Reponse pou dix question lor relation sexuel

1 Eski peché originel c’est relation sexuel ki Adam ek Ève ti gagné dan jardin Éden?

▪ Reponse: Beaucoup dimoune pensé ki fruit ki Bondié ti defann mangé dan jardin Éden represente bann relation sexuel. Selman, c’est pa sa ki la Bible enseigné.

Anou reflechi: avant-mem ki Bondié ti crée Ève, Li ti donne Adam l’ordre pou pa mange fruit ki ti lor “pié connaissance bon ek mauvais.” (Genèse 2:15-18) Adam ti tousel, alors sa l’ordre-la pa ti pou kapav faire reference ar bann relation sexuel. En plus, Bondié ti donne Adam ek Ève enn l’ordre bien clair pou “gagne beaucoup zenfant, multiplié, rempli la terre.” (Genèse 1:28) Eski enn Bondié ki ena l’amour ti pou donne l’ordre premier couple pou “rempli la terre”​—bien sur pou zot faire sa, zot ti bizin gagne relation sexuel​—ek apré, condamne zot a mort parski zot ti obeir so l’ordre?​—1 Jean 4:8.

En plus, c’est kan Ève ti tousel, sans so mari, ki li ti commence “prend . . . fruit [ki Bondié ti defann] ek li ti mangé. Apré, li ti donne sa so mari aussi, kan li ti avek li, ek li ti mangé.”​—Genèse 3:6.

Plitar, kan Adam ek Ève ti gagne relation sexuel ek ti gagne bann zenfant, Bondié pa ti condamne zot. (Genèse 4:1, 2) Alors, li clair ki sa fruit ki Adam ek Ève ti mangé-la pa ti represente bann relation sexuel mais li ti enn vrai fruit ki ti poussé lor enn pié.

2 Eski la Bible condamne plaisir sexuel?

▪ Reponse: Premier livre la Bible montré ki c’est Bondié ki ti crée bann dimoune “male ek femelle.” Bondié ti dire ki so creation ti “bien bon.” (Genèse 1:27, 31) Plitar, Bondié ti inspire enn ecrivain la Bible pou donne bann mari sa bann instruction-la: “Trouve la joie avek femme ar ki to’nn marié depuis to jeunesse m . . . Laisse so sein soule toi touletan.” (Proverbes 5:18, 19) Kan nou lire sa bann verset-la, eski nou ena l’impression ki la Bible condamne bann plaisir sexuel?

Nou aprann ki Bondié pa finn zis permette pou ena reproduction, mais Li’nn aussi crée bann organe sexuel dan enn fason ki enn mcouple kapav montré zot l’amour ek zot l’affection pou ki toulé-deux gagne plaisir. Bann relation sexuel permette pou satisfaire bann besoin physik ek affectif enn mari ek enn femme ki ena l’affection ek ki bien proche entre zot.

3 Dapré la Bible, eski enn zom ek enn femme gagne droit vive ensam si zot pa marié devant la loi?

▪ Reponse: Dan enn fason bien clair la Bible dire ki “Bondié pou juge bann fornicateur.” (Hébreux 13:4) En general, mot grec pou fornication, pornéïa, faire reference ar mauvais fason ki bann dimoune ki pa marié servi zot bann organe sexuel.a Alors, devant lizié Bondié, li mauvais ki deux dimoune vive ensam sans marié​—mem si zot ena l’intention pou marié plitar.

Mem si deux dimoune bien content zot camarade, Bondié attann ki zot marié avant zot gagne relation sexuel. C’est Bondié ki’nn crée nou dan enn fason ki nou kapav manifesté l’amour. Principal qualité Bondié, c’est l’amour. Alors, Li ena bann bon raison pou insisté ki c’est selman bann dimoune marié ki gagne droit gagne relation sexuel, couma prochain lartik pou expliké.

4 Eski Bondié accepté polygamie, setadir ki enn dimoune ena plusieurs conjoint?

▪ Reponse: Pendant enn temps, Bondié ti permette ki enn zom ena plus ki enn madame. (Genèse 4:19; 16:1-4; 29:18–30:24) Mais, c’est pa Bondié ki’nn etabli polygamie. Li ti donne Adam zis enn sel madame.

Bondié ti donne Jésus Christ l’autorité pou ré-etabli principe ki Li ti fixé au commencement, setadir ki enn zom bizin ena enn sel femme. (Jean 8:28) Kan ti pose Jésus question lor mariage, li ti dire: “Celui ki ti crée zot, depuis commencement, ti faire zot enn zom ek enn femme, ek Li ti dire: ‘A cause sa-mem enn missié pou quitte so papa ek so mama ek li pou attache-li avek so madame, ek toulé-deux pou vinn enn sel la chair.’”​—Matthieu 19:4, 5.

Plitar, Bondié ti inspire enn parmi bann disciple Jésus pou ecrire: “Ki chaque zom ena so prop femme, ek chaque femme so prop mari.” (1 Corinthiens 7:2) La Bible dire aussi ki tou bann zom marié dan congregation ki gagne bann responsabilité special, bizin “mari enn sel femme.”​—1 Timothée 3:2, 12.

5 Eski li mauvais ki bann couple servi bann methode contraception?

▪ Reponse: Jésus pa ti donne l’ordre so bann disciple ki zot bizin gagne zenfant. Ni okenn disciple Jésus pa ti donne sa l’ordre-la. Dan okenn place, la Bible pa condamne bann couple ki decidé pou pa gagne zenfant.

