Contigne favorise la paix
“Anou contigne faire bann kitsoz ki favorise la paix.”—ROM. 14:19.
1, 2. Kifer ena la paix parmi bann Témoins de Jéhovah?
DAN le monde zordi, li bien difficile pou trouve vrai la paix. Mem bann dimoune ki dan mem pays ek ki koz mem langue souvent zot divisé parski zot pa dan mem religion, pa dan mem parti politik, ek zot pena mem position dan la societé. Par kont, ena la paix parmi bann serviteur Jéhovah, malgré ki zot sorti dan “tou nation, ek tribu, ek peuple ek langue.”—Rév. 7:9.
2 C’est pa par hasard si en general ena la paix parmi nou. Raison principal c’est parski nou “profite la paix avek Bondié” grace a nou la foi dan so Garson, ki’nn verse so di-sang pou couvert nou bann peché. (Rom. 5:1; Éph. 1:7) En plus, vrai Bondié donne so l’esprit saint so bann serviteur ki fidele, ek parmi fruit sa l’esprit-la ena la paix. (Gal. 5:22) Enn lot raison kifer nou ena la paix ek l’unité parmi nou c’est parski nou “pa faire partie dan le monde.” (Jean 15:19) Nou pa prend part okenn parti politik. Nou ’finn forge nou bann l’epée ek finn faire sa vinn bann zouti pou travail la terre,’ a cause sa, nou pa participe dan okenn la guerre civil ou-soit international.—Is. 2:4.
3. (a) La paix ki nou ena parmi nou permette nou pou faire ki kitsoz? (b) Ki nou pou examiné dan sa lartik-la?
3 La paix ki nou ena entre nou, li pa vedir ki nou zis pa faire di-tort nou bann frere, li al pli loin ki sa. Mem si dan congregation Témoins de Jéhovah kot nou été, ena bann dimoune different race ek culture, nou ’content nou camarade.’ (Jean 15:17) Nou la paix permette nou pou “faire di-bien envers tou dimoune, mais surtout envers nou bann frere dan la foi.” (Gal. 6:10) Nou bizin accorde enn grand valeur ar nou paradis spirituel kot ena la paix ek nou bizin protege li. Alors, anou guetté couma nou kapav contigne favorise la paix dan congregation.
Kan nou “faire erreur”
4. Ki nou kapav faire pou contigne favorise la paix kan nou finn offense enn dimoune?
4 Disciple Jacques ti ecrire: “Nou tou, souvent nou faire erreur. Si enn dimoune pa faire erreur kan li kozé, li enn dimoune parfait.” (Jacq. 3:2) A cause sa, nou kapav sur ki pou ena bann probleme ek bann malentendu entre bann chretien. (Phil. 4:2, 3) Pourtant, nou kapav reglé sa bann probleme-la, sans troublé la paix dan congregation. Par exemple, anou guette conseil ki nou bizin appliké si nou rann-nou compte ki nou finn offense enn kikenn.—Lire Matthieu 5:23, 24.
5. Couma nou kapav favorise la paix kan enn kikenn finn offense nou?
5 Ki nou pou faire si enn kikenn inn offense nou? Eski nou bizin attann ki li vinn demann nou excuse? Dan 1 Corinthiens 13:5 li dire: “[L’amour] pa garde enn compte pou tou di-tort ki’nn faire li.” Kan enn dimoune offense nou, nou contigne favorise la paix kan nou pardonné ek nou blié, setadir kan nou ’pa garde enn compte pou tou di-tort ki faire nou.’ (Lire Colossiens 3:13.) Li pli bon ki nou agir dan sa fason-la kan nou gagne bann ti probleme dan nou la vie toulé-jour, parski sa favorise bann bon relation avek nou bann frere ek soeur ek nou l’esprit pou en paix. Enn proverbe ki rempli ar sagesse dire ki ’li enn beauté pou passe lor bann erreur.’—Prov. 19:11.
