Ou kapav heureux mem si ou famille pa servi Jéhovah

“Couma to koné ki to pa pou sauve to [conjoint]?”​—1 COR. 7:16.

ESKI OU KAPAV TROUVE BANN REPONSE?

Ki enn chretien kapav faire pou favorise la paix avek bann membre so famille ki pa servi Jéhovah?

Couma enn chretien kapav aide bann membre so famille pou accepté la verité?

Ki lezot kapav faire pou aide zot bann compagnon ki vive dan enn famille ki pa servi Jéhovah?

1. Kan enn kikenn accepté la verité, ki l’effet sa kapav ena lor so famille?

ENN jour, kan Jésus ti envoye so bann zapotre preché, li ti dire zot: “Kan zot allé, preché, ek dire: ‘Royaume ki dan le ciel finn approché.’” (Mat. 10:1, 7) Bann dimoune ki ti pou accepté la bonne nouvelle avek tou zot leker, ti pou konn la paix ek ti pou heureux. Selman, Jésus ti averti so bann zapotre ki beaucoup ti pou opposé ar zot predication. (Mat. 10:16-23) Enn l’opposition ki surtout bien difficile pou supporté c’est kan bann membre nou famille opposé ek pa accepté la verité.​—Lire Matthieu 10:34-36.

2. Kifer li possible ki bann chretien heureux mem si zot famille pa servi Jéhovah?

² Eski sa vedir ki li impossible ki bann disciple Jésus heureux mem si bann membre zot famille pa servi Jéhovah? Non. Mem si l’opposition dan enn famille parfois kapav bien severe, li pa touletan coumsa. Ek aussi, kitfois sa l’opposition-la pa pou duré touletan. Tou depann lor fason ki sa dimoune ki dan la verité-la reagir ar l’opposition ou-soit ar l’indifference. En plus, Jéhovah beni bann dimoune ki fidele envers Li. Li aide zot pou garde zot la joie malgré bann situation difficile. Bann ki’nn accepté la verité kapav faire zot part pou zot heureux (1) kan zot faire zeffort pou favorise la paix dan zot famille ek (2) kan zot faire bann zeffort sincere pou aide bann membre zot famille pou accepté la verité.

FAVORISE LA PAIX DAN LA FAMILLE

3. Kifer enn chretien ki vive dan enn famille ki pa servi Jéhovah bizin favorise la paix?

³ Enn famille pou plus kapav accepté la verité si ena la paix dan lakaz. (Lire Jacques 3:18.) Mem si tou bann membre so famille pa servi Jéhovah, enn chretien bizin travail dur pou favorise la paix dan so lakaz. Couma li kapav faire sa?

4. Couma bann chretien kapav garde la paix ki zot ressenti au fond zot-mem?

⁴ Bann chretien bizin garde la paix ki zot ressenti au fond zot-mem. Pou zot kapav faire sa, zot bizin prié Jéhovah avek tou zot leker pou gagne “la paix Bondié.” (Phil. 4:6, 7) Enn dimoune pou heureux ek pou konn la paix si li aprann konn Jéhovah ek mette en pratik bann principe biblik. (Is. 54:13) Li bien important aussi ki nou assisté reunion ek participe avek zele dan predication, si nou envie heureux ek konn la paix. En general, bann ki vive dan enn famille kot pa zot tou ki servi Jéhovah, zot kapav kan-mem participe dan bann l’activité spirituel. Anou prend l’exemple Enzaa ki ena enn mari ki bien opposé. C’est selman kan Enza inn fini faire tou so l’ouvrage ki li al preché. Enza dire: “Jéhovah bien beni moi, mo gagne bann bon resultat chaque fois ki mo faire zeffort pou preche la bonne nouvelle.” Sa bann benediction-la faire li ressenti la paix, li satisfait ek li heureux.

5. Ki difficulté enn chretien ki so famille pa dan la verité souvent gagné, ek ki kapav aide li?

⁵ Nou bizin faire bann grand zeffort pou favorise la paix avek bann membre nou famille ki pa dan la verité. Sa kapav difficile parski parfois zot envie ki nou faire bann kitsoz ki kont bann principe biblik. Kan nou bien ferme pou obeir bann principe ki droite, sa kapav faire nou bann famille en colere, mais avek le temps sa favorise la paix. Bien sur, si nou pa’lé cedé kan pena nanyin ki kont bann principe biblik, sa kapav amenn bann desaccord inutile. (Lire Proverbes 16:7.) Kan nou dan enn situation difficile, li important ki nou rod bann conseil biblik dan bann publication ki l’esclave fidele et avisé donne nou ek ar bann ancien.​—Prov. 11:14.

