Anou aprann ar Parole Bondié

Sa lartik-la examine bann question ki kitfois ou finn deja demann-ou-mem ek li montré kot-sa ou kapav trouve bann reponse dan ou la Bible. Bann Témoins de Jéhovah pou bien content pou examine sa bann reponse-la avek ou.

1. Kifer nou bizin obeir Bondié?

Li bon ki nou obeir Bondié​—c’est Li ki finn crée nou. Mem Jésus ti obeir Bondié touletan. (Jean 6:38; Révélation 4:11) Bann la loi Bondié donne nou l’occasion pou prouvé ki nou content Li.​—Lire 1 Jean 5:3.

Tou bann la loi Jéhovah zot bon pou nou. Zot enseigne nou ki pli bon fason nou kapav amenn nou la vie, ek montré nou couma nou kapav gagne bann benediction eternel dan l’avenir.​—Lire Psaume 19:7, 11; Isaïe 48:17, 18.

2. Couma bann la loi Bondié aide nou pou ena enn bon la santé?

La loi Bondié ki condamne boire ziska sou protege nou kont bann maladie mortel ek bann accident ki kapav faire nou perdi la vie. Kan enn dimoune habitué boire ziska li sou, finalement sa vinn couma enn la drogue pou li, ek sa amenn li pou ena enn mauvais conduite. (Proverbes 23:20, 29, 30) Jéhovah permette nou boire bann la boisson kot ena lalkol, mais dan enn fason raisonnable, pa plus ki bizin.​—Lire Psaume 104:15; 1 Corinthiens 6:10.

Jéhovah mette nou en garde aussi kont jalousie, kont enn colere ki nou pa controlé, ek kont lezot l’attitude ki kapav faire nou ek lezot di-tort. Tant ki nou applik so bann conseil, sa pou ena enn bon l’effet lor nou la santé.​—Lire Proverbes 14:30; 22:24, 25.

3. Couma la loi Bondié kapav protege nou?

La Loi Bondié condamne bann relation sexuel en dehors mariage. (Hébreux 13:4) Bann couple ki obeir sa la loi-la senti-zot plus en securité ek crée enn pli bon l’ambiance dan lakaz pou zot bann zenfant. Parkont, kan enn kikenn gagne bann relation sexuel en dehors so mariage, li kapav gagne enn maladie, souvent sa amenn divorce, violence, probleme affectif, ek enn famille kot ena enn sel parent.​—Lire Proverbes 5:1-9.

Kan nou evite bann situation ki kapav tente nou pou gagne bann relation sexuel en dehors nou mariage, nou protege nou l’amitié avek Bondié. Nou aussi evité faire lezot di-tort.​—Lire 1 Thessaloniciens 4:3-6.

4. Couma kan nou respecté la vie, sa faire nou gagne bann bienfait?

Bann dimoune ki respecté la vie, don ki Bondié inn faire nou, gagne bann bienfait dan domaine la santé kan zot arrete bann l’habitude couma fumé ou-soit lezot kitsoz ki couma enn la drogue pou zot ek ki kapav faire zot perdi zot la vie. (2 Corinthiens 7:1) Pou Bondié, mem la vie enn ti-baba ki pé developpé dan ventre so mama, ena valeur. (Exode 21:22, 23) Alors, fodé pa ki nou touye par expré enn ti-baba ki pankor né. Bann ki ena mem fason pensée ki Bondié lor la vie, prend bann precaution en rapport avek zot securité dan travail, dan lakaz, ek dan zot l’auto. (Deutéronome 22:8) En plus, zot pa riské zot la vie dan enn sport, parski la vie c’est enn don ki Bondié inn faire nou.​—Lire Psaume 36:9.

5. Couma kan nou considere di-sang couma enn kitsoz ki sacré, sa faire nou gagne bann bienfait?

Di-sang li sacré parski Bondié dire ki li represente la vie, ou-soit nâme enn creature. (Genèse 9:3, 4) Dapré la loi Bondié, di-sang ena mem valeur ki la vie, ek sa la loi-la faire nou gagne bann bienfait. Couma? Lor base sa la loi-la, Bondié kapav pardonne nou bann peché.​—Lire Lévitique 17:11-13; Hébreux 9:22.

Di-sang Jésus ti ena enn grand valeur parski li ti parfait. Jésus ti presente devant Bondié enn kitsoz ki ti represente so la vie​—so di-sang. (Hébreux 9:12) Grace a di-sang ki li’nn versé, nou kapav gagne la vie eternel.​—Lire Matthieu 26:28; Jean 3:16.

Pou gagne plus renseignement, guette chapitre 12 ek 13 dan livre Ki la Bible enseigné vrai-mem?, publié par bann Témoins de Jéhovah.