L’esprit Bondié ti guide bann serviteur fidele dan le passé
“Souverain Seigneur Jéhovah Li-mem finn envoye moi, oui so l’esprit.”—IS. 48:16.
1, 2. Ki nou bizin pou manifesté la foi, ek ki l’encouragement nou pou gagné kan nou examine l’exemple bann serviteur fidele ki ti vive dan le passé?
MEM si depuis lepok Abel, beaucoup dimoune ti montré ki zot ena la foi, la Bible dire nou ki “pa tou dimoune ki ena la foi.” (2 Thess. 3:2) Alors, kifer enn dimoune ena sa qualité-la, ek ki permette li pou reste fidele? Dan beaucoup cas, enn dimoune commence ena la foi apré ki li finn tann bann kitsoz ki sorti dan Parole Bondié. (Rom. 10:17) La foi forme partie dan fruit l’esprit saint Bondié. (Gal. 5:22, 23) Alors, pou nou kapav ena la foi ek manifesté sa qualité-la, nou bizin l’esprit saint.
2 Li pou enn erreur si nou pensé ki bann zom ek bann femme ki ena la foi finn né ar sa qualité-la. Bann serviteur Bondié ki’nn donne enn bon l’exemple ki mentionné dan la Bible, ti bann dimoune “ki ti ena bann sentiment pareil couma nou.” (Jacq. 5:17) Zot ti ena bann doute, zot ti peur, ek zot ti ena bann faiblesse, mais l’esprit Bondié “ti’nn faire zot vinn fort,” pou faire face ar bann difficulté. (Héb. 11:34) Kan nou examiné couma l’esprit Jéhovah finn agir lor zot, sa pou encourage nou pou contigne servi Jéhovah avek fidelité. Sa l’encouragement-la li bien important alors ki nou pé vive enn lepok kot beaucoup kitsoz kapav affaibli nou la foi.
L’esprit Bondié ti donne Moïse pouvoir
3-5. (a) Couma nou koné ki Moïse ti agir avek l’aide l’esprit saint? (b) Ki l’exemple Moïse enseigne nou lor fason ki Jéhovah donne so l’esprit?
3 Parmi tou bann dimoune ki ti vive en 1513 avant nou lepok, Moïse ti “beaucoup pli humble.” (Nomb. 12:3) Bondié ti confié sa serviteur ki ti ena la douceur-la, bann grand responsabilité dan nation Israël. L’esprit Bondié ti donne Moïse pouvoir pou prophetisé, pou jugé, pou ecrire, pou dirigé, ek pou faire bann mirak. (Lire Isaïe 63:11-14.) Pourtant, enn certain moment, Moïse ti plaigné parski sa charge-la ti trop lourd. (Nomb. 11:14, 15) Alors Jéhovah ti “tire enn partie l’esprit” ki ti lor Moïse ek ti mette sa lor 70 lezot zom pou aide Moïse dan so travail. (Nomb. 11:16, 17) Mem si Moïse ti pensé ki li ti pé sarié enn charge ki ti bien lourd, en realité, li pa ti pé sarié sa tousel. Sa 70 zom ki Moïse ti choisir pou aide li-la, zot aussi zot pa ti pou sarié sa charge-la tousel.
4 Jéhovah ti donne Moïse assez l’esprit saint pou faire sa travail ki li ti gagné-la. Apré ki Jéhovah ti donne sa 70 zom-la l’esprit saint, Moïse ti encore pé gagne l’esprit saint ki li ti bizin. Li pa ti gagne trop tigit, ek sa 70 zom-la pa ti gagne trop beaucoup. Jéhovah donne nou quantité l’esprit saint ki nou bizin, dapré nou situation. “Li pa mesure so l’esprit avant Li donné” mais Li donne sa “dan seki li ena en abondance.”—Jean 1:16; 3:34.