Alors, bann couple libre pou decidé personnellement si zot pou ena zenfant ou-soit non. Zot kapav aussi decidé ki quantité zenfant zot pou ena ek kan zot pou ena sa bann zenfant-la. Ena bann contraception ki pa avorte enn ti-baba dan ventre so mama. Alors, si enn couple choisir sa qualité contraception-la pou ki femme-la pa tombe enceinte, c’est zot decision ek zot responsabilité personnel. Personne pa gagne droit juge zot.b​—Romains 14:4, 10-13.

6 Eski li mauvais ki enn madame faire l’avortement?

▪ Reponse: La vie sacré pou Bondié, ek Li considere mem enn ti-baba ki’nn fek formé dan ventre so mama couma enn creature vivant. (Psaume 139:16) Bondié ti dire ki Li ti pou demann bann compte enn dimoune ki blesse enn ti-baba ki pankor né. Alors, pou Li, c’est enn crime pou touye enn ti-baba ki pankor né.​—Exode 20:13; 21:22, 23.

Mais, ki enn couple pou faire si arrive enn probleme kan femme-la pré pou gagne so ti-baba ek couple-la bizin choisir entre la vie mama-la ou-soit zenfant-la? Dan sa cas-la, couple-la pou bizin decidé ki la vie pou essaye sauvé.c

7 Dapré la Bible, eski gagne droit divorcé?

▪ Reponse: Dapré la Bible, enn couple gagne droit divorcé. Selman, Jésus ti montré ki ena zis enn sel raison valable pou divorcé. Li ti dire: “N’importe kisannla ki divorce avek so femme, excepté a cause fornication, [gagne relation sexuel en dehors mariage] ek marié avek enn lot, commette l’adultere.”​—Matthieu 19:9.

Bondié detesté kan enn kikenn embete so conjoint, faire traitre ar li ek divorce avek li. Li-mem personnellement Li pou demann enn compte bann dimoune ki quitte zot conjoint pou enn raison banal, surtout kan zot faire sa dan l’intention pou prend enn lot partenaire.​—Malaki 2:13-16; Marc 10:9.

8 Eski Bondié approuve l’homosexualité?

▪ Reponse: Dan enn fason bien clair, la Bible condamne fornication. L’homosexualité forme partie dan fornication. (Romains 1:26, 27; Galates 5:19-21) Alors ki la Bible bien precis ek montré ki Bondié condamne sa fason vive-la, nou koné aussi ki “Bondié finn tellement content le monde ki Li finn donne so sel Garson ki Li finn crée direct, pou ki tou seki ena la foi en li pa detruire, mais gagne la vie pou touletan.”​—Jean 3:16.

Mem si zot kont bann relation homosexuel, bann vrai chretien montré-zot bon envers tou dimoune. (Matthieu 7:12) Bondié envie ki nou “honore tou sorte qualité dimoune.” Alors, bann vrai chretien pena la haine pou bann homosexuel.​—1 Pierre 2:17.

9 Eski sexe par telephone, envoye bann “sexto,” ou-soit sexe par Internet, mauvais?

▪ Reponse: Sexe par telephone implik koz lor sexe dan enn mauvais fason ou-soit ecoute bann message erotik lor telephone. “Sexto” vedir envoye lezot dimoune bann zimage erotik ek bann message cri-cri lor sexe. Sexe par Internet, c’est kan bann dimoune servi Internet pou envoye ou-soit recevoir tou seki ena enn rapport avek bann kitsoz erotik.

La Bible pa koz dan enn fason precis lor bann kitsoz moderne coumsa. Mais li dire: “Fodé ki fornication ek l’impureté dan n’importe ki forme, ou-soit desir pou gagne plus, pa mem mentionné parmi zot; c’est coumsa ki sa bizin été pou bann dimoune saint; ni enn conduite ki faire honté, ni bann kozé bete, ni bann badinage grossier, tousala c’est bann kitsoz ki pa bon.” (Éphésiens 5:3, 4) Bann kitsoz couma sexe par telephone, envoye bann “sextos,” ou-soit sexe par Internet, encourage bann dimoune pou considere relation sexuel dan enn fason deformé ek pousse zot pou faire l’experience bann plaisir sexuel en dehors mariage. Au lieu ki sa bann kitsoz moderne-la encourage bann dimoune pou controle zot bann desir sexuel, sa encourage zot pou rod zot prop satisfaction dan enn fason egoïste.

10 Ki la Bible dire lor masturbation?

▪ Reponse: La Bible pa koz dan enn fason precis lor masturbation. Masturbation, c’est kan enn kikenn par expré caresse so bann organe sexuel ziska ki li excité. Selman, Parole Bondié donne sa l’ordre-la bann chretien: “Alors detruire net bann membre zot lekor ki lor la terre en seki concerne la fornication, l’impureté, bann desir sexuel [ki mauvais].”​—Colossiens 3:5.

Masturbation encourage bann dimoune pou considere bann relation sexuel dan enn fason deformé ek pou rod satisfaire zot prop plaisir. La Bible donne nou l’assurance ki Bondié kapav donne “puissance ki plus ki seki normal” bann dimoune ki faire enn zeffort sincere pou rejette sa l’habitude-la.​—2 Corinthiens 4:7; Philippiens 4:13.

[Notes]