Ki été repos Bondié?

“Reste encore enn repos sabbat pou peuple Bondié.”​—HÉB. 4:9.

1, 2. Ki nou kapav aprann dan Genèse 2:3 ek ki bann question nou pou reponn?

DEPUIS premier chapitre Genèse, nou aprann ki pendant six jour symbolik, Bondié ti prepare la terre pou bann dimoune resté. Sa bann jour-la pa ti bann jour 24 heure, mais bann periode le temps beaucoup pli longue. A la fin sakenn sa bann periode-la, Bondié ti dire: “Ek ti ena enn soir ek ti ena enn gramatin.” (Gen. 1:5, 8, 13, 19, 23, 31) Selman, en rapport avek septieme jour, la Bible dire: “Bondié ti beni septieme jour ek ti faire li vinn sacré, parski sa jour-la, Bondié pé reposé ar tou so travail ki Li finn crée.”​—Gen. 2:3.

² Remarké ki verbe “pé reposé” vedir ki Bondié ti encore toujours pé reposé dan sa lepok-la. Sa vedir ki, kan Moïse ti ecrire livre Genèse en 1513 avant nou lepok, ti encore toujours dan septieme jour​—“jour” repos Bondié. Mais eski dan nou lepok Bondié encore toujours pé reposé? Si oui, eski nou kapav rente dan sa repos-la? Li bien important ki nou konn reponse sa bann question-la.

Eski Jéhovah encore “pé reposé”?

3. Couma seki Jésus ti dire dan Jean 5:16, 17, montré ki septieme jour ti pé contigné dan premier siecle?

³ Ena deux raison kifer nou kapav dire ki ti toujours septieme jour dan lepok Jésus ek bann premier chretien. Nou trouve premier raison dan seki Jésus ti dire ar certain so bann l’ennemi. Zot ti en colere parski Jésus ti gueri bann dimoune jour sabbat. Zot ti pensé ki li ti mauvais pou faire guerison jour sabbat parski dapré la Loi Moïse, sabbat ti enn jour repos kot fodé pa travail. Pou reponn zot, Jésus ti dire: “Mo Papa inn contigne travail ziska asterla, ek moi aussi mo pé contigne travail.” (Jean 5:16, 17) Ki li ti pé rod dire? Coumadir Jésus ti pé rod dire zot: ’Mo Papa ek moi nou pé faire mem travail. Mo Papa inn travail pendant so sabbat ki’nn dure plusieurs millier l’année, ek Li encore toujours pé travail, alors mo kapav travail pendant sabbat.’ Bann parole Jésus montré ki dan so lepok, ti encore toujours septieme jour, setadir jour repos Bondié en rapport avek creation bann kitsoz lor la terre. Mais Bondié ti encore pé travail pou realise so projet pou bann dimoune ek la terre.a

4. Par seki Paul ti dire, couma nou koné ki septieme jour ti pé contigné dan so lepok?

⁴ Ena enn deuxieme raison kifer nou koné ki dan lepok Jésus ek bann premier chretien, zot ti encore dan septieme jour. L’apotre Paul ti koz lor repos Bondié dan lettre ki li ti ecrire bann Hébreux. Dan chapitre quatre, avant ki li ti cite Genèse 2:2, li ti ecrire: “Parski nou ki ti ena la foi, nou pé rente vrai-mem dan sa repos-la.” (Héb. 4:3, 4, 6, 9) Alors, dan lepok Paul, ti toujours septieme jour. Kan sa jour repos-la pou fini?

5. Ki l’objectif septieme jour ena, ek kan projet Bondié pou realisé dan enn fason complet?

⁵ Pou reponn sa question-la, nou bizin rappel l’objectif sa septieme jour-la. Genèse 2:3 explik sa l’objectif-la: “Bondié ti beni septieme jour ek ti faire li vinn sacré.” Jéhovah ti faire sa jour-la vinn sacré,’ setadir saint, ou-soit separé, pou ki Li complete so projet. Dapré projet Bondié, Li ti envie ki bann dimoune obeissant reste lor la terre, prend li soin ek tou seki ena lor la. (Gen. 1:28) C’est pou realise sa projet-la ki Jéhovah ek Jésus Christ, ki “Seigneur sabbat,” “ti contigne travail ziska asterla.” (Mat. 12:8) Jour repos Bondié pou contigné ziska ki so projet en rapport avek sa jour-la realisé dan enn fason complet, a la fin Regne mille an Christ.