5 Eski ou pé endure bann difficulté? Eski ou pensé ki ou bann responsabilité pé augmenté ek sa pé prend plus ou le temps? Eski ou pé faire zeffort pou prend soin ou famille lor plan spirituel ek physik ek en mem temps ou pé bizin faire face ar bann prix ki pé augmenté, ou-soit ar enn la santé ki pé deterioré? Eski ou ena bann grand responsabilité dan congregation? Ou kapav ena l’assurance ki par so l’esprit, Bondié kapav donne ou la force ki ou bizin pou faire face ar n’importe ki situation.—Rom. 15:13.
L’esprit saint ti aide Betsalel
6-8. (a) Ki l’esprit Bondié ti permette Betsalel ek Oholiab pou faire? (b) Couma nou koné ki c’est l’esprit Bondié ki ti pé guide Betsalel ek Oholiab? (c) Kifer l’exemple Betsalel li surtout bien encourageant?
6 Betsalel ti vive dan mem lepok ki Moïse. Seki ti arrive li, montré bien dan ki fason l’esprit Bondié kapav agir. (Lire Exode 35:30-35.) Bondié ti mette Betsalel en charge pou arrange bann meuble ki ti bizin dan tabernacle. Eski li ti koné couma pou faire bann travail di-bois avant ki li ti gagne sa grand projet-la pou faire? Kitfois oui. Mais surement dernier travail ki li ti faire, c’est pou faire bann blok pou bann Égyptien. (Ex. 1:13, 14) Alors, couma Betsalel ti pou accompli sa travail compliké ki Jéhovah ti donne li-la? Jéhovah “ti rempli li avek [So] l’esprit . . . pou li gagne sagesse, l’intelligence, connaissance ek pou li konn faire tou sorte qualité kitsoz, pou prepare bann modele . . . pou invente tou sorte qualité kitsoz ki compliké.” N’importe ki capacité naturel Betsalel ti kapav ena, l’esprit saint ti ameliore sa capacité-la. Nou kapav dire mem zaffaire lor Oholiab. Kitfois, Betsalel ek Oholiab ti’nn bizin aprann bien parski zot pa ti zis faire zot travail mais zot ti aussi enseigne lezot ki pou faire. Pena doute ki Bondié ti mette dan zot leker capacité pou enseigne lezot.
7 Enn lot preuve ki l’esprit Bondié ti pé guide Betsalel ek Oholiab, c’est parski bann travail ki zot ti faire ti al bien longtemps. Bann Israélite ti encore pé servi seki zot ti faire apepré 500 an plitar. (2 Chron. 1:2-6) Zordi la plupart dimoune ki faire kitsoz content gagne l’honneur pou zot travail. Mais Betsalel ek Oholiab pa ti interessé pou donne zot travail enn mark ou-soit pou mette zot signature lor la. C’est Jéhovah ki ti gagne la gloire pou tou seki zot ti faire.—Ex. 36:1, 2.
8 Zordi, kitfois nou bizin faire bann travail ki bien difficile ek kot nou bizin bann capacité special. Par exemple, bann travail ki concerne construction, l’imprimerie, organise bann l’assemblée, responsable bann secours apré bann catastrophe naturel ek al koz avek bann docteur ek bann dimoune ki travail dan l’hopital lor nou position concernant di-sang. Parfois, c’est bann dimoune ki ena capacité ki faire sa bann travail-la, mais pli souvent, c’est bann volontaire ki pena enn grand l’experience dan sa bann domaine precis-la, ki faire sa. L’esprit Bondié faire zot bann zeffort reussi. Eski ou finn deja refuse enn privilege dan service Jéhovah parski ou ti ena sentiment ki lezot pli qualifié ki ou? Rappel bien, l’esprit Jéhovah kapav ameliore ou connaissance ek ou bann capacité ek aide ou pou rempli n’importe ki privilege ki Li donne ou.
