bann action ki kont la loi finn pardonné ek ki zot bann peché finn couvert; heureux sa zom ki Jéhovah pa pou prend compte so peché dan okenn fason.” (Rom. 4:7, 8) Oui, Bondié finn donne nou enn moyen pou ki nou kapav gagne pardon nou bann peché sans ki sa al kont so bann la loi ki juste.
La bonne nouvelle lor Jésus: enn l’aspect bien important nou message
18, 19. (a) Lor ki l’aspect la bonne nouvelle Paul ti mette l’accent dan livre Romains? (b) Pou gagne bann benediction ki Royaume Bondié pou amené, ki nou bizin reconette?
18 Kan ou pense lor disposition ki Jéhovah finn prend, pena doute ki ou kapav dire: “Sa c’est vrai-mem enn bon nouvelle!” Sa rappel nou enn l’aspect la bonne nouvelle lor ki Paul ti mette l’accent dan livre Romains. Couma ti mentionné avant, Paul ti ecrire: “Mo pa honté a cause la bonne nouvelle; avredir li puissance Bondié pou ki tou dimoune ki ena la foi kapav gagne la vie sauve.”—Rom. 1:15, 16.
19 Sa bonne nouvelle-la mette l’accent lor role ki Jésus ena dan realisation projet Bondié. Paul ti kapav attann avek impatience “jour ki Bondié, par Christ Jésus, pou juge seki bann dimoune pé cachiette, dapré la bonne nouvelle.” (Rom. 2:16) Kan li ti dire sa, li pa ti pé donne “royaume Christ ek Bondié” ou-soit seki Bondié pou faire par moyen so Royaume, moins l’importance. (Éph. 5:5) Mais li ti montré ki pou nou kapav vive ek profite bann benediction ki pou ena kan Royaume Bondié pou dirigé, nou bizin reconette (1) nou condition en tant ki bann dimoune ki faire peché devant lizié Bondié ek (2) kifer nou bizin ena la foi en Jésus Christ pou nou gagne pardon nou bann peché. Kan enn dimoune arrivé comprend ek accepté sa bann kitsoz ki forme partie dan projet Bondié-la ek li trouvé couma sa donne li enn l’espoir, lerla vrai-mem li kapav dire: “Oui, vrai-mem c’est enn bon nouvelle!”
20, 21. Dan nou ministere, kifer nou bizin garde dan nou l’esprit la bonne nouvelle lor ki livre Romains mette l’accent, ek ki resultat nou kapav attann pou gagné?
20 Sans okenn doute, nou bizin garde sa l’aspect concernant la bonne nouvelle-la dan nou l’esprit kan nou pé accompli nou ministere chretien. Paul ti faire reference ar Jésus kan li ti cite bann parole Isaïe: “Enn dimoune ki mette so la foi en li, pa pou deçu.” (Rom. 10:11; Is. 28:16) Beaucoup dimoune ki ena enn connaissance lor seki la Bible dire concernant peché, kitfois konn message fondamental lor Jésus. Mais pou lezot, sa message-la kapav parette nouveau, enn kitsoz ki zot pa koné ou-soit ki en general bann dimoune ki dan zot culture pa croire. A mesure ki sa bann dimoune-la commence croire en Bondié ek mette zot confiance dan bann l’Ecriture, nou pou bizin explik zot role ki Jésus ena. Prochain lartik pou montré couma Romains chapitre 5 developpe sa l’aspect concernant la bonne nouvelle-la. Pena doute ki ou pou trouvé ki sa l’etude-la kapav aide ou beaucoup dan ou ministere.
21 Nou gagne enn grand satisfaction kan nou aide bann dimoune ki ena enn leker sincere pou comprend la bonne nouvelle ki mentionné plusieurs fois dan livre Romains, la bonne nouvelle ki avredir “puissance Bondié pou ki tou dimoune ki ena la foi kapav gagne la vie sauve.” (Rom. 1:16) En plus ki nou pou gagne sa satisfaction-la, nou pou trouve lezot dimoune ena mem sentiment ki Paul ti exprimé dan Romains 10:15: “Ala zot joli bann lipié bann ki annonce bon nouvelle lor bann bon kitsoz!”—Is. 52:7.
[Note]
a Nou trouve sa bann mem l’expression-la dan lezot livre inspiré.—Marc 1:1; Actes 5:42; 1 Cor. 9:12; Phil. 1:27.
Eski ou rappel?
• Lor ki l’aspect la bonne nouvelle livre Romains mette l’accent?
• Ki verité nou bizin aide lezot pou comprend?
• Ki bann benediction nou-mem ek lezot dimoune kapav gagné grace a “la bonne nouvelle concernant Christ”?
[L’encadré page 16]
La bonne nouvelle lor ki livre Romains mette l’accent implik role bien important ki Jésus ena dan projet Bondié
[Zimage page 17]
Nou tou nou finn né avek enn defaut ki amenn la mort—peché!