6, 7. (a) Kifer certain opposé ar bann membre zot famille ki commence etudié avek bann Témoins de Jéhovah? (b) Couma enn etudiant la Bible ou-soit enn Témoin bizin reagir kan li gagne l’opposition dan so famille?

⁶ Pou ki ena la paix dan nou famille, nou bizin ena confiance en Jéhovah ek comprend sentiment bann membre nou famille ki pa dan la verité. (Prov. 16:20) Mem bann nouveau ki pé etudié la Bible kapav faire sa. Certain mari ou-soit certain femme ki pa dan la verité kitfois d’accord ki zot conjoint etudié. Li possible mem ki zot reconette ki sa kapav faire di-bien la famille. Mais ena lezot ki bien opposé. Esther, ki asterla enn Témoin, reconette ki li ti “bien en colere” kan so mari ti commence etudié la Bible avek bann Témoins de Jéhovah. Li dire: “Soit mo ti jette so bann livre, soit mo ti brule zot.” Howard, ki au commencement ti opposé kan so madame ti etudié la Bible, dire: “Beaucoup mari peur pangar zot madame pé rente dan enn secte ki’nn embete zot. Kitfois, enn mari pa koné couma pou agir ar seki li considere couma enn menace ek sa kapav faire li opposé.”

⁷ Si conjoint enn etudiant la Bible opposé, nou kapav aide etudiant-la pou comprend ki li pa necessaire ki li arrete so l’etude. Souvent, li kapav reglé sa probleme-la kan li manifesté douceur ek respé envers so conjoint. (1 Pierre 3:15) Howard dire: “Mo bien reconnaissant ki mo madame ti reste calme ek pa ti reagir brite!” So madame expliké: “Howard ti demann moi pou arrete etudié la Bible. Li ti dire moi ki bannla pé faire enn lavage cerveau ar moi. Au lieu ki mo ti persisté ar li, mo ti dire li ki li possible ki li ena raison, mais mo ti aussi dire li ki honnetement mo pa trouvé couma bannla pé faire sa. Alors, mo ti demann li pou lire livre ki mo ti pé etudié. C’est seki li ti faire ek li pa ti kapav pa d’accord avek seki ti ena dan sa livre-la. Sa ti ena enn grand l’effet lor li.” Li bon nou rappel ki kitfois bann conjoint ki pa dan la verité senti-zot abandonné ou-soit pensé ki zot mariage menacé kan zot conjoint quitte zot pou al reunion ou-soit predication. Mais si zot conjoint ki dan la verité rassure zot, sa kapav faire zot moins tracassé.

AIDE ZOT POU ACCEPTÉ LA VERITÉ

8. Ki conseil Paul donne bann chretien ki ena enn conjoint ki pa servi Jéhovah?

⁸ L’apotre Paul ti conseil bann chretien ki fodé pa zot quitte zot conjoint zis parski li pa servi Jéhovah.b (Lire 1 Corinthiens 7:12-16.) Si enn chretien pa blié ki so conjoint kapav vinn enn Témoin enn jour, sa kapav aide li pou garde so la joie. Selman, kan enn chretien essaye rann temoignage lor la verité ar so conjoint, li bizin faire attention. C’est seki sa bann l’exemple ki nou pou examiné-la montré.

9. Ki precaution enn chretien bizin prend kan li koz lor la verité ar so famille?

⁹ Kan Jason rappel fason ki li ti reagir kan li ti aprann bann verité ki ena dan la Bible, li dire: “Mo ti envie partage sa ar tou dimoune!” Kan enn etudiant la Bible apprecié bann verité ki li pé aprann, kitfois li tellement content ki li koz lor la touletan. Li possible ki li attann ki so famille pou accepté la verité desuite, mais kitfois zot pa d’accord ar li. Ki l’effet l’enthousiasme ki Jason ti manifesté au commencement, ti ena lor so madame? So madame rappel: “Sa ti fatigue moi!” Enn madame ki ti accepté la verité 18 an apré so mari dire: “Moi, mo ti bizin aprann la verité tigit-tigit.” Si ou pé etudié la Bible avek enn kikenn ki ena enn conjoint ki pa interessé avek la verité, kifer regulierement ou pa faire bann seance d’exercice pou montré ou etudiant couma li kapav explik la verité sans ki li agace so conjoint? Moïse ti dire: “Mo l’enseignement pou tombé goutte par goutte couma la pluie, mo parole pou tombé couma la rosée, pareil couma bann ti la pluie lor l’herbe.” (Deut. 32:2) Sa faire plus di-bien kan nou dire enn dimoune zis deux-trois parole lor la verité dan enn bon fason ek dan ler ki bizin, ki nou noye li ar beaucoup parole.

