“Prend courage ek reste bien fort”
“Prend courage ek reste bien fort . . . Jéhovah to Bondié avek toi.”—JOS. 1:7-9.
COUMA OU POU REPONN?
Dan ki fason Hénok ek Noé ti manifesté courage?
Couma certain femme dan le passé finn laisse enn bon l’exemple kan zot inn manifesté la foi ek courage?
Cite l’exemple certain jeune ki ena courage ek ki finn impression-ou.
1, 2. (a) Ki nou bizin parfois dan nou la vie toulé-jour pou faire seki bien? (b) Ki nou pou examiné dan sa lartik-la?
ENN dimoune ki ena courage, li contraire ar enn dimoune ki peur, timide ou-soit capon. Nou kapav pensé ki enn dimoune ki ena courage li fort, li bien decidé ek li pa peur devant bann danger. Mais parfois, enn dimoune bizin courage zis pou contigne faire seki bien dan la vie toulé-jour.
2 La Bible mentionne certain dimoune ki pa ti peur dan bann situation bien difficile. Lezot ti montré zot courage dan bann situation ki bann serviteur Bondié en general koné. Ki nou kapav aprann ar l’exemple bann dimoune ki finn ena courage, ki la Bible mentionné? Couma nou kapav ena courage?
BANN TÉMOINS KI TI ENA COURAGE DAN ENN MAUVAIS LE MONDE
3. Ki Hénok ti annoncé concernant bann mauvais dimoune?
3 Ti bizin beaucoup courage pou enn temoin Jéhovah vive parmi bann mauvais dimoune avant deluge ki ti ena dan lepok Noé. Mais selman, Hénok, ki ti dan “septieme generation apré Adam,” ti annonce avek courage sa message prophetik-la: “Guetté! Jéhovah inn vini avek so bann millier ange ki saint, pou execute so jugement lor zot tou, ek pou condamne tou bann mauvais dimoune concernant tou bann mauvais kitsoz ki zot inn faire dan enn fason ki montré zot desobeissance envers Bondié, ek concernant tou bann kitsoz choquant ki bann dimoune rebelle finn dire kont Li.” (Jude 14, 15) Fason ki Hénok ti dire sa prophetie-la coumadir sa ti’nn fini arrivé, parski li ti sur ki sa ti pou realisé. Ek vrai-mem, bann mauvais dimoune ti mort dan deluge!
4. Malgré ki situation Noé ti ‘marche avek Bondié’?
4 Deluge ti arrivé en l’an 2370 avant nou lepok, plus ki 650 an apré ki Hénok ti annonce sa prophetie-la. Entre-temps, Noé finn né, finn fonde enn famille, ek ensam avek so bann garson finn construire l’arche. Bann mauvais ange ti prend enn lekor humain pou gagne bann relation avek bann joli femme, ek zot ti vinn papa bann Nephilim. En plus, bann dimoune ti vinn pli mauvais ek la terre ti rempli ar violence. (Gen. 6:1-5, 9, 11) Mem dan sa bann condition-la, Noé “ti marche avek vrai Bondié” ek li ti rann temoignage avek courage couma “enn predicateur la justice.” (Lire 2 Pierre 2:4, 5.) Nou aussi nou bien bizin sa qualité courage-la dan bann dernier jour ki nou pé vive.
ZOT TI MANIFESTÉ LA FOI EK COURAGE
5. Couma Moïse ti manifesté la foi ek courage?
5 Moïse ti ena enn grand la foi ek enn grand courage. (Héb. 11:24-27) A partir 1513-1473 avant nou lepok, Bondié ti choisir li pou delivré bann Israélite dan l’Égypte ek pou guide zot dan desert. Moïse ti pensé ki li pa ti assez qualifié pou sa mission-la, mais li ti accepté sa kan-mem. (Ex. 6:12) Li, avek so frere Aaron, ti al plusieurs fois devant Pharaon l’Égypte, ki ti enn dimoune bien cruel. Avek courage zot ti annoncé ki Jéhovah ti pou envoye dix plaie ki ti pou abaisse bann bondié l’Égypte ek delivré So peuple. (Ex. chap. 7-12) Moïse ti manifesté la foi ek courage parski Bondié ti contigne soutenir li, pareil couma Bondié soutenir nou zordi.—Deut. 33:27.
6. Si bann l’autorité demann nou bann question, ki pou aide nou pou rann temoignage avek courage?
6 Nou aussi nou bizin mem qualité courage ki Moïse parski Jésus ti dire: “A cause moi, pou traine zot devant bann gouverneur ek bann le roi, sa pou enn temoignage pou sa bann dimoune-la ek pou bann nation. Selman kan pou livré zot, pa tracassé couma zot pou kozé ou-soit ki zot pou dire, parski dan sa l’heure-la, pou donne zot bann parole ki zot bizin dire; c’est pa zis zot ki pou kozé, mais c’est l’esprit zot Papa ki pé koz par zot.” (Mat. 10:18-20) Si bann l’autorité demann nou bann question, l’esprit saint Jéhovah pou aide nou pou rann temoignage avek respé, la foi ek courage.—Lire Luc 12:11, 12.