Josué ti reussi grace a l’esprit Bondié
9. Dan ki situation bann Israélite ti été apré ki zot ti’nn quitte l’Égypte, ek ki question nou kapav posé?
9 L’esprit Bondié ti aussi guide enn lot dimoune ki ti vive dan mem lepok ki Moïse ek Betsalel. Enn tipé apré ki bann Israélite ti quitte l’Égypte, bann Amaléqite ti attak peuple Bondié alors ki bannla pa ti faire zot nanyin. Ti’nn arrive ler pou bann Israélite faire face ar sa menace-la. Mem si zot pa ti habitué la guerre, bann Israélite ti bizin faire zot premier la guerre couma enn peuple libre. (Ex. 13:17; 17:8) Ti bizin enn kikenn pou prend la tête dan zot l’armée. Kisannla Bondié ti pou choisir?
10. Kifer bann Israélite ti gagne la victoire enba direction Josué?
10 Bondié ti choisir Josué. Mais, si Josué ti bizin dire ki l’experience li ti ena pou li kapav al faire sa mission-la, ki li ti pou dire? Enn esclave? Enn kikenn ki ti melange la paille? Enn kikenn ki ti ramasse la manne? Li vrai ki grand-pere Josué, Élishama, ti chef tribu Éphraïm. Kitfois aussi li ti dirige 108,100 zom ki ti forme partie dan enn parmi bann division en Israël kot ti ena trois tribu. (Nomb. 2:18, 24; 1 Chron. 7:26, 27) Pourtant, a travers Moïse, Jéhovah ti dire ki c’est Josué, pa Élishama ni so garson Noun, ki ti pou dirige sa l’armée ki ti pou vaink zot bann l’ennemi-la. La guerre ki zot ti faire ti deroulé pendant preské enn journée. Josué ti manifesté enn grand l’obeissance ek li ti accepté ki l’esprit saint Bondié guide li. Grace a sa, bann Israélite ti gagne enn grand victoire.—Ex. 17:9-13.
11. Couma nou kapav reussi dan nou service pou Bondié, pareil couma Josué?
11 Plitar, Josué, ki ti “rempli ar l’esprit sagesse,” ti remplace Moïse. (Deut. 34:9) L’esprit saint pa ti donne li capacité pou prophetisé ou-soit pou faire bann mirak pareil couma Moïse. Mais, li ti permette Josué pou dirige l’armée bann Israélite dan enn campagne militaire ki ti faire zot prend pays Canaan. Zordi, kitfois nou ena l’impression ki nou pena assez l’experience ou-soit ki nou pa assez qualifié pou faire certain kitsoz dan nou service pou Bondié. Selman, pareil couma Josué, nou kapav sur ki si nou suive bien bann instruction ki Bondié donné, nou pou reussi.—Jos. 1:7-9.
“L’esprit Jéhovah ti enveloppe Guidéôn”
12-14. (a) Ki nou aprann ar victoire ki ti l’armée bann Israélite ti gagné kont grand l’armée madianite? (b) Couma Jéhovah ti fortifié la foi Guidéôn? (c) Ki l’assurance Bondié donne nou zordi?
12 Apré la mort Josué, Jéhovah ti contigne servi so l’esprit pou fortifié so bann serviteur ki fidele. Livre Juges rempli ar recit bann dimoune ki ‘ti faible, mais ki l’esprit Bondié ti faire vinn fort.’ (Héb. 11:34) Bondié ti servi so l’esprit saint pou aide Guidéôn pou al la guerre pou So peuple. (Juges 6:34) Mais l’armée Guidéôn ti pli tigit ki l’armée bann Madianite. Ti ena enn soldat Israélite pou quatre soldat madianite. Pou Jéhovah, mem sa ti l’armée Israélite-la ti trop beaucoup. Deux fois Li ti demann Guidéôn pou diminué quantité soldat ki ti ena dan l’armée Israël ziska ki ti ena enn soldat Israélite pou 450 soldat madianite. (Juges 7:2-8; 8:10) Jéhovah ti trouve sa chiffre-la bon. Si bann Israélite ti pou gagne enn grand victoire, kisannla ki ti pou kapav dire ki sa finn arrivé grace a la force ou-soit sagesse bann dimoune?