10-12. (a) Ki conseil l’apotre Pierre ti donne bann chretien ki zot conjoint pa dan la verité? (b) Couma enn etudiant la Bible finn aprann pou applik conseil ki ena dan 1 Pierre 3:1, 2?

¹⁰ Bondié ti inspire l’apotre Pierre pou donne bann bon conseil bann soeur ki zot mari pa dan la verité. Pierre ti ecrire: “Soumette ar zot prop mari, pou ki si ena ki pa oulé ecoute la parole, kapav gagne zot sans parole grace a conduite zot femme, parski zot finn trouvé ar zot prop lizié couma zot femme ena enn conduite pur ek enn grand respé.” (1 Pierre 3:1, 2) Enn madame kapav aide so mari pou accepté la verité, kan li soumette ek kan li ena enn profond respé pou so mari, mem si so mari faire brite ar li. Enn mari chretien aussi pareil, li bizin comporte-li couma Bondié demandé ek vinn enn chef famille ki content so famille, malgré n’importe ki l’opposition ki li kapav gagné ar so madame.​—1 Pierre 3:7-9.

¹¹ Beaucoup chretien zordi finn tire profit kan zot inn suive bann conseil l’apotre Pierre. Anou guette l’exemple Selma. Kan li ti commence etudié la Bible, Steve, so missié, pa ti content. Steve dire: “Mo ti en colere, mo ti jaloux, mo ti possessif ek mo ti peur pangar mo madame quitte moi.” Selma dire: “Mem avant ki mo ti konn la verité, pa ti facile pou vive ar li, mo ti bizin faire bien attention ar seki mo dire ek faire. Li ti ena enn mauvais caractere. Kan mo ti commence etudié la Bible, li ti vinn pli pire.” Ki ti aide Selma?

¹² Selma rappel enn kitsoz ki li ti aprann ar sa soeur ki ti faire so l’etude-la. Li dire: “Enn jour, mo pa ti envie faire l’etude. La veille, Steve ti batte moi parski nou ti gagne enn discussion, ek mo ti senti-moi bien triste. Apré ki mo ti dire sa soeur-la seki ti arrivé ek seki mo ti ressenti, li ti demann moi pou lire 1 Corinthiens 13:4-7. Kan mo ti pé lire sa bann verset-la, mo ti pé dire mo-mem: ‘Steve jamais pa manifesté sa bann bon qualité-la envers moi.’ Mais sa soeur-la inn aide moi pou reflechi dan enn lot fason kan li ti demann moi: ‘Parmi tou sa bann fason pou montré l’amour-la, comié ladan to manifesté envers to mari?’ Mo ti reponn li: ‘Nanyin, parski pa facile pou vive ar li.’ Avek douceur sa soeur-la ti demann moi: ‘Selma, kisannla pé essaye vinn enn chretien ici? Toi ou-soit Steve?’ Mo ti realisé ki mo ti bizin change mo fason pensé, mo ti prié Jéhovah pou aide moi pou manifesté plus l’amour envers Steve. Tigit-tigit, bann kitsoz finn commence changé.” Apré 17 an, Steve ti accepté la verité.

COUMA LEZOT KAPAV AIDÉ

13, 14. Couma lezot dan congregation kapav aide bann ki vive dan enn famille kot pa zot tou ki servi Jéhovah?

¹³ Pareil couma bann ti goutte la pluie ki mouille la terre ek faire bann plante poussé, beaucoup frere ek soeur dan congregation aide bann chretien pou trouve la joie mem si zot famille pa pé servi Jéhovah. Elvina ki reste Brésil dire: “L’amour mo bann frere ek soeur, c’est sa-mem ki finn aide moi pou reste fort dan la verité.”