7. Couma Josué ti gagne courage ek succès?
7 Apré Moïse, c’est Josué ki ti dirige nation Israël. Josué ti etudié regulierement la Loi Bondié ek grace a sa, so la foi ek so courage ti vinn pli grand. En 1473 avant nou lepok, nation Israël ti pré pou rente dan la Terre promise. Bondié ti dire li: “Prend courage ek reste bien fort.” Tant ki Josué ti obeir la Loi Bondié, li ti pou agir avek sagesse ek li ti pou gagne succès. Jéhovah ti dire li: “Pa tremblé ek pa peur, parski Jéhovah to Bondié avek toi partout kot to pou allé.” (Jos. 1:7-9) Surement sa bann parole-la ti donne li courage! Ek Bondié ti vrai-mem avek li, parski dan six an selman, en 1467 avant nou lepok, nation Israël ti’nn gagne la victoire lor enn grand partie la Terre promise.
BANN FEMME KI TI SERVI BONDIÉ AVEK COURAGE
8. Kifer eski Rahab li enn l’exemple la foi ek courage?
8 A travers bann siecle, beaucoup femme finn montré ki zot ti ena courage pou servi Jéhovah. Par exemple, Rahab, enn prostitué ki ti reste Jéricho, ti ena la foi dan Bondié. Avek courage, li ti cachiette deux espion ki Josué ti envoyé, ek apré, li ti faire bann zom ki le roi ti envoyé pou rod sa deux espion-la, al lor enn fausse la piste. Li ek so famille ti gagne la vie sauve kan bann Israélite ti prend la ville Jéricho. Rahab ti abandonne so mauvais la vie ek ti adore Jéhovah avek fidelité. Li ti vinn enn ancetre le Messie. (Jos. 2:1-6; 6:22, 23; Mat. 1:1, 5) Li ti gagne enn grand benediction a cause so la foi ek so courage.
9. Couma Débora, Baraq ek Yaël ti manifesté courage?
9 Apré la mort Josué vers 1450 avant nou lepok, Bondié ti etabli bann juge lor nation Israël. Yabîn, enn le roi cananéen ti’nn faire dominere ar bann Israélite pendant 20 an. Bondié ti envoye prophetesse Débora pou encourage juge Baraq pou al la guerre kont sa le roi-la. Baraq ti rassemblé 10,000 zom lor montagne Tabor ek ti pré pou commence la guerre kont Sisera, chef l’armée Yabîn. Sisera avek so l’armée ek so 900 char la guerre ti rente dan vallée Qishôn, ki ti sec sa lepok-la. Kan bann Israélite ti commence desann dan sa vallée-la, Bondié ti faire enn inondation ki ti rempli vallée-la ar la boue ek char bann Cananéen ti tasse ladan. Bann zom Baraq ti gagne la victoire ek “tou bann soldat Sisera ti detruire par l’epée.” Sisera li, li ti al cachiette dan la tente Yaël, mais Yaël ti touye li kan li ti pé dormi. En accord avek seki Débora ti annonce Baraq dan enn prophetie, c’est Yaël, enn femme, ki ti gagne “beauté” sa victoire-la. Débora, Baraq ek Yaël ti agir avek courage, ek grace a sa, Israël “ti konn la paix pendant quarante an.” (Juges 4:1-9, 14-22; 5:20, 21, 31) Beaucoup zom ek femme ki ti servi Bondié ti manifesté mem la foi ek courage.
NOU BANN PAROLE KAPAV DONNE LEZOT COURAGE
10. Kifer nou kapav dire ki nou bann parole kapav donne lezot courage?
10 Seki nou dire kapav donne courage lezot serviteur Jéhovah. Dan 11eme siecle avant nou lepok, le roi David ti dire so garson Salomon: “Prend courage, reste fort, ek agir. Pa bizin peur ek pa bizin paniké, parski Jéhovah, mo Bondié, Li avek toi. Li pa pou laisse toi ek Li pa pou abandonne toi, ziska ki tou travail ki concerne lakaz Jéhovah, fini.” (1 Chron. 28:20) Salomon ti agir avek courage ek li ti construire enn joli temple pou Jéhovah dan Jérusalem.