Pa “tombe dan mem l’exemple desobeissance”

6. Ki bann l’exemple donne nou enn l’avertissement, ek ki leson nou pou aprann ar sa bann l’exemple-la?

⁶ Bondié ti explik Adam et Ève so projet dan enn fason bien clair, mais zot pa ti agir en accord avek sa projet-la. Bien sur, a part Adam ek Ève, ti ena encore plusieurs million dimoune ki ti desobeir Bondié. Mem peuple Bondié, bann Israélite, ti desobeir Li plusieurs fois. Paul ti averti bann chretien dan so lepok ki certain parmi zot ti pou kapav tombe dan mem piege ki bann Israélite. Li ti ecrire: “Alors anou faire tou nou possible pou rente dan sa repos-la, pangar enn kikenn tombe dan sa mem l’exemple desobeissance-la.” (Héb. 4:11) Seki Paul ti dire montré ki bann dimoune desobeissant pa kapav rente dan repos Bondié. Ki sa vedir pou nou? Si nou rebelle kont projet Bondié dan n’importe ki fason, eski li possible ki nou pa rente dan so repos? Li bien important ki nou konn reponse sa question-la, ek nou pou examine sa plus dan sa lartik-la. Mais avant, anou koz lor mauvais l’exemple ki bann Israélite inn laissé, ek anou guetté kifer zot pa finn rente dan repos Bondié.

“Zot pa pou rente dan mo repos”

7. Ki l’objectif Jéhovah ti ena kan Li ti delivré bann Israélite dan l’Égypte, ek ki zot ti bizin faire?

⁷ En 1513 avant nou lepok, Jéhovah ti dire Moïse ki projet Li ti ena pou bann Israélite. Bondié ti dire: “Mo pé desann pou delivré zot dan la main bann Égyptien ek pou faire zot sorti dan sa pays-la [l’Égypte] ek al dan enn bon pays ki grand, enn pays kot di-lait ek di-miel coulé.” (Ex. 3:8) Jéhovah ti ena projet pou delivré bann Israélite “dan la main bann Égyptien” avek l’objectif pou faire zot vinn so peuple, pareil couma Li ti promette zot ancetre Abraham. (Gen. 22:17) Bondié ti donne bann Israélite bann la loi ki ti pou aide zot pou ena la paix avek Li ek vinn so bann camarade. (Is. 48:17, 18) Li ti dire bann Israélite: “Si zot obeir tou seki mo dire zot faire, ek zot garde mo l’alliance [couma inn ecrire dan la Loi], lerla vrai-mem zot pou vinn mo di-bien special parmi tou bann lezot peuple, parski la terre entier pou moi.” (Ex. 19:5, 6) Sa vedir ki bann Israélite ti pou kapav vinn peuple Bondié zis si zot ti obeir so bann la loi.

8. Couma la vie bann Israélite ti pou été si zot ti obeir Bondié?

⁸ Maziné couma la vie bann Israélite ti pou été si zot ti obeir Jéhovah! Jéhovah ti promette zot ki Li ti pou beni zot karo, zot plantation raisin, zot bann troupeau zanimo. Li ti aussi promette ki Li ti pou protege zot kont zot bann l’ennemi. (Lire 1 Rois 10:23-27.) Kan Jésus ti pou vini, li ti pou trouve bann Israélite couma enn nation independant, ki pa ti pou dominé par bann Romains. Jéhovah ti envie ki nation Israël vinn enn bon l’exemple pou bann lezot nation. Li ti envie ki zot tou comprend bien ki bann dimoune ki obeir Li, vrai Bondié, pou gagne bann benediction.

9, 10. (a) Kifer desir ki bann Israélite ti ena pou retourne l’Égypte, ti mauvais? (b) Si bann Israélite ti retourne l’Égypte, ki l’effet sa ti pou ena lor zot l’adoration pou Jéhovah?

