Question bann lecteur
Ki mo bizin faire kan mo ena enn question lor enn kitsoz ki mo’nn lire dan la Bible ou-soit kan mo bizin enn conseil lor enn probleme personnel?
Dan Proverbes 2:1-5, sakenn parmi nou encouragé pou “contigne rod” l’intelligence ek bon jugement coumadir nou pé rod “bann tresor ki finn cachiette.” Sa vedir ki nou bizin faire tou seki nou kapav pou trouve bann reponse concernant nou bann question biblik ek bann solution pou nou bann probleme personnel. Couma nou kapav faire sa?
Livre École du ministère théocratique, page 33-38, montré nou couma faire bann recherche grace a bann zouti ki “l’esclave fidele et avisé” inn donne nou. (Mat. 24:45) Lor page 36, li explik nou couma pou servi l’Index des publications Watch Tower. Chaque l’Index divisé en deux partie, l’Index par sujet ek l’Index par verset la Bible. Sa aide nou pou faire bann recherche, soit par bann mot important, soit par bann verset la Bible ek lerla nou gagne enn la liste bann reference ki nou kapav guetté. Ou bizin ena patience kan ou faire recherche pou gagne enn reponse ou-soit enn guide precis lor seki ou bizin. Pa blié, ou pé rod “bann tresor ki’nn cachiette,” ek sa prend le temps ek zeffort pou trouvé.
Bien sur, ena bann sujet ek bann verset ki nou bann publication pa finn examiné directement. Mem kan ena enn commentaire ki finn faire lor enn certain verset la Bible, kitfois bann publication pa finn examine exactement sa question ki ou ena dan ou l’esprit-la. Ek aussi, certain recit dan la Bible faire nou pose bann question, parski la Bible pa donne tou ti detail. Ala kifer, nou pa kapav trouve bann reponse desuite pou chaque question ki nou posé. Dan sa cas-la, fodé pa nou faire bann supposition lor bann kitsoz ki nou pa kapav reponn, attention ki nou rente dan bann debat lor “bann question pou faire bann recherche au lieu ki [nou] gagne kitsoz avek Bondié en seki concerne la foi.” (1 Tim. 1:4; 2 Tim. 2:23; Tite 3:9) Ni filiale ni bureau mondial bann Témoins de Jéhovah pa kapav analyse ek reponn tou bann question ki pa finn examiné dan bann publication. Nou bizin content ki la Bible donne nou assez renseignement pou guide nou dan nou la vie, mais aussi ki li pa mentionne certain detail. Coumsa, sa permette nou pou ena enn la foi solide dan nou Createur.—Guette livre Approchez-vous de Jéhovah page 185-187.
Ki ou pou faire si ou finn faire tou seki ou kapav pou faire bann recherche lor enn sujet ki pé affecté ou personnellement, mais ou pa finn trouve direction ou-soit solution ki ou bizin? Pa hesité pou al guette enn chretien ki ena l’experience, par exemple, enn ancien dan ou congregation. Zot ena enn grand connaissance lor la Bible ek aussi enn grand l’experience dan la vie en tant ki chretien. L’aide ki zot pou donne ou dan enn fason equilibré pou bien utile si ou bizin conseil lor enn probleme personnel ou-soit si ou ena enn decision pou prend. Kifer? Parski bann ancien konn ou ek ou situation ek zot proche avek ou. Jamais pa blié pou prié Jéhovah ek dire Li exactement seki tracasse ou ek demann Li pou guide ou bann pensée par so l’esprit saint “parski Jéhovah Li-mem donne la sagesse . . . ek bon jugement.”—Prov. 2:6; Luc 11:13.