11. Ki l’effet bann parole enn tifi israélite ti ena lor la vie enn zom?
11 Dan dixieme siecle avant nou lepok, enn tifi israélite ki ti ena courage, ti dire bann parole ki ti faire enn lepreux gagne bann bienfait. Bann voleur syrien ti kokin sa tifi-la ek li ti vinn enn servante dan lakaz Naamân, enn lepreux ki ti chef l’armée bann Syrien. Sa tifi-la ti koné ki Jéhovah ti faire bann mirak par moyen prophete Élisha, alors li ti dire femme Naamân ki si so mari al en Israël, prophete Bondié pou gueri li. Vrai-mem Naamân ti al en Israël ek prophete Bondié ti gueri li par enn mirak, ek li ti vinn enn adorateur Jéhovah. (2 Rois 5:1-3, 10-17) Si ou enn jeune ki content Jéhovah pareil couma sa tifi-la, Jéhovah kapav donne ou courage pou rann temoignage ar ou bann professeur, ou bann camarade ek lezot dimoune.
12. Ki l’effet bann parole Hizqiya ti ena lor so peuple?
12 Bann parole ki’nn bien choisir kapav aide enn dimoune pou gagne courage dan bann moment difficile. Kan bann Assyrien ti vinn faire la guerre kont Jérusalem dan huitieme siecle avant nou lepok, le roi Hizqiya ti dire so peuple: “Prend courage ek reste fort. Pa peur ek pa paniké a cause le roi l’Assyrie ek a cause la foule ki ena avek li; parski avek nou ena plus ki avek li. Avek li ena enn lé-bras la chair, mais avek nou ena Jéhovah nou Bondié ki pou aide nou ek pou la guerre pou nou dan nou bann bataille.” Ki l’effet sa bann parole-la ti ena lor peuple Juda? La Bible dire: “Le peuple ti compte lor bann parole Hizqiya.” (2 Chron. 32:7, 8) Bann parole encourageant coumsa kapav aide nou ek lezot chretien pou ena plus courage kan nou gagne persecution.
13. Ki l’exemple Obadia finn donne nou?
13 Parfois nou montré nou courage kan nou reste trankil dan certain situation. Dan dixieme siecle avant nou lepok, Obadia, serviteur le roi Ahab, ti ena courage pou cachiette cent prophete Jéhovah. Li ti cachiette zot “par cinquante dan enn la cave,” pou ki mauvais la reine Jézabel pa touye zot. (1 Rois 18:4) Pareil couma Obadia ti ena la crainte pou Bondié, beaucoup serviteur Jéhovah zordi finn ena courage pou protege zot bann frere ek soeur kan zot pa finn donne okenn renseignement bann persecuteur.
LA REINE ESTHER TI ENA COURAGE
14, 15. Couma la reine Esther ti manifesté la foi ek courage, ek ki consequence sa ti ena?
14 Dan cinquieme siecle avant nou lepok, la reine Esther, ti manifesté enn grand la foi ek enn grand courage. Kifer? Parski Hamân, ki ti mauvais, ti faire plan pou touye tou bann Juif ki ti vive dan l’empire perse. Sa bann Juif-la ti bien triste ek zot ti garde careme ek pena doute ki zot ti prié avek tou zot leker! (Esther 4:1-3) La reine Esther ti bien tracassé pou bann Juif. So cousin Mordekaï, ti envoye li enn copie la loi ki ti donne l’ordre pou touye bann Juif. Ek li ti demann Esther pou al devant le roi ek pou suppliye li pou manifesté so faveur envers so peuple, bann Juif. Mais n’importe kisannla ki ti al devant le roi sans enn l’invitation, le roi ti kapav mette li a mort.—Esther 4:4-11.
15 Malgré sa, Mordekaï ti dire Esther: ‘Si to reste trankil, delivrance pou sorti dan enn lot place. Mais ki koné ki c’est pa pou enn moment coumsa ki to’nn vinn la reine?’ Esther ti encourage Mordekaï pou rassemblé bann Juif dan Suse ek pou garde careme pou li. Li ti dire: “Moi aussi mo pou garde careme, apré mo pou rente devant le roi, enn kitsoz ki dapré la loi pa faire; ek si mo bizin mort, mo ava mort.” (Esther 4:12-17) Esther ti agir avek courage, ek livre ki porte so nom, montré ki Bondié ti delivré So peuple. Dan nou lepok, bann chretien oint ek bann lezot brebis, manifesté mem courage dan bann l’epreuve—ek sa Kikenn “ki ecoute la priere[-la]” touletan avek zot.—Lire Psaume 65:2; 118:6.