⁹ Bann Israélite ti ena enn grand privilege​—laisse Jéhovah servi zot pou realise so projet. Zot ti pou kapav gagne bann benediction Jéhovah pou zot-mem ek aussi permette ki tou bann famille lor la terre gagne sa bann benediction-la. (Gen. 22:18) Mais, la plupart bann Israélite pa ti considere sa couma enn privilege ki Jéhovah ti choisir zot pou vinn so nation ek ki zot ti kapav vinn enn l’exemple pou lezot nation. Zot ti mem dire ki zot ti envie retourne l’Égypte! (Lire Nombres 14:2-4.) Mais si zot ti retourne l’Égypte, zot pa ti pou kapav adore Jéhovah dan fason ki Li ti envie ek vinn enn l’exemple pou lezot nation. Si zot ti ré-vinn bann esclave dan l’Égypte, zot pa ti pou libre pou obeir la Loi Bondié ek gagne pardon pou zot bann peché. Kan zot ti dire ki zot ti envie retourne l’Égypte, zot ti pé pense zis zot tousel. Zot pa ti pé pense Bondié, ni so projet. A cause sa, Jéhovah ti dire lor zot: “Mo ti ena degout pou sa generation-la, ek mo ti dire: ’Zot leker pé touletan suive enn mauvais chemin, ek zot pa finn aprann pou konn mo bann chemin.’ Alors, dan mo colere mo finn faire serment: ’Zot pa pou rente dan mo repos.’”​—Héb. 3:10, 11; Ps. 95:10, 11.

¹⁰ Kan zot ti pé rod retourne dan l’Égypte, bann Israélite ti montré ki zot pa ti apprecié bann benediction spirituel ki Jéhovah ti pé donne zot. Au contraire, sa bann Israélite desobeissant-la ti prefere poireau, zoignon, ek l’ail ki zot ti pé gagné dan l’Égypte. (Nomb. 11:5) Zot ti pareil couma Ésaü ki pa ti donne enn grand l’importance so droit premier-né ek ti vann sa pou enn l’assiette mangé.​—Gen. 25:30-32; Héb. 12:16.

11. Bann Israélite dan lepok Moïse pa ti ena la foi en Jéhovah. Ki l’effet sa ti ena lor projet Bondié?

¹¹ Selman, mem si bann Israélite ki ti quitte l’Égypte pa ti montré zot la foi en Jéhovah, Li ti ”contigne travail” pou realise projet ki Li ti ena pou sa nation-la. Bann zenfant Israélite ti plus obeissant ki zot parent. Zot ti obeir commandement Jéhovah pou rente dan la Terre promise, ek zot ti prend sa pays-la. Dan Josué 24:31, nou lire: “Israël ti servi Jéhovah pendant toute longue la vie Josué ek pendant toute longue la vie bann ancien ki ti contigne vive apré Josué ek ki finn konn tou seki Jéhovah finn faire, seki Li’nn faire pou Israël.”

12. Couma nou koné ki li possible pou bann chretien rente dan repos Bondié zordi?

¹² Mais sa bann Israélite obeissant-la ti vinn vié ek ti mort. Generation ki ti remplace zot “pa ti konn Jéhovah ni seki Li ti’nn faire pou Israël.” A cause sa, “bann Israélite ti commence faire seki mauvais devant lizié Jéhovah ek zot ti commence servi bann Baal.” (Juges 2:10, 11) Parski bann Israélite ti desobeir, zot ti nepli en paix avek Bondié. Alors, la Terre promise pa ti vinn couma enn place ’pou reposé’ pou zot. Plitar, Paul ti ecrire: “Si Josué ti’nn dirige zot dan enn place pou zot reposé, Bondié apré, pa ti pou koz lor enn lot jour. Alors reste encore enn repos sabbat pou peuple Bondié.” (Héb. 4:8, 9) “Peuple Bondié” ki Paul ti pé kozé ti bann chretien. Eski sa vedir ki bann chretien ti kapav rente dan repos Bondié? Oui, bien sur, bann Juif ek bann non-Juif toulé-deux!

Certain pa ti reussi rente dan repos Bondié

13, 14. (a) Ki bann Israélite ti bizin faire pou rente dan repos Bondié dan lepok Moïse? (b) Ki bann premier chretien ti bizin faire pou rente dan repos Bondié dan lepok Paul?