¹⁴ Kan lezot dan congregation montré-zot bon ek interessé ar enn membre la famille ki pa Témoin, sa kapav touche so leker. Enn missié dan Nigeria ki ti accepté la verité 13 an apré so madame, dire: “Kan mo ti pé voyagé avek enn Témoin, so l’auto ti tombe en panne. Li ti al rod bann Témoins dan enn village a coté, ek zot ti donne nou enn place pou nou kapav resté a-soir. Zot ti prend nou soin coumadir nou ti konn nou camarade depuis zenfant. Sa jour-la, mo ti trouve l’amour chretien ki mo madame touletan ti pé kozé.” En Angleterre, enn femme ki ti vinn dan la verité 18 an apré so mari, rappel: “Bann Témoins ti invite nou toulé-deux pou mangé kot zot. Touletan zot ti bien accueillir moi.”c Enn mari ki reste dan mem pays ek ki plitar ti vinn enn Témoin, dire: “Bann frere ek soeur ti vinn visite nou, ou-soit zot ti invite nou kot zot, ek mo ti trouvé ki zot ti interesse-zot ar moi. Mo ti remark sa surtout kan mo ti dan l’hopital ek kan beaucoup ti vinn visite moi.” Eski ou kapav rod bann fason pou manifesté mem l’interet envers bann membre enn famille ki pa servi Jéhovah?

15, 16. Ki kapav aide enn chretien pou garde so la joie mem si lezot membre so famille pa accepté la verité?

¹⁵ Bien sur, mem si pendant plusieurs l’année, bann chretien ena enn bon conduite ek rann temoignage avek tact ar bann membre zot famille, pa tou conjoint, tou zenfant, tou parent ou-soit lezot membre la famille ki pou accepté la verité. Certain reste indifferent ou-soit contigne manifesté l’opposition. (Mat. 10:35-37) Mais, kan bann chretien manifesté bann bon qualité, sa kapav ena enn l’effet positif. Enn mari ki pa ti Témoin avant, dire: “Kan enn conjoint ki Témoin de Jéhovah laisse so bann bon qualité brillé, ou pa koné ki pé passé dan la tête ek dan leker so conjoint ki pa Témoin. Alors, jamais pa baisse lé-bras concernant ou conjoint ki pa Témoin.”

¹⁶ Mem si enn membre dan la famille pa accepté la verité, li possible ki sa chretien ki pé servi Jéhovah-la li heureux. Enn soeur finn rann temoignage lor la verité ar so mari pendant 21 an. Mem si so mari pa finn accepté la verité, sa soeur-la dire: “Mo reussi garde mo la joie kan mo faire zeffort pou faire Jéhovah plaisir, kan mo reste fidele envers Li ek kan mo faire zeffort pou fortifié mo spiritualité. Mo reste bien occupé ar bann kitsoz spirituel​—l’etude personnel, assisté reunion, participe dan predication ek aide lezot dan congregation​—sa inn faire moi vinn pli proche avek Jéhovah ek inn protege mo leker.”​—Prov. 4:23.

PA BAISSE LÉ-BRAS!

17, 18. Couma enn chretien kapav garde l’espoir mem si li pé vive dan enn famille ki pa servi Jéhovah?

¹⁷ Si ou enn chretien fidele ki pé vive dan enn famille ki pa servi Jéhovah, pa baisse lé-bras. Rappel ki “Jéhovah jamais pa pou abandonne so peuple a cause so grand nom.” (1 Sam. 12:22) Li avek ou tant ki ou reste attaché ar Li. (Lire 2 Chroniques 15:2.) Alors, “trouve enn grand plaisir en Jéhovah.” Oui, “mette tou dan la main Jéhovah, [ek] compte lor Li.” (Ps. 37:4, 5) “Perseveré dan la priere,” ek ena la foi ki ou Papa ki dan le ciel kapav aide ou pou endure tou sorte qualité difficulté.​—Rom. 12:12.

¹⁸ Demann Jéhovah so l’esprit saint pou aide ou favorise la paix dan ou famille. (Héb. 12:14) Oui, li possible ki nou favorise bann condition kot ena la paix ki avek le temps kapav touche leker bann membre nou famille ki pa pé servi Jéhovah. Si ou contigne “faire tou pou la gloire Bondié,” ou pou heureux ek ou pou senti-ou plus en paix avek ou-mem. (1 Cor. 10:31) A mesure ki ou pé faire tou sa bann zeffort-la, ou kapav aussi sur ki ou bann frere ek soeur dan congregation pou soutenir ou.

[Notes]

[Zimage page 30]

Choisir enn bon moment pou explik ou croyance

[Zimage page 31]

Interesse-ou ar bann conjoint ki pa servi Jéhovah