6. Ki nou bizin faire si enn kikenn inn offense nou ek nou pa pé kapav passe lor la?
6 Ki nou pou faire si enn kikenn inn offense nou ek nou pa pé kapav passe lor la? Li pa sage si nou fann sa dan zoreille tou dimoune. Sa qualité palab-la li zis menace la paix dan congregation. Ki nou kapav faire pou reglé sa probleme-la dan la paix? Matthieu 18:15 dire: “Si to frere commette enn peché, al devoile so faute entre toi ek li tousel. Si li ecoute toi, to finn gagne to frere.” Mem si Matthieu 18:15-17 applik ar bann peché grave, nou kapav suive principe ki trouve dan verset 15. Couma? Avek bonté, nou pou al guette sa dimoune ki finn offense nou-la ek nou pou essaye retabli la paix avek li.a
7. Kifer nou bizin reglé bann probleme bien vite?
7 L’apotre Paul ti ecrire: “Zot kapav en colere, mais pa faire peché; pa laisse soleil couché alors ki zot encore en colere, ek pa donne Satan okenn l’occasion.” (Éph. 4:26, 27) Jésus ti dire: “Tombe enn l’arrangement vite ar enn kikenn ki faire enn complainte kont toi . . . [dan] la cour.” (Mat. 5:25) Alors, pou favorise la paix, nou bizin reglé bann probleme bien vite. Kifer? Parski, si nou pa faire sa, probleme-la pou vinn pli grave ek lerla, li pou pareil couma enn blessure ki’nn infecté parski nou pa’nn soigne li vite. Fodé pa nou laisse l’orgueil, la jalousie, ou-soit enn trop grand l’attachement pou bann kitsoz materiel empeche nou reglé bann desaccord desuite.—Jacq. 4:1-6.
Kan plus ki enn dimoune impliké dan enn probleme
8, 9. (a) Ki different fason pensé ti existé dan congregation Rome dan premier siecle? (b) Ki conseil Paul ti donne bann chretien dan Rome concernant zot desaccord?
8 Parfois li arrivé ki pa zis deux dimoune ki impliké dan enn probleme, mais plusieurs dimoune. Sa ti arrivé avek bann chretien dan Rome. L’apotre Paul ti ecrire zot enn lettre inspiré. Ti ena enn desaccord entre bann chretien juif ek non-juif. Li parette ki certain dan congregation ti pé meprise bann ki ti ena enn conscience faible, setadir ki ti ena enn conscience trop strict. Sa bann dimoune-la ti pé mal juge lezot surtout lor bann kitsoz personnel. Ki conseil Paul ti donne congregation?—Rom. 14:1-6.
9 Paul ti conseil toulé-deux groupe chretien. Li ti dire bann ki ti comprend ki zot nepli enba la Loi mosaïk pou pa meprise zot bann frere. (Rom. 14:2, 10) Sinon, sa ti kapav faire bann chretien ki ti trouve sa degoutant pou mange bann kitsoz ki la Loi ti defann, tombé lor plan spirituel. Paul ti donne zot sa conseil-la: “Arrete detruire travail Bondié zis a cause enn mangé. Li bon ki to pa mange la viande, ou-soit ki to pa boire di-vin, ou-soit ki to pa faire nanyin ki pou faire to frere tombé.” (Rom. 14:14, 15, 20, 21) De lot coté, Paul ti conseil bann chretien ki ti ena enn conscience pli strict, pou pa juge certain ki ti ena enn fason pensé different. (Rom. 14:13) Li ti dire ’sakenn parmi zot, ki fodé pa li pense plus ki bizin lor li-mem.’ (Rom. 12:3) Apré ki li ti conseil toulé-deux groupe lor sa probleme-la, Paul ti ecrire: “Alors, anou contigne faire bann kitsoz ki favorise la paix ek bann kitsoz ki fortifié sakenn so camarade.”—Rom. 14:19.
10. Pareil couma congregation Rome dan premier siecle, ki bann chretien bizin faire pou reglé zot bann probleme?
10 Nou kapav sur ki congregation Rome ti accepté conseil ki Paul ti donne zot ek ti faire bann changement necessaire. Kan ena bann desaccord parmi bann chretien zordi, eski nou aussi nou pa bizin faire pareil, setadir reglé sa bann desaccord-la avek amour, ek avek l’humilité rod bann conseil biblik ek applik zot? Pareil couma bann chretien dan Rome, zordi bann ki gagne probleme entre zot, bizin faire bann changement pou zot kapav “reste en paix entre zot.”—Marc 9:50.
Kan bann ancien aide lezot
11. Ki precaution enn ancien bizin prend si enn chretien vinn koz ar li lor enn desaccord ki li finn gagné avek enn lot chretien?