“PREND COURAGE”
16. Ki l’exemple Jésus inn laissé pou bann jeune?
16 Enn fois, kan Jésus ti ena douze an, so bann parent ti trouve li dan temple, “pé assizé au milieu bann enseignant, li ti pé ecoute zot ek li ti pé pose zot question.” En plus, “tou bann ki ti pé ecoute li ti reste etonné par so l’intelligence ek par so bann reponse.” (Luc 2:41-50) Mem si li ti jeune, Jésus ti ena la foi ek courage pou pose question bann enseignant pli agé ki li. Kan bann jeune dan congregation medite lor l’exemple Jésus, sa pou aide zot pou profite tou l’occasion pou ‘defann zot l’esperance devant tou dimoune ki demann zot kifer zot ena sa l’esperance-la.’—1 Pierre 3:15.
17. Kifer Jésus ti encourage so bann disciple pou “prend courage,” ek kifer nou bizin agir avek courage?
17 Jésus ti encourage lezot pou “prend courage.” (Mat. 9:2, 22) Li ti dire so bann disciple: “Guetté! L’heure pé vini, en realité, li’nn fini vini, kot zot pou separé, sakenn pou al dan so prop lakaz ek zot pou laisse moi tousel; mais pourtant mo pa tousel, parski [mo] Papa avek moi. Mo finn dire zot sa bann kitsoz-la pou ki par moi zot gagne la paix. Dan le monde zot pé gagne bann l’epreuve, mais prend courage! Mo finn gagne victoire lor le monde.” (Jean 16:32, 33) Pareil couma bann premier disciple Jésus, nou aussi nou faire face ar la haine ki le monde ena pou nou, mais fodé pa nou vinn pareil couma le monde. Si nou medite lor courage ki Garson Bondié finn manifesté, sa kapav donne nou courage pou nou pa laisse sa le monde-la contamine nou. Pareil couma Jésus, nou aussi nou kapav gagne victoire lor le monde.—Jean 17:16; Jacq. 1:27.
“BON COURAGE!”
18, 19. Couma l’apotre Paul ti manifesté la foi ek courage?
18 L’apotre Paul ti passe par beaucoup l’epreuve. Enn jour, bann Juif dan Jérusalem ti pou casse-casse li ar batté si bann soldat romain pa ti vinn sap li. Pendant la nuit, “nou Seigneur ti deboute pré kot li ek ti dire: ‘Bon courage! Parski, pareil couma to’nn rann temoignage a fond lor bann kitsoz ki concerne moi dan Jérusalem, pareil aussi, to bizin rann temoignage dan Rome.’” (Actes 23:11) Paul ti faire exactement seki Jésus ti demann li.
19 Paul pa ti peur pou reprend bann “super-apotre,” ki ti pé essaye faire congregation Corinthe vinn impur. (2 Cor. 11:5; 12:11) Contrairement ar sa bann fausse zapotre-la, Paul ti kapav prouvé ki li ti vrai-mem enn zapotre. Li ti endure plusieurs l’epreuve—li ti al dan prison, gagne batté, faire bann voyage dangereux, konn lezot danger, gagne faim, soif, a soir pa dormi, ek aussi, bien tracassé pou so bann frere. (Lire 2 Corinthiens 11:23-28.) Paul ti vrai-mem manifesté la foi ek courage—sa montré ki c’est Bondié ki ti donne li la force!
20, 21. (a) Donne enn l’exemple ki montré ki nou bizin contigne prend courage. (b) Dan ki bann situation kitfois nou bizin manifesté courage? (c) Ki nou kapav sur?
20 Pa tou bann chretien ki pou gagne bann grand persecution. Pourtant, nou tou nou bizin prend beaucoup courage pou kapav faire face ar bann difficulté dan la vie. Anou guette enn l’exemple: enn jeune dan Brésil ti forme partie dan enn groupe bandit. Apré ki li ti etudié la Bible, li ti trouvé ki li ti bizin faire bann changement, mais bien souvent kan enn kikenn quitte enn groupe coumsa, bannla touye li. Sa jeune-la ti prié, ek li ti servi la Bible pou montré chef sa groupe bandit-la kifer li pa pou kapav contigne reste dan zot groupe. Zot ti accepté pou laisse li allé ek pa ti faire li nanyin. Apré, sa jeune-la ti vinn enn proclamateur.
21 Nou bizin courage pou preche la bonne nouvelle. Bann jeune chretien bizin developpe sa qualité-la si zot envie garde zot l’integrité dan lekol. Kitfois nou bizin prend courage pou demann congé dan nou travail pou nou kapav assisté tou bann session enn l’assemblée. Nou kapav donne encore beaucoup lezot l’exemple. Mais, malgré bann difficulté ki nou gagné, Jéhovah pou ecoute ‘bann la priere ki nou faire avek la foi.’ (Jacq. 5:15) Ek pena doute ki Li kapav donne nou so l’esprit saint pou ki nou “prend courage ek reste bien fort”!
[Zimage page 19]
Hénok ti preche avek courage dan enn mauvais le monde
[Zimage page 20]
Yaël ti manifesté courage ek ti reste fort