Anou aprann ar Parole Bondié

Sa lartik-la examine bann question ki kitfois ou finn deja demann-ou-mem ek li montré kot-sa ou kapav trouve bann reponse dan ou la Bible. Bann Témoins de Jéhovah pou bien content pou examine sa bann reponse-la avek ou.

1. Eski tou religion bon?

Dan beaucoup religion ena bann dimoune sincere ki envie faire Bondié plaisir. Bondié trouve sa bann dimoune-la ek Li interessé ar zot. Mais li triste ki certain dimoune finn servi religion pou faire bann mauvais kitsoz. Dan le passé, bann chef religieux ti mem persecute zot bann l’ennemi. (2 Corinthiens 4:3, 4; 11:13-15) Zordi, dapré bann reportage ki bann journaliste faire, certain chef religieux finn encourage terrorisme ou-soit finn soutenir la guerre, ou-soit zot finn impliké dan bann agression sexuel lor bann zenfant.​—Lire Matthieu 24:3-5, 11, 12.

La Bible enseigné ki ena deux qualité religion​—vrai religion ek fausse religion. Fausse religion pa enseigne la verité lor Bondié. Mais selman, Jéhovah envie ki bann dimoune konn la verité lor Li.​—Lire 1 Timothée 2:3-5.

2. Ki bon nouvelle ena lor la religion?

Bondié pa envie ki bann dimoune laisse-zot embeté par bann religion ki pretann content Li mais ki pa enseigne la verité lor Li. En realité, bann dimoune ki frequente sa bann religion-la content pou vinn camarade avek le monde ki pé dirigé par Satan le Diable. (Jacques 4:4; 1 Jean 5:19) Parole Bondié decrire bann religion ki soutenir bann gouvernement humain au lieu ki Bondié, couma enn prostitué. La Bible appel sa prostitué-la “Babylone la Grande,” dapré nom enn ancien la ville, Babylone, kot fausse religion ti commencé apré deluge dan lepok Noé. Bientot, enn sel coute Bondié pou detruire bann religion ki pé trompe ek ki pé domine bann dimoune.​—Lire Révélation 17:1, 2, 5, 17; 18:8, 23, 24.

3. Couma Bondié pou amenn la joie partout lor la terre?

Jugement ki fausse religion pou koné bientot, c’est enn bon nouvelle. Zordi bann dimoune pé souffert parski lezot pé faire dominere ar zot. Bondié pou soulage tou sa bann dimoune-la. Fausse religion jamais pa pou ré-embete ek ré-divise l’humanité encore. Tou dimoune lor la terre pou uni ensam pou adore sel vrai Bondié.​—Lire Isaïe 11:9; Révélation 18:20, 21; 21:3, 4.

4. Ki bann dimoune sincere bizin faire?

Jéhovah pa’nn blié bann dimoune sincere ki dan different fausse religion partout lor la terre. Zordi, Li pé rassemblé zot ek pé enseigne zot la verité pou zot servi Li dan l’unité.​—Lire Mika 4:2, 5.

Jéhovah accueillir dan so famille bann dimoune ki envie servi Li. Mem si nou bann camarade ek nou bann famille pa content kan nou commence servi Jéhovah, nou pou gagne beaucoup bienfait. Par exemple, nou gagne l’amitié Bondié, enn nouveau “famille” ki bien content nou ek l’espoir pou gagne la vie eternel.​—Lire Marc 10:29, 30; 2 Corinthiens 6:17, 18.

Pou gagne plus renseignement, guette chapitre 15 ek 16 dan livre Ki la Bible enseigné vrai-mem?, publié par bann Témoins de Jéhovah.

[Origine zimage page 26]

The Complete Encyclopedia of Illustration/J. G. Heck