11 Ki enn ancien pou faire si enn chretien envie koz avek li lor enn probleme ki li pé gagné avek enn membre so famille ou-soit avek enn lot chretien? Proverbes 21:13 dire: “N’importe kisannla ki bouche so zoreille kan li tann enn ti-dimoune plaigné, li aussi li pou demann l’aide ek personne pa pou reponn li.“ Li clair ki ancien-la pa pou “bouche so zoreille.” Selman, enn lot proverbe donne sa l’avertissement-la: “Premier [dimoune] ki kozé pou explik so cas, parette ena raison, ziska ki so l’adversaire commence questionne li.” (Prov. 18:17, New English Translation) Enn ancien bizin ecoute avek bonté, mais li bizin faire attention pou pa prend part sa kikenn ki’nn vinn raconte li so probleme-la. Apré ki li’nn fini ecoute so probleme, surement li pou demann sa dimoune ki’nn senti-li offensé-la si li finn koz sa ar sa kikenn ki’nn offense li-la. Ancien-la kapav aussi ré-guette certain kitsoz ki sa dimoune ki finn offensé-la kapav faire pou favorise la paix.
12. Cite bann l’exemple ki montré ki ena enn danger pou agir trop vite apré ki nou finn tann enn probleme.
12 Ena trois l’exemple biblik ki montré ki ena enn danger pou agir vite apré ki nou finn tann zis enn sel version enn probleme. Potiphar ti croire kan so madame ti raconte li ki Joseph ti rod viol li. Li ti bien en colere ek li ti jette Joseph dan prison. (Gen. 39:19, 20) Le roi David ti croire Tsiba, ki ti dire li ki so maitre Mephibosheth ti prend part bann l’ennemi David. David pa ti prend le temps pou reflechi ek ti dire li: “Guetté, tou seki pou Mephibosheth pé vinn pou toi.” (2 Sam. 16:4; 19:25-27) Le roi Artaxerxès ti gagne enn rapport ki bann Juif ti pé ré-construire muraille Jérusalem ek ki zot ti pré pou rebelle kont l’empire Perse. Le roi ti croire sa fausse rapport-la ek ti donne l’ordre ki tou construction ki ti ena dan Jérusalem arreté. A cause sa, bann Juif ti arrete travail ki zot ti pé faire lor temple Bondié. (Ezra 4:11-13, 23, 24) Bann ancien montré ki zot sage kan zot suive conseil ki Paul ti donne Timothée pou evite faire enn jugement avant ki zot finn tann tou lor enn probleme.—Lire 1 Timothée 5:21.
13, 14. (a) Ki nou bizin rappel concernant bann desaccord ki ena entre bann chretien? (b) Ki l’aide bann ancien gagné pou faire bann bon jugement concernant zot bann frere?
13 Mem si nou pensé ki nou koné ki finn arrivé kan deux dimoune finn gagne enn probleme, li important ki nou rappel seki sa verset-la dire: “Si enn kikenn pensé ki li’nn gagne connaissance lor enn kitsoz, li pa encore konn sa couma li ti bizin konn sa.” (1 Cor. 8:2) Eski vrai-mem nou konn tou bann detail ki finn crée sa probleme-la? Eski nou vrai-mem comprend par ki sa bann dimoune-la inn passé dan zot la vie? Kan bann ancien bizin juge enn zaffaire, li bien important ki zot pa laisse bann fausseté, ou-soit bann dimoune ki konn manipule lezot, ou-soit-mem bann rumeur, embete zot. Juge ki Jéhovah inn etabli, setadir Jésus Christ, li juge avek justice. Li pa “juge zis dapré seki parette devant so lizié, li pa pou corrige zis dapré seki so zoreille tendé.” (Is. 11:3, 4) Mais, Jésus laisse-li guidé par l’esprit Jéhovah. Pareil aussi pou bann ancien, Bondié guide zot par so l’esprit saint.
14 Bann ancien bizin prié pou gagne l’esprit saint Jéhovah avant ki zot juge enn probleme. Zot laisse l’esprit Bondié guide zot kan zot servi la Bible ek bann publication l’esclave fidele et avisé.—Mat. 24:45.
Eski nou bizin touletan favorise la paix?
15. Kan eski nou bizin dire bann ancien enn peché grave ki nou’nn koné?
15 En tant ki chretien, nou encouragé pou favorise la paix. Selman la Bible dire aussi: “Sagesse ki sorti la-haut li avant tou pur, apré li pacifik.” (Jacq. 3:17) Li pli important ki nou pur avant ki nou pacifik. Nou pur kan nou obeir bann principe moral lor la pureté ki Bondié inn etabli ek so bann principe ki juste. Si enn chretien inn koné ki enn lot chretien inn faire enn peché grave, li bizin encourage li pou al dire sa bann ancien. (1 Cor. 6:9, 10; Jacq. 5:14-16) Si sa chretien ki’nn faire sa peché-la pa al guette bann ancien, lerla sa chretien ki’nn konn sa peché-la, li, li bizin faire sa. Si li pa al guette bann ancien zis pou garde la paix avek sa chretien ki’nn faire peché-la, li pou complice dan so peché.—Lév. 5:1; lire Proverbes 29:24.