13 Guidéôn ek so l’armée ti’nn paré pou al la guerre. Si ou ti forme partie dan sa ti l’armée-la, eski ou pa ti pou senti-ou en securité kan ou koné ki dan ou l’armée nepli ena personne ki capon ou-soit ki pa reste lor so garde? Ou-soit eski ou ti pou inpé peur kan ou pense seki kapav arrivé? Nou pa bizin deviné ki Guidéôn ti ressenti. Li ti faire exactement seki Bondié ti demann li! (Lire Juges 7:9-14.) Jéhovah pa ti reproche Guidéôn parski li ti demann enn signe ki ti pou montré ki Bondié ti pou avek li. (Juges 6:36-40) Au contraire, Li ti fortifié la foi Guidéôn.
14 Pouvoir ki Jéhovah ena pou sauve bann dimoune pena okenn limite. Li kapav sap so peuple dan n’importe ki situation difficile. Li kapav mem servi bann ki parette faible ou-soit desesperé, pou faire sa. Parfois, nou kapav ena l’impression ki ena beaucoup dimoune ki kont nou ou-soit ki nou dan enn situation kot nou pa kapav faire nanyin. Nou pa attann ki Bondié faire enn mirak couma Li ti faire pou Guidéôn. Mais Li kapav guide nou ek rassure nou a travers la Bible ek congregation, ki dirigé par l’esprit saint. (Rom. 8:31, 32) Bann promesse encourageant ki Jéhovah inn faire, fortifié nou la foi ek donne nou l’assurance ki vrai-mem Li aide nou!
“L’esprit Jéhovah ti vinn lor Yiphtah”
15, 16. Kifer tifi Yiphtah ti ena enn bon l’attitude, ek couma sa encourage bann parent?
15 Anou guette enn lot l’exemple. Kan bann Israélite ti bizin al la guerre kont bann Ammonite, “l’esprit Jéhovah ti vinn lor Yiphtah.” Yiphtah ti tellement envie gagne la victoire pou glorifié Jéhovah, ki li ti faire enn promesse ki ti coute li bien cher. Li ti promette ki si Bondié faire li gagne la guerre kont Ammôn, li ti pou offert Jéhovah premier dimoune ki ti pou sorti dan so lakaz kan li retourne kot li. Apré ki Yiphtah ti gagne la victoire kont Ammôn, c’est so tifi ki ti galopé pou vinn joinde li. (Juges 11:29-31, 34) Eski Yiphtah ti etonné kan sa ti arrivé? Kitfois non, parski li ti ena enn sel zenfant. Li ti respecté so promesse kan li ti offert so tifi pou al servi dan tabernacle Jéhovah, dan Shilo. Parski li ti adore Jéhovah avek fidelité, tifi Yiphtah pa ti ena okenn doute ki promesse ki so papa ti faire ti bizin realisé. (Lire Juges 11:36.) L’esprit Jéhovah ti donne zot toulé-deux la force ki zot ti bizin.
16 Couma eski tifi Yiphtah ti developpe enn l’esprit sacrifice coumsa? Pena doute ki tifi Yiphtah ti trouve zele ek l’attachement ki so papa ti ena pou Bondié ek sa ti fortifié so la foi. Parent, ou bann zenfant pé guette ou l’exemple. Ou bann decision montré ki ou croire dan seki ou dire. Kan ou bann zenfant ecoute ou bann la priere sincere, zot prend compte seki ou enseigne zot ek zot trouve tou bann zeffort ki ou pé faire pou servi Jéhovah avek tou ou leker, kitfois sa pou faire zot developpe enn grand desir pou servi Jéhovah. Sa pou faire ou bien content.