¹³ Paul ti ecrire bann chretien hébreu parski certain ti pé agir kont projet Bondié. (Lire Hébreux 4:1.) Couma? Zot ti pé toujours obeir certain kitsoz ki ti ena dan la Loi Moïse. Li vrai ki pendant apepré 1,500 an, peuple Bondié ti bizin obeir la Loi Moïse pou faire Bondié plaisir. Selman, apré la mort Jésus, zot ti nepli bizin sa la Loi-la encore. Certain chretien pa ti accepté sa ek zot ti persisté pou croire ki zot ti bizin contigne obeir certain partie dan la Loi.b

¹⁴ Pou sa bann chretien ki ti persisté pou suive la Loi-la, Paul ti expliké ki Jésus ti enn pli bon Grand Pretre ki n’importe ki grand pretre imparfait ki ti ena. Li ti montré ki nouvelle alliance ti superieur ar l’alliance ki Bondié ti faire avek nation Israël. Li ti aussi montré ki grand temple Jéhovah “ti pli grand ek pli parfait” ki temple ki “ti faire avek la main.” (Héb. 7:26-28; 8:7-10; 9:11, 12) Paul ti servi l’exemple sabbat, ki ti forme partie dan la Loi Moïse, pou expliké couma bann chretien kapav rente dan jour repos Jéhovah. Li ti ecrire: “Reste encore enn repos sabbat pou peuple Bondié. Parski sa kikenn ki finn rente dan repos Bondié-la, finn reposé li aussi ar bann travail ki li’nn faire, pareil couma Bondié finn reposé ar So bann travail.” (Héb. 4:8-10) Sa bann chretien juif-la ti bizin arrete pensé ki zot ti kapav gagne faveur Bondié ar “bann travail ki [zot ti] faire” dapré la Loi Moïse. Depuis la Pentecôte l’an 33 nou lepok, Bondié donne so faveur avek generosité, bann dimoune ki ena la foi en Jésus Christ.

15. Kifer l’obeissance important si nou envie rente dan repos Bondié?

¹⁵ Kifer bann Israélite dan lepok Moïse pa ti rente dan la Terre promise? C’est parski zot ti desobeir Jéhovah. Kifer certain chretien dan lepok Paul pa ti rente dan repos Bondié? Parski zot aussi zot ti desobeir. Zot pa ti accepté ki la Loi ti’nn realise so l’objectif ek ki Jéhovah ti pé dirige so peuple dan enn lot fason.

Rente dan repos Bondié zordi

16, 17. (a) Couma bann chretien kapav rente dan repos Bondié zordi? (b) Ki nou pou examiné dan prochain lartik?

¹⁶ Zordi, personne parmi nou pa croire ki bann chretien bizin obeir la Loi Moïse pou zot sauvé. Seki Paul ti inspiré pou ecrire bann Éphésiens, li bien clair: “En realité, c’est par sa faveur ki personne pa merité-la ki zot finn sauvé par la foi; ek c’est pa par zot-mem, mais c’est don ki Bondié donné. Non, sa li pa arrive par bann action, pou ki personne pena okenn raison pou glorifié li-mem.” (Éph. 2:8, 9) Alors, couma bann chretien kapav rente dan repos Bondié zordi? Jéhovah ti choisir septieme jour​—so jour repos​—pou Li realise dan enn fason extraordinaire, projet ki Li ti ena pou la terre ek pou bann dimoune. A travers so l’organisation, Jéhovah faire nou konn so projet ek seki Li envie nou faire. Nou kapav rente dan repos Jéhovah si nou obeir Li ek nou cooperé pou realise so projet, pareil couma so l’organisation faire nou koné.

¹⁷ De lot coté, si nou pa obeir l’esclave fidele et avisé ou-soit nou choisir pou obeir zis seki nou pensé important, lerla nou pou agir kont projet Jéhovah. Ek si nou agir kont projet Jéhovah, nou pou perdi nou bann bon relation avek Li. Dan prochain lartik, nou pou koz lor certain situation ki donne nou l’occasion pou montré ki nou bann dimoune obeissant. Nou pou trouvé couma bann decision ki nou prend dan sa bann situation-la kapav montré si nou finn vrai-mem rente dan repos Bondié.

[Notes]

Question lor ki ou kapav medité

• Ki l’objectif Bondié ti ena en rapport avek septieme jour, ou-soit so jour repos?

• Couma nou koné ki nou encore toujours dan septieme jour zordi?

• Kifer bann Israélite dan lepok Moïse ek certain chretien dan lepok Paul pa ti rente dan repos Bondié?

• Couma nou kapav rente dan repos Bondié zordi?

[L’encadré page 27]

Nou kapav rente dan repos Jéhovah zordi si nou obeir Li ek nou cooperé pou realise so projet, pareil couma so l’organisation faire nou koné

[Zimage page 26, 27]

Ki bann serviteur Bondié bizin contigne faire zordi pou rente dan so repos?