16. Ki nou kapav aprann ar seki Yéhou ti faire kan li ti joinde le roi Yehoram?
16 Enn recit ki ti implik Yéhou montré ki la justice Bondié passe avant la paix. Bondié ti envoye Yéhou pou faire So jugement lor famille le roi Ahab. Yehoram, garson Ahab ek Jézabel, ti enn mauvais le roi. Li ti pé conduire so char pou al joinde Yéhou ek li ti dire li: “Eski ena la paix Yéhou?” Ki reaction Yéhou ti ena? Yéhou ti reponn li: “Kot kapav ena la paix, tant ki ena fornication Jézabel to mama, ek tou bann sorcellerie ki li faire?” (2 Rois 9:22) Apré sa, Yéhou ti tire so fleche ek ti vise Yehoram dan so leker. Pareil couma Yéhou, bann ancien aussi bizin faire kitsoz. Fodé pa zot ferme lizié lor peché bann membre congregation ki contigne faire peché dan enn fason volontaire ek ki pa’lé repenti, zis pou garde la paix. Zot exclu sa bann dimoune-la pou ki congregation kapav contigne profite la paix avek Bondié.—1 Cor. 5:1, 2, 11-13.
17. Ki tou bann chretien bizin faire pou favorise la paix?
17 La plupart desaccord entre bann frere pa concerne bann peché grave kot bizin faire enn comité judiciaire. Alors, li pli bon ki nou passe lor faute lezot avek amour, pa vrai? Parole Bondié dire: “Enn kikenn ki passe lor enn peché, rod l’amour, mais enn kikenn ki contigne koz lor enn kitsoz, separe bann camarade.” (Prov. 17:9) Si nou obeir sa bann parole-la, sa pou aide nou tou pou preserve la paix dan congregation ek pou garde bann bon relation avek Jéhovah.—Mat. 6:14, 15.
Bondié beni bann ki favorise la paix
18, 19. Ki bann bienfait nou gagné kan nou favorise la paix?
18 Kan nou poursuive “bann kitsoz ki favorise la paix,” sa faire nou gagne beaucoup benediction. Kan nou imite fason agir Jéhovah, nou kapav ena enn relation bien proche avek Li. Nou aussi faire nou part pou favorise la paix ek l’unité dan nou paradis spirituel. Kan nou faire sa dan congregation, sa aide nou aussi pou trouve bann fason kot nou kapav favorise la paix avek bann dimoune ar ki nou preche “la bonne nouvelle lor la paix.” (Éph. 6:15) Nou pli bien preparé ’pou ena la douceur envers tou dimoune, pou controle nou-mem kan lezot faire nou di-tort.’—2 Tim. 2:24.
19 Rappel aussi ki pou “ena enn resurrection bann dimoune ki juste ek bann dimoune ki pa juste, toulé-deux.” (Actes 24:15) Kan sa l’esperance-la pou vinn enn realité lor la terre, plusieurs million dimoune different l’origine, caractere ek personnalité pou ressuscité. Sa bann dimoune-la ti vive different lepok, depuis bann dernier jour ziska “fondation le monde”! (Luc 11:50, 51) Li pou vrai-mem enn grand privilege pou enseigne bann ressuscité couma pou favorise la paix. Formation ki nou pé gagné asterla—pou vinn bann dimoune ki favorise la paix—pou vrai-mem enn grand l’aide pou nou dan sa lepok-la!
[Note]
a Nou pou gagne plus renseignement lor seki la Bible dire concernant bann peché grave couma bann palab ki gate reputation enn dimoune ek fraude, dan La Tour de Garde 15 octobre 1999, page 17-22.
Ki ou finn aprann?
• Couma nou kapav favorise la paix si nou finn offense enn dimoune?
• Ki nou bizin faire pou favorise la paix kan enn dimoune inn offense nou?
• Kifer li pa bon ki nou prend part enn dimoune ki’nn gagne probleme avek enn lot dimoune?
• Expliké kifer pa touletan ki nou bizin favorise la paix.
[Zimage page 25]
Jéhovah content bann ki pardonne lezot avek tou zot leker