“L’esprit Jéhovah ti commence agir lor” Samson
17. Ki Samson ti faire grace a l’esprit Bondié?
17 Anou guette enn lot l’exemple. Kan bann Israélite ti vinn prisonnier bann Philistin, “avek le temps, l’esprit Jéhovah ti commence pousse” Samson pou delivré Israël. (Juges 13:24, 25) Samson ti gagne pouvoir pou faire bann kitsoz ki ti extraordinaire grace a enn la force ki personne pa ti ena. Kan bann Philistin ti convaink lezot Israélite pou attrape Samson, “l’esprit Jéhovah ti commence agir lor li, ek bann la corde ki ti lor so lé-bras ti vinn couma bann di-fil en lin ki ti’nn brulé avek difé, alors bann la chaine ki ti entoure so la main ti fonn ek ti tombé.” (Juges 15:14) Plitar, Samson ti prend bann mauvais decision ki ti faire li perdi so la force. Mem si li ti faible lor plan physik, l’esprit Bondié ti faire Samson vinn fort “grace a la foi.” (Héb. 11:32-34; Juges 16:18-21, 28-30) L’esprit Jéhovah ti agir lor Samson dan enn fason special parski li ti dan bann situation ki pa ordinaire. Sa bann l’evenement ki ti ena dan le passé-la encore pé encourage nou beaucoup zordi. Couma?
18, 19. (a) Ki l’assurance l’exemple Samson donne nou? (b) Ki bann bienfait ou finn gagné kan ou finn examine l’exemple bann fidele serviteur Bondié ki mentionné dan sa lartik-la?
18 Pareil couma Samson, nou aussi nou compte lor mem l’esprit saint. Nou faire sa a mesure ki nou accompli travail ki Jésus ti donne so bann disciple, setadir “preche avek bann dimoune ek . . . donne temoignage a fond.” (Actes 10:42) Pou nou kapav rempli sa responsabilité-la nou bizin bann capacité ki nou pa gagné dan enn fason automatik. Nou vrai-mem ena enn grand reconnaissance ki Jéhovah servi so l’esprit pou aide nou pou accompli different responsabilité ki nou finn gagné dan so service! Alors, a mesure ki nou faire sa, nou kapav dire pareil couma prophete Isaïe: “Souverain Seigneur Jéhovah Li-mem finn envoye moi, oui so l’esprit.” (Is. 48:16) Pena doute ki c’est l’esprit Bondié ki finn envoye nou! Nou mette tou nou leker dan nou service pou Jéhovah, avek l’assurance ki Li pou ameliore nou bann capacité pareil couma Li ti faire pou Moïse, Betsalel, ek Josué. Nou prend “l’epée l’esprit, setadir, parole Bondié,” avek l’assurance ki Li pou fortifié nou pareil couma Li ti faire avek Guidéôn, Yiphtah ek Samson. (Éph. 6:17, 18) Kan nou compte lor Jéhovah pou aide nou pou surmonte nou bann difficulté, nou kapav vinn puissant lor plan spirituel pareil couma Samson ti été lor plan physik.
19 Li clair ki Jéhovah beni bann ki prend enn position ferme pou vrai l’adoration. Kan nou laisse l’esprit saint Bondié agir lor nou, nou la foi vinn pli solide. Alors, nou pou bien content pou ré-guette aussi certain l’evenement extraordinaire ki ena dan bann l’Écritures grecques chrétiennes. Sa pou montré couma l’esprit Jéhovah ti agir lor so bann serviteur fidele dan premier siecle, avant ek apré Pentecôte l’an 33, nou lepok. Nou pou examine sa bann recit-la dan prochain lartik.
Kifer sa encourage ou pou koné couma l’esprit Bondié ti agir lor . . .
• Moïse?
• Betsalel?
• Josué?
• Guidéôn?
• Yiphtah?
• Samson?
[L’encadré page 24]
L’esprit Bondié kapav faire nou vinn puissant lor plan spirituel pareil couma Samson ti été lor plan physik
[Zimage page 23]
Parent, ou zele ena enn l’effet lor ou